Tuladenyo Dagiti Matalek nga Anghel

1-2. (a) Ania ti nakaidumaantayo kadagiti anghel? (b) Ania ti pagpapadaantayo kadagiti anghel?

IDI inyasidegnaka ni Jehova iti kinapudno, inawisnaka nga agbalin a paset ti naayat a pamiliana a buklen dagiti agdaydayaw kenkuana iti intero a lubong ken ti minilion a matalek nga anghel idiay langit. (Dan. 7:​9, 10) No dagiti anghel ti pagsasaritaantayo, mabalin a masansan a mapanunottayo ti nakaidumaantayo kadakuada. Kas pagarigan, sakbay pay a naparsua dagiti tattao, nabayagen nga adda dagiti anghel. (Job 38:​4, 7) Nabilbilegda ngem datayo. Nasantuan ken perpektoda, idinto ta saantayo a perpekto.—Luc. 9:26.

² Ngem uray no adu dagiti nakaidumaantayo, adu met ti pagpapadaantayo kadagiti anghel. Kas pagarigan, kas kadakuada, matuladtayo dagiti nagsasayaat a kualidad ni Jehova ken adda wayawayatayo nga agpili. Kas met la kadatayo, adda personal a naganda, agduduma ti personalidadda, ken nadumaduma ti responsabilidadda. Agpapadatayo met a masapul nga agdaydayaw iti Namarsua kadatayo.—1 Ped. 1:12.

3. Ania ti masursurotayo kadagiti matalek nga anghel?

³ Gapu ta adu ti pagpapadaantayo kadagiti anghel, maparegtatayo iti nasayaat nga ulidanda ken adu ti nasayaat a masursurotayo kadakuada. Iti daytoy nga artikulo, pagsasaritaantayo no kasanotayo a matulad ti kinapakumbaba dagiti matalek nga anghel, ti ayatda kadagiti tattao, ti panagibturda, ken ti panangikagumaanda a pagtalinaeden a nadalus ti kongregasion.

NAPAKUMBABA DAGITI ANGHEL

4. (a) Kasano nga ipakpakita dagiti anghel ti kinapakumbabada? (b) Apay a napakumbaba dagiti anghel? (Salmo 89:7)

⁴ Napakumbaba dagiti matalek nga anghel. Tungtungpalenda dagiti instruksion ni Jehova uray no eksperiensiado, mannakabalin, ken masiribda. (Sal. 103:20) Bayat nga ar-aramidenda dagiti annongenda, saanda nga ipangas ti maar-aramidanda wenno usaren ti pannakabalinda tapno maipaay kadakuada ti pammadayaw. Naragsakda a mangar-aramid iti pagayatan ni Jehova uray no saan a maammuan ti dadduma ti naganda.a (Gen. 32:​24, 29; 2 Ar. 19:35) Saanda nga awaten ti aniaman a pammadayaw a para laeng ken Jehova. Apay a nakapakpakumbaba dagiti anghel? Gapu ta ay-ayatenda ni Jehova ken nauneg ti panagraemda kenkuana.—Basaen ti Salmo 89:7.

5. Kasano nga impakita ti maysa nga anghel ti kinapakumbabana idi inlintegna ni apostol Juan? (Kitaen met ti ladawan.)

⁵ Kitaentayo ti maysa a pasamak a mangipakita iti kinapakumbaba dagiti anghel. Idi agarup 96 C.E., adda anghel a saan a nainaganan a nangipakaammo iti nakaskasdaaw a sirmata ken apostol Juan. (Apoc. 1:1) Ania ti reaksion ni Juan idi nakitana dayta a sirmata? Nagruknoy iti anghel tapno idaydayawna. Ngem dagus a linapdan isuna dayta a matalek nga espiritu a parsua, sa imbagana: “Agannadka! Dimo aramiden dayta! Maysaak laeng nga adipen a kas kenka ken kas kadagiti kakabsatmo . . . Agdaydayawka iti Dios!” (Apoc. 19:10) Talaga a nakapakpakumbaba dayta nga anghel! Saanna a kayat ti maidaydayaw. Dagus nga imbaga ti anghel ken Juan a ni Jehova ti masapul a daydayawenna. Ngem saan met a nababa ti panagkita ti anghel ken Juan. Uray no nabayagen nga agserserbi ti anghel ken Jehova ken talaga a nabilbileg ngem ni Juan, sipapakumbaba nga inawaganna ti apostol kas ti padana nga adipen. Ken uray no masapul nga ilintegna ti lakayen nga apostol, saanna nga inungtan wenno pinabainan. Nasingpet ketdi ti pannakisarita ti anghel. Mabalin a naawatan ti anghel a naaramid dayta ni Juan gapu iti panagamangana.

