Ti “Yellowstone,” Umuna a Nasional a Parke
Ti kaddaanan, kadadakkelan, ken ti kalalatakan a nasional a parke idiay Estados Unidos. Masarakan a nangnangruna idiay Wyoming ken naipasdek idi 1872, dayta saklawenna ti 900,000 a hektaria ken sarsarungkaran ti nasurok a dua a milion a tattao iti tinawen. Dagiti nagsikkosikko a kabambantayan, dagiti nauuneg a nasupit a gingginget, dagiti dumaranudor a dissuor, ken dagiti nalilitnaw a danaw, dagiti kankanayon a naberde a kabakiran, ken dagiti nalalasbang a tantanap—maysa a nakatantan-ok a pagnaedan ti uso, elk, ken ti bison nga agpasiar iti aglawlawna ken dagiti agila, swans, ken dagiti pelicans a mangtaripato ti pamiliada sadiay.
Ti Yellowstone nagun-odanna ti kaaduan iti kinalatakna manipud kadagiti rinibribo a napudot nga ubbog ken ginasgasut a napudot a baresbes—a ti kangrunaan kadakuada isu ti “Old Faithful,” a naipakita ditoy. Dayta ti pumsuak iti promedio a maminsan iti tunggal 65 minutos, ngem iti nabiit pay a tawtawen mammanon a pumsuak a kasta.
Ti “DEVIL’S TOWER,” Umuna a Nasional a Monumento
Ti Wyoming immuna met nga addaan iti nasional a monumento. Kas iti itsura iti maysa a dakkel, timmangkenen a puon ti kayo, ti “Devil’s Tower” ti naiwaragawag a kasta idi 1906. Maikuna a nagtaud iti maysa a bulkan, dayta ti tumangkayag iti 264 metros iti langit. Kunaen dagiti geologo a dayta ti nabati iti panagbettak iti maysa a bulkan. Bayat ti panaglabas ti tiempo, dayta ti nagreggaay a nangporma iti agdama nga itsurana.
Kunaen ti leyenda dagiti Indian a pito nga ubbing a babbai ti kinamat dagiti uso ket nagkamangda iti maysa a nababa a bato, ket tapno isalakan ida, dagiti didios ti nangpatayag kadagiti batbato a nakangatngato iti langit. Dagiti ubbing a babbai, kuna ti leyenda, ti makita pay laeng a kas dagiti pito a bitbituen, ti Pleiades. Dagiti nakapungtot nga uso kinaramutanda dagiti sikigan ti bato iti awan mamaayna a panangikagumaanda a manggaw-at kadakuada—dagiti marka ti kuko ti makitkita pay laeng a kas dagiti atitiddog a nauuneg a gulis iti sikigan ti torre.
Dayta ti leyenda. Ngem maysa a banag ti sigurado: Iti likudan ti kinatan-ok ti umuna a nasional a parke ken ti umuna a nasional a monumento adda ti Namarsuada, ti sibibiag a Dios a ni Jehova: “Daydiay iti bilegna patibkerenna dagiti bambantay.”—Salmo 65:6.