Agimtuod dagiti Agtutubo. . .

Dagiti Nakristianuan a Panaggigimong​—Apay Tabunuanyo Ida?

Pinilitdak dagiti dadakkelko a mapan idiay simbaan,” kuna ni Christiaan, maysa nga agtutubo a lalaki idiay pagilian ti Suriname. “Kanayon a kayatko ti napigsa a panagtudo kadagiti agsapa ti Domingo, tapno makapagtalinaedak iti balay. Ngem,” kunana pay a buyogen ti panagisem, “kasla agtudo laeng manipud Lunes agingga iti Sabado.”

“Pulos nga awan ti tiempo a napnekak kadagiti serbisio idiay simbaan. Idi nakakitaak iti gundaway nga agsardeng, innalak a dagus dayta.”

NI Christiaan ket saan a mailaksid. Dagiti klero iti aglikmut iti lubong agsennaayda iti kinakurang ti interes dagiti agtutubo kadagiti relihiuso a serbisio. Kuna ni Simote Vea, maysa a klero manipud iti isla ti Pacifico a Tonga: “Ti bilang dagiti agtutubo a tumabtabuno kadagiti simsimbaan . . . bumasbassit.”

Apay, ngarud, a dagiti kangrunaan nga ig-iglesia saanda a makaawis kadagiti agtutubo? Ni Lorine Tevi, miembro a kameng iti World Council of Churches, aminenna: “Ti nasken unay a kasapulan isu ti edukasion . . . Dagiti ig-iglesia masapul a sursuruenda a ti edukasion iti teolohia masapul a makisarita kadagiti isuamin.”

“Umiso dayta,” umanamong ni Christiaan. “Adu nga agtutubo ti agtarigagay iti nalawag nga edukasion iti Biblia. Nupay kasta, imbes a punnuanda dayta a kasapulan, ti iglesia agtalinaed kadagiti daan a ritual.” Ni Annie, nga agtawen iti 13, kinunana: “Ti simbaan kaipapananna ti adu a panagkanta ngem bassit ti masursuro.” Ti sangapulo ket walo ti tawenna a ni Barbara isennaayna ti kasta met laeng a kinakurang ti edukasion iti iglesia. “Maysa nga aldaw,” linagipna, “ti pastor inikkannak kadagiti drowing ken Jesus a puro linea. Imbagana kaniak a kolorak ida. Dayta ti serbisio!”

Ngarud, awan duadua, nga adu nga agtutubo ti maup-upay kadagiti serbisio iti simbaan. Daytoy kadi kaipapananna, nupay kasta, nga amin a relihiuso a gimgimong ket pagsayangan laeng iti tiempo? Maisupadi ketdi, dagiti agtutubo ditoy a naadaw rinugianda ti nagatender manen kadagiti gimgimong! Ti rason? Nakitada a ti magasin nga U.S. Catholic impadamagna sumagmamano a tawenen ti napalabas: “Aniaman a Kingdom Hall mangitukon iti ad-adu pay . . . nga edukasion iti makabulan ngem ti kaaduan a paruko iti isuamin a tawen.”

Dagiti Kingdom Hall​—Makabang-ar ti Pannakaidumada

Dagiti Kingdom Hall? Wen, dagiti pagigimongan dagiti Saksi ni Jehova, dagiti manangiwaras itoy a magasin. Maysa a surbey a naaramid iti pagilian iti Suriname impakitana nga agarup maysa iti tunggal tallo a tattao a tumabtabuno kadagiti gimgimong sadiay ti adda iti nagbaeten ti edad a 12 ken 20! Pudno met dayta kadagiti adu a dadduma a dagdaga​—adu a bilang dagiti agtutubo ti tumabtabuno kadagiti Kingdom Hall.

Inlawlawag ni Christiaan no apay a dagiti gimgimong sadiay ti nakaawis kenkuana: “Naawisak a makakita no kasano kasansan a mausar ti Biblia. Isuamin a maibaga ti masuportaran manipud iti dayta. Dagiti gimgimong ket kasla eskuelaan!” Kinapudnona, ti Kingdom Hall addaan iti maysa a kurso a lima a linawas a gimgimong a mangsanay kadagiti Kristiano iti panagbasa, panangisuro, ken panangiyaplikar iti Biblia. Masarakanyonto a dagiti gimgimong sadiay ket makabang-ar ti pannakaidumada manipud kadagiti serbisio ti iglesia.

