Panangsolbar ti Parikut Dagiti Napanglaw

SUMAGMAMANO kadagiti pangulo ti relihion ti silalamuyot a nangiyebkas ti bagbagida maipapan kadagiti agdama a parparikut a gapu itoy mabalin a patien dagiti tattao a talaga nga ammoda no kasano ti panangparang-ay kadagiti bambanag. Kaskasdi, no dagiti politiko ken dagiti ekonomista saanda a nasolbar dagiti problema, nasaysayaatto aya ti maaramidan dagiti papangulo ti relihion babaen ti panangsuportarda kadagiti rebolusionario nga elemento?

Ikalintegan dagiti pangulo ti simbaan ti naregget nga espirituda, ngem saan a tunggal maysa ti kumbinsido iti kinapasnekda. Ni Edmund Burke ti nagsurat: “Pangkaaduan a biddut ti panangipagarup a dagiti kalalaawan a managreklamo para iti publiko ket isudat’ magagaran unay iti pagimbaganna.” Posible ngata a dagiti pangulo ti simbaan ket tigtignayen ida ti pannakaseknan imbes a gapu laeng iti regtada maipaay iti kinahustisia?

Ti Braziliano a magasin a Veja ti nagkuna: “Iti kinapudnona, ti tartarigagayan ti Simbaan isut’ pannakabalin . . . Ti banag a dagiti kinabaknang ti lubong ti naipamaysa unay kadagiti Protestante, Buddhist, ken uray pay kadagiti ateistiko a pagilian ket isut’ mangpilpilit iti Simbaan a mangpadpadas nga agsubli iti pannakabalin babaen iti im-ima dagiti napanglaw iti Maikatlo a Lubong.”

Ngem uray ikabiltayon a dagiti indibidual a klero saanda nga agsapsapul iti personal a bentahada, pudno met laeng aya a magunggonaan dagiti napanglaw iti panangsuportar iti movimiento ti panangwayawaya a manganamong iti sosial nga aktibismo? Kasta aya ti pamay-an a panangsolbar iti parikut dagiti napanglaw?

Padron para kadagiti Pudno a Kristiano

Ania a pagarigan ti impakita ni Jesu-Kristo, daydiay obligado a pagtuladan ti amin a pudno a Kristiano? Bayat nga adda ditoy daga, saanna nga inraman ti bagina kadagiti sosial a reporma, ken saan met a simmiasi manipud nakaibaonanna nga ibaga kadagiti dadduma ti maipapan iti Pagarian ti Dios. (Lucas 4:43; Juan 6:15) Uray ni Papa Juan Paulo II, idi salaysayenna ti sosial nga aktibismo, ti nagkuna: “Nalawag ti panangipakita dagiti Ebanghelio a para ken Jesus, aniaman a mangbaliw ti misionna kas Adipen ni Yahweh [Jehova] ket maysa a sulisog.”

Di kayat a sawen daytoy a di nabigbig ni Jesus ti pagkasapulan dagiti napanglaw. Nabigbigna dayta. “Simnek ti asina kadakuada,” kuna ti Biblia, “gapu ta nalidayda [wenno mariribukan] ken nawarawarada a kasda la karkarnero nga awan ti pastorda.” (Mateo 9:36) Ket inawisna dagidiay sumurot kenkuana: “Umaykayo kaniak, dakayo amin nga agrigrigat ken madagdagsenan, ta paginanaenkayto.”​—Mateo 11:28.

Maysa a padto ti Biblia ti mangiladawan ti panagturay ni Kristo iti Pagarian: “Ta ispalennanto ti makasapul intono umkis, ken ti napanglaw nga awan mangarayat kenkuana. Mangngaasinto kadagiti napanglaw ken makasapul, ket dagiti kararua dagiti makasapul isalakannanto. Subbotennanto dagiti kararuada iti panangirurumen ken iti panangrabsut, ket napategto ti darada iti saklangna.”​—Salmo 72:12-14.

Dagidiay ngarud mangtulad ken Jesus ti masapul a maaddaan dakkel a kinamanangaasi kadagiti napanglaw ken masapul a birukenda ti panangtulong kadakuada. Ngem kasano? Yantangay inannugot ni Jesus a ti agdama a lubong ket adda iti sidong ti panangituray ni Satanas a Diablo, saanna a pinadpadas a repormaen dayta. (Lucas 4:5-8; Juan 12:31; 14:30; 18:36) Ngem tinulonganna dagiti napanglaw babaen ti panangisurona kadakuada iti makatulong kadakuada a makibagay kadagiti parikut ti panagbiag.

Sinuruan ni Jesus dagiti adalanna nga agbalin a nagaget, iti kasta daytat’ mangtultulad kenkuana ken ni Amana. “Ni Amak agingga ita agar-aramid, ket agar-aramidak met,” kunana. (Juan 5:17) Kasta met, nasursuruan dagiti pasurot ni Kristo maipapan ti panangaywan ti bagbagida ken ti pamiliada babaen iti panagbalinda a nadayaw, nasingpet, ken nagaget. (Filipos 4:4-8; 1 Tesalonica 4:11, 12) Ngem daytoy ket panagsagana laeng iti banag a nasaysayaat pay: ti kaitungpalan dagiti bendision ti Pagarian ti Dios.

Pagarian ti Dios ti Kakaisuna a Solusion

Pudno unay, intandudo ni Jesus ti Pagarian ti Dios kas ti kakaisuna a pudpudno ken manayon a solusion ti parikut dagiti napanglaw ken ti isuamin a dadduma pay. Aniat’ pampanunotyo iti dayta? Apay a dagiti manangirupir ti teolohia ti panangwayawaya bassit ti makunkunada maipapan iti Pagarian ti Dios?

