Panagimdeng Babaen Kadagiti Matam
ANIA ti makatulong iti naballigi a pannakikomunikar iti Tuleng a tao? Nalawag ken umiso a panagkita. Napateg dayta no agsasao dagiti Tuleng a tattao. Kinapudnona, no agsinsinnenias ti dua a tao, ibilangda a nasabrak no adda sabali a kitkitaen ti maysa kadakuada ken dina mingmingmingan ti kasarsaritana. Ket kasano a maallukoymo ti atension ti Tuleng a tao? Imbes nga usarem ti naganna, ad-adda a maitutop no pikpikem ti abaga wenno takiagna, payapayam wenno no adda iti adayo, ibilinmo iti maysa a tao nga ayabanna dayta a tuleng. Depende iti kasasaad, mabalin nga agtabbugaka wenno iddepem sa sindiam met laeng ti silaw. Dagitoy ken ti dadduma a maitutop a pamay-an ti panangallukoy iti atension ti maibagay iti kasasaad dagiti Tuleng a tattao ken paset iti kultura dagiti Tuleng.
Ti Mamagkaykaysa a Lenguahe
No adda masabatda a Tuleng, impagarup dagiti dadduma a nalaklaka no ipabasada ti panaggaraw ti bibigda. Nupay kasta, adu a Tuleng ti mangibilang a limitado dayta a pamay-an ti pannakikomunikar. Siempre, adda dagiti mailaksid, ta dadduma a tao ket nalaing nga agbasa iti isao ti ngiwat, ngem kaaduanna, maibilang a kinamanangngaasi ti di maipagarup a nalaka a mabasa ti maysa ti ibagbagam. Nalabit ti maysa a para senias wenno ti panangisuratmo iti kayatmo nga ibaga ti mangted gundaway iti nabagas a pannakikomunikar.
Nupay kasta, no kanayon a kalangenmo dagiti Tuleng a tattao, saan kadi a nasaysayaat no adalem bassit ti agsenias? Anian a mamagkaykaysa a singgalut daytoy, nangnangruna kadagiti agkakapammatian! Mayasping dayta iti panagsursuro kadagiti kangrunaan a pagannurotan iti sabali a lenguahe iti dua ti lenguahena a kultura. Nabayagen nga interesado dagiti Saksi ni Jehova a magun-odan dagiti amin ti pannakaammo maipapan ken Jehova a Dios. No maamiristayo a dagiti Tuleng a tattao dida masursuro ti normal a panagdengngeg, anian a nasaysayaat nga amang no tuladentayo ida babaen ti panagsenias!—1 Corinto 9:20-22.
Kuna ni Antonino nga idi rinugianna ti timmabuno kadagiti Nakristianuan a gimong idiay Italia, idi damo “awan ti aktual ken aktibo a pannakipinnaregtana kadagiti kakabsat a makangngeg. Gapu ta dikam agkikinnaawatan, panagriknak idi ket maipaspasuliak.” Adu a miembro iti kongregasion ti nagtignay babaen ti panagadalda iti Italian Sign Language (LIS). Nangrugi a nakiadal iti Biblia dagiti interesado a tuleng, ket naidaulo dagiti gimong iti LIS. Naparegta ni Antonino ket ita kunana: “[Kayatkon] nga ibaga iti amin a gagayyemko a Tuleng maipapan kadagiti gimong ken ti nabara a panaginnayan-ayat iti ili ni Jehova.”
Iti intero a lubong, mangbubuangay dagiti Saksi ni Jehova kadagiti kongregasion ti panagsenias, a sadiay matagiragsak dagiti Tuleng ti nabara ken naayat a panaglalangen. Nasurok a 20 a tawenen nga adda dagiti grupo ti panagsenias para kadagiti Tuleng idiay España. Idiay Estados Unidos, adda madama a 19 nga aktibo a kongregasion para kadagiti Tuleng ken 47 a babbabassit a grupo.
Kabaelan dagiti Tuleng a tattao ti agserbi kas amin-tiempo a ministro (payunir), ministerial nga ad-adipen, ken papanglakayen ken kabaelanda pay ti agpalawag kadagiti kombension, agisuro iti Pioneer Service School, ken mangidaulo iti nadumaduma a pamay-an. Iti daytoy nga aglawlaw, awan ti limitasion, no di ket dagiti laeng gundaway a mangidayaw ken Jehova babaen iti abilidad ti maysa.
Ti nainkasigudan a panagkasapulantayo iti pannakikadua ken pannakikomunikar ket mayebkas iti adu a kultura ken lenguahe iti intero a lubong. Imbes a matmatantayo dagiti Tuleng a tattao kas addaan iti depekto wenno diperensia, anian a nasaysayaat nga amang no makitatayo dagiti gapuananda, abilidadda, ken galadda a pakabigbigantay amin kas tattao! Babaen ti panagraemtayo kadagiti sabsabali ken ti kinatuloktayo a makibagay, datay amin adda maitulongtayo iti nadumaduma ngem nagkaykaysa a natauan a pamilia.
[Ladawan iti panid 24]
No makisarsaritaka babaen iti panagsenias, kanayon a mingmingam ti kasarsaritam
[Ladawan iti panid 24]
Dagiti Tuleng a tattao a siraragsak nga agserserbi kas amin-tiempo a ministro
[Ladawan iti panid 25]
Panangisenias kadagiti kanta ti Pagarian idiay España
[Ladawan iti panid 25]
Panagpalawag iti diskurso iti kombension babaen iti Korean Sign Language
[Ladawan iti panid 25]
Dagiti nai-video a publikasion a naibasar-Biblia a naisenias