Manipud Managbasatayo

Ti Matmatay a Kabakirantayo

Maay-ayoak unay a makakita a nangilasinkayo iti adu a lugar a maipaay a pakasalaysayan ti kabakiran ken dagiti peggad a sangsanguenna. (Hunio 22, 1987) Dagiti kabakirantayo mabalin a maisalakan laeng no adu nga umuli ti makabigbig iti peggad ket aramidenda ti pasetda iti panangparmek iti dayta. Ti panggep iti foundationmi isu ti panangisuro iti populasion no kasano a nakaron ti panagpeggad ti kabakirantayo ken ti mangibaga kadakuada no ania ti maaramidan ti tunggal indibidual.​—Managing Director, Endangered Forests Foundation.

C. A., Federal Republic of Germany

Pannakibagay kadagiti Kakabsat a Lallaki ken Babbai

Agyamanak Unay iti artikulo nga “Agimtuod dagiti Agtutubo . . . Apay a Nakarigrigat Ti Makibagay kadagiti Kakabsatko?” (Hulio 22, 1987) Kamengak iti pamilia iti siam, ket gagangay nga agririnnamankami iti kuarto. Ti edadko ket 12, ket kakuartok ti kabsatko a lalaki a 5 ti tawenna. Marigatanak nga agibtur iti panangitambakna kadagiti ay-ayamna ken dagiti kawesna iti lugarko iti kuarto. Ti artikuloyo ti nangtulong kaniak a makaawat a nasaysayaat kenkuana. Agsinnungbatkami pay laeng, ngem nagsaritakamin ket nabigbigmi a kasapulan ti dua tapno maaddaan ti pannakipagayam. Agpadakami a managwara nga ubbing, ket agpinnabasolkami iti maysa ken maysa. Ngem itan kitaek ti pagimbaganna ket nasarakak a nalaka a parmeken ti panagriri no agtalinaedka kadagiti prinsipio iti Biblia.

E.H., England

Panagadal iti Kolehio

Naupayak iti kasta unay iti panangiprentayo iti surat iti panid a “Manipud Managbasatayo” maipapan iti panagadal iti kolehio. (Agosto 22, 1987) Uray no dakayo masapul nga aminenyo a ti artikulo a “College Education​—A Preparation for What?” (Enero 8, 1987 nga Awake!) ket saan a nainkalintegan ken adda kilkilinganna, ket ti pangngeddeng a mapan agadal wenno saan iti kolehio ti masapul a maaramid a personal, iti nainkalintegan, ken iti indibidual a pamay-an. Masiguradok a nakaawatkayon kadagiti sursurat ti di panangamong iti dayta nga artikulo. Ammok dagiti adu a nakabasa iti dayta ket pagarupenda a dayta ket akikid ken saan a nainkalintegan a kapanunotan, ngem pulos a dikay nangiprenta kadagiti sasao maipapan iti agduduma a kapanunotan. Itan, innem a bulan kalpasanna, maysa a surat a maysa met nga akikid a kapanunotan ti umanamong iti artikulo ket naiprenta dayta.

T.B., U.S.C., United States

Kinapudnona, agingga iti isasangpet ti suratmo, awan pay dagiti sursurat a di umanamong iti artikulo maipapan iti panagadal iti kolehio a naiyeg iti atensionmi. Umanamongkami a ti parikut maipapan iti panagadal iti kolehio wenno saan ket personal ken indibidual a banag. Nupay kasta, mariknami a ti kagudua ti panid nga artikulo, a naibatay kadagiti komento iti mararaem a kolumnista iti pagiwarnak, ket nangiparang kadagiti makalawlawag ken makapagpanunot a kapanunotan. Kas iti kinapateg iti pannakaammo a magun-odan iti kolehio, dayta ti di maipada iti kinasirib a magun-odan babaen iti kapadasan. Ti artikulo pagduaduaanna ti praktikal a kinapateg dagiti dadduma a bambanag a naadal iti kolehio ket nangipaay iti napudno a panangmatmat iti posibilidad iti panangibanagto dagiti estudiante iti kolehio kadagiti namnamada iti masanguanan. Kasta met, namakdaar met maipapan iti panagannad a maibusor iti panangsapul kadagiti namaterialan a kalat. Nalawag, ti kolumnista a naadaw saanna a sinaklaw dagiti amin a paspaset iti tema, ngem pagarupenmi nga iti sumagmamano a napili a sasao, nangaramid kadagiti nakapatpateg a punto a rumbeng nga usigen.​—ED.