Ti kinapudnona ket, napukawda ti pammatida iti karkari ti Biblia maipapan ti Pagarian ti Dios. Kaskasdi, idi sinuruan ni Jesus dagiti pasurotna a kararagen a ‘ti pagarian ti Dios umay koma ket maaramid ti pagayatanna ditoy daga kas met sadi langit,’ saan a mangipapaay iti naatap a namnama. Dayta a kararag ti masungbatanto. Ti Pagarian ti Dios ket maysa a pudpudno a gobierno. Makasiguradokayo a ni Kristo ket saanna nga allilawen dagiti napeklan a pasurotna babaen ti panangisurona kadakuada a kararagen ti maysa a banag a nikaanoman dinto pulos umay.​—Mateo 6:9, 10.

Naparaburan ni apostol Pedro ti pannakasirpat iti dayta a nailangitan a gobierno. Napasamak daytoy idi nagbaliw ti langa ni Jesus iti sanguanan ni Pedro ken ti dua pay a dadduma nga apostol iti maysa a nangato a bantay. Gapuna, adu a tawtawen iti kamaudiananna nabalinan nga insurat ni Pedro: “Ta saanmi a sinursurot dagiti nainsikapan a palpaltuad idi impakaammomi kadakayo ti pannakabalin ken ti iyaay ni Apotayo a Jesu-Kristo, no di ket nasaksian dagiti matami ti dayagna.”​—2 Pedro 1:16-18.

Iti maysa a sirmata, aktual a nakita ni Pedro nga agturturay ni Kristo iti dayta a Pagarian ti Dios! “Ket,” intuloy ni Pedro, “naaddaankami ti natibtibker a sao ti padto [maipapan ti Pagarian, babaen kada mammadto nga Isaias ken Daniel].” (2 Pedro 1:19) Ni mammadto a Daniel, kas pangarigan, ti nangilanad ti sirmata maipapan ti pannakaipatugaw ni Kristo kas Ari idi Isut’ “naikkan iti panagturay ken dayag ken maysa a pagarian.” Intuloy pay a kinuna ni Daniel: “Ti panagturayna agnanayon a panagturay a dinto mapalabas, ket ti pagarianna dinto maduprak.”​—Daniel 7:13, 14.

Aniat’ kuna “ti sao ti padto” a mapasamakto kadagiti agdama a gobierno ti tattao inton umayen ti Pagarian ti Dios kas sungbat ti karkararag dagiti pasurot ni Kristo? Denggenyo ti naipaltiing a panangipakaammo idiay Daniel 2:44: “Ket kadagiti al-aldaw dagita nga ar-ari [dagiti agdama ita a gobierno] ti Dios ti langit mamangonto iti maysa a pagarian a kaanoman dinto madadael [ti Pagarian nga insuro ni Kristo a kararagen dagiti adalanna]. Ket ti panagturayna dinto met maited iti sabali nga ili. Ngem burakennanto ken ibusennanto amin dagitoy a pagpagarian [dagiti agdama a natauan a gobierno], ket isu agtalinaedto iti panawen a di nakedngan.”

Pudno unay, daytoy a Pagarian ti Dios ket isut’ kakaisuna a namnama ti sangatauan a mangsolbar ti parikut dagiti napanglaw! Ti kinapudnona ket, saan a kabaelan dagiti tattao nga iturayan a siuumiso ti padada a tao. Ipanayag ti historia a “ti maysa a tao addaan pannakabalin iti sabali a maipaay iti pagdaksanna,” agpapan pay aniaman a tipo ti natauan a gobierno ti pinadpadasdan. Kas nabayagen nga impamatmat ti Sao ti Dios, saan nga agtaud iti tao ti mangituray ti bagina met laeng a naisina iti Dios.​—Eclesiastes 8:9; Jeremias 10:23.

Iti kasumbangirna, mabalinyo ti agtalek a ti aglaplapusanan a bendision a sinalaysay ti “sao ti padto” ni Isaias ket matungpalto, nga awan sabali: “Ket isuda bangonendanto dagiti balbalay ken agtaengdanto kadakuada; ket agmuladanto kadagiti kaubasan ket kanendanto ti bungada. Isuda didanto mangbangon ket sabali ti agnaed; didanto agmula ket sabali ti mangan. . . . Isuda didanto agtrabaho iti ubbaw, didanto agpasngay a maipaay iti didigra; ta isuda ti kapuonan ti binendisionan ni Jehova, ken ti putotda makiadda kadakuada. Ket maaramidto nga iti sakbay ti iyaawagda sumungbatakto; ken iti bayat ti panagsasaoda denggekto.”​—Isaias 65:21-24.

Ni Jehova a Dios dinto mangusar iti aniaman a natauan a panagregget wenno tignay, agraman ti teolohia a panangwayawaya, a mangiyeg kadagitoy a bendision. Imbes ketdi, ti nailangitan a gobiernona ti mangituray ken mamagkaykaysa iti amin a natulnog a sangatauan, a mangiyegto ti kinalinteg ken panagrang-ay. Gapuna, kanayon a laglagipenyo ti Pagarian ti Dios. Ipangpangrunayo dayta iti biagyo. Wen, “nasaysayaat ti panagkamang ken Jehova ngem ti panagtaltalek iti tao.”​—Salmo 118:8; Mateo 6:33.

[Ladawan iti panid 7]

Ti Pagarian ti Dios solbarenna ti parparikut dagiti napanglaw