Manipud Managbasatayo
Orthodox Church Kas maysa a Kristiano nga Orthodox, naintrigaak iti artikuloyo a “Ti Greek Orthodox Church—Nabingay a Relihion.” (Enero 8, 1996) Inton padaksenyo manen ti Orthodox, ipudnoyo man met dagiti naitulongna, kas ti panangtaginayonna iti Kinakristiano kabayatan ti panangidadanes dagiti Islam ken ti turay dagiti Soviet. Malaksid pay, saan a maitunos iti Biblia ti panagsina ti Iglesia ken Estado. Naisina kadi idi dagiti gobierno da Ari David ken Solomon iti Iglesia?
M. F., Estados Unidos
Impamaysami ti madama a krisis a sangsanguen ti Orthodox Church—maysa a banag a pasingkedan unay ti warnakan idiay Grecia. Daytoy a krisis ket resulta ti di panagtungpal ti iglesia iti bilin ni Jesus nga agbalin a “saan a paset ti lubong” ken agtalinaed a neutral iti politika. (Juan 17:16)—ED.
Pannakataranta Pagyamanan iti artikulo a “Panangsaranget iti Pannakataranta.” (Hunio 8, 1996) Sangapulo ket uppat a tawenen a mapaspasamak kaniak dagitoy nga isesekken ket impagarupko no sisiak ti addaan iti kastoy a problema. No dadduma, sumken pay dagitoy a rikna uray idiay Kingdom Hall. Nupay adda latta dagiti problemak, talaga a tinulongannak daytoy nga artikulo.
C. C., España
Kasta unay ti panagarubos ti luak idi nabasak ti artikulo maipapan iti pannakataranta. Tulongannakto inton sumken manen ti pannakatarantak. Patiek a ti artikulo ti sungbat dagiti kararagko.
M. B., Scotland
Iti gistay 30 a tawen, diak maitured ti aglugan kadagiti tren wenno bus wenno aggian iti lugar nga aduan iti tattao. Dakkel a karit ti tumabuno kadagiti gimong idiay Kingdom Hall ken kombension. Isu a maawatanyo no kasano a gubuayan ti dakkel a pammaregta ken liwliwa kaniak daytoy nga artikulo. Naimpusuan nga agyamanak iti panagsuratyo maipapan itoy nga an-annayen iti makapabileg ken makaliwliwa a pamay-an.
Y. T., Japan
Managebanghelioak iti amin a tiempo, ket nanipud pay 1994 a mapaspasamak kaniak dagitoy terible nga isesekken. Napukawko ti rag-ok ken diak idi kayat ti rummuar iti balayko. Pagarupko no dagitoy a rikna ket gapu laeng iti kurang a pammati, ngem ita ammok a saan laeng a sisiak ti Kristiano a makapaspasar iti kastoy.
S. A., Brazil
Waltzing Matilda Ipalagip kaniak ti kanta a “Waltzing Matilda” dagiti nagsayaat a napalabas. Pagyamanan iti artikulo (Hunio 8, 1996) a nangipaay iti impormasion maipapan iti nagtaudan dayta a kanta. Ti panangbasak iti dayta ti nangpabaro manen iti panaginteresko a mangbasa iti amin nga artikulo ti Agriingkayo!
J. M., Alemania
Kababalin iti Telepono Pagyamanan iti ekselente nga artikulo a “Kasano ti Kababalinyo iti Telepono?” (Hunio 8, 1996) Agtartrabahoak iti maysa a banko nga agserserbi kadagiti kliente babaen iti telepono. Intedko ti artikulo iti superbisorko, ket kinunana a makagunggona, naintiempuan, ken praktikal ti artikulo. Kiniddawna nga iwarasko ti artikulo iti 32 nga opereytormi iti telepono.
N. J. S., Brazil
Tangay nagproblemaak iti napalabas kadagiti di makaay-ayo nga awag nga addaan iti kriminal a motibo, kanayon a sinurotmi ti rekomendasion ti kompania ti telepono nga ibabamin ti auditibo no agkedked ti immawag a makiam-ammo kalpasan ti tallo a nadayaw a kiddaw. Nagresulta daytoy iti namin-adu a pannakasair ti maysa a gayyem idi immawag ken nakipinnugto a kas iti nadakamat iti artikulo. Dagiti artikulo a kas itoy ti mangitandudo iti kinasingpet ken pannakaawat uray kadagiti kasla babassit a benneg.
G. A., Estados Unidos