Panangampon—Maitutop Aya Kadakayo?
BABAEN TI KORESPONSAL TI AGRIINGKAYO! ITI BRITANIA
“MAYSA a serbisio agpaay kadagiti ubbing ti panangampon, saan a serbisio a mangipaay iti anak kadagiti awan annakda nga agassawa,” kuna ti maysa a social worker a babai a taga Britania. Nupay kasta, ania ti gagangay a makuna ti ubing iti pannakaamponna?
Pangpanggepenyo kadi ti mangampon iti ubing? Ngarud sanguenyo saan laeng a ti emosional a pangngeddeng no di ket ti pay pangngeddeng a di mabalbaliwan. Kasano ti kaballiginto ti pannakilangen ti ubing iti pamiliayo?
No maysaka a naampon nga ubing, ammom kadi no asino ti pudno a nagannakmo? No saan, ania ti pagarupmo a nakaidumaanna no am-ammom ida?
Maysaka kadi nga ina nga agpangpanggep a mangipaampon iti anakmo? Pudno kadi a ti panangampon ti kakaisuna a solusion ken ti kasayaatan a pagimbagan ti anakmo?
Idi 1995, nasurok a 50,000 nga ubbing ti naampon idiay Estados Unidos, ket ganggannaet ti agarup 8,000 kadakuada. Umad-adu dagiti tattao a mangampon iti annak kadagiti ganggannaet a pagilian. Sigun iti magasin a Time, iti napalabas a 25 a tawen nangampon dagiti pamilia idiay Estados Unidos iti nasurok a 140,000 a ganggannaet nga ubbing. Umasping ti bilang idiay Europa a 32,000 iti Sweden, 18,000 iti Holland, 15,000 iti Alemania, ken 11,000 iti Denmark.
Pampanunotenyo kadi ti mangampon iti ubing, wenno mangipaampon iti anakyo? Ti panangampon kaipapananna a ti biagyo—saan laeng a ti biag ti ubing—saanto a kas idin. Adda nainkalintegan a rason dagiti nangampon a manginanama iti adu a pagragsakan, ngem masapul met a sisasaganada maipaay iti adu a parikut ken pakaupayan. Kasta met, ti sakit ti nakem a mapadasan ti maysa nga ina a mangipaampon iti anakna mabalin a pulos a dinanto naan-anay a malipatan.
Mangiparang ti tunggal kaso iti karit iti panangpatanor wenno panangpadakkel iti agtutubo buyogen iti ayat. Salaysayen ti sumagsaganad nga artikulo dagiti dadduma a rag-o—ken karit—iti panangampon iti ubing.