Asino ti Nangimbento iti Kurbata?
BABAEN TI KORESPONSAL TI AGRIINGKAYO! IDIAY ALEMANIA
ITI intero a lubong, agarup 600 milion a lallaki ti kanayon a nakakurbata. Idiay Alemania, addaan iti agarup 20 a kurbata ti kadawyan a lalaki. Adu a lallaki ti masimronan a mangpampanunot, bayat nga isusuotda ti kurbata no ‘asino ngata ti nangirugi iti pannakausar ti kurbata?’ Nagtaudan ti kurbata?
Aklonen ti Steenkerke, maysa nga ili idiay Belgium, ti dayaw a “nangimbento” iti kurbata. Idi 1692, kellaat a rinaut dagiti puersa nga Ingles dagiti tropa a Pranses a naidestino sadiay. Sigun iti periodiko nga Aleman a Frankfurter Allgemeine Sonntagszeitung, “awan ti tiempo dagiti opisial a [Pranses] nga agkawes a siuumiso. Ngem madardaras nga inggalutda dagiti scarf iti unipormeda a silulukay iti tengngedda ket isuksokda dagiti ngudona iti ohales dagiti jacketda. Ngarud, naipasngayen ti kurbata iti immuna a pormana.”
Nupay kasta, ti arkos nga uso kadagiti soldado saan nga isu ti immuna. Kunaen dagiti eksperto iti pakasaritaan ti kurbata nga adu a siglo sakbayna, nagusar dagiti mannakigubat para iti Insik nga emperador a ni Cheng (Shih Huang Ti) iti lupot nga umasping iti scarf a nakupin a mayukkor iti tengnged, a mangipamatmat iti ranggoda.
Nupay kasta, nalabit a ti kalatakan, isu dagiti scarf nga inusar dagiti taga Croatia a makilablaban agpaay ken Ari Louis XIV iti France. Bayat ti parada ti biktoria idiay Paris, kasta unay ti pannakaallukoy dagiti Pranses kadagiti scarf dagiti taga Croatia ta inawaganda ida a cravates, manipud Cravate, maysa a Croat, ket rinugianda metten nga inusar dagiti scarf. “Nanipud idin,” insurat ti immunan a naibaga a periodiko, “nagtultuloyen a nagsaknap ti uso ti kurbata, nupay no dagiti soldado ti Steenkerke ti immuna a nangsiglot kadagiti scarf nga agbalin a kurbata.”
Bayat ti French Revolution (1789-99), mabalin nga ipamatmat ti maysa a lalaki ti panagduyosna iti politika babaen iti kolor ti “kurbata,” wenno scarf, a nayukkor iti tengngedna. Idi maika-19 a siglo, “natakuatan” ti naestilo a kagimongan ti Europa daytoy a porma ti kawes. Idi ngarud a naipangato ti kurbata manipud iti namilitaran ken napolitikaan a lugar ket nagbalin a paset ti aruaten ti kaaduan a lallaki. Ita saan laeng a maawat ti kurbata iti adu a kagimongan ti sangalubongan; iti dadduma a pamay-an, inkapilitanen dayta.
[Picture Credit Line iti panid 31]
Historic Costume in Pictures/Dover Publications, Inc., New York