Maysa a Surat ti Panangapresiar
SUMAGMAMANO a bulanen ti napalabas nakaawat ti magasin nga Agriingkayo! ti maysa a surat manipud iti agtutubo nga estudiante isu a nagkuna iti sumaganad:
“Dagiti pagiwarnakyo makaipaayda unay iti impormasion, nalaka a basaen ken awaten, naintiempuan, ken makaparegta a pagiwarnak a nabasak pay laeng. Awitenda ti kinapudno ti Sao ti Dios a siaannad. Tamingenda dagiti agdama a paspasamak a buyogen ti pannakaawat ken pananginanama iti masanguanan.
“Nakalaklaka ti bokabulario a nausar tapno mabasa ti agtutubo, nalaklaka ngem dagiti dadduma a magasin, enciklopedia, ken dagiti libro a reperensia. Ket naintiempuanda. Masansan a pampanunotek ti maysa a banag, ket kalpasanna addan ti sungbat iti sumaganad a bilang.
“Kas maysa nga estudiante iti high school, masapul nga agsukimatak maipaay kadagiti report ken dagiti nadumaduma a proyekto, a sapulenna dagiti adu a reperensia a liblibro. Ditoy napaneknekan a makatulong dagiti magasinyo. Maragsakanak a mangibaga a ti impormasion maipaay iti kaaduan kadagiti proyektok naggapuda kadagiti magasin. Kasla no kasapulak ti maysa a topiko maipaay iti proyekto, addan sadiay magasin. Wenno no ad-adalek ti maysa a banag idiay eskuelaan, maysa nga artikulo maipapan iti tema a mismo ti adda sadiay a mangtulong kaniak nga umawat iti dayta.
“Kas pangarigan, kasapulak ti maysa a tema a proyekto iti siensia maipaay iti Science Fair a masapul nga iserrekmi. Masapul a dayta buklen dagiti tallo a posters, maysa a report, ken maysa a modelo. Gapuna inkeddengko ti mangaramid iti maysa a topiko a pampanunoten dagiti adu a tattao kadagitoy nga al-aldaw: ti “greenhouse effect.” Daytat’ naisalaysay iti Setiembre 8, 1989, nga Agriingkayo! Inusarko ti makin-uneg a ladawan maipaay iti pampanunotek a maysa a poster ken ti ladawan iti panid 7 maipaay iti sabali. Ti maikatlo a poster isu ti maipapan kadagiti suson ti atmospera. Inusarko met ti impormasion kadagiti artikulo iti reportko. Tunggal maysa kayatda ti proyektok ken ti pamay-an ti panangiparangko iti dayta, nangnangruna ti mannursurok iti biology. Inikkannak iti A, ket naawatko ti umuna a gunggona iti seksion iti Ecology and Conservation.
“Kalpasanna, idi Marso, kasapulak ti maysa a tema maipaay iti assainmenko iti First Aid. Nakitak iti Marso 22, 1990, nga Agriingkayo! ti maysa nga artikulo maipapan iti angkit ken ti panangagas iti dayta. Inkeddengko nga usaren ti ladawan iti panid 17 maipaay iti poster ken ti impormasion maipaay iti report. Nakaawatak met ti A iti daytoy a proyekto.
“Iti klasemi iti American History, inadalmi dagiti sibilisasion idi ugma, kas iti Maya, Aztec, ken Inca, ket ammoyo kadi, nga idi simmangpetak iti maysa a rabii, ti Mayo 8, 1990, nga Agriingkayo! agur-urayen kaniak iti pagibusonan ti surat. Inuksotko iti balkotna tapno palabasak ket nakitak ti artikulo iti panid 13, a mangisalsalaysay iti sibilisasion a Maya. Maragragsakanak unay. Dagus a binasak ti artikulo ket inikkak ti mannursurok iti history iti maysa a kopia dayta.
“Agyamanak kadakayo kadagitoy amin a naintiempuan nga impormasion, a pudno a mamagbalin iti panagaramid kadagitoy a proyekto a maysa a pagsursuruan a kapadasan ken maysa a pagragsakan imbes a pakapadagsenan. Kinapudnona, dagitoy a magasin kasda la napapateg nga alahas. Pulos a diak kayat ti maisina kadakuada. Pudno a makatulongda, nangnangruna kadagiti agtutubo kas kaniak, a nakalaklaka a masinga. Babaen ti panangbasa kadagiti magasin, agraman dagiti artikulo ti ‘Agimtuod dagiti Agtutubo,’ mapabilegtayo a manglapped kadagitoy a pannakasinga ket taginayonentayo ti panangmatmattayo iti premio a biag nga agnanayon. Agyamanak unay kadakayo iti gagetyo a mangisagsagana kadagitoy a magasin maipaay iti pannakaawatmi ken pagragsakanmi.”—Naipatulod.