Panangmatmat iti Lubong
Mabigbig a Legal dagiti Saksi Idiay Mozambique
Naikkan ti legal a pannakabigbig ti panangasaba dagiti Saksi ni Jehova iti makin-abagatan a daya a pagilian ti Africa a Mozambique. Maysa a surat manipud iti Ministry of Justice, a napetsaan iti Pebrero 11, 1991, kunaenna: “Dagiti Saksi ni Jehova, kas kadagiti dadduma a relihiuso nga institusion, tagiragsakenda dagiti amin a kalintegan ken pagimbagan a naibaga iti Konstitusion iti Republika iti Mozambique.” Daytat’ pinirmaan ti Director of Religiuos Affairs iti pagilian. Dagiti 5,235 a Saksi a nagreport a nangikasaba iti mensahe ti Biblia sadiay idi napalabas nga Enero siraragsak nga inawatda daytoy a naimbag a damag. Agyaman met dagiti 13,971 a delegado a timmabuno iti tallo a “Nadalus a Pagsasao” a Kumbension Distrito a nabiit pay a naaramid idiay Mozambique, a sadiay 357 ti nabautisaran idi pannakaiwaragawag ti opisial a pannakabigbig.
Naimbag a Damag manipud U.S.S.R.
Idi Marso 28, 1991, ti Minister of Justice inyawatna kadagiti pannakabagi dagiti Saksi ni Jehova ti maysa a dokumento a nangited iti legal a pannakabigbigda idiay Union Soviet.
Dagiti Biktima iti Buchenwald
Ti nagan a Buchenwald pagamkenna dagidiay a makalagip iti Nazi nga Alemania. Masarakan iti asideg iti Weimar, iti makuna agingga iti nabiit pay a Makindaya nga Alemania, ti Buchenwald ket maysa a kampo konsentrasion a nalatak ti kinaranggasna kadagiti agarup kakapat a milion a balud. Itatta, adda sadiay a pakalaglagipan ti publiko ken museo kadagiti biktima iti kinadakes, ngem adda pay laeng panagsusupiat maipapan iti dayta. Ni Ulrich Schneider, baro a direktor iti pakalaglagipan, ti natudingan a mangipabigbig kadagiti 65,000 nga adipen a trabahador a natay sadiay. “Maiparbeng, kas pangarigan, a malaglagip dagiti soldado a Soviet ditoy,” kinunana. “Ngem nakaad-adu met dagiti natay ditoy a Pranses, taga Belgium ken tattao a Dutch, ket nakabasbassit nga atension ti naipaay kadakuada.” Dinakamatna met ti pannakasapul “ti panangipaay iti nabilbileg a salaysay” a mangibutaktak iti kinaawan hustisia kadagiti dadduma a grupo, agraman dagiti Saksi ni Jehova.
Acupuncture Agpaay kadagiti Taraken
Sigun iti The Wall Street Journal, ti American Veterinary Medical Association bigbigennan ti acupuncture a kas maawat a panangagas kadagiti agsakit nga animal. Kuna ti pagiwarnak a “nupay makuna idi a pangallilaw, ti acupuncture kadagiti animal naipasdeknan ti bagina a kasukat iti awan drogana a panangagas, a nalaka a magun-odan no di agballigi dagiti kadawyan a pamay-an.” Dadduma a beterinario mangus-usarda kadagiti saan unay a napigsa a laser, ultrasound, ken dadduma a pamay-an a mangtignay kadagiti luglugar a pakaitudokan ti dagum kadagiti animal. Makuna a, ti pannakaitudok dagiti napipino nga stainless steel a dagdagum kadagtii nadumaduma a reflex points iti bagi ti animal napaneknekan a naballigi iti panangagas kadagiti aso, kabayo, tumatayab, ken uray pay kadagiti goldfish.
