Nagturongkami iti Gubuayan ti Pudno a Kinalinteg

Kas insalaysay ni Erwin Grosse

SUMAGMAMANO a tawen ti napalabasen, iti bigbigat unay addaakon kadagiti ruangan ti dakkel a pagaramidan ti barko idiay Kiel, Alemania, nga agiwarwaras ti polietos ken aglaklako ti Rote Fahne, ti magasin ti KPD/ML.a Maigiddato iti daytoy pinadpadasko met nga allukoyen dagiti trabahador ken dagiti aprentisda kadagiti pannakidebate. Ti panangkumkumbinsir kadakuada kadagiti komunista a kapampanunotak ket di maap-apresiar a trabaho.

Nupay kasta, diak pinalubosan daytoy a nangupay kaniak. Nakadiskobreakon ti maysa a kalat iti biag: ti panangtulong a mangiyeg kadagiti nalinteg a kasasaad babaen iti sangalubongan a rebolusion. Kasanot’ pannakagtengko iti dayta a panangmatmat? Mapennekto aya dayta a kalat ti panagbisinko iti kinalinteg?

Panagsapsapul ti Kinalinteg

Ti wagas a panagbiag dagiti dadakkelko ket isut’ panangaramid iti amin a kabaelan a rumang-ay iti namaterialan, ket daytoy ti di nakaallukoy a pulos kaniak. Dakami nga agtutubo ti agsapsapul iti banag a nasaysayaat. Dagiti baro nga estilo ti panagbiag ti inkam padpadasen ken iwarwaragawagmi dagiti baro a pangpanggepmi iti biag. Iti dayta a tiempo, ti gubat idiay Vietnam ken kinagulo dagiti estudiante ti dadakkel a paulo ti damdamag. Agparang kadakami a dagiti inosente a tattao ti mangibubuis kadagiti biagda gapu kadagiti agbibisin nga agpasikat a politiko ken dagiti kapitalista. Daytoy a situasion ti natimbang iti pampanunotko, ket gapu itoy nangrugi a kagurakon ti sistema a kapitalista.

Tinallikudak metten dagiti naipaspasdek a relihion. Ti kapadasak bayat nga agserserbiak kadagiti armado a buybuyot a Makinlaud nga Aleman ti timmulong kaniak a nangaramid itoy a desision. Dagiti maniobra militar a nakairamananmi idi ti nasinga gaput’ pamisa idiay kampo, ket dagiti soldado ti nabingbingay iti grupo dagiti Katoliko ken Protestante. Iti panagpatingga ti misa, dagiti klero iti agsumbangir a denominasion ti nangbendision kadagiti nagdadakkel nga artilleria! Nabiglaak pay. Saan aya a naaramid dagitoy nga ig-igam a pangpapatay? Ken idi nasursuruanak idiay relihion idiay eskuelaan, saan kadi a naisuro kaniak a: “Dika mangpapatay”?​—Exodo 20:13, King James Version.

Mariknak nga umiso ni Karl Marx idi nga inawaganna ti relihion a “ti apiang dagiti tattao” agsipud ta pinagbalinna nga awan gawgaway dagiti tattao iti imatang dagiti intereses ti kapitalismo. Gapu itoy kalpasan ti ipapanawko iti army, naglusulosak iti simbaan ket nangalaak ti leksion a regular iti Marxismo-Leninismo. Nagbasbasaak met kadagiti sursurat ni Mao Tse-tung. Amin daytoy ti nangpapigsa iti pammatik a ti laeng sangalubongan a rebolusion ti makaparut iti kinadakes. Iti laeng kasta a pamay-an, kunak iti panunotko, nga agparangto ti maysa a baro a natauan a kagimongan nga iladladawan ti kinalinteg.

Ti KPD/ML ti nangsanay kaniak a mangallukoy kadagiti trabahador maipaay kadagiti pannursuro ni Lenin ken ti agitukon kadakuada ti polietos ken ti Rote Fahne. Nagaw-awitak met ti bambandera ken nagmanehoak kadagiti lugan nga addan loudspeaker kadagiti demostrasion. Nupay kasta, mamatmatmatanak laeng kas paspasurot ti partido. Sakbay nga awatennak ti central committee kas miembro, masapul a paneknekak ti bagik, nga agserbi iti partido iti mabayag bassit ken suportarak iti pinansial dayta.

