Panagamak iti “Flight 811”

Pebrero 24, 1989. Maysa nga oras pay laeng ti nakalabas iti aldaw. Kaduak ti asawak, ni Linda, inanamaek ti makaawiden iti pagilianmi idiay Australia iti uneg ti 12 nga oras wenno nasursurok pay. Ti flight 811 nga agturong idiay New Zealand,​—ti umuna a paset ti panagbiahemi nga agawid,​—ket kasla maysa laeng a gagangay a panagtayab.

Iti uneg ti duapulo a minutos a panagbiahemi, nakigtotkami babaen iti maysa a napigsa a gutad iti makingkannawan a sikigan ti eroplano. Maysa a paset iti uneg ti eroplano ti naabutan, maysa laeng a linea ti baetmi. Dagiti rebbek ken dagiti babassit a sarming naitayabda iti uneg ti eroplano. Simrek ti kasta unay nga angin iti eroplano. Ket dikam ammo a siam a pasaheros ti naitayab a naitappuak iti eroplano​—maysa kadakuada ti sinultop ti makingkannawan a makina ti eroplano!

Ti mabutbuteng a riaw dagiti pasaheros ket naringbawan babaen iti timek ti dumaranudor nga angin ken ti panagkintayeg ti bagi ti eroplano. Basta nagkinnitakami laengen ken ni Linda. Saanen a masapul ti panagsao. Ammomi a ngangnganikamin matay!

Panangsaranget iti Siguradon nga Ipapatay

Timmalliawak ket nakitak a nagtinnagen dagiti oxygen masks manipud iti bubida para iti kaaduan kadagiti pasaheros ngem awan ti para kadakami ken ni Linda. Timmakderak iti panangikagumaanko a manglukat iti pagikkan iti maskara ngem ginuyodnak ti asawak iti tugawko.

Kaskasdi, nabaelanmi a ginuyod dagiti life jacketsmi iti sirok dagiti tugaw ket nagsaganakamin a maipaay iti kellaat a panagdisso. Ti laeng ammomi, ngangngani matnagkamin iti Pacifico!

Nagkinnitakami manen ken ni Linda. “Inay-ayatka, Linda, kinunak. “Inay-ayatka met,” insungbatna. Simmubli iti posisionna a maipaay iti kellaat a panagdisso, indumogko, ket nagkararagakon ken ni Jehova a Dios.

Masansan a mangngegyo a dagiti ngangngani matayen a tattao malagipda dagiti panagbiagda idi. Agpadakami a nakapadas iti dayta. Riniribuknakami met dagiti ‘no koma no.’ Ti asawak ken siak ket agpadakami a Saksi ni Jehova. Inanamaek a dumtengto ti aldaw a makakualipikarak a maysa a ministerial nga adipen iti lokal a kongregasion. Ngem itan kasla siguradon a diakton magteng dayta a kalat. Ni Linda ket tutuoken dagiti panagbabbabawi iti saanna nga iseserrek iti amin-tiempo a panangasaba kas payunir, a masansan a sarsaritaenna nga aramiden.

Immawagak manen ken ni Jehova, iti daytoy a tiempo a nakapigpigsa, a ti makingkannawan nga imak ket nakapetpet iti makingkannawan nga ima ni Linda. Maysa kadagiti hostesses iti eroplano ti nangipaay iti naganat a dawat kadagiti amin a pasaheros nga agtalinaedda a nakatugaw. Iti ruar, awan ti makita no di ti kinasipnget. Iti uneg, adda ti naan-anay a panagamak.

‘Anianto ti mapasamak no matay ni Linda ket makalasatak a sibibiag?’ Nagpanunotak. ‘Anianto ti pagarupen dagiti dadakkelna kaniak iti panangipanawko iti anakda ket isut’ diak naiyawid?’ Saan pay a pulos a nagbalin a nakapatpateg ti namnama ti panagungar kadakami agingga iti dayta a kanito.

Iti panangpampanunot a mammano ti makalasat iti kellaat a panagdisso, pinampanunotkon ti pannakatnag iti baybay ken ti panangsaranget kadagiti pating. Nagdumogak a mangmatmat kadagiti sakak ket ginaw-atko dagiti sapatosko iti sirok ti tugaw iti sangok. ‘No kamatennak ti maysa a pating,’ pinanunotko, ‘marigatanto a mangkagat iti sapatosko!’ Kinamaag? Wen. Ngem mammano a makapanunotka iti umiso kadagita a tiempo.

Ti Panagdisso!

Kellaat, addan anunsio: “Dua a minutos laengen sakbay ti panagdisso!”