Relihion kadagiti Aw-away nga Insik
Kuna ni Wang Zhen, ti vice-priemier iti China, a dagiti komunidad dagiti mannalon idiay China rarautenen dagiti relihion iti Laud, sigun iti South China Morning Post ken naipadamag iti pagiwarnak a World Daily iti pagsasao nga Insik idiay Estados Unidos. Kuna ni Wang Zhen a kadagiti pagtalonan iti aw-away, a sadiay ti pagnanaedan iti 70 porsiento iti populasion, “umad-adu a tattao ti agtarigagay a makitimpuyog kadagiti ig-iglesia.”
Kasta Unay a Dayaw?
Makasarak koma dagiti kongregasion iti United Methodist kadagiti dadduma a pamay-an a pangdayaw kadagiti obispoda malaksid iti panangitedda kadagiti dadakkel a di ninamnama a pinansial a gunggona. Daytat’ rekomendasion ti maysa a panagadal ti maysa nga eskuelaan iti relihion idiay Estados Unidos. Nasarakan ti panagadal a ti kongregasion masansan a mangipaay iti sagut a kuarta nga agingga iti $40,000 ken kotse nga aggatad ti agingga iti $20,000 no agretirodan wenno maiyakarda. Kuna ti Christianity Today: “Adda idi tiempo a dagita a gunggona nairanta a mangpunno iti nababa a sueldo a mait-ited kadagiti opisiales iti iglesia. Ngem inton sumaganad a tawen, ti sueldo ti maysa nga obispo iti UM [United Methodist] lab-awannanton ti $66,000. Mainayon pay, umawat pay dagiti obispo iti libre a balay ken alawans iti opisina a $41,000.”
Pannakalang-ab ti Sigarilio
Ti asuk nga iruar dagiti agsigarilio masansan a di boluntario a malang-ab dagiti di agsigarilio. Daytoy a pannakalang-ab ti sigarilio patpatayennan ti rinibribo idiay Australia, sigun iti nabiit pay a panagadal. Mapapati a “nasurok a 1000 a di agsigarilio nga Australiano ti matay iti tinawen kas resulta iti atake ti puso a gapu iti pannakalang-ab iti sigarilio,” kuna ti The Australian. Ti pagiwarnak napaliiwna a daytoy a ‘naiyallatiw nga asuk’ naglaon iti carbon monoxide ken nikotina, isu a mangpakapuy iti kabaelan ti puso ken “ti abilidad ti puso a mangawit iti oksihena iti puso ken kadagiti dadduma a paset ti bagi.” Nagserra ti panagadal nga “iti tunggal walo a managsigarilio a matay iti tabako, maysa a di agsigarilio ti matay gaput’ pannakaisarang iti asuk.”
Kaaduan a Mausar a Droga iti Lubong
Ipadamag ti magasin nga L’Express a ti kaaduan ti mausar a pagagas a droga isu dagiti Pranses. Nangbusbosda iti 90 ribo a milion a francs ($18 ribo a milion, E.U.) idi 1989 kadagiti ag-agas, a dayta agpromedio iti 1,598 francs ($320, E.U.) iti tunggal tao. Sigun iti pagiwarnak a Pranses a La Croix, mangusar dagiti Pranses iti maminlima a daras nga ad-adu a pildoras a pangpakalma ken pangpaturog ngem dagiti Americano. Nasaknapen ti parikut ket apektaranna ti amin nga edad. Adut’ maamak nga addanton ti peggad iti pannakaadikto. Maysa kadagiti lima a barito/balasitang ti pumanaw iti opisina ti doktor nga addaan iti resita a pildoras a pangpaturog ken pangpakalma. Kadagiti ubbing a nababbaba ngem makatawen ti edadna, 15 porsiento ti umawat iti pangpakalma a pangagas iti panagnerbios ken ti di pannakapangpangan. Ipadamag ti inaldaw a diario a Le Figaro nga idiay Francia, adda iti nagbaetan ti 25 ken 30 porsiento a nataengan ti nabayagen a kankanayon nga agus-usar iti dadduma a kita iti pangpakalma.
