Addanto Pay Aya Talna ken Kinatalingenngen?
IDI napagsaludsodanda no ania ti inanamaenda iti panagbakasion iti sabali a pagilian, dandani 3 iti tunggal 4 a Britano a turista ti simmungbat, “Talna ken kinatalingenngen.” Ngem gapu ta maysan a sangalubongan a parikut ti kinaarimbangaw, adut’ mamati a ti pudno a talna ken kinatalingenngen ket ar-arapaap laeng.
Nupay kasta unay ti panangikagumaan a mangkissay iti kinaarimbangaw, mabalin a pampanunotem no realistiko ti mamati nga agballiginto a naan-anay. Dagiti ngay dadduma a saan a maseknan a kas kenka?
Dagiti Parmeken a Lapped
Saan a nalaka ti makisarita kadagiti tattao a mannakisupiat, ket narigrigat pay ti mangipaawat iti panangmatmatmo. Idi nagtitipon dagiti naarimbangaw a tin-edyer iti ruar ti patakder a pagindegan ni Ron, nakigayyem kadakuada. Nakiam-ammo kadakuada. Timmulong pay a nangtarimaan iti maysa kadagiti bisikletada. Nanipud idin awanen ti parikutna kadakuada.
Usigenyo ni Marjorie, agsolsolo nga ina nga addaan balasitang a tin-edyer, nga agindeg iti maysa nga apartment a nagbaetan ti naarimbangaw a kaarruba. Awan ti alpombra ti suelo dagiti agab-abang iti ngato. Ngarud, nadlaw ni Marjorie a ti karadukod ti agtulid iti suelo a roller-skate dagiti ubbing, ti agbalandra a bola, wenno uray ti panagtabbugada a dumsaag iti kama makaisturbo kenkuana. Kasta met, ti inada agsapatos ti nangato ti takonna idiay pagtaengan. Naasi a kiniddaw ni Marjorie iti kaarrubana nga agulimekda koma bassit, ngem napaay gapu ta dida agkinnaawatan iti pagsasao. Ti lokal a munisipio intukonna a mangipatulod iti agipatarus a tumulong a mangrisut iti parikut, isu nga aguray ni Marjorie iti pagsaysayaatanna.
Iti babaenna adda maysa a lalaki a binigat nga agpatokar iti napigsa a musika iti nagbaetan ti alas siete ken alas otso, a kankanayon a bumanugbog ti bajo. Simmungbat ti lalaki iti nataktika nga iyaadanina a kasapulanna ti musika tapno ‘nasayaat ti riknana nga agtrabaho.’ Kasano a makaandur ni Marjorie?
“Agtepteppel ken agan-anusak,” kunana. “Implanok ti aramidek ket agtugawak nga agbasa uray no naarimbangaw. Nadlawko a dagus a maipamaysaak iti librok. Ket saanko unayen a madmadlaw ti arimbangaw.”
Iti kasumbangirna, ni Heather, agindeg iti maysa nga apartment a makatannawag iti nightclub, a sadiay, kalpasan ti naariwawa a rabii, agserra iti agarup alas sais ti bigat. Nupay nagreklamo idin kadagiti lokal nga autoridad, bassit laeng ti naaramidan a mangpasardeng iti panangisturbo.
Panungpalan ti Arimbangaw?
“Adu a tattao ti mariribukan ken maamak iti naan-anay a kinaulimek,” kuna ni Dr. Ross Coles iti Medical Research Council’s Institute of Hearing Research iti Britania. Ti napintas a kanta dagiti tumatayab, ti naalumamay a tapliak ti allon iti nadarat nga aplaya, ti naragsak nga ikkis dagiti ubbing—dagitoy ken dadduma pay nga uni paragsakendatayo. Nupay mabalin a tarigagayantayo itan ti mabang-aran iti arimbangaw, maragsakantayo iti kaadda dagiti naimbag a kadua a makisarita kadatayo. Inkari ti Dios ti talna ken kinatalingenngen kadagiti matalek nga adipenna.
Iti Biblia kuna ti salmista: “Dagiti naemma tawidendanto ti daga, ket maay-ayatandanto iti kinaruay ti talna.” (Salmo 37:11) Asidegen a makibiang ti nailangitan a gobierno ti Pagarian ti Dios iti ar-aramid ti tao. (Daniel 2:44) Kalpasanna, iti sidong ti panangituray ni Kristo Jesus, addanto “kinaruay ti talna, agingga a maawanen ni bulan.”—Salmo 72:7; Isaias 9:6, 7.
Masiguradoyo a ti pannakibiang ti Dios ibanagnanto ti talna ken kinatalingenngen a tarigagayantay amin, kas impadto ti mammadto ti Dios a ni Isaias: “Ti aramid ti kinalinteg isunto ti talna; ket ti patauden ti kinalinteg kinaulimek ken panagtalek nga agnanayon. Ket ti ilik agnaedto . . . iti natalingenngen a paginanaan.”—Isaias 32:17, 18.
Uray ita, makasarakkayo iti naespirituan a talna ken kinatalingenngen kadagiti panagtitipon dagiti Saksi ni Jehova iti lugaryo. Nupay manmano nga agtitipon ti pinullo a ribu nga agdayaw kadagiti dadakkel a kombension—ket dagitoy a panagtitipon ti pudno a ‘naarimbangaw kadagiti lallaki, babbai, ken ubbing’—saan a makaisturbo ti uni no di ket makaay-ayo. (Mikias 2:12) Padasenyo a mismo babaen ti pannakigimongyo kadagiti Saksi iti lugaryo wenno agsuratkayo iti maysa kadagiti direksion iti panid 5 daytoy a magasin tapno makaumanyo ida. Tagiragsakenyo ti pudno a talna ken kinatalingenngen a kaduada itan ken nalabit iti agnanayon.