“Dua a minutos laengen sakbay ti panagdisso?” Aburidoak. ‘Dika agdisso iti baybay​—matnagka,’ pinanunotko. ‘Mabalin kadi a nagsublikami idiay Honolulu?’ Iti sumagmamano laeng a kanito nagun-odakon ti sungbat. Nagsindin dagiti silaw, ket nakaal-alumamay ti panagdissomi. Adda ti nakapigpigsa a palakpak kadagiti pasaheros bayat ti panagsardeng ti eroplano! Nagtalinaedak a nakasadag iti tugawko. Ngem di nagbayag. Idin immayen ti awag a dumsaag iti eroplano. Nagturongkamin iti ruangan ket simrekkami kadagiti chutes a nagturong iti talged iti runway nga adda iti baba.

Iti natalged a kaadayo manipud iti nadadael nga eroplano, sinukimatko ti rason iti kaguduat’ oras a panagamakmi: Maysa a 10-metros a paset ti bagi ti eroplano ti naitayab, a nangiparang kadagiti innem a linea ti paset a business class, paset iti pagikkan ti karga, ken ti bassit a paset ti first class. Malagipko ti pannakadlawko a ti intero a nagtugawan ti business class ket saan a naan-ano ket mariknak ti pannakabang-ar a mabalin a nakalasat ti isuamin. Anian ti panagbiddutko! Naammuak nga innem a linea ti pudno a naitayab iti jet, isu a nangawit kadagiti siam a pasaheros iti nakabutbuteng nga ipapatayda.

Bayat ti panangisubli ti maysa a shuttle bus kadakami iti kangrunaan a terminal, dagiti pasaheros liniwliwada ti maysa ken maysa. Nalawag nga umad-adun kadakuada ti naapektaran iti pannakakigtot. Idi nakagtengkamin idiay terminal, dagus nga inusarda dagiti magun-odan a telepono. Dagiti naklaat a pasaheros pinadasda nga inawagan dagiti pamiliada sakbay ti pannakakigtot dagita kadagiti report ti radio ken telebision.

Diakto malipatan dagiti sumaganad nga innem nga oras: Dagiti addaan dara ken nakigtot a pasaheros naiwarasda iti datar ti pasilio ti eropuerto. Dagiti grupo dagiti pagiwarnak ken dagiti abogado nagtitiponda iti ruar. Dagiti kamkameng ti eroplano padpadasendakami a salakniban kadakuada. Adda ti kankanayon a pannakabilang dagiti pasaheros bayat ti panagap-apura dagiti opisiales a mangikeddeng no siasino, a pudno, ti awan.

Kamaudiananna, tunggal pasahero ti pinagsaludsodan dagiti ahente ti U.S. Federal Bureau of Investigation, a tarigagayanda ti mangikeddeng no mabalin a ti aramid dagiti terorista ti mabalin a makagapu iti didigra. Agparang a saan met, ngem kaawatan a magagaran dagiti autoridad iti eroplano. Dua a bulan a nasaksakbay, ti panangbomba ti terorista ti nangtinnag ti maysa a jet idiay Lockerbie, Scotland. Naammuanmi kamaudiananna, nupay kasta, a ti di nasayaat a pannakaaramid ti eroplano ti mabalin a makagapu iti didigra iti flight 811.

Nakaawid met Laengen!

Kalpasan ti ababa a panaginana ken ti napudot a pannangan iti maysa nga otel ti Waikiki, naibaga kadakami a nabaliwan ti eskediol ti panagtayab iti naladawen a paset dayta a rabii. Nupay no sumagmamano ti nangpili nga agtalinaed idiay Waikiki tapno makainana, ni Linda ken siak ken dagiti dinosena a dadduma inkeddengmi a tarigagayanmi a lipatenen daytoy a nakaam-amak a pasamak iti kabiitan a tiempo. Nupay kasta, ti panagbiahemi manipud Honolulu ket makapatigerger a kapadasan. Ti bassit laeng a panaggaraw ti eroplano pagkinteyegennakami iti kasta unay. Maysa a tripolante ti nakatinnag iti maysa a plastik a tasa ti yelo ket makakigtot ti unina. Dagiti linea dagiti pasaheros, agraman kaniak, timmakederkami iti tugawmi.

Iti umiso a tiempo, nupay kasta, simmangpetkami a sitatalged ken nasalun-at idiay Australia. Maysa a kabagian, a saanmi a kapammatian, ti nagkuna a mabalin a ti pammatimi ti nangtulong kadakami a nagballigi iti drama iti tangatang. Ket no lagipek dayta a nakabutbuteng a panagtayab, awan ti panagduaduami ken ni Linda a ti panagtalekmi ken ni Jehova Dios ken ti sigurado a pammatimi iti karina a panagungar ket dakkel a liwliwa kadakami.

Nupay no dikam mabalin a kunaen a ti pannakalasatmi ket milagro iti aniaman a pamay-an, pudno nga agyamankami ta sibibiagkami. Kinapudnona, ti kapadasan tinulongannakami a mangapresiar nga ad-adda pay a ti biag ket maysa a napateg a sagut manipud iti Dios. Ket ad-adda pay ngem idi a determinadokami a mangusar iti dayta a naan-anay maipaay iti pakaidayawanna.​—Kas insalaysay ni Roger White.