Kaskasdi, adu nga agtutubo ti mabalin nga umadayu gapu iti panangpanunot iti aniaman a kita iti eskuelaan. Uray dagiti dadduma nga agtutubo a pinadakkel dagiti Kristiano a nagannak mabalin a mapukawda ti panangapresiar kadagiti Nakristianuan a gimgimong, nga agrekreklamo a dagitoy ti ‘makabannog,’ ‘nakabaybayag,’ wenno ti panangaramid kadagiti dadduma a bambanag​—kas iti panagbuya iti telebision​—ket ad-adda a makapainteres. Apay, ngarud, a ti maysa a tao mangkissay iti tiempo manipud iti panaglinglingay ken trabaho iti eskuelaan tapno agatender kadagiti Nakristianuan a gimgimong?

Dagiti Gimgimong​—Maysa nga Alikamen iti Panagtalinaed a “Nasalun-at iti Pammati”

Naminsan kinuna ni apostol Pablo a “no awan ti pammati saan a mabalin nga ay-ayuen ti [Dios].” (Hebreo 11:6) Ngarud pinaregtana dagiti Kristiano nga agtalinaed a “nasalun-at iti pammati.” (Tito 2:2) Daytoy kadi a balakad ket maitutop kadagiti agtutubo a tattao itatta? Pudno a kasta! Maysa a 15-años a babai ti nagkuna iti kastoy: “No dadduma pagarupek a dagiti agtutubo addaanda iti karirikutan a tiempo iti panagbiag. Addatayo iti aglawlaw dagiti tattao nga agaramid iti pannakiabig, agtomar iti droga, ken aginum.” Mabalinyo kadi a labanan dagitoy a pudno a makaimpluensia a bambanag babaen ti ‘panangisinayo iti bagiyo’ manipud kadagiti padayo a Kristiano? (Proverbio 18:1) Narigat a kasta.

Ngarud dagiti Nakristianuan a gimgimong punnuanda ti nasken a kasapulan. Tulongandakayo nga agtalinaed a “nasalun-at iti pammati”! Kuna ni Tertulian, maysa a maikadua-siglo a manamati: “Agtataripnongkami nga agbasa iti sagrado a sursurattayo . . . babaen kadagiti sagrado a sasao taraonantayo ti pammatitayo.” Kasta met itatta, dagiti gimgimong kadagiti Kingdom Hall ‘mataraonanda ti pammatiyo’ ken mapabilegdakayo. Awan duadua, ngarud, a dagiti Kristiano nabilinda: “Natibkertayo koma ken di maisin iti panangipudnotayo iti namnamatayo, . . . a ditay baybay-an ti panaggigimongtayo, kas ti aramiden dagiti dadduma.”​—Hebreo 10:23-25, The New English Bïble.

Dagiti Gimgimong​—Makaay-ayo ken Makaawis

Iti daytoy a nakaro ti teknolohiana a panawen, nupay kasta, adu nga agtutubo ti mangkalikagum saan laeng a ti pannakaisuro no di ket tapno malinglingay. Ket aminentayo, dagiti gimgimong iti Kingdom Hall saanda a napipintas a pabuya iti entablado. Daytoy dina kaipapanan, nupay kasta, a ti programa ket saan a makaay-ayo ken saan a makapainteres. Usigenyo: Ania ti mamagbalin a makaay-ayo iti taraon? Saan kadi a ti nasustansia a nadumaduma a taraon, ti makaay-ayo a pannakikadua iti lamisaan, ken ti nainanaan a kasasaad? Bueno, dagiti Nakristianuan a gimgimong pudno a masabetda dagitoy a kasasaad iti panagragsak.

Nasustansia ken Nadumaduma: Dagiti lima a gimgimong mangipaayda iti natimbeng a naespirituan a taraon​—manipud balakad maipapan iti biag ti pamilia agingga iti panagadal kadagiti padpadto. Nadumaduma? Bueno, dagiti palawag ken panagsasarita ti grupo ti masansan a mabal-etan kadagiti panagsaludsod ken dagiti makaparagsak a panagsasarita. Ti sangapulo ket lima ti tawenna a ni Janet nalagipna ti damo a pannakigimongna: “Idi agkaguduan ti gimong imbagak ken nanangko, ‘Agawidtan.’ Nabannogakon a nakatugaw. Ngem kalpasanna nangrugin a nagsasarita dagiti babbaket ken agtutubo iti plataporma. Kayatko dayta ket nagtalinaedak agingga a nalpas.”

