“Ti Kumarkaro a Nakaidumaan ti Klero ken Pasurot”
“ADDA kumarkaro a nakaidumaan ti klero ken pasurot kadagiti iglesia ebanghelikal iti America,” kuna ni Robert K. Johnston, maysa a propesor iti teolohia ken kultura. Iti Ministerial Formation, maysa a magasin ti World Council of Churches, dakamatenna ti dadduma a makagapu iti daytoy a panagsina: Gapu iti kumarkaro a rigat ti pamilia, kayat dagiti pastor a ti eskediul ti trabaho ket kapada “ti turno dagiti doktor no ngudo ti lawas.” No agtrabaho ti pastor iti ad-adu nga oras, inanamaenna a masuelduan gapu iti bannogna. Kanayonanna, kuna ti propesor, “bayat nga umadu ti maitunos iti moral ken legal a parikut,” pakdaaran dagiti seminario ti teolohia dagiti graduadoda a lapdanda dagiti parikut babaen ti “nasinged a pannakigayyemda laeng iti ‘ummong’ dagiti dadduma a klero” ket tratuenda dagiti pasurotda a kas “kliente.” No kasta, awan duadua nga adu a pasurot, ti mangmatmat kadagiti pastorda a kas kameng ti natan-ok a klase a di makaawat kadagiti kasapulan ken parikut dagiti kadawyan a mannakimisa.
Ania a kita ti pastor ti mangparang-ay iti pagkinnaawatan dagiti klero ken pasurot? Maysa a panagadal a nangusig no apay a di nagballigi dagiti pastor iti ministerioda natakkuatanna a dagiti pasurot dida matmatan a napateg ti pannakaammo dagiti pastor iti akademia ken ti kinalaingda iti propesionda. Saan a birbiroken dagiti mannakimisa dagiti nalalaing, makatignay a pumapalawag, wenno nalaing nga administrador. Kangrunaan iti amin, kayatda a ti pastorda ket maysa a “lalaki nga agraem iti Dios” a mangaramid iti ikaskasabana. No awan dayta a kalidad, kuna ni Propesor Johnston, “awan ti maipaay nga impormasion wenno kinalaing a naipakita” a makarangtay iti nagdumaan.
Ania ti kuna ti Biblia a kasapulan ti maysa a panglakayen ti kongregasion? “Ti manangaywan masapul ngarud nga awan pakababalawanna, asawa ti maymaysa a babai, natimbeng iti panagug-ugali, nasimbeng iti panunot, naurnos, managpadagus, kualipikado a mangisuro, saan a mammartek a mannakiapa, saan a manangkabil, no di ket nainkalintegan, saan a mannakiringgor, saan a managayat iti kuarta, maysa a lalaki a mangidadaulo iti bukodna a sangakabbalayan iti nasayaat a pamay-an, addaan kadagiti annak nga agpaspasakop buyogen ti amin a kinaserioso . . . Mainayon pay, masapul met nga addaan iti nasayaat a pammaneknek manipud kadagiti tattao iti ruar, tapno saan koma a matnag iti pannakaumsi ken silo ti Diablo.”—1 Timoteo 3:2-4, 7.