Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • g93 8/22 pp. 12-15
  • Napennek ti Wawko iti Dios

Awan video-na ti napilim.

Pasensiakan, adda problema iti pannakai-load ti video.

  • Napennek ti Wawko iti Dios
  • Agriingkayo!—1993
  • Subtitulo
  • Umasping a Material
  • Nanumo a Kabibiag
  • Panagsanay Idiay Seminario
  • Pannakaupay Manen
  • Maysa a Di Ninamnama a Sangaili
  • Napennek ti Wawko iti Dios
  • Panangparmek iti Danagko
  • Sakbay ken Kalpasanna—Nagbalbaliw Gapu Kadagiti Prinsipio ti Biblia
    Ti Pagwanawanan Mangibumbunannag iti Pagarian ni Jehova—2003
  • Ti Panagdaliasatko nga Agsapul iti Panggep
    Agriingkayo!—1988
  • ‘Linaglagipna ti Namarsuana Kadagiti Aldaw ti Kinaagtutubona’
    Agriingkayo!—1994
  • No Apay nga Immikkat ti Maysa a Padi iti Relihionna
    Agriingkayo!—2015
Kitaen ti Ad-adu Pay
Agriingkayo!—1993
g93 8/22 pp. 12-15

Napennek ti Wawko iti Dios

BINUSBOSKO ti sangapulo a tawen a nageskuela kadagiti seminario ti Sud America, a ti maudi a tallo a tawen ket impamaysak itiD teolohia ken pilosopia. Ngem ita maysa a nanumo a mannalon ti mangibagbaga a matulongannak a mangtarus iti Biblia. Ti pannakaupayko kadagiti nasursurok idiay seminario ti nangtignay kaniak nga umimdeng.

Aniat’ nanggutugot kaniak nga agbalin a maysa a padi? Ngem apay a dagiti tawen a kaaddak idiay seminario dida pinennek ti wawko iti Dios?

Nanumo a Kabibiag

Pitokami a lallaki a pinadakkel dagiti nagannakmi idiay Vallegrande sadi Bolivia. Agtataengkami iti maysa a nabunga a kapatagan, agtartaraken iti baka ken agmulmula iti mais, mani, ken patatas. Ti purokmi a Naranjal ket naiputputong, isu nga awan unay gundawayko a nageskuela. Kaskasdi, nasursurok ti agbasa ken agsurat.

Iti kada tawen, sarungkaran ti maysa a Romano Katoliko a padi ti purokmi gapu iti maysa a narelihiusuan a piesta. Apresiarek ti panagsaona maipapan ti Dios. Idi naminsan nga isasarungkarna, impakaammona a naglukat idiay Bolivia ti maysa a seminario tapno sanayen dagiti babbaro nga agbalin a papadi. Idi kinunak a kayatko ti masursuruan maipapan ti Dios, naaddaan interes kaniak. Kinunana: “Agbalinkanto a kas maysa nga agdan, a tumulong iti tattao a makagteng idiay langit.”

Tinarigagayak ti mapan idiay seminario ken gun-oden ti pannakaammo maipapan ti Dios. In-inanamaek idi a malawlawaganto sadiay dagiti mangburburibor iti panunotko. Kas pangarigan, nupay insuro kaniak ni nanangko a dagiti bantay, sabsabong, ken kaykayo ket sagut manipud Dios, kinunana pay nga ipan ti Dios ti dadduma a tao idiay impierno tapno agsagaba kadagiti nakaro a panagtutuok. Pinampanunotko, ‘Ania a klase a Dios dayta?’

Panagsanay Idiay Seminario

Ti seminario ket adda idiay Tupiza, maysa nga ili iti maysa a napintas a tanap. Simmangpetak idi 1958. Idi ubingak pay, pagay-ayatkot’ sumang-at iti maysa a turod a sadiay ti pagmennamennaak maipapan iti naayat a Namarsuatayo. Ngem naupayak gapu ta awan unay nasursurok maipapan iti Dios idiay seminario. Awan pay ketdi kompleto a Bibliada sadiay, ti “Baro a Tulag” laeng. Idi nagkiddawak iti maysa, imbaga kaniak dagiti instruktorko nga aganusak pay laeng.

Kalpasan ti makatawen, tallokam laeng a naawat nga agtultuloy iti kurso. Napagawid ti kaaduan. Yantangay mammanokami, naibaonkam idiay Buenos Aires, Argentina, tapno itultuloy ti panagadalmi. Idi simmangpetak idiay San Miguel Seminary, nasdaawak unay. Nagdakkelan a lugar. ‘Sigurado a mabalinak ti umadani iti Dios ditoy,’ kinunak. Inadalmi ti Latin, Griego, Ingles, ken Pranses, ken binasami ti kabibiag dagiti padpadayawan ti Iglesia Katolika a “sasanto.” Ngem didak pinennek dagitoy a panagadal. Kaskasdi a saan a nasungbatan dagiti pakaburiburak.

