Panangparmek iti Panangidumduma iti Rasa
TI TAGA Sud Africa a ni Isaac Langa napadakkel iti pagilian dagiti negro iti Alexandra, Johannesburg. Gaput’ addaan iti nabileg nga espiritu iti panangidumduma iti rasa, kagurana dagiti puraw ket matmatanna ti nasion a Zulu a natantan-ok ngem dagiti dadduma a negro. Babaen ti itatabuno kadagiti gimgimong nga inyurnos ti ANC (African National Congress), maysa a naparitan a maibusor iti gobierno nga organisasion, nairaman ni Isaac kadagiti derraaw iti Sud Africa idi 1976. Nalagipna: “Adu ti natay a pinaltogan dagiti polis; dadduma ti nagbalinen a baldado iti isuamin a panagbiagda. Bayat ti pannakakitak kadagitoy amin, napataudko ti espiritu ti panagibales. Kayatko ti mangala iti automatiko a paltog ket paltogak dagiti nakaad-adu a kabaelak a paltogan sakbay ti panangpapatayko iti bagik met laeng. Gaput’ diak makasarak iti maysa, inkeddengko a suroten ti ulidan dagiti dadduma a pimmanaw a napan kadagiti kaarruba a pagilian tapno makagun-od iti pannakasanay iti militaria.”
Iti daytoy a narikut a tiempo ni Isaac ti nasabet dagiti Saksi ni Jehova iti panangaskasabada iti balaybalay. Dagiti liblibro a mangilawlawag iti mensahe iti Biblia ti naibati kenkuana, ket ti kangrunaan, Ti Pudpudno a Talna ken Talged—Sadino ti Paggapuanna?, ti naaddaan iti napaut nga impresion. Ilawlawagna: “Itan nasarakakon ti pudno a talna a sapsapulek. Naammuak a kunaen ti Biblia: ‘Ti killo saan a mapalinteg,’ ken: ‘Saan nga agtaud iti tao a magna ti panangiturong kadagiti addangna.’ (Eclesiastes 1:15; Jeremias 10:23) Gapuna nagbalinen a nalawag kaniak a ti pannakidangadangmi ket awan ti mamaayna gapu ta saan a mangiyeg dayta iti talna ditoy daga. Ti laeng Pagarian ti Dios ti mangaramidto iti dayta. (Apocalipsis 11:17, 18) Ti Biblia tinulongannak met a mangbalbaliw iti panangmatmatko kadagiti dadduma a rasa. (Aramid 10:34, 35) Makapabileg-puso ti makaammo a dagiti tattao iti amin a rasa ken tribo ti agbibiagen nga addaan iti namnama a biag nga agnanayon iti paraiso a daga iti sidong ti Pagarian ti Dios.”
Ni Isaac agserserbin a kas amin-tiempo nga agdaldaliasat a ministro, a mangpabpabileg kadagiti kongregasion dagiti Saksi ni Jehova a buklen dagiti adu a nagduduma a nasional a grupo.