Panangdaer iti Trahedia Babaen iti Panangandingay ni Jehova
BABAEN TI KORESPONSAL TI AGRIINGKAYO! IDIAY ESPAÑA
IDI Pebrero daytoy a tawen, agkakadua ti adu a taga-Bailén a Kongregasion dagiti Saksi ni Jehova idiay España a mangtagtagiragsak iti nasayaat nga aldaw iti asideg ti Sierra Nevada Mountains. Ngem lima la a kilometro manipud lugarda, maysa a napardas a kotse ti nangballasiw iti lane a pagtartarayan ti bus-da, a nakaigapuan ti dinnungparan. Adda bimtak, ket nauram ti bus. Nakaruar a dagus ti dadduma a pasahero ngem adu kadagiti adda iti likudan ti bus ti naangsan iti asuk ket natayda.
Agdagup iti 26 a Saksi ti nakettel ti biagda, agraman uppat nga amin-tiempo a ministro ken sumagmamano nga ubbing—gistay kakapat ti Kongregasion ti Bailén. Inyebkas ti ari ti España a ni Juan Carlos ti pannakipagrikna ti kaaduan nga Español idi insuratna iti telegramana iti alkalde ti Bailén: “Naklaatak unay iti nakaro nga aksidente. Awatenyo ti napasnek a pannakipagladingitmi. Pangngaasiyo ta iyallatiwyo iti pamilia dagiti biktima ti kasta unay a pannakipagrikna ken panangsaranaymi kabayatan dagitoy a nakalkaldaang a kanito.”
Apay a mapasamak dagita a trahedia?, ti saludsod a pampanunoten ti sumagmamano kadagiti rinibu a timmabuno iti pumpon. Nabatad a dagiti aksidente a maigapu iti “panawen ken di mapakpakadaan a pasamak” ti mabalin a mangapektar iti ili ni Jehova a kas met laeng iti asinoman. (Eclesiastes 9:11, 12, NW) Nupay kasta, ikarkari ni Jehova nga asidegen a mapukaw dagita a trahedia.—Apocalipsis 21:4, 5.
Adu a kameng iti pamilia ti Bethel dagiti Saksi ni Jehova idiay España ken rinibu a Saksi manipud dadduma a paset ti pagilian ti nagbiahe idiay Bailén tapno liwliwaen ken saranayen dagiti lokal a kakabsat. Dagiti umili ti Bailén, agraman dagiti lokal ken rehional nga agtuturay ti nakipagladingit met iti pamilia dagiti Saksi. Adu a managpaliiw ti nangdayaw iti bileg dagiti naulila a Saksi.
“Adun a tawen nga am-ammok dagiti Saksi,” kinuna ni Antonio Gómez, ti alkalde ti Bailén, “ket nupay maysaak nga agnostiko, dayawek ti pammatiyo. Idi napasamak ti aksidente, dagus a napanunotko a ti narelihiosuan ken natauan a kinasingedyo ti tumulong kadakayo a mangdaer iti trahedia a nasaysayaat ngem iti dadduma a grupo. Nakitak no kasano a sinaranay ti intero nga ili dagiti naulila a pamilia. Nalabit sakbayna, adda kamali a panangipapán ti tattao iti takderyo, ngem maragsakanak a mangibaga a napukawen dagitoy a panangipapán. Adda makin-uneg a bilegyo a narigat a maawatan ti di-Saksi a tao.”
Impudno ni José Borrell, ti ministro ti public works a timmabuno iti pumpon kas pannakabagi ti gobierno ti España: “Aniat’ makunayo kadagidiay namimpinsan a napukawan iti intero a pamiliada? Awan ti makaipaay iti nasaysayaat a liwliwa ngem ti nasarakanda iti pammatida. . . . Nakaskasdaaw ti pammatiyo.”