6. Kasanotayo a matulad ti kinapakumbaba dagiti anghel?

⁶ Kasanotayo a matulad ti kinapakumbaba dagiti anghel? No ar-aramidentayo dagiti annongentayo, saantayo met a pagpangas dagita wenno saantayo nga iturong ti pammadayaw iti bagitayo gapu kadagiti maar-aramidantayo. (1 Cor. 4:7) Maysa pay, saantayo nga ipapan a nangatngatotayo ngem iti dadduma gapu laeng ta nabaybayagtayon nga agserserbi ken Jehova wenno gapu ta adda dagiti naisangsangayan a pribilehiotayo. Kinapudnona, no ad-adu dagiti responsabilidadtayo, lallalo koma a matmatantayo ti bagitayo kas nanumnumo wenno nababbaba. (Luc. 9:48) Kas kadagiti anghel, kayattayo ti agserbi iti dadduma. Saantayo a kayat nga itan-ok ti bagitayo.

7. Kasanotayo a maipakita ti kinapakumbaba no adda ilinteg wenno balakadantayo?

⁷ Maipakitatayo met ti kinapakumbaba no adda masapul nga ilinteg wenno balakadantayo—kapammatiantayo man wenno anaktayo. No mangbalakadtayo, baka masapul nga agbalintayo a prangka. Ngem kas iti anghel a nangilinteg ken Juan, agbalintayo a prangka ngem saan koma a mapabainan wenno maupay ti balbalakadantayo. No saantayo nga ibilang ti bagitayo a nangatngato ngem iti dadduma, makaipaaytayo iti balakad a naibatay iti Biblia iti nadayaw ken naayat a pamay-an.—Col. 4:6.

AY-AYATEN DAGITI ANGHEL DAGITI TATTAO

8. (a) Sigun iti Lucas 15:​10, kasano nga ipakpakita dagiti anghel ti ayatda kadagiti tattao? (b) Ania ti papel dagiti anghel iti trabahotayo a panangasaba? (Kitaen met ti ladawan.)

⁸ Saan nga adayo ti rikna dagiti anghel kadagiti tattao gapu ta ay-ayatenda ida. Maragragsakanda no agbabawi ti maysa a managbasol—kayatna a sawen, no agsubli ken Jehova ti maysa a napukaw a karnero wenno no agbalbaliw ti maysa ken awatenna ti kinapudno. (Basaen ti Lucas 15:10.) Aktibo met dagiti anghel a makiramraman iti trabaho a panangikasaba iti Pagarian. (Apoc. 14:6) Uray no saanda a direkta a mangasaba kadagiti tattao, mabalin a maigiyadatayo a mapan iti maysa a mayat a mangammo maipapan ken Jehova. Siempre, saantayo a maibaga a dagiti anghel ti kanayon a timmulong kadatayo a nangbirok iti maysa nga interesado. Ngamin, adda pay dagiti us-usaren ni Jehova, kas iti nasantuan nga espirituna, tapno tumulong kadagiti tattao wenno mangigiya kadagiti adipenna. (Ara. 16:​6, 7) Ngem masansan latta nga us-usarenna dagiti anghel a tumulong kadatayo iti panangasaba. Isu a no ipakpakaammotayo ti naimbag a damag, masiguradotayo nga adda dagiti anghel a tumulong kadatayo.—Kitaen ti kahon a “Nasungbatan Dagiti Kararagda.”b

