Dagiti Milagro ken Aparision—Pagilasinan a Naggaput’ Dios?
“DAGITI milagro itatta ket mabigbigbigda pay laeng . . . a kasla maysa a surat iti rekomendasion, maysa a panangipanamnama iti kinapudno ti mensahe ti Dios, ti mannakabalin-amin a pammatalgedna iti mision wenno sao a naggapu kenkuana.” Dagiti milagro a tuktukoyen ditoy ni Joseph Vandrisse, koresponsal idiay Vaticano a maipaay iti inaldaw a pagiwarnak a Pranses a Le Figaro, ket gagangay a dagidiay nga inanamongan ti Iglesia Katolika. Ngem ania dagiti pagalagadan iti panangikeddeng no ti maysa a milagro wenno aparision ket pudno a naggapu iti Dios?
Ti Kadi Iglesia ti Mangikeddeng iti Bukodna a Kaso?
Sigun kadagiti autoridad a Katoliko, dagiti aparision masapul a pennekenda dagiti dua a kasasaad. Umuna, masapul a dagitoy ket maitunos iti pannursuro ti iglesia. Maysa a nagsayaatan nga ulidan isu ti aparision idiay Lourdes, a sadiay ti “Birhen” ti nangiparang iti bagina met laeng a kas “Ti Imakulada Konsepsion.” Makapainteres, sumagmamano a tawen sakbay daytoy, ni Papa Pio IX impaulogna nga iti panagnginaw ni Maria ket naitalimeng a siwayawaya manipud iti orihinal a basol. Idi 1933 ti masanguanan a Pio XII inyebkasna ti kapanunotanna a dagiti dua a paspasamak ket adda panagnaigda, a kunkunana: “Ti Imakulada a Birhen, ti Ina ti Dios ken bendito kadagiti babbai, tarigagayanna a patalgedan iti bibigna a mismo daydiay inkeddeng ti Roma babaen ti di agbiddut a Katan-okan nga Obispo. Daytoy ket inaramidna kalpasan ti nalatak nga aparision idiay Massabielle Grotto [Lourdes].”
Maikadua, ti kababalin daydiay nakakita iti aparision ket masapul met nga usigen. Kas kinuna ti obispo iti Tours: “Ti iglesia . . . mamati iti aparision [idiay Lourdes] gapu iti kinasanto ni Bernadette.” Ket dagiti autoridad iti iglesia ibilangda nga agpadpada ni Bernadette ken ni Lucie, a nagkuna a nakitada ni Maria idiay Lourdes ken Fátima, a nasabetda daytoy a kasasaad babaen ti panagbalinda kamaudiananna a mamadre.
Dagiti mensahe a naiyallatiw ket maitunos iti sursuro ti Katoliko. Ti panagbiag dagiti nakaaparision ket maitunos iti ulidan nga impasdek ti iglesia. Kadagitoy a kaso, saan ngarud a nakaskasdaaw a dagiti aparision a bigbigen ti Iglesia Katolika patalgedanna laeng dagiti bukodna a tradision ken doktrina, uray pay kadagidiay nabiit pay, kas iti Imakulada Konsepsion.
Ngem dagiti kadi milagro ken aparision pudno a pagilasinan a naggaput’ langit a mangpaneknek iti kinapudno dagiti sursuro ti iglesia? Ni J. Bricout, editor iti Dictionnaire pratique des connaissances religieuses (Dictionary of Religious Knowledge), inadawna ti sabali nga autor a Katoliko, ni P. Buysse, isu a nagsurat: “No dagiti milagro idiay Lourdes addaanda iti espesipiko a pakainaigan kadagiti ‘pammati a masarakan laeng iti Iglesia Katolika’ (ti Imakulada Konsepsion, ti depinasion dagiti addaan autoridad nga obispo iti daytoy a sursuro, ti pannakadayaw ti Bendito a Sakramento, ti pannakadayaw ni Birhen Maria, ken dadduma pay), ti maysa mabalin, wenno, ti maysa masapul a bigbigenna a ‘dagiti doktrina iti iglesia ikutanda ti selio iti pananganamong ti Dios.’”
Nupay kasta, ti Iglesia Katolika dina siuumiso a makuna a dayta ket addaan nadiosan a pammatalged. Babaen ti panangalana a mismo iti autoridad a mangikeddeng no dagiti aparision (ken dagiti nainaig a milagro) ket naggapuda iti Dios wenno saan, ipaspasdekna ti bagina met laeng nga ukom iti kasona met laeng.
Adu a dadduma a relihion ti mangipaay kadagiti pammaneknek kadagiti milagro ket kunaenda nga adda pananganamong ti Dios. Ti kadi Dios adda pakibianganna kadagiti milagro a maar-aramid kadagiti movimiento a karismatiko (agraman dagiti saan a Katoliko) wenno uray pay kadagiti di Kristiano a relihion? Narigat a patien nga isu adda iti likudan dayta, ta ibaga ti Biblia kadatayo a ti Dios ket “saan a Dios iti riri, no di ket iti talna.”—1 Corinto 14:33.