“Kasano a nagbalin a ti Dios ket maysa a Trinidad?” inyimtuodko iti maysa kadagiti instruktorko. Kinunana a dagiti nalatak a teologo a kas iti Italiano a ni Thomas Aquinas idi maika-13-siglo ti di pay nakailawlawag kadagiti banag a kas iti dayta. Kaskasdi a diak pay nakakitkita idi iti maysa a kompleto a Biblia, isu nga inimtuodko iti maysa kadagiti propesorko maipapan iti “Daan a Tulag.”

“Para laeng kadagiti Prostestante dayta,” kinunana.

Nasdaawaak iti daytoy, yantangay ammok a masansan a nagadaw ni Jesus manipud iti dayta. Naupayak ken nagleddaang.

Idi agangay, innemkami a napili kas novicio, ket nagbiagkami iti sidong ti sapata ti kinadalus, kinapanglaw, ken kinatulnog. Kalpasan ti makatawen a panagadal kas novicio, napankam iti seminario idiay Córdoba, Argentina. Dagiti relihiuso nga aruaten ti mabalin laeng nga isuotmi, a buklen ti maysa a nagayad ken nangisit a sotana ken puraw a kuelio, agraman rosario ken maysa a dakkel a krus. Magagaranak unay; iti umuna a gundaway, adalek met laengen ti maysa a kurso iti teolohia.

Pannakaupay Manen

Ti kurso ti teolohia ket buklen ti maysa a panagadal iti nangato a pammabalaw, a mangibilang iti Biblia kas maysa a kita ti literatura a kas iti dadduma a libro. Naupayak a kaskasdi a di pay nasungbatan ti adu a saludsodko. Nagbalinak a nasinged a gayyem ti maysa nga obispo. Dinamagko, “apay a kunaen ti Biblia a ni Jesus ket immulog idiay impierno?” (Aramid 2:31) Ngem liniklikanna a sungbatan ti saludsodko.

Addada pay adu a parikut iti moral a nangburibor kaniak. Dinamagko ti maysa a teologo maipapan ti masturbasion ken panagdenna ti dua a di pay kasado. Imbes a dakamatenna ti kunaen ti Sao ti Dios maipapan kadagita a banag, magagaran unay idi maipapan kadagiti kabaruan a kapanunotan dagiti mabigbigbig a teologo idiay Paris. Impakitana kaniak ti maysa kadagiti libroda. “Kunada a saan a pakabasolan dagitoy a banag,” kinunana. “Dika madanagan.” Ngem ti sungbatna dinak pinennek.

Maysa nga aldaw, suksukimatek dagiti libro idiay libraria ti seminario idi naiparna a naukradko ti maysa a libro a Pranses. Inadawna ti Salmo 42:2, a kunana: “Toy kararuak mawaw iti Dios.” Kinunak iti bagik, ‘Talaga a kasta ti mariknak.’ Di nagbayag, idi nagbakasionak idiay balay, napanak iti maysa a kumbento iti kabangibang nga ili ti Vallegrande. Iti maysa a tiendaan ti libro sadiay ti nakakitaak iti maysa a kopia ti kompleto a Biblia​—ti patarus a Nácar-Colunga. Damok idi a nakakita iti maysa a kompleto a Biblia. Dinamagko no mabalin a gatangek, a diak impagarup a mabalin. Anian a ragsakko idi rimmuarakon iti dayta a tiendaan nga ig-igpilakon ti bukodko a Biblia!

Nagawidak nga agkankanta ken agsagsagawisiw. Apagsangpetko, binasak ti Salmo 42, a ti rugina: “Kas panagal-al ti ugsa a mawaw kadagiti baresbes a dandanum, kasta ti panagal-al toy kararuak a mawaw kenka, O Dios. Toy kararuak mawaw iti Dios, iti sibibiag a Dios.” ‘Nalabit ita,’ kunak iti un-unegko, ‘mapennekko met laengen ti wawko iti Dios.’ Ngem naamirisko idi agangay a kasapulak ti tulong tapno masarakak iti Biblia dagiti sungbat kadagiti saludsodko. Di nakaipaay iti kasta a tulong dagiti panagadalko idiay seminario.

Idi 1966, nadamagko a naglukaten ti nangatngato a tukad ti seminario a naipamaysa iti teolohia ken pilosopia iti asideg ti Cochabamba idiay Bolivia a dimmakkelak ket sadiayto ti pakaiyakarak. Ti staff ti seminario ket buklen dagiti agkabanuag nga Español a papadi, kabarbaro a teologo, ken addaan napintas a libraria. ‘Mabirukak met ngatan ti sungbat dagiti saludsodko,’ kinunak iti unegko.