9. Kasanotayo a matulad ti panagayat dagiti anghel kadagiti tattao?

⁹ Kasanotayo a matulad ti panagayat dagiti anghel kadagiti tattao? No naipakaammo a naisublin ti maysa a naikkat iti kongregasion, agragsaktayo a kas kadagiti anghel. Mabalintayo nga abrasaen ken ipasigurado kenkuana ti ayattayo. (Luc. 15:​4-7; 2 Cor. 2:​6-8) Mabalintayo met a tuladen dagiti anghel babaen ti panangaramidtayo iti amin a kabaelantayo a mangasaba. (Ecl. 11:6) Ken no kasano a tultulongandatayo dagiti anghel iti panangipakaammotayo iti naimbag a damag, mangpanunottayo met koma kadagiti pamay-an no kasanotayo a tulongan dagiti kakabsat iti ministerio. Kas pagarigan, mabalintayo kadi nga iyurnos a kaduaen ti maysa a kabbaro iti ministerio? Mabalintayo kadi a tulongan dagiti nataengan wenno masakit tapno adda latta maaramidanda iti ministerio?

10. Ania ti masursurotayo iti kapadasan ni Sara?

¹⁰ Ngem kasano ngay no limitadon ti maaramidantayo gapu iti kasasaadtayo? Adda latta maaramidantayo tapno makitinnulongtayo kadagiti anghel iti trabaho a panangasaba. Kitaentayo ti kapadasan ni Sarac a maysa a sister idiay India. Agarup 20 a tawenen a payunir idi nagsakit ken naidalit iti pagiddaan. Natural laeng a naladingitan unay. Ngem gapu iti naayat a tulong dagiti kakabsat, agraman ti regular a panagbasana iti Biblia, in-inut a nagsubli ti positibo a panagpampanunotna. Siempre, masapulen nga ag-adjust iti baro a kasasaadna. Gapu ta saan man la a makatugaw tapno makapag-letter writing, mangaskasaba laengen babaen ti telepono. Isu a tinawaganna dagiti dati a sarsarungkaranna. Imbagada met a tawaganna dagiti am-ammoda a posible nga interesado nga agadal iti Biblia. Ania ti resultana? Iti sumagmamano a bulan, naaddaan ni Sara iti 70 nga iyad-adalan iti Biblia. Ngem saanna a kaya nga iyadalan amin ida! Isu nga intedna ti dadduma kadagiti kakongregasionna. Adu kadagita a mayad-adalan ti makigimgimongen. Anian a ragsak dagiti anghel a makipagtrabtrabaho kadagiti kakabsat a kas ken Sara, a mangar-aramid iti amin a kabaelanda a mangasaba!

AGIB-IBTUR DAGITI ANGHEL

11. Kasano nga ipakpakita dagiti matalek nga anghel ti naisangsangayan a panagibtur?

¹¹ Dagiti matalek nga anghel ket nagsayaat nga ulidan iti panagibtur. Rinibun a tawen nga ib-ibturan ti tunggal maysa kadakuada ti kinaawan hustisia ken kinadakes nga an-anusan ni Jehova. Nakitada ti panagrebelde ni Satanas ken ti adu nga anghel, a dati a kakaduada nga agserserbi ken Jehova. (Gen. 3:1; 6:​1, 2; Jud. 6) Dinakamat ti Biblia ti maysa a matalek nga anghel a direkta a linapdan wenno binusor ti maysa a nabileg a demonio. (Dan. 10:13) Kasta met nga iti intero a pakasaritaan ti tao, nakita dagiti anghel a bassit laeng a bilang dagiti tattao ti agtultuloy iti pudno a panagdaydayaw. Iti laksid amin dagita, naragsak ken naregta latta nga agserserbi ken Jehova dagita a matalek nga anghel. Ammoda nga iti umiso a tiempo, ikkatento ti Dios ti amin a kinaawan hustisia.

12. Ania ti makatulong kadatayo nga agibtur?

¹² Kasanotayo a matulad ti panagibtur dagiti anghel? Kas kadakuada, baka makitkitatayo ti kinaawan hustisia ken adda dagiti bumusbusor kadatayo. Ngem kas kadagiti anghel, agtalektayo nga iti umiso a tiempo, ikkatento ti Dios ti amin a kinadakes. Tuladentayo dagiti matalek nga anghel, ken “ditay koma sumuko nga agaramid iti nasayaat.” (Gal. 6:9) Inkari met ti Dios a tulongannatayo nga agibtur. (1 Cor. 10:13) Mabalintayo a kiddawen ken Jehova nga ipaayna ti espirituna a tumulong kadatayo nga agbalin a naanus ken naragsak. (Gal. 5:22; Col. 1:11) Ania ngay ti aramidem no maipaspasangoka iti ibubusor? Naan-anay nga agtalekka ken Jehova ken dika agbuteng. Kanayon a tulongan ken papigsaennaka ni Jehova.—Heb. 13:6.