Salisal Babaen iti Init Idiay Australia
Dagiti nadumaduma a karkarna ti itsurana a pilidan a lugan—39 ti bilangda, manipud iti amin a lubong—nagbiaheda manipud Darwin, idiay makin-amianan nga Australia, idi Nobiembre 11, 1990, a nagturong idiay Adelaide, iti abagatan ti isla a kontinente. Ti umuna kadagiti lugan simmangpet sadiay innem nga aldaw kamaudiananna. Nagbiaheda iti 3,000 km a paandaren laeng ti silnag ti init. Daytoy a salisal, ti maikadua a World Solar Challenge, ti nangabakan ti nakisalisal a Sueko, ti Spirit of Biel. Ti nangabak nagpromedio iti 70 kilometros tunggal oras, ket no dadduma pumartak iti 100 kilometros. Ti maikadua, a naudi iti 400 kilometros iti nangabak, nakagasto iti $15,000,000 iti pannakaaramidna, kuna ti magasin nga Asiaweek. Ti Spirit of Biel, nupay kasta, aggatad laeng iti $600,000.
Mannanakaw iti Libro
Dagiti mangay-aywan ti libreria ken dagiti dadduma nga adda iti industria iti libro mariribukanda iti yaadu ti panagtakaw iti libro. Sigun iti The New York Times Book Review, ni Mary Ellen Quinn, direktor iti pannakaparang-ay dagiti koleksion agpaay iti Chicago Public Library, kunana a ‘ti libreria nalabit gumatang iti kas iti kaadu ti matakaw a libro iti tinawen.’ Dadduma a dodoktor, mannurat, abogado, seminarista, mannursuro, ken uray pay dagiti agay-aywan a mismo nairamanda iti listaan dagiti mannanakaw ti libro, ket ti maysa nga eksperto tukoyenna dagiti tattao nga agtakaw iti libro a kas “dadduma a kasayaatan a tao iti lubong.” Kuna dagiti managsirarak a ti Biblia “ti nalawag a kaaduan a matakaw a libro, ti pagay-ayat dagiti tattao a dida maliklikan iti amin a tiempo.”
Ad-adu ti Peggadna kadagiti Pintor
Sigun iti maysa nga ahensia iti WHO (World Health Organization) idiay Lyons, Francia, dagiti pintor ket 20-porsiento a nangatngato ti peggadda a makagun-od iti kanser ngem ti dadduma iti populasion. “Para iti kanser iti bara,” kuna ti magasin nga Aleman a Naturwissenschaftliche Rundschau, “daytoy a peggad gapu iti trabaho makagteng iti 40 porsiento a nangatngato ngem ti promedio. Ti peggad iti panagsakit iti kangrunaan ken dagiti aglawlaw a paset iti sistema nerbio ket nangatngato met.” Kuna ti magasin nga uray dagiti annak ti dadduma kadagiti pintor mabalin nga apektaran ti trabaho dagiti dadakkelda; kasla ad-adda a makapataudda iti tumor iti utek ken leukemia. Sigun iti WHO, dagiti pagtunaw nga adda iti pintor ken varnish ti gubuayan ti peggad, saan a ti trabaho a panagpinta a mismo.
Pannakaraut dagiti Babbai a Klero
Iti maysa a surbey nga inaramid ti United Methodist Church idiay Estados Unidos, nasurok a tallo a kakapat iti babbai a klero iti simbaan ti nangipadamag a napadasanda ti seksual a pannakaraut. Sigun iti Ecumenical Press Service (ti pagiwarnak iti World Council of Churches), dayta met laeng a surbey impadamagna a 41 porsiento kadagiti babbai a klero iti simbaan impalgakda a ti pannakaraut iti sekso “ket ar-aramiden dagiti kakaduada wenno dagiti dadduma a papastor.”