Masansan nga agsaludsodak, kas iti: “Kasano a nagbalin nga ina ti Dios ni Maria?” Ngem awan unay interes dagiti instruktor kadagita a saludsod. Imbes ketdi, ad-adda a maseknanda iti pilosopia dagiti Komunista. Idi naminsan naam-ammok ti maysa a kardinal, ngem ad-adda nga interesado a mangsalaysay kadagiti kapadasanna idi Gubat Sangalubongan II imbes a sungbatanna dagiti saludsodko.

Kalpasan ti sangapulo a tawen a panagsanayko idiay seminario, nagkiddawak iti makatawen a panagbakasion tapno makaruarak ken makilangen iti tattao. Kayatko a mapadasan ti makisarsarita iti tattao maipapan iti ebanghelio. Idi agangay, naamirisko a diakto pulos mapnek kadagiti kumbento, isu a kiniddawko a palubosandakon nga aglusulos kadagiti sinapataak. Idi agangay, inkasarko ti maysa a dati a madre a ni Porfiria. Nagnaedkami idiay siudad ti Santa Cruz, Bolivia.

Maysa a Di Ninamnama a Sangaili

Maysa nga aldaw iti simmuno a tawen, agtugtugawak idi iti balkonahe a paglutlutuan ti kaserami iti tinapay iti maysa nga urno a masungrodan iti kayo. Adda lalaki a simmangbay idiay ruangan. Impagarupko no adda ibagana iti kaserami, isu a kinunak: “Dumanonkayo!” Kasta nga agpaysot’ inaramidna, ket nagtugaw iti abayko. Nupay nanakman ti panagkawesna, nadlawko babaen iti langana a nanumot’ panagbiagna. Nasdaawak ta nagsao maipapan iti Biblia.

Idi agangay, naammuak nga Adrian Guerra ti naganna ken maysa a Saksi ni Jehova. Di nagbayag, nadlawko a nakapuy nga agbasa. Impapanko nga isut’ kabaelak, isu a saanak a madanagan. ‘Ngamin,’ kinunak iti unegko, ‘ammok ti Latin ken Griego. Nagadalak iti teolohia ken tawtawen ti binusbosko a nangilawlawag iti pilosopia kadagiti teologo ken obispo.’ Diak met ketdi agpannakkel wenno laisen isuna, ngem diak impagarup nga adda masursurok kenkuana.

Dinamagna ti kapanunotak iti saludsod nga, Apay a nagraira ti kinadakes iti lubong? Nagsaritaanmi daytoy, ket di nagbayag kiniddawna nga iruarko ti Bibliak. Kagatgatangko idi iti kaipabpablaak a Katoliko a Jerusalem Bible. Impabasana kaniak ti Apocalipsis 12:12, a kunana: “Ngem kadakayo, daga ken baybay, um-umay ti riribuk​—ta ti Diablo immulog kadakayo nga addaan iti pungtot, nga ammona a mabilbilangen dagiti aldawna.”

“Sigurado a tuktukoyenna ti panangrugi idi ti basol,” imballaetko. Impabasana kaniak ti konteksto, dagiti bersikulo 7-10, a kunana a ti gubat idiay langit ket nangrugi idi nagbalin nga Ari ni Kristo, ket kas resultana, naitappuak ni Satanas ken dagiti anghelna ditoy daga. “Dagiti nariribuk a kasasaad a maim-imatangantay itan ti resulta ti kasta unay a pungtot ti Diablo,” inlawlawag ni Adrian. “Ngem maragsakantayo ta ni Kristo ket Arin ken mabilbilangen dagiti aldaw ti Diablo.”

Naragsakanak a nakaammo iti daytoy iti Bibliak. Ngem nasdaawak met a nabalinan daytoy a nanumo ngem mannakigayyem a lalaki, ti natanang a panangilawlawag kaniak kadagiti Kasuratan.

Napennek ti Wawko iti Dios

Imbatiannak ni Adrian iti sumagmamano a pagbasaan ket inkarina nga agsubli. Naragsakanak iti sumaganad nga isasarungkarna, ket rinugiak nga inimtuod kenkuana dagiti saludsod a nabayagen a nangburibor kaniak, kas iti: “Kasano a nagbalin a Trinidad ti Dios?” ken, “Apay nga immulog idi ni Jesus idiay impierno?” Inusarna ti maysa a katulongan ti Biblia a napauluan Ti Kinapudno a Mangiturong iti Biag nga Awan Inggana, ket impabasana iti bukodko a Biblia dagiti naisitar a teksto kas sungbat dagiti saludsodko. Mabainak pay gapu ta diak pulos naammuan dagita. Naammuak a ti nagan ti Dios ket Yahweh, wenno Jehova, ket isut’ saan a Trinidad, a ti impierno ket tanem ken awan idi ti puot ni Jesus sadiay iti gistay tallo nga aldaw.​—Salmo 16:10; Eclesiastes 9:10; Isaias 42:8.