TUMULTULONG DAGITI ANGHEL TAPNO AGTALINAED A NADALUS TI KONGREGASION

13. Ania ti espesial nga annongen dagiti anghel bayat ti maudi nga al-aldaw? (Mateo 13:​47-49)

¹³ Bayat ti maudi nga al-aldaw, inikkan ni Jehova dagiti anghel iti espesial nga annongen. (Basaen ti Mateo 13:​47-49.) Gapu iti panangasabatayo, minilion a tattao iti intero a lubong ti nagbalin nga interesado iti naimbag a damag. Nagbalbaliw ti dadduma kadakuada ken nagbalinda a pudno a Kristiano, ngem saan a kasta ti ar-aramiden ti dadduma. Naikkan dagiti anghel iti annongen a ‘paglasinen dagiti dakes ken nalinteg a tattao.’ Kayat a sawen dayta a tumultulongda tapno agtalinaed a nadalus ti kongregasion. Saan a kayat a sawen dayta a ti asinoman a simmardeng a nakitimpuyog kadatayo gapu iti aniaman a rason ket saanen a pulos a makapagsubli. Dina met kaipapanan nga awanen a pulos ti tumaud a problema iti kongregasion. Ngem masiguradotayo nga ikagkagumaan dagiti anghel ti tumulong tapno agtalinaed a nadalus dagiti kongregasion.

14-15. Kasanotayo a matulad ti pannakaseknan dagiti anghel nga agtalinaed a nadalus ti kongregasion iti moral ken naespirituan? (Kitaen met dagiti ladawan.)

¹⁴ Kasanotayo a matulad ti pannakaseknan dagiti anghel nga agtalinaed a nadalus ti kongregasion? Masapul nga ikagumaantayo a salakniban ti relasiontayo ken Jehova. Aramidentayo dayta babaen ti panangpilitayo kadagiti gagayyem a mangay-ayat kenkuana, ken ti saantayo a panagaramid iti aniaman a mabalin a mangdadael iti pannakigayyemtayo iti Dios. Iti kasta, makatulongtayo tapno agtalinaed a nadalus ti kongregasion iti moral ken naespirituan. (Sal. 101:3) Mabalintayo met a tulongan dagiti kapammatiantayo tapno agtultuloyda a matalek ken Jehova. Kas pagarigan, ania ti masapul nga aramidentayo no naammuantayo a nakaaramid ti maysa a kapammatiantayo iti nadagsen a basol? Gapu iti ayattayo kenkuana, paregtaentayo a makisarita kadagiti panglakayen. No dina kayat, datayon ti mangibaga kadagiti panglakayen. Kayattayo a dagus a tulongan ti kabsattayo a masakit iti naespirituan!—Sant. 5:​14, 15.

¹⁵ Nakalkaldaang ta masapul a maikkat iti kongregasion ti dadduma a nakaaramid iti nadagsen a basol. No mapasamak dayta, ‘isardengtayo ti makikadua’ kadakuada.d (1 Cor. 5:​9-13) Makatulong dayta nga urnos tapno agtalinaed a nadalus ti kongregasion. No ditay makilangen kadagiti naikkat, ipakpakitaantayo ida iti kinaimbag. Gapu iti dayta, mabalin a makapagpampanunotda ken agsublida ken Jehova. Ket no aramidendanto dayta, makipagragsaktayo ken Jehova ken kadagiti anghelna.—Luc. 15:7.

16. Ania dagiti pamay-an a matuladmo dagiti anghel?

¹⁶ Nagdakkel a pribilehio ti panangipalubos ni Jehova a makasursurotayo kadagiti anghel ken makipagtrabaho kadakuada! Tuladentayo ngarud dagiti nagsayaat a kualidadda: ti kinapakumbabada, ti ayatda kadagiti tattao, ti panagibturda, ken ti pannakaseknanda iti moral ken naespirituan a kinadalus ti kongregasion. No tuladentayo dagiti matalek nga anghel, agbalintayo met a paset ti pamilia ni Jehova nga agdaydayaw kenkuana iti agnanayon.