Asidegen ti Biag nga Awanan Ut-ot!

DAGITI narikut a mekanismo ti bagi a mangsalaknib kadatayo manipud iti pannakadangran ket pudno a nakaskasdaaw. Ti panangusig kadakuada rumbeng a tignayennatayo a mangidayaw iti Namarsua, a kas iti salmista ti Biblia a nagsurat: “Idaydayawkanto ta nakaam-amak ken nakaskasdaaw ti pannakaaramidko.” (Salmo 139:14) Pudno unay, ti laeng Dios ti makaibanag iti biag nga awanan ut-ot! Ngem kasano a maibanag daytoy?

Paliiwenyo a kasakbayan la unay ti kari maipapan iti pannakapukaw iti ut-ot ken panagsangit, saritaen ti Biblia ti [maipapan iti] “maysa a baro a langit ken maysa a baro a daga; ta ti immuna a langit ken ti immuna a daga naglabasdan.” (Apocalipsis 21:1, 4) Siempre, saan a sarsaritaen ti Biblia ti literal a langit ken daga nga aglabas. Imbes ketdi, ibagbagana kas pangababaan, a ti naan-anay a baro a sistema dagiti bambanag sukatannanto daytoy agdama a sistema. Wen, maysa a baro, natantan-ok ngem gobierno ti tao ti makaibanag iti panangtagiragsak iti biag nga awanan ut-ot ditoy daga a mismo.

Iti panangdeskribirna iti daytoy a gobierno, kuna ti Biblia a ‘ti Dios ti langit mamangonto ti maysa a pagarian [wenno, gobierno] a . . . dadaelennanto ken ibusennanto amin dagitoy a pagpagarian, ket isu agtalinaedto iti panawen a di nakedngan.’ (Daniel 2:44) Idi adda ditoy daga ni Jesu-Kristo, insurona nga ikararagtayo daytoy a gobierno ti Pagarian idi kinunana: “Agkararagkayo, ngarud, a kastoy: Amami nga addaka sadi langit, Madaydayaw koma ti naganmo. Umay koma ti pagariam. Maaramid koma ti pagayatam, kas sadi langit kasta met ditoy daga.”​—Mateo 6:9, 10, King James Version.

Kasano, ngarud, a maibanagna ti kaipapanan dayta a kararag a biag nga awanan ti ut-ot agpaay kadakayo?

Maysa nga Agturay a Nabilbileg Ngem Tao ti Pannakabalinna

Ti sekreto agpannuray iti kinasirib ken pannakabalin daydiay pinili ti Dios a pangulo ti gobiernona. Dayta isu ni Jesu-Kristo a mismo. Maipapan kenkuana, kuna ti maysa a padto ti Biblia: “Ti panangiturayna maiparabawto iti abagana . . . Ti idadakkel ti panangiturayna ken ti kappia awanto ti inggana.”​—Isaias 9:6, 7, KJ.

Ti kinasirib ni Jesus, nga adda itan sadi langit, ket natantan-ok nga amang ngem [ti kinasirib] dagiti amin a mangngagas ditoy daga. Naan-anay a maawatanna ti kasasaad ti pisikal a bagitayo, agraman dagiti sistema ti panangsalaknibna iti bagina manipud iti pannakadangran. Idi isut’ maysa a tao ditoy daga nasurok a 1,900 a tawenen ti napalabas, awan ti sakit wenno an-annayen a dina naagasan. Ngarud impakitana iti nasaksaknap a pamay-an ti aramidennanto kas Agturay iti Pagarian ti Dios. Maipapan iti maysa a pasamak, kunaen ti Biblia:

“Idin dagiti dadakkel a bunggoy immasidegda kenkuana, a naikuyog kadakuada dagiti tattao a pilay, pawad, bulsek, umel, ken adu a sabsabali pay, ket ngangnganida la ipurruak ida iti sakaananna, ket inagasanna ida; iti kasta nagsiddaaw ti bunggoy idi nakitada a ti umel agsasao ken ti pilay magmagna ken ti bulsek makakita.” (Mateo 15:30, 31) Mairaman kadagiti an-annayen nga agasanto ni Jesus bayat ti panagturayna iti Pagarian isu dayta nakaam-amak, napaut nga ut-ot.

Kinapudnona, anian a nakaskasdaawto dayta a bendision! Ket saan a maibanag dayta maigapu laeng iti sumagmamano. Ti kari ti Namarsua ket: “Awanto ti agtaeng nga agkuna: ‘Masakitak.’” (Isaias 33:24) Ngarud, iti sidong ti panagturay ti Pagarian ti Dios, matungpalto ti kari nga, “awanto metten ti . . . ut-ot.”​—Apocalipsis 21:4.

Iti sidong ti nadayag a turay ti Pagarian ni Kristo, dagiti adu a mekanismo ti bagitayo, agraman dagidiay a mangsalaknib kadatayo manipud pannakadangran, agandardanto a naan-anay ta naikkatton ti natawidtayo a basol. Saanton a pulos a mangtuok ti pannakariknatayo iti ut-ot. Nakaragragsak, sigun kadagiti padto ti Biblia a matungtungpal itan, addatayon iti ruangan dayta a baro a lubong, a sadiay ti ut-ot dinton pulos mangpataud iti panagsagaba.​—Mateo 24:3-14, 36-39; 2 Timoteo 3:1-5; 2 Pedro 3:11-13.

Mabalinyo a tagiragsaken ti biag iti sidong ti Pagarian ti Dios inton ti kita ti ut-ot a mangsapsaplit ita kadagiti minilion a tattao awandanton. Ngem masapul nga adda aramidenyo. Intudo ni Jesu-Kristo ti kangrunaan a kasapulan idi kinunana iti kararag[na] iti Dios: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

Maragsakanto dagiti Saksi ni Jehova a tumulong kadakayo a manggun-od itoy a nasken a pannakaammo. Kiddawenyo laeng iti maysa kadakuada iti lugaryo, wenno agsuratkayo kadagiti manangipablaak daytoy a magasin, a yebkasyo ti tarigagayyo a makipagadal iti Biblia idiay pagtaenganyo wenno iti aniaman a kumbiniente a lugar. Mayurnosto ngarud ti panangammoyo iti ad-adu pay maipapan iti pangpanggep ti Dios agpaay kadagiti tattao tapno tagiragsakenda ti biag nga awanan ut-ot.