Kasano Kapateg Kadatayo ti Nagan ni Jehova?

1-2. Kasanotayo nga ammo a nakapatpateg ken Jesus ti nagan ni Jehova?

TI NAGAN ni Jehova ti kapatgan ken Jesus. Isu ti kangrunaan a nangipakaammo iti nagan ti Amana. Kas iti naammuantayo iti napalabas nga artikulo, situtulok a natay ni Jesus tapno paneknekanna a nasantuan ni Jehova ken umiso ti amin nga ar-aramidenna. (Mar. 14:36; Heb. 10:​7-9) Ken kalpasan ti Sangaribu a Tawen a Panagturay ni Jesus, situtulok nga isublinanto ti amin nga autoridad iti Amana ta kayatna a maiturong ti amin a dayaw ken Jehova. (1 Cor. 15:​26-28) Amin nga inaramid ni Jesus paneknekanna nga ay-ayatenna unay ni Jehova.

² Immay ni Jesus ditoy daga iti nagan ni Amana. (Juan 5:43; 12:13) Impakaammona ti nagan ni Amana kadagiti pasurotna. (Juan 17:​6, 26) Idi insurona dagiti tattao ken nagaramid kadagiti milagro, impakaammona a ni Jehova ti nangipaay iti sirib ken pannakabalin a mangaramid kadagita. (Juan 10:25) Ken idi inkararagna ken Jehova nga aywananna dagiti adalanna, kiniddawna dayta ‘maigapu iti nagan’ ni Amana. (Juan 17:11) Nalawag ngarud a ti nagan ti Dios ti kapatgan ken Jesus. Isu a kasano koma a maibaga ti maysa nga isu ket pudno a pasurot ni Kristo no dina man la ammo wenno us-usaren ti nagan ni Amana?

3. Ania ti pagsasaritaantayo iti daytoy nga artikulo?

³ Kas pudno a Kristiano, tultuladentayo ni Jesus. Ipatpategtayo met ti nagan ni Amana. (1 Ped. 2:21) Iti daytoy nga artikulo, kitaentayo no apay nga inted ni Jehova ti naganna kadagidiay mangikaskasaba iti “naimbag a damag maipapan iti Pagarian.” (Mat. 24:14) Pagsasaritaantayo met no kasano koma kapateg ti nagan ni Jehova iti tunggal maysa kadatayo.

“ILI A MAIPAAY ITI NAGANNA”

4. (a) Ania ti imbilin ni Jesus kadagiti adalanna sakbay a nagsubli idiay langit? (b) Ania a saludsod ti pagsasaritaantayo maipapan iti dayta a bilin?

⁴ Sakbay unay a nagsubli ni Jesus idiay langit, imbagana kadagiti adalanna: “Umawatkayto iti pannakabalin inton umay kadakayo ti nasantuan nga espiritu, ket dakayonto dagiti saksik idiay Jerusalem, iti intero a Judea ken Samaria, ken agingga iti kaadaywan a paset ti daga.” (Ara. 1:8) Isu a saan laeng nga idiay Israel a maikaskasaba ti naimbag a damag no di ket iti sadinoman. Inton agangay, addanto ngarud gundaway ti amin a tattao iti intero a lubong nga agbalin a pasurot ni Jesus. (Mat. 28:​19, 20) Ngem imbaga ni Jesus: “Dakayonto dagiti saksik.” Kaipapanan kadi dayta a dagita a baro nga adalan ket masapul laeng nga agbalin a Saksi ni Jesus wenno masapul nga ammuenda ti nagan ni Jehova ken agbalinda a Saksina? Makatulong dagiti pasamak a nadakamat iti Aramid kapitulo 15 tapno masungbatan dayta a saludsod.

5. Kasano nga impakita dagiti apostol ken panglakayen iti Jerusalem a masapul a maammuan ti amin a tattao ti nagan ni Jehova? (Kitaen met ti ladawan.)

⁵ Idi 49 C.E., nagtataripnong dagiti apostol ken panglakayen iti Jerusalem tapno pagsasaritaanda ti masapul nga aramiden dagiti di nakugit a Gentil tapno makualipikarda nga agbalin a Kristiano. Kalpasan ti panagsasaritada, imbaga ni Santiago a kabsat iti ina ni Jesus: “Insalaysay a naimbag ni [Pedro] no kasano nga inawat ti Dios dagiti tattao kadagiti nasion iti umuna a gundaway tapno mangpili iti ili a maipaay iti naganna.” Makinnagan ti tuktukoyen ni Santiago? Kinotarna ti imbaga ni propeta Amos. Kinunana: “Tapno dagidiay mabati kadagitoy a tattao sipapasnek a birokenda ni Jehova, agraman dagiti tattao iti amin a nasion, dagidiay maawagan iti naganko, kuna ni Jehova.” (Ara. 15:​14-18) Saan la ngarud a masapul nga ammuen dagiti baro nga adalan ti maipapan ken Jehova no di ket ‘maawaganda met iti naganna.’ Kayatna a sawen nga ipakaammoda ti nagan ti Dios ken dayta a nagan ti agbalin a pakabigbiganda.

