Manipud Managbasatayo
Panaggayyem Iyebkasko ti naimpusuan a panagyamanko iti artikulo nga “Agimtuod Dagiti Agtutubo . . . Apay a Diak Makataginayon Kadagiti Gagayyem?” (Mayo 22, 1996) Diyo ngata mailadawan ti kadakkel ti naitulong daytoy nga artikulo kaniak. Impaawatna kaniak nga agpapan pay kadagiti tubeng, posible ti maaddaan kadagiti manayon a panaggayyem. No dadduma, mapukawantay iti gagayyem agsipud ta itantantantayo a risuten dagiti di pagkikinnaawatan. Daytoy nga artikulo ti timmulong kaniak a mangparmek kadagiti pagkapuyak maipapan itoy a banag.
A. M. P., Brazil
Dimteng ti artikulo iti umiso a tiempo. Tallo a bulanen ti napalabas, limmamiis ti impatpategko a pannakigayyem iti maysa a balasang; agingga a dikam agsinsinnaritan. Idi dimteng ti artikulo, binasami nga agpada ket naamirismi a nagtignaykami a simamaag. Nagsaritakami a naimbag ket linawlawaganmi ti intero a dimi nagkinnaawatan. Ita, napabaro ti bileg ti panaggayyemmi.
N. T., Italia
Didigra ti Bulkan Malagipko dagiti damag ti panagbettak ti Mount Pinatubo idi 1991. Ngem nalipatakon dayta agingga a nabasak ti artikulo a “Lahar—Imbunga ti Mount Pinatubo.” (Mayo 22, 1996) Diak pay pulos nakadamag idi iti lahar ket naay-ayoak iti artikulo. Naisangsangayan ti kinatured ken kinamannakitulong nga impakita ti pamilia Garcia, nupay addada iti madalanan ti lahar.
S. F., Canada
Inabbukaynak ti artikulo. Makaparegta a basaen ti kapadasan dagiti Kristiano a kakabsat a nangtaginayon iti kinaregtada iti naespirituan a bambanag, nupay addada iti di makaay-ayo a kasasaad. Daytoy ti nangparegta kaniak a di mangipalubos a dagiti babassit a problema ti mamagliway kaniak kadagiti Nakristianuan a gimong wenno manglapped kaniak a makipaset iti panangasaba a trabaho. Pagyamanan iti artikulo!
S. D., Italia
Dikam pay nakadamag ken ni lakayko iti lahar, ngem ita naamirismin no kasano kapeligroso ken kapeggadda. Kayatmi nga ipakaammo kadagiti kakabsatmi idiay Pilipinas nga ikarkararaganmi ida ken dagidiay nakabael a timmulong kadakuada.
C. A. B., Guatemala
Berde a Rimat Kabasbasak ti artikulo a “Nakakitakayo Kadin iti Berde a Rimat?” (Mayo 22, 1996) Sumagmamano a tawenen ti napalabas, bayat nga ager-eroplanoak iti kakaykayuan ti Alaska, nasdaawak a nakakita iti asul-berde a rimat a nagpaut iti awan pay maysa a segundo. Diak pay nakasarak iti maysa nga artikulo a nangilawlawag iti daytoy a pasamak agingga ita. No dadduma, ipagarupko a daydit’ maysa la a banag a dinarepdepko!
G. C., Alaska
Pannakataranta Kayatko nga iyebkas ti panagyamanko iti artikulo a “Panangsaranget iti Pannakataranta.” (Hunio 8, 1996) Nagsagabaak iti kasta a pannakataranta iti innem a tawen. Kalpasan ti panagserbik kas payunir (amin-tiempo a managebanghelio) iti makatawen, masapul nga agsardengak agsipud ta awanen ti bilegko a mangdaer iti pannakatarantak. Anian a saem daydi agsipud ta agparang a nasalun-atak kadagiti nadekket a gagayyemko isu a didak maawatan. Nagrigat nga iladawan ti ragsakko idi nabasak daytoy nga artikulo.
O. S., Ukraine
Walon a tawen nga agserserbiak kas amin-tiempo a ministro. Ngem iti sumagmamano a tawen, nariknak nga awan serserbik ken kasta unay ti danagko. Idi nabasak daytoy nga artikulo a mangilawlawag kadagiti sintoma nga umasping kaniak, dagus nga inyaplikarko ti balakadna. Simmayaaten ti riknak, ket nakalkalman ti pusok.
K. M., Thailand
Nagpaagasak iti pannakatarantak ket natulonganak. Kaskasdi a sililimed a tutuokennak ti saludsod a, ‘Nakapuyak ngata iti naespirituan wenno nasadut?’ Ti panangbasak iti artikulo inikkatna ti kasta unay a dagsen nga adda iti abagak.
P. P., Finland