Dagiti Milagro ken Aparision—Napalabas ken Agdama
Babaen ti koresponsal ti “Agriingkayo!” idiay Francia
GUADALUPE, Fátima, ken Lourdes—ania ti kaipapanan dagidiay a nagnagan kadakayo? Para kadagiti adu dagitoy ket basta il-ili idiay Mexico, Portugal, ken Francia. Ngem para kadagiti minilion a napasnek a Katoliko, dagitoy ket santuario, tallo kadagiti kalalatakan a templo ni Maria iti lubong. Ti debosion dagiti Katoliko kadagita a luglugar ket saan nga agkupas iti daytoy maika-20 a siglo. Kas pangarigan, idi 1982 adda 4,500,000 a bisita a napan idiay Lourdes, ket ad-adu pay ti bunggoy a napan idiay Guadalupe.
Para Iti Iglesia Katolika, dagitoy a templo ket luglugar a maipagarup nga addaan kadagiti namilagruan a pannakaagas. Nangnangruna a kastoy ti kasasaad iti Lourdes, a dineskribir ni Papa Pio X a kas “ti sentro iti panagdayaw ken Maria ken ti trono ti Eucharistiko a misterio, a kasla manglab-aw iti dayag kadagiti amin nga umasping a sentro iti intero a Katoliko a lubong.” Rinibribo a tattao ti agkuna a naagasanda bayat wenno kalpasan ti ipapanda idiay Lourdes. Nupay kasta, ti iglesia binigbigna laeng dagiti 65 a “milagro” agingga itatta.
Mamatikayo man iti Dios wenno saan, addaankayo iti kalintegan nga agimtuod. Dagiti ngay aparision, nangnangruna ken Maria, iti aglawlaw ti lubong? Dagiti kadi namilagruan a panangagas ken dadduma a paspasamak a nainaig kadakuada ket pammaneknek iti nadiosan a pananganamong? Iti kumperensia a naaramid idiay Lourdes idi 1986, ti obispo iti Tours pinaregtana dagiti managdengngegna nga ‘agmennamenna iti kaipapanan dagiti aparision’ tapno ‘ipasdek ti napateg a pagdumaan dagiti ulbod ken pudno nga aparision.’ No maysakayo a Katoliko, mabalin met nga interesadokayo a mangmatmat a naimbag iti tema.
Dagiti Aparision—Pudno wenno Ulbod?
Ti Iglesia Katolika Romana dina opisial nga isinggalut ti bagina met laeng kadagita nga aparision, wenno obligarenna dagiti miembrona a mamati kadakuada. Ngem ania ti konklusion dagiti napasnek a Katoliko no makitada ni Papa Juan Paulo II nga umin-inum iti danum manipud iti grotto ti Lourdes wenno makisarsarita ken ni Lucie, ti kakaisuna a tao a sibibiag a nakakita iti aparision ni Fátima? Saan kadi a daytoy ket nalawag a demonstrasion iti opisial a pananganamongna (ken ti [pananganamong] ti iglesia)? Kasta met, bayat dagiti panagbiahena, pulos a saan a malanganan ti papa ti bumisita kadagiti santuario ni Maria, kas iti templo iti Black Virgin iti Czestochowa idiay Poland.
Dadduma kadagiti kanunumuan a templo ket inanamongan ti iglesia, kas iti Beauraing ken Banneux idiay Belgium. No dadduma maipalubos laeng ti panagdayaw iti lokal a kasasaad, a kas iti kaso idiay Tre Fontane, Italia, ken Marienfried, Alemania.
Nanipud idi pagnguduan iti maika-19 a siglo, nupay kasta, adu ti agkuna a nakakita kadagiti aparision. Ti libro a Vraies et fausses apparitions dans l’Église (Pudno ken Ulbod nga Aparision iti Iglesia) pattapattaenna nga addada nasurok a 200 a kaskaso manipud 1930 agingga iti 1976. Apay a nakabasbassit ti opisial a mabigbigbig idinto a, sigun iti autor, “dagiti mensahe, malaksid kadagiti sumagmamano, ket pudnoda met ken, idi nausig, nagbanag a ngangngani agkakapareho?”
Ti Pranses a magasin a L’Histoire mangipaay iti panangilawlawag iti maysa nga artikulo a mangtamtaming kadagiti maika-19-siglo nga aparision ni Maria idiay lugar ti Loire iti makintengnga a daya ti Francia. Sigun iti autor, ti iglesia dina sinukimat dagitoy a paspasamak ket binaybay-anna ida a saan a nalawag tapno maliklikan ti “kompetision” kadagiti mabigbigbigen a templo.
Itatta, dadduma kunaenda a ti agdama a panagulimek ti iglesia ket gapu iti agdama a pannakaseknanna a maipaay iti “sientipiko” a kinaumiso. Ni René Laurentin, maysa nga autoridad a Pranses a Katoliko maipapan kadagitoy a bambanag, kunaenna pay a dagiti aparision a kas kadagidiay idiay Lourdes ket bassit laeng ti gundawayda nga opisial a mabigbig itatta. Ngem saan kadi a dagiti pagilasinan—no pudno a naggapu iti Dios—ket masapul nga awaten a kasta iti aniaman a tiempo iti historia?
Ad-adu a Moderno nga Aparision
Dagiti aparision ket mapaspasamakda pay laeng. Idiay San Damiano, Italia, dagiti bunggoy a perigreno agturongda iti lugar a sadiay ni Mamma Rosa (a natay idi 1981) kunaenna a nakitana “ti Birhen.” Ti iglesia nagtalinaed a naulimek maipapan iti tema, ngem dadduma kadagiti matalek manginanamada iti panagbalbaliw iti kababalin a sumaruno iti pannakakumberte a naipagarup a napasamak sadiay.
Iti bassit a bario iti Medjugorje, Yugoslavia, dagiti ubbing ken dagiti tin-edyers nangipadamagda kadagiti nasurok a sangaribo nga aparision iti “Birhen.” Ditoy manen, agpapan pay iti pangngeddeng ti iglesia, dadduma a grupo ti makidangdangadang a maipaay iti opisial a pannakabigbig ti pasamak. Dagiti Katoliko, nupay kasta, mabalin nga agduaduada no ania a kababalin ti awatenda bayat ti panangur-urayda iti pangngeddeng dagiti autoridad ti iglesia. Kabayatanna, masapul kadi a mamatida kadagita a pammaneknek?
Tapno makompleto ti ladawan, addada met dagiti aparision a di inawat ti iglesia, a kas dagidiay napasamak idiay Palmar de Troya, España. Maipapan iti naud-udi, ti obispo iti Seville ti namakdaar iti matalek a saan a “mangpabileg iti panamati ti publiko no maipapan iti pasamak a saan a bigbigen ken kondenaren pay ti iglesia.” Nupay adda pakdaar, nupay kasta napasamak ti panagsisina, a nangiturong iti pannakaikkat iti maysa nga arsobispo ken sumagmamano a papadi, isu nga, iti pananglais iti iglesia, tinaginayonda a dagiti aparision ket pudnoda.
Kasano a posible ti mangikeddeng no dagitoy nga aparision ket pudno wenno saan? Ti sumaganad nga artikulo ti mangtaming iti dayta a saludsod a detaliado.