6-7. (a) Apay nga immay ni Jesus ditoy daga? (b) Ania pay ti napatpateg a rason nga inaramidna dayta?

⁶ Ti kaipapanan ti nagan ni Jesus ket “Ni Jehova ti Mangisalakan.” Inusar ni Jehova ni Jesus a mangisalakan iti amin a tattao a mangipakita iti pammati kenkuana ken iti Anakna. Immay ni Jesus ditoy daga tapno ipaayna ti biagna para kadagiti tattao. (Mat. 20:28) Gapu iti subbot, posiblen a maisalakan dagiti tattao ken agbiagda iti agnanayon.—Juan 3:16.

⁷ Ngem apay ngamin a masapul a maisalakan dagiti tattao? Gapu iti napasamak idiay hardin ti Eden. Kas nadakamat iti napalabas nga artikulo, ti immuna a nagannaktayo a da Adan ken Eva ket nagrebelde ken Jehova. Isu a napukawda ti namnamada nga agbiag nga agnanayon. (Gen. 3:​6, 24) Ngem adda pay ti napatpateg a rason nga immay ni Jesus ditoy daga ngem iti panangisalakanna kadagiti managbasol a tattao. Napadpadakes ngamin ti nagan ni Jehova. (Gen. 3:​4, 5) No kasta, ti pannakaisalakan ti amin a kaputotan da Adan ken Eva ket konektado iti dakdakkel nga isyu—ti pannakasantipikar ti nagan ni Jehova. Ni Jesus ti maikari unay a mangpaneknek iti dayta gapu ta isu ti pannakabagi ni Jehova ken perpekto ti amin nga inaramidna tapno masantipikar ti nagan ni Jehova.

8. Ania ti masapul a bigbigen ti amin a mangipakita iti pammati ken Jesus?

⁸ Amin a mangipakita iti pammati ken Jesus, Judio man wenno saan, masapul a bigbigenda a ti Gubuayan ti pannakaisalakanda ket ni Jehova a Dios, ti Ama ni Jesus. (Juan 17:3) Kanayonanna, kas ken Jesus, masapul a maawaganda iti nagan ni Jehova. Masapul met a bigbigenda ti kinapateg ti pannakasantipikar dayta a nagan. Nakadepende iti dayta ti pannakaisalakanda. (Ara. 2:​21, 22) No kasta, amin a matalek a pasurot ni Jesus, masapul nga ammuenda ti maipapan ken Jehova, agraman ken Jesus. Di ngarud pakasdaawan a kastoy ti maudi a paset ti kararag ni Jesus a mabasa iti Juan 17: “Impakaammok kadakuada ti naganmo ken itultuloyko nga ipakaammo, tapno ipakitada ti ayat a kas iti panagayatmo kaniak ken tapno maikaykaysaak kadakuada.”—Juan 17:26.

“DAKAYO DAGITI SAKSIK”

9. Kasanotayo a maipakita a napateg kadatayo ti nagan ni Jehova?

⁹ Amin ngarud a pudno a pasurot ni Jesus ket masapul a santipikarenda ti nagan ni Jehova. (Mat. 6:​9, 10) Masapul nga ibilangtayo a ti nagan ni Jehova ti kapatgan a nagan ken masapul a paneknekantayo dayta iti aramidtayo. Ngem kasanotayo a makipaset iti pannakasantipikar ti nagan ni Jehova wenno iti pannakadalus dayta kadagiti pammadakes ni Satanas?

10. Ania a simboliko a kaso iti korte ti nailadawan iti kapitulo 42 agingga iti 44 ti libro nga Isaias? (Isaias 43:9; 44:​7-9) (Kitaen met ti ladawan.)