Naiduma iti Aramid​—Napait a Pannakaupay

Nasanayak kas maysa nga engineering draftsman wenno diseniador, ngem ad-adda nga interesadoak iti arte dagiti socialista a pintor, ket tinartarigagayak a maukoparko koma met ti bagik a manangpartuat kas kadakuada. Gapuna, nagaplikarak maipaay iti lugar idiay West Berlin College of Art. Naakseptarak ket rinugiak ti panagadalko ti arte idi Pebrero 1972.

Ditoy manen immasidegak iti partido ket di nagbayag agtaktakderak manen iti sanguanan dagiti ruangan ti pabrika nga aglaklako ti Rote Fahne. Nakadisenioak met kadagiti placards ken nagipimpinta kadagiti ladawan da Marx, Engels, Lenin, ken Mao Tse-tung kadagiti nalabaga a bandera.

Determinadoak a di mangas-asawan​—dayta ket, agingga a nagkitakami ken ni Linda. Nasarakak nga isut’ addaan natakkon a kualidad, matalek, ket daytoy ti nangbaliw ti panunotko. Lima a bulan kamaudiananna agassawakamin, a rinugianmi ti agbalinto a kas natunos a panagasawa.

Iti dati, nakikabkabbalayak iti maysa a grupo dagiti agtutubo a nadumaduma dagiti makakannigid a sentimientoda. Nagadu dagiti pagdidiskutiranmi, ngem adda met panagaapa ken sakit ti naknakem. Pareho met laeng dayta kadagiti dadduma a partido komunista. Tunggal maysa tagtaginayonenda nga amin dagiti dadduma saanda a maaw-awatan dagiti idea a komunista ket rebbeng a tumiponda iti “pudpudno” a partido. Naipasdek dagiti linea wenno pagbedngan ti pagbabakalan!

Iti uneg ti mismo a partidok, ti panagdadangadang dagiti dasig ti kannigid ken kannawan ket gagangayen. Dagiti prominente a miembro ti mangpadpadas a mangituang iti maysa ken maysa. Naumaak iti panaglalaban ken panagiinninsulto, ket daytoy ti nangiturong ti nagin-inut a pananggessatko iti amin a koneksionko iti partido. Nakitak nga awan kaipapanan ti pannakiramramanko iti maysa a banag nga iti kinapudnona di makaiyeg ti panagbalbaliw. Ti raragpaten a komunista ti nangpaneknek iti bagbagina a di maragpat babaen iti aramid! Ngem iti pusok nagtalinaedak a maysa a Marxist.

Imbaga Kaniak ni Linda ti Maipapan iti Dios

Maysa a rabii, bayat nga agmammanehoak manipud Kiel agturong Berlin, kinellaatnak ni Linda. Kinunana: “Kumbinsidoak nga adda ti Dios, ket iti unegko, mamatiak kenkuana.” Daytat’ kaudian a banag a namnamaek a mangngegan! Sinupsuportaran ni Linda dagiti ganuat a Marxist.

Maysa a nabara a suppiat maipapan iti agkalaban a materialismo ken Marxismo ti simmaruno. Iparparang ti Marxismo ti sursuro a ti tao magunggun-odanna ti intero a naespirituan, kinasirib, ken moral a biagna manipud iti sosial nga aglawlawna. Kas resultana, rumsua ti “baro” a tao kas bunga ti edukasion kadagiti komunista nga ideolohia ken babaen iti positibo a panagbalbaliw iti aglawlawna. Ni Linda, nupay kasta, ket maysa a nasanay a teknisian ti laboratorio, ket ammonat’ nasaysayaat! Mapaneknekanna a ti kababalin ti tao ket maim-impluensiaan met iti genetiko a katataona. Ginupedmi ti diskusionmi tapno maliklikan ti panagapa.

Kabayatan ti naud-udi a biahemi, marikna manen ni Linda ti tarigagayna nga isarsarita ti Dios kaniak. Iti panangmatmatko, pinatalgedan ti teoria ti ebolusion nga isuamin ket adda namunganayanna kadagiti material a bambanag ket daytat’ resulta ti puro a tsansa. Inruar ni Linda dagiti prinsipio ti thermodynamics, ti linteg ti inertia, ken dadduma pay a pisikal a linlinteg tapno paneknekan a rebbeng nga adda maysa nga intelihente a namunganay ti biag. Pinetpetak dagiti opinionko. Nupay kasta, ti pilosopiak iti biag ken dagiti kalkalatko, ket napisangpisangen!