Ania ti umiso a pakaibatayan iti panangukom? Ti libro a Les signes de crédibilité de la révélation chrétienne (Signs of Credibility of the Christian Revelation) inlawlawagna a ti pagalagadan iti panangibilang a pudno ti maysa a milagro ket kangrunaanna moral ken relihiuso.
Pudno iti Pannakaipaltiing?
Sigun kadagiti nadumaduma nga autor a Katoliko, “ti Umuna a kasapulan ket ti mensahe a naiyallatiw masapul a maitunos iti pannakaipaltiing iti Ebanghelio ken ti sursuro iti tradision iti iglesia.” “Awan ti baro a paltiing a mabalin a makabalbaliw iti immuna a paltiing.” Kasta met, inlawlawag ni Papa Juan Paulo II a “ti mensahe a naited idiay Fátima idi 1917 naglaon iti interamente a kinapudno iti Ebanghelio.” Amin daytoy kaipapananna a kangrunaan iti amin, ti mensahe nga inted ti kasta nga aparision masapul a maitunos iti “paltiing,” ti Nasantuan a Kasuratan. Pudno kadi a kastoy ti mapaneknekan?
Ania a konklusion ti maadawtayo manipud kadagiti aparision iti umap-apuy nga impierno a naited kadagiti papastor idiay Fátima? Nalawag ti panangipakita ti Kasuratan a dagiti managbasol saanda a madusa iti kastoy a pamay-an no matayda. Ni Jesus a mismo imbagana a masapul a kabutengtayo Daydiay makabael a mangdadael agpadpada iti kararua ken bagi, iti kasta ipakpakitana a mabalin a matay ti kararua. Dagiti dadduma a teksto ti Biblia nalawag ti panangisuroda nga awan ti puot iti ipapatay ket ti namnama nga agbiag manen naibatay iti kari ti Biblia a masanguanan a panagungar.—Mateo 10:28; Eclesiastes 9:5, 10; Juan 5:28, 29.
Ket ti ngay “Imakulada Konsepsion” a sinao ni Bernadette? Daytoy manen ket maisupadi unay iti sursuro ti Biblia. Ipakita ti Kasuratan a ni Maria, kas kadagiti amin a kaputotan ni Adan, ket ‘nainginawda iti basol’ ket tinawidda ti ipapatay. (Salmo 51:5; Roma 3:23) No ni Maria nainginaw nga awan basolna, apay a nangiparang iti daton a maipaay iti basol kalpasan ti panangipasngayna ken ni Jesus? (Levitico 12:6; Lucas 2:22-24) Kasta met, awan ti uray maysa a teksto ti Biblia a mangsuportar iti sursuro a Katoliko nga agkuna nga isut’ naitalimeng nga awanan ti orihinal a basol babaen iti naisangsangayan a bendision. Yantangay ti panagdayaw ken ni Maria ket awanan ti Nainkasuratan a pamunganayan, nainkalintegan laeng ti mangisaludsod no dagiti aparisionna ket naggapuda iti Dios.
Mabalin Kadi nga Agtaudda iti Sabali a Gubuayan?
Siempre, ammo dagiti eskolar ti Biblia a dagiti namilagruan a pagilasinan saanda nga agtaud amin iti Dios. Kalpasan ti panangisitarna kadagiti milagro nga inaramid dagiti mahiko nga Egipcio iti sanguanan ni Faraon ken ni Moises, ti Dictionnaire de la Bible, nga immatonan ni F. Vigouroux ti pannakaisuratna, dinakamatna nga “iti kamaudianan nga al-aldaw, dagiti ulbod a mammadto ken ulbod a Kristo, nga aminda ket ahente iti Diablo, agaramiddanto kadagiti adu a milagro agingga nga allilawenda dagiti matalek nga ad-adalan ni Jesu-Kristo a mismo, no mabalin dayta.”—Mateo 24:24; Exodo 7:8-13.
Ngem ania ngay no, kas iti kaso idiay Fátima, ti aparision awisenna ti sangatauan nga agbabawi ket dawatenda dagiti manamati nga agkararagda a maipaay iti pannakakumberte dagiti managbasol? Makapainteres, maysa a libro nga uman-anamong kadagiti aparision, a napauluan iti Fátima—Merveille du XXe siècle (Fátima—Marvel of the 20th Century), adawenna ti padi, nga iti dayta a tiempo adda idiay Fátima, a nangiyebkas iti panagduadua maipapan iti nagtaudan dagitoy a mensahe agpapan pay kadagiti linaonda. Kinunana: “Mabalin a dayta ket panangallilaw ti demonio.” Kinapudnona, ipakita ti Biblia a ni Satanas “agpammarang a kas anghel ti lawag” ket “dagiti ad-adipenna, met, agpammarangda a kas ad-adipen iti kinalinteg.” (2 Corinto 11:14, 15, The Jerusalem Bible) Ngarud ti maysa a nainkalintegan a mensahe ket saan a pammaneknek a ti maysa nga aparision ket pudno a naggapu iti Dios.