“Itultuloyyo a Liwliwaen ti Maysa ken Maysa”
Aniat’ “nasarakanda iti pammatida”? Kangrunaan iti amin, nasarakanda ti liwliwa manipud ken Jehova, “ti Dios ti amin a liwliwa, a mangliwliwa kadakami iti amin a rigatmi.” (2 Corinto 1:3, 4) Agpapan pay iti ladingitda, naaddaanda iti bileg a mangliwliwa iti maysa ken maysa babaen iti panangipapusoda iti sasao ni Pablo kadagiti taga Tesalonica: “Itultuloyyo a liwliwaen ti maysa ken maysa ken pabilgen ti maysa ken maysa.”—1 Tesalonica 5:11.
Makaparegta a kapadasan a makita dagiti Kristiano a kakabsat, a dadduma kadakuada ti napukawan iti aginggat’ walo a kabagian, a simmarungkar iti dadduma a naulila a miembro ti kongregasion. “Idi nagkikitakami, nagsisinnangitkami. Ngem kadagidi a lulua impalagipmi iti bagbagimi ti namnama a panangungar, ket naliwliwakami,” inlawlawag ni Francisco Saez, ti mamangulo a manangaywan, nga isu a mismo ti naulila iti dudua nga annakna.
“Dikam liniwayan ti trabahomi a panangasaba, ket pinagreggetanmi unay a sarungkaran ti di-Saksi a kakabagian dagiti natay, babaen ti panangusarmi iti broshur a No Adda Matay nga Ay-ayatenyo.” Intuloy ni Francisco: “No siak a mismo, kayatko ti mangasaba, tangay ammok a sumayaat ti riknak no mangasabaak iti sabsabali. Ket sigurado a nupay rummuarak nga agsangsangit, agawidak a naliwliwa.”
Nagsayaat ti reaksion dagiti umili ti Bailén iti daytoy a trabaho a panangasaba. Makalawas kalpasan ti aksidente, sinarungkaran ni Encarna, nga agladladingit iti pannakaulilana iti dua a balasangna ken uppat nga appoko, ti maysa a babai a nabiit pay a rinugianna nga inyadalan iti Biblia. Nangipapaayen ni Encarna iti Nainkasuratan a liwliwa iti daytoy a babai, a natayán iti asawa uppat a bulan kasakbayanna. “Ita dakamin a dua ti aglinlinniwa,” kinunana, bayat nga intuloyda ti panangadalda iti broshur a No Adda Matay nga Ay-ayatenyo.
Madagdagus met a dimteng ti saranay manipud iti sangalubongan a panagkakabsat. “Naparegta unay ti intero a kongregasion iti naawatmi a rinibu a surat ken telegrama,” inlawlawag ni Francisco Capilla, ti sekretario ti kongregasion. “Kasapulan a direkta a mangibaon ti opisina ti koreo iti van idiay balaymi iti kada aldaw tapno maitulod ida amin. Agyamankami unay iti naayat a pannakaseknan dagiti kakabsat.”
Namnama iti Trahedia
Adda kadi naimbag nga ibunga ti kasta a trahedia? “Ti puso ti masirib adda idiay balay a pagdung-awan,” insurat ni Ari Solomon idi ugma. (Eclesiastes 7:4) Maitunos iti daytoy a prinsipio, ti trahedia idiay Bailén ti ad-adda a namagpanunot iti dadduma a tattao maipapan iti relasionda iti Dios. Kinuna ni Faustino, di manamati nga asawa a napukawan iti dua kadagiti innem nga annakna iti aksidente, iti asawana a ni Dolores: “Adda man naimbag nga ipadamagko kenka. Mangrugiakon nga agadal iti Biblia, tangay kayatko a makita dagiti annakko idiay baro a lubong.”
Nupay saanto a dagus a madaeran dagiti kakabsattayo idiay Bailén ti ladingitda, liwliwaenda dagiti sabsabali ket maliwliwada met. An-andingayen ida ni Jehova babaen ti espirituna ken babaen iti pannaranay ti adu a naayat a kakabsat. Itultuloytayo ida nga ikararagan iti nailangitan nga Amatayo.
[Dagiti ladawan iti panid 26]
Uppat kadagidiay a natay