Limmabas ti makatawen. Maysa nga agsapa ti Domingo bigla nga inruar ni Linda ti maysa a napuskol a libro ket rinugianna a basaen dayta kaniak. Daytat’ estoria ti maysa a tao a nangpukan ti maysa a kayo, nga inusarna ti kagudua dayta a mangaramid ti awan biagna a didiosen ket sana nagkararagan: “Isalakannak.” Daytoy makaatrakar unay a panangiladawan ti relihion ti naipasagepsep unay kaniak. Agasenyo ti panagsiddaawko idi maammuak a daytat’ naggapu iti Biblia.​—Isaias 44:14-20.

Dinawatko iti asawak a sarsaritaannak pay. Daytat’ inaramidna iti lima nga oras​—nangrugi iti panagbasol ti tao idiay Eden agingga iti pannakaisubli manen ti Paraiso a naisalaysay idiay libro ti Apocalipsis. Daytoy ti nangbannog unay ken ni Linda, ngem mariknak a kasla nagtinnag dagiti siksik manipud kadagiti matak ket nakakitaak a nakalawlawag iti damdamona. Natural, kayatko a maammuan no sadinot’ nakaammuan ni Linda kadagitoy amin.

Imbagana kaniak nga idi isut’ 14 años, isut’ nakipagad-adal ti Biblia kadagiti Saksi ni Jehova idiay Berlin ket iti kamaudianan isu pay ti nabautisaran. Idi isut’ agtawenen ti 18, isut’ immakar iti nakaad-adayo gaput’ panggedanna, ket nakalkaldaang a kunaen, napanawanna ti dalan ti kinapudno. Kalpasanna idi isut’ nagsubli idiay Berlin, isut’ naigamer kadagiti politika a makakannigid. Ti ragsak a malaklak-amanna ita iti panagasawami ti nangtignay kenkuana a mangabaruanan a mangsapul iti Dios. Ngem isu aya ti mangpakawan kenkuana kadagiti basbasolna? Ammona a ti kakaisuna a mangitalimeng iti panagbiagmi ken ti ragsak ti panagasawami ket isut’ sibababawi a panagsublina iti Dios. Ngem awanak pay iti dayta a punto. Kasapulak ti ad-adu pay a tiempo.

Panagturong iti Umiso a Direksion

Maysa a rabii iti kalgaw, binambantayanmi ti naranga nga ilelennek ti init iti siudad. Kuna ni Linda: “Mabalin a tagtagiragsakentayo ti kakasta a bambanag iti mabiit, Erwin. Ngem ispalennatayto aya ti Dios inton isut’ bumallaet? Ania dagiti rason nga ipakpakitatay kenkuana a mangaramid ti kasta?” Daytoy ti namagpanunot kaniak ti nauneg. Adda naammuakon bassit maipapan ken ni Jehova ngem nalawag a di pay umdas. Gapuna naikeddengko ti agturongen kenkuana.

Di nagbayag kalpasan daytoy, addakam idiay tiendaan idi nakakitakami ti maysa a baket nga adda iti wheelchair nga agig-iggem Ti Pagwanawanan. Dinawatmi kenkuana nga ibagana kadakami ti oras ti panaggigimong iti lokal a Kingdom Hall, ket rimmaniag ti matmatana. Pinetpetanna dagiti im-imami: “Maragsakanak ta dagiti agtutubo kas kadakayo kayatyo a maammuan ti Biblia,” ti sangkaulit nga ibagbagana. Gapu iti napalaus a ragsakna, nagtugaw a diretso iti wheelchairna ket inarakupna ni Linda. Inawatmi ti sumagmamano a magasin ket inkarimi nga umay iti sumaganad a panaggigimong.

Dimtengkami di nabayag sakbay panangrugina. Atiddag ti buok ken barbasko ken naka-jeans ken T-shirt. Inkawes met ni Linda ti 30-años nga asul a bestida a pinagkasar ni antina. Nakakitaak ti maysa a lalaki a nakaterno ken nakakorbata a sitatakder idiay ruangan ket kunak iti panunotko: “Talaga a lalaki! Anian a pangrugian!’ Isut’ mannakigayyem, nupay kasta, ket kunana: “Ur-urayendakayo.” Nakellaatak pay ngem kunak kenkuana: “Kayatmi a maaddaan ti panagadal ti Biblia.” Uray dayta ti saan met a namagsiddaaw kenkuana: “Naiyurnosen,” insungbatna. Medio marurod, simrekkamin.

