Agkaduakami Met Laengen!

Linda: Idi 12 anyosak, imbaga kaniak ni Nanang nga adda adingko a babai a naipaampon. Pinampanunotko no umel met laeng isuna. Ngem dimmakkelak a saanko nga am-ammo ti kabsatko.

Sally: Diak pulos ammo nga amponak laeng. Kinabkabil ken trinatonak nga adipen ti dimmakkelak nga ina isu a dimmakkelak a naliday. Dayta ti nangparigat pay iti kasasaadko kas maysa nga umel. Idi kuan, naam-ammok dagiti Saksi ni Jehova ket nakipagadalak iti Biblia. Idi naammuan ni Nanang, binaut-bautnak iti sinturon ken sinukatanna ti kandado ti ruanganmi tapno saanak a makaruar iti balay. Idi 20 anyosakon, nagtalawak ket innaladak dagiti Saksi. Nagbautisarak iti rugrugi ti 2012.

Linda: Idi 20 anyosak, nakipagadalak kadagiti Saksi ni Jehova. Di nagbayag, umat-atenderakon kadagiti kombension distrito iti Jakarta. Mayin-interpret ti programa para kadagiti umel. Adu ti naam-ammok nga umel kadagita a kombension, a pakairamanan ni Sally, maysa a Saksi a taga-North Sumatra. Naasideg ti riknak kenkuana ngem diak ammo no apay.

Sally: Nagbalinkami nga aggayyem ken Manang Linda. Nadlawko nga agkaruprupakami ngem binaybay-ak laeng dayta.

Linda: Idi Agosto 2012, iti aldaw sakbay nga agbautisarak, kasta unay ti ayatko a mangbirok ken ni adingko. Impakaasik ken Apo Jehova, “Pangngaasim, tulongannak a mangbirok iti kabsatko ta kayatko a maam-ammonakayo.” Di nagbayag, dimi inekspektar a makaawat ni Nanang iti teks manipud iti maysa a tao nga adda naammuanna maipapan iti napukaw a kabsatko. Agsasarunon dagiti pasamak agingga a nabirokanmin ni Sally.

Sally: Idi imbaga ni Manang Linda a siak ti nabayagen a mapukpukaw a kabsatna, napanak a dagus iti Jakarta tapno agkitakami. Idi addaakon iti airport, nakitak da Manang Linda, Tatang, Nanang, ken ti maysa pay a manangko nga agur-uray. Agpigpigergerak gapu iti aglalaok a marikriknak. Nagiinnarakup ken nagbibinnisongkami. Ni Nanang ti kabayagan a nangarakup kaniak. Agsasangitkami amin. Agsangsangit da Tatang ken Nanang a dimmawat iti pammakawan ta impaampondak ket nagsangsangit ken nagiinnarakupkami manen.

Linda: Gapu ta agsabali ti pannakapadakkelmi, masapul a sursuruenmi nga awaten ti agduma nga ugali ken nakairuamanmi nga aramiden. Ngem ay-ayatenmi unay ti maysa ken maysa.

Sally: Maymaysan ti paggigiananmi ken Manang Linda ken agpada ti nakaikamenganmi a sign language a kongregasion ditoy Jakarta.

Linda: Nasurok a 20 a tawen a nayadayokami ken Sally iti maysa ken maysa. Agyamyamankami ken Apo Jehova ta agkaduakami met laengen!