¹⁰ Ti kinapateg ti papeltayo iti pannakasantipikar ti nagan ni Jehova ket naitampok iti kapitulo 42 agingga iti 44 ti libro nga Isaias. Sigun kadagita a kapitulo, adda nailadawan a simboliko a kaso iti korte a ti isyu ket maipapan iti kinadios. Kidkiddawen ni Jehova kadagiti amin a saan nga agdaydayaw kenkuana a paneknekanda a sibibiag dagiti diosda. Kidkiddawenna met no adda asinoman nga agtestigo a mangpaneknek a talaga a sibibiag dagita a dios. Ngem awan met ngarud ti makapaneknek!—Basaen ti Isaias 43:9; 44:​7-9.

11. Ania ti imbaga ni Jehova iti ilina kas mabasa iti Isaias 43:​10-12?

¹¹ Basaen ti Isaias 43:​10-12. Imbaga ni Jehova iti ilina: “Dakayo dagiti saksik, . . . ket siak ti Dios.” Kidkiddawen ni Jehova kadakuada a sungbatanda daytoy a saludsod: “Adda kadi Dios malaksid kaniak?” (Isa. 44:8) Pribilehiotayo ngarud a sungbatan dayta a saludsod. Babaen kadagiti sasao ken aramidtayo, paneknekantayo a ni laeng Jehova ti pudno a Dios. Ti naganna ti kapatgan iti amin a nagan. Paneknekantayo iti intero a panagbiagtayo a talaga nga ay-ayatentayo ni Jehova ken napudnotayo kenkuana—aniaman a rigat ti mapasarantayo gapu ken Satanas. No aramidentayo dayta, adda gundawaytayo a makatulong iti pannakasantipikar ti naganna.

12. Kasano a natungpal ti padto iti Isaias 40:​3, 5?

¹² Impadto met ni Isaias nga adda umun-una a ‘mangdalus [wenno, ‘mangisagana,’ ftn.] iti dalan ni Jehova.’ (Isa. 40:3) Kasano a natungpal dayta? Insagana ni Juan a Mammautisar ti dalan para ken Jesus, nga immay ken nagsao iti nagan ni Jehova. (Mat. 3:3; Mar. 1:​2-4; Luc. 3:​3-6) Imbaga ti isu met la a padto: “Maipalgakto ti dayag ni Jehova.” (Isa. 40:5) Kasano a napasamak dayta? Idi immay ni Jesus ditoy daga, perpekto nga inrepresentarna ni Jehova a kas man la ni Jehova a mismo ti immay ditoy daga.—Juan 12:45.

13. Kasanotayo a matulad ni Jesus?

¹³ No makipasettayo iti pannakasantipikar ti nagan wenno reputasion ni Jehova, tultuladentayo ni Jesu-Kristo. Kas ken Jesus, datayo dagiti Saksi ni Jehova. Awit-awittayo ti nagan ni Jehova ken ipakpakaammotayo ti maipapan kadagiti nagsayaat nga aramidna. Ngem tapno epektibo ti panangaramidtayo iti dayta, masapul met nga ipakaammotayo ti nagpateg a papel ni Jesus iti pannakasantipikar ti nagan ni Jehova. (Ara. 1:8) Ni Jesus ti kangrunaan a Saksi ni Jehova ket tultuladentayo ti ulidanna. (Apoc. 1:5) Ngem ania pay ti aramidentayo tapno maipakitatayo a napateg kadatayo ti nagan ni Jehova?

NO KASANO KAPATEG KADATAYO TI NAGAN NI JEHOVA

14. Kas ipakita ti Salmo 105:​3, ania ti panagriknatayo iti nagan ni Jehova?

¹⁴ Ipagpannakkeltayo ti nagan ni Jehova. (Basaen ti Salmo 105:3.) Maragsakan unay ni Jehova no ipagpannakkeltayo ti naganna. (Jer. 9:​23, 24; 1 Cor. 1:31; 2 Cor. 10:17) Ti ‘panangipannakkel ken Jehova’ kaipapananna ti panangipasindayagtayo ken Jehova kas ti Diostayo. Ibilangtayo a maysa a pribilehio ti mangidayaw iti naganna ken tumulong iti pannakadalus ti reputasionna. Masapul a ditay pulos ibain nga ipakaammo kadagiti katrabahuan, kaklase, kaarruba, ken dadduma pay a datayo ket Saksi ni Jehova! Kayat ti Diablo nga isardengtayo ti agsao maipapan iti nagan ni Jehova. (Jer. 11:21; Apoc. 12:17) Kinapudnona, ni Satanas ken dagidiay mangiwarwaras iti kinaulbod maipapan ken Jehova, kayatda a malipatan dagiti tattao ti nagan ni Jehova. (Jer. 23:​26, 27) Ngem gapu ta ipatpategtayo ti nagan ni Jehova, kayattayo nga idaydayaw isuna iti “agmalmalem.”—Sal. 5:11; 89:16.