Daytoy met ti konklusion a nagun-odan ti [Katoliko] a Dictionnaire historique de la Bible, ni Calmet a kunana: “Dagiti milagro ken pakaskasdaawan ket saanda a kanayon a sigurado a pagilasinan a dagidiay a mangar-aramid kadakuada ket nasantuanda wenno ti doktrinada ket umiso, wenno siguradoda a dagitoy dagiti pammaneknek dagiti nakaaparision a nakaawatda iti mision.”
Maisupadi iti dayta, nangaramid ni Kristo kadagiti adu a milagro idi adda ditoy daga. Ania ti panggepna, ket ania a lawag ti ipalgakda kadagiti milagro ken pakaskasdaawan itatta? Dagitoy a salsaludsod masungbatandanto iti sumaganad nga artikulo.
[Kahon/Ladawan iti panid 6]
Disiembre 9, 1531.
Maysa nga Indian a Mexicano, a managan Juan Diego, ti agap-apura a mapan Makimisa idiay siudad ti Mexico. Iti dalan nakasabet iti maysa a babai a nangibaon kenkuana iti obispo iti siudad ti Mexico a mangibangon iti maysa a simbaan iti nagtakderanna a mismo. Ti obispo ket kasla agduadua maipapan iti mensahe ti Indian.
Iti sumaganad nga aparision, impakaammona ti bagina met laeng a kas ti ina ti pudno a Dios ken di nagbayag kamaudiananna kas “Santa Maria iti Guadalupe.” Tapno mangipaay iti pagilasinan kenkuana, imbagana ken ni Juan Diego a mangurnong kadagiti rosas, nupay saan idi a tiempo iti panagsabong dagiti mulmula. Nupay kasta, nakasarak kadagiti sumagmamano ket binungonna iti kagayna. Idi nga imparangna ida iti obispo, ti kasla tao ti kadakkelna a ladawan ti “Birhen” nagparang iti kagayna.
Maysa a ladawan ti eksena ti naiparang itatta idiay Guadalupe Basilica, iti asideg ti siudad ti Mexico.
[Ladawan]
Guadalupe
[Kahon/Ladawan iti panid 7]
Pebrero 11, 1858.
Maysa a 14-años nga ubing a babai a Pranses a managan Bernadette Soubirous, ti kabsatna a babai, ken maysa a gayyem ti adda a mangaykayo iti asideg ti Lourdes, iti maysa nga ili iti abagatan a laud ti Francia iti asideg ti pagbeddengan ti España. Apaman a bumallasiw ni Bernadette iti waig, maysa a “babai” ti nagparang kenkuana iti grotto. Iti sabali manen nga okasion, ti isu met laeng a “babai” ti nangdawat ti pannakaibangon iti maysa a kapilia iti dayta a lugar ket nagpakaasi kadagiti amin a sangatauan nga agbabawida.
Iti pannakasabetna ti sabali pay nga aparision, nangngeg ni Bernadette ti “babai” a nagkuna iti lokal a dialekto: “Siak ti Konsepsion Imakulada.” Agsolsolo a binusor ti sibil ken uray dagiti relihiuso nga autoridad, pinatalgedan ni Bernadette Soubirous dagiti sasaona a pudnoda. Kamaudiananna, ti Iglesia Katolika opisial a binigbigna ti aparision ti “Birhen.” Ti santuario idiay Lourdes isu ti banagna.
[Ladawan]
Lourdes
[Kahon/Ladawan iti panid 8]
Mayo 13, 1917.
Maysa nga agtutubo a pastor ken dua a babai nga agpaspastor ti mangay-aywan kadagiti arbanda idiay Fátima, iti makintengnga a Portugal, a sadiay nakitada ti umuna nga aparision ti “Birhen.” Bayat ti naud-udi nga aparision, nagdardaras dagiti tattao a napan iti lugar a manginanama a makagun-od iti pagilasinan. Kunaenda a nakitada ti init nga agsalsala iti langlangit ket kalpasanna nagtinnag ditoy daga.
Dagiti ubbing nakaawatda met kadagiti “palimed.” Naaddaanda iti sirmata iti impierno, a sadiay nakitada dagiti managbasol nga agsagsagaba iti kasta unay iti nakaam-amak nga apuy. Ti “Birhen” dinawatna met ti pannakakonsagrar ti Russia iti “imakulada a pusona.” Kamaudiananna tinungpal dagiti papa ti pagayatanna. Ti maudi a “palimed” ket salsalimetmetan dagiti nangangato nga autoridad iti Iglesia Katolika, nga agkedked a mangipakaammo iti dayta iti publiko itatta.
[Ladawan]
Fátima