Masansan a dinamagko idiay seminario ti biag kalpasan ti ipapatay ket kinunada a ti langit ket kas ti maysa a dakkel a simbaan a pagdatagan ti amin iti sanguanan ti Dios ken pagkararagan. ‘Anian a makauma!’ napanunotko. Ngem itan, idi nailawlawag kaniak ti kari ti Biblia nga agnanayon a biag iti maysa a paraiso a daga, rimmayray ti pammatik iti ayat ti Dios iti sangatauan.​—Salmo 37:9-11, 39; Apocalipsis 21:3, 4.

Kalpasan ti sumagmamano nga isasarungkar, maysa nga aldaw simmangbay ni Adrian a kaduana ti maysa a ganggannaet, nga inyam-ammona kas manangaywan ti kongregasion. “Adu unay ti saludsodmo,” kinunana, “isu a pagarupek nga ad-adda a makatulong kenka daytoy a misionero.” Ngem magustuak ni Adrian, ket ti kaadda ti misionero ti nangpanerbios kaniak. Isu nga intultuloyko ti nakipagadal iti Biblia ken Adrian. Inrugikon a tinabunuan dagiti gimong idiay Kingdom Hall ket nasarakak a makaisuro unay dagiti palawag iti Biblia.

Panangparmek iti Danagko

Idi agangay, pinaregtanak ni Adrian nga iranud dagiti naadalko iti sabsabali. Kadagiti gimongda, maigunamgunam kadagiti Saksi ni Jehova a mangisuro iti binalaybalay. Kinapudnona, nabigbigko a ti tema ti Biblia a damo nga inlawlawag ni Adrian kaniak, ti ilalanlan ti kinadakes, ti naisingasing a topiko nga ilawlawag dagiti Saksi ni Jehova idiay Bolivia iti dayta a bulan idi 1970. Naawatak a ti pannakasanay ni Adrian ti ad-adda a timmulong kenkuana nga agserbi iti Dios ngem ti sangapulo a tawen a panagsanayko! Ngem, ti isasarungkar iti tattao kadagiti balbalayda ti nangpadanag kaniak. Naiduma dayta iti basta panangisuro kadagiti tao no makimisada idiay simbaan.

Iti sumaganad a panangiyadal ni Adrian kaniak, naglemmengak idiay balay ket pinagparangko nga awanak. Talaga a naginap nga addaak ta uray la eksakto a tallopulo a minuto a nagur-uray idiay ruar sakbay a pimmanaw. Ngem di nauma kaniak; nasdaawak ta nagsubli iti sumaganad a lawas. Nagin-inot a rimmayray ti panagayatko ken Jehova, ken naparmekko ti danagko. Idi 1973, nagpabautisarkam ken baket. Nagpayunir ni Porfiria, nagserbi iti amin-tiempo iti panangasaba ken panangyadal iti Biblia. Nagtultuloy a kasta agingga iti aldaw ti ipapatayna idi kattapog ti 1992.

Simmayaat ti panagbasa ni Adrian, ken adun a tawen nga agserserbiak kas maysa a panglakayen iti kongregasion. Agpadakam a nagtultuloy a mangikasaba iti naimbag a damag ti Pagarian ti Dios iti binalaybalay. Itay nabiit, naam-ammok ti maysa a babai a nagkuna: “Rumbeng a nagtalinaedka koma iti simbaan. Ad-adu komat’ naimbag a naaramidam.”

Kiniddawko nga iruarna ti Bibliana. Idi inruarna, impabasak ti Jeremias 2:13, a mangilawlawag no kasano nga inlaksid ti Israel ti Sao ti Dios. Kunana: “Naglikudandak nga ubbog dagiti dandanum a sibibiag, ket nagkalida kadagiti bubon nga agpaay kadakuada, bubbubon a narengngat a saan a mabatian iti danum.”

“Umasping iti dayta ti napasamak iti simbaan,” kinunak kenkuana. “Ti panangpadasda a penken ti waw ti tattao iti Dios babaen kadagiti Katoliko a sursuro nga awan idiay Biblia ket kas iti panangted iti danum manipud narengngat a bubon.” Kinapudnona, idi laeng nakipagadalak iti Biblia kadagiti Saksi ni Jehova a napennek ti wawko iti Dios.​—Kas insalaysay ni Hugo Durán.

[Ladawan iti panid 15]

Agkaduakam ken Adrian a mangiparang ti mensahe ti Pagarian

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share