15. Ania ti kaipapanan ti panangawag iti nagan ni Jehova?

¹⁵ Itultuloytayo ti umawag iti nagan ni Jehova. (Joel 2:32; Roma 10:​13, 14) Ti panangawag iti nagan ni Jehova ramanenna saan laeng a ti panangammo ken panangusar iti personal a nagan ti Dios. Am-ammuentayo met ti kinasiasinona, agtalek, agpatulong, ken agpaiwanwantayo kenkuana. (Sal. 20:7; 99:6; 116:4; 145:18) Ipakaammotayo met ti naganna ken dagiti kualidadna ken paregtaentayo dagiti tattao nga agbabawi tapno maparagsakda ni Jehova ken maisalakanda.—Isa. 12:4; Ara. 2:​21, 38.

16. Kasanotayo a mapaneknekan nga ulbod ni Satanas?

¹⁶ Nakasaganatayo nga agsagaba para iti nagan ni Jehova. (Sant. 5:​10, 11) No agtalinaedtayo a napudno ken Jehova uray no agsagabatayo, mapaneknekantayo nga ulbod ni Satanas. Idi panawen ni Job, imbaga ni Satanas daytoy nga akusasion maipapan kadagiti agserserbi ken Jehova: “Ited ti tao ti amin nga adda kenkuana para iti biagna.” (Job 2:4) Imbaga ni Satanas nga agserbi laeng kano ken Jehova dagiti tattao no nasayaat ti kasasaadda. Ngem no agrigatdan, agsardengdan nga agserbi ken Jehova. Pinaneknekan ti matalek a ni Job nga ulbod dayta nga akusasion. Pribilehiotayo met a paneknekan nga aniaman ti aramiden ni Satanas kadatayo, ditayto pulos tallikudan ni Jehova. Naan-anay a makapagtalektayo nga aywanannatayo ni Jehova maigapu iti naganna.—Juan 17:11.

17. Sigun iti 1 Pedro 2:​12, ania ti sabali pay a pamay-an a maidaydayawtayo ni Jehova?

¹⁷ Ipakitatayo a raraementayo ti nagan ni Jehova. (Prov. 30:9; Jer. 7:​8-11) Gapu ta datayo ket pannakabagi ni Jehova ken awit-awittayo ti naganna, mabalin a maidaydayaw wenno maibabaintayo ti naganna. (Basaen ti 1 Pedro 2:12.) Kayattayo ngarud nga aramiden ti amin a kabaelantayo a mangidaydayaw ken Jehova iti man panagsasao wenno ar-aramidtayo. Iti kasta, maipadayagtayo ti naganna uray no saantayo a perpekto.

18. Ania ti sabali pay a pamay-an a mapaneknekantayo a napateg kadatayo ti nagan ni Jehova? (Kitaen met ti footnote.)

¹⁸ Napatpateg kadatayo ti nagan ni Jehova ngem iti mismo a reputasiontayo. (Sal. 138:2) Apay a nagpateg a kasta? Ngamin, mabalin a padaksendatayo dagiti tattao gapu iti panagayattayo iti nagan ni Jehova.a Idi natay ni Jesus, imbilang dagiti tattao a kriminal. Ngem situtulok ni Jesus a matay iti nakababain a pamay-an tapno laeng maidaydayawna ti nagan ni Jehova. “Saan a nagbain” ken saan a nadanagan iti panunoten ti dadduma maipapan kenkuana. (Heb. 12:​2-4) Nakasentro ti biagna iti panagaramid iti pagayatan ti Dios.—Mat. 26:39.

19. Ania ti panagriknam maipapan iti nagan ni Jehova, ken apay?

¹⁹ Ipagpannakkeltayo ti nagan ni Jehova ken ibilangtayo a dayaw ti maawagan kas dagiti Saksi ni Jehova. Gapu ta nagpateg kadatayo ti nagan ni Jehova, itultuloytayo nga idaydayaw isuna uray no nababa ti panagkita kadatayo ti sabsabali. Napatpateg kadatayo ti nagan ni Jehova ngem iti mismo a reputasiontayo. Isu nga itultuloytayo koma nga idaydayaw ti nagan ni Jehova aniaman ti aramiden kadatayo ni Satanas. Iti kasta, mapaneknekantayo a ti nagan ni Jehova ti kapatgan kadatayo kas iti inaramid ni Jesu-Kristo.