Manipud Managbasatayo
Panagliday
Idi damo a nakitak ti magasinyo maipapan iti “Panagliday—Agballigikayo iti Pannakidangadang!” (Oktubre 22, 1987) ti damo a napanunotko ket, ‘Ay, saan! Saan a sabali manen nga artikulo maipapan iti panangpampanunot laeng kadagiti makaparagsak a pampanunot, umisemka, ket mapukawen.’ Naresitaak nga addaan iti S.A.D. (Seasonal Affective Disorder), gapuna idi nakita a nadakamat dayta iti artikulo naragsakanak! Nangnangruna nga agyamanak kadakayo iti sentensia a simmaruno a dagus iti deskripsionna: “Gapuna ti panagliday ket saan a kanayon nga ‘adda iti panunot.’”
J. E. G., Estados Unidos
Edukasion iti Kolehio
Diak umanamong iti artikulo nga “Edukasion iti Kolehio—Panagsagana Maipaay iti Ania?” (Enero 8 1987 nga Awake!) ken kasta met ti surat iti Agosto 22, 1987, a ruar. Am-ammok a personal dagiti agtutubo a nagkolehio, ket addaanda kadagiti makaay-ayo a trabaho ken nabileg a Nakristianuan a panagasawa. Ti biag ket saan laeng a ti panangsuro kadagiti praktikal a bambanag. Bayat ti pannagnatay iti kakaykayuan, panangmatmattay kadagiti bitbituen, panagsuro nga agay-ayam iti tennis, wenno panagbasa iti libro maipapan iti arte, saantay a mangar-aramid kadagiti bambanag a praktikal, no di ket dagiti bambanag a mangpabaknang iti panagbiagtayo iti kasta unay.
A. J. M., Estados Unidos
Ti artikuloyo maipapan iti edukasion iti kolehio ti nangparurod kaniak. Umanamongak iti managbasa a nagkuna a saan a nainkalintegan ken adda panangidumdumana, ken umanamongak met iti sungbatyo. (Nobiembre 8, 1987) Ti kolehio addaan kadagiti pagimbagan ken pagdaksan. Agballigi man ti maysa a tao iti kolehio wenno iti relihiuso nga organisasion ket agpannuray no kasano ti kasayaat ti panangiyaplikarna iti nasursurona.
T. M., Estados Unidos
Umanamongkami nga adu dagiti gunggona a magun-odan manipud iti ad-adu a pannakaammo a mabalin nga ipaay dagiti institusion iti nangatngato a pannakaammo. Maigiddato iti dayta, ditay laklaksiden dagiti gunggona nga inawat ti sosiedad manipud kadagiti lallaki a kas kada Thomas Edison ken Henry Ford, nga adda bassit laeng a pormal nga edukasionna. Dikam konkondenaren a kasta ti makunkuna a nangatngato nga edukasion ket patalgedanmi ti naibagamin idi, a ti ipapan iti kolehio ket adda iti indibidual. Maigiddato iti dayta, mariknami ti panangitudomi kadagiti peggad iti aglawlaw iti kolehio.
Umuna, nupay addada dagiti mailaksid, ti panangiduron iti edukasion iti kolehio kaaduanna ket maibusor iti pammati iti Dios ken maitunos kadagiti pilosopia ti tao.
Maikadua, ti edukasion iti kolehio gagangay nga ipaganetgetna ti panagbalin nga umun-una iti lubong ken ti pananggun-od iti namaterialan a balligi, a maibusor iti balakad ni Jesus ken ni apostol Juan.—Mateo 6:19-21, 25-34; 1 Juan 2:15, 16.
Maikatlo, ti gagangay nga aglawlaw iti kolehio parang-ayenna ti espiritu iti panagwaywayas ken kinalulok, nga agbanag iti seksual nga imoralidad ken ti di umiso a panangusar iti droga a mabalin a narigat a liklikan dagiti agtutubo. Paregtaenmi dagiti agtutubo nga itultuloyda ti manggun-od iti pannakaammo, nangnangruna daydiay masarakan iti Biblia agsipud ta dayta ti mangiturong iti pananggun-od iti biag nga agnanayon. (Juan 17:3) Paregtaenmi met ida a mangsukay kadagiti paglaingan a nasken a mangiturong iti napateg, nabunga a panagbiag nga addaan iti panangipaganetget kadagiti sasao ni Jesus idiay Mateo 6:33, nga itultuloy a biruken nga umuna ti Pagarian ti Dios ken ti kinalintegna.
Ken maikapat, ti tiempo ababan. (Lucas 21:34-36; Efeso 5:15, 16) Dayta ti mabalin a mabusbos a nabungbunga iti panagserbi iti Namarsuatayo.—ED.