Kabayatan ti gimong, mariknak iti naminadu a daras a kasla ti agpalpalawag ket personal a makisasao kaniak. Ken dadduma iti kongregasion ti nagsiddaaw idi inruar ni Linda Ti Pagwanawanan nga insagsaganana a nasapa maipaay iti panagadal. Kalpasan ti dua oras, ti kabsat a baket ti immay ket inarakupnakami, a ti rupana ti nakaranraniag iti ragsakna. Isu daydiay nangipakaammo ti idadatengmi. Naiyurnos ti regular a panagadal ti Biblia iti maysa a kabsat a lalaki a nangawat kadakami idiay ruangan, ket siam a bulan iti kamaudiananna, idi Abril 4, 1976, insimbolok ti dedikasionko ken Jehova babaen iti pannakaitaneb iti danum.

Anian a ragsakko a maammuan Daydiay a nangikari: “Adtoy! Pagbalinek a baro dagiti isuamin a bambanag”! (Apocalipsis 21:5) Ket kasano ti panangiyeg ti Namarsua iti daytoy pudpudno a kinalinteg? Itden ti Proverbio 2:21, 22 ti sungbatna: “Ta ti nalinteg agtalinaedto ditoy daga, ket ti napnuan-imbag agtaengto kenkuana. Ngem dagiti nadangkes magudasdanto ditoy daga; ket dagiti nagulib maparutdanto kenkuana.”

Idinto nga idi unana agtaktakderak babaen ti Rote Fahne iti sanguanan ti ruruangan ti pabrika, ita agtaktakderakon kada Sabado idiay Karl Marx Street sadi Berlin-Neukölln babaen Ti Pagwanawanan. Itan mabalinkon ti agsao maipapan iti maysa a banag a di maitukon ti aniaman nga aramid-tao a sistema: ti biag nga agnanayon. (Juan 17:3) Naadalko no kasano a dagiti “nalinteg” masansanayda pay itan nga agkawes iti “baro a personalidad, isu a mapabpabaro iti umiso a pannakaammo.” (Colosas 3:10) Daytoy nga edukasion a maipaay iti baro a lubong ti dinto mapaay!

Maipapan ken ni Linda, isu itan ti determinado a dinton bumaw-ing manipud iti Gubuayan ti pudpudno a kinalinteg. Ni Peter ken Reni, a nangisuro kadakami ti daldalan ni Jehova, nabigbigda no ania dagiti kasapulanna a naespirituan ket isut’ tinulonganda a rumang-ay.

Dagiti Baro a Kalat iti Dana ti Kinalinteg

Idiay kolehio, adda ti sipapanayag a dida iyaanamong iti pampammati a sireregtan a petpetpetak. Ti propesorko iti klase, nga agdindinamag a pintor, ti nangipakaammo a rebbengkon ti agdesidir maipapan iti arte wenno iti baro a pammatik. Gapuna inidiakon ti panagpimpinta ket nagbirukak ti trabaho a makatulong kadakami a makaragpat iti baro a kalatmi: ti serbisio a panagpayunir. Sipapanunot iti daytoy, siak ken ni Linda ti masansan a mangipakpakaammo iti dayta a tarigagaymi ken Jehova iti kararag. Impatulodmi ti aplikasionmi kagudua a tawen a nasapsapa iti planomi a petsa a panangrugi, Setiembre 1, 1977.

Saan idi a nalaka dayta, ngem babaen iti tulong ni Jehova naragpatmi met laengen ti kalatmi. Kabayatanna, nanipud Enero 1, 1985, siak ken ni Linda ti agserserbin kas espesial payunir​—gapuna maysa manen a bumarbara a tarigagay ti naiyeg iti kaitungpalanna. Ti panangus-usar ti amin a pigsami a mangtulong kadagiti tattao a makaammo ti dana ti pudpudno a kinalinteg ket pudpudno a makapnek unay kadakami.

Ket ti ngay il-iliwenmi a kinalinteg? Napennek met laeng aya dayta? Wen. Itatta ammokon ti pudpudno a kaipapanan ti sasao ni Jesus idiay Mateo 5:6: “Naragsak dagiti mabisin ken mawaw iti kinalinteg, ta mapnekdanto.”

[Footnote]