Makaay-ayo a Pannakikadua: Kalpasan ti itatabunona iti damo a pannakigimongna, maysa nga agtutubo a babai a managan Carolina, manipud Nicaragua, kinunana: ‘Dagiti agtutubo a miembro ti nangawis kaniak. Dagitoy mannakigayyemda ken managraem.’ Wen, idiay Kingdom Hall mabalin a makasarakkayo iti ‘nasayaat ken makaay-ayo’ a pannakikadua. (Salmo 133:1) Ti sangapulo ket innem ti tawenna a ni Anita ngarud kunana: “Iti Kingdom Hall, nakasarakak kadagiti pudpudno a gagayyem.”

Nainanaan nga Atmospera: “No dadduma madanaganak maipapan iti parikut nga agmalmalem,” kuna ni Simeon, agtawen iti 14. “Ngem idiay Kingdom Hall, malipatak dayta. Mariknak ti talna iti uneg.” Dagiti Nakristianuan a gimgimong mangiparangarangda iti espiritu ti Dios a rag-o ken talna. (Filipos 4:4-7) Ket maisupadi iti naarte a disenio ken ti naulimek, artipisial a kasasaad iti adu kadagiti ig-iglesia, dagiti Kingdom Hall simple ti disenioda ket parang-ayenda ti nainanaan nga atmospera. Kuna ni agtutubo a Barbara: “Idiay Kingdom Hall, saanak a maalumiim.”

Maysa a Lugar a Pagsursuruan

Ti napatpateg pay ngem ti atmospera, nupay kasta, isu ti masursuroyo babaen iti itatabuno iti gimong idiay Kingdom Hall. Tapno iyilustrar, usigenyo ti maysa laeng kadagiti lima a gimong, ti Teokratiko nga Eskuelaan ti Panagministro. Dayta naipasdek idi 1943 tapno mangsanay kadagiti Kristiano iti arte ti panagpalawag iti publiko. Dayta ket internasional nga eskuelaan, a naipasdek kadagiti amin a kongregasion dagiti Saksi ni Jehova iti isuamin a lubong, ket mangipaay iti agpada a gundaway iti edukasion. Dagiti estudiante umawatda ti isu met laeng a pannakasanay lallaki man wenno babbai, nangisit wenno puraw, nabaknang wenno napanglaw​—nga awan bayad!

Ti kangrunaan a libro isu ti Biblia. Dagiti kualipikado nga instruktor isuroda dagiti estudiante no kasano ti mangurnong ken mangbukel kadagiti impormasion iti Biblia ket kalpasanna iparang dayta babaen iti pannakisarita. Ti libro a napauluan Giya ti Teokratiko nga Eskuelaan ti Panagministroa ket maus-usar met a mainaig iti Eskuelaan. Dagiti 38 nga adalen saklawenna dagiti tema a kas ti “Panangbukel ti Maysa a Balabala,” “Ipaganetget ti Kababagasna ken Panagbaliw ti Tono,” ket dagitoy isuroda ti umiso a panangisao, panangbalikas, ken pannakabukel. Idi ti agtutubo a managan Terri imparangna daytoy a libro iti instruktorna iti Klasena iti “Speech,” imbagana kadagiti dadduma nga estudiante: “Kalpasan iti lima a lawas iti klase iti “speech,” kamaudiananna inikannak ti libro maipapan iti no kasano ti panangisuro a siuumiso iti klase iti “speech”!”

Panunotenyo laengen ti pannakabael nga agtakder iti sanguanan ti maysa a grupo ket isuro ti Biblia​—a nakasigsigo, ken addaan ti panagtalek! Daytoy ket maysa laeng kadagiti gunggona a magun-odan no tumabunokayo kadagiti gimgimong idiay Kingdom Hall. Inayonyo iti dayta ti nasayaat a pannakilangen a tagiragsakenyo sadiay, ken nalaka a makitayo no apay a ti kanayon nga itatabuno iti gimong ket nasken unay iti panangtaraon iti pammatiyo iti Dios ken iti Anakna. “Ti mangalagad ti pammati,” ipalagip ni Jesus kadatayo, “addaan biag nga agnanayon.”​—Juan 3:36.

Inanamaenmi ngarud, a daytoy nga ababa a pannakaisalaysay ti nangtignay iti panagreggetyo a mangrugi a tumabuno kadagiti gimgimong no dikay pay nakarugi a tumabuno. Ania, ngay, no tumabtabunokayon? Ngarud ti saludsod ket, Adu kadi ti magunggun-odanyo kadagitoy a gimgimong kas ti masapul nga aramidenyo? Ti masanguanan a bilang salaysayennanto daytoy.

[Dagiti Footnote]

[Ladawan iti panid 21]

Dagiti gimgimong idiay Kingdom Hall mangipaayda iti gundaway para kadagiti agtutubo a makipaset a siaaktibo