Manipud Kadagiti Agbasbasa
Panagpakamatay Dagiti Agtutubo Kayatko ti agyaman unay kadakayo iti serye dagiti artikulo nga “Ania ti Namnama Dagiti Agtutubo Itatta?” (Setiembre 8, 1998) Nakaluaak. Namin-adun a pinanggepko ti agpakamatay. Ngem maragsakanak ta saanak a nagballigi.
A. Z., Czech Republic
Mannakaawat unay dagitoy nga artikulo maipapan iti sensitibo a tema. Pinanggepkon a ketlen ti biagko idi rugrugi daytoy a tawen idi narekonoser a malmaldaangak. Pagyamanan iti daytoy naintiempuan a tema. Sinalbarna ti biagko.
R. P., Inglatera
Nakalkaldaang ta dua a kaklasek ti nagpanggep nga agpakamatay. Maysa kadakuada ti nagpakamatay agsipud ta awan aniaman a nakitana a naimbag a masakbayanna—bin-ig a pakarigatan laeng a masapul a daeranna. Praktikal ngarud daytoy nga artikulo, ta inlawlawagna iti nakabatbatad ken espesipiko a wagas no kasano nga addaan panggep ti masakbayantayo.
R. D., España
Ti artikuloyo pinikapikna ti pusok. Kas man la makisasao kaniak ni Jehova kas naayat nga Ama. Idi ubingak, nagsagabaak iti panangabuso ni amak. Impagarupko nga awan serserbik ken sangkapanunotko idi a ketlek sa laengen ti biagko. Ngem ita, kas insingasing ti artikuloyo, kanayonko a segseggaan “ti pudpudno a biag.”—1 Timoteo 6:19.
S. R., Brazil
Pagyamanan, nangnangruna kadagiti nadakamat nga imbaga dagiti agtutubo, a kaaduan ket aglaon kadagiti solusion iti parparikut a naisurat iti sumagmamano laeng a sasao.
W. H., Alemania
Panagtegged Pagyamanan unay iti panawenyo a nangipablaak iti makaisuro nga artikulo nga “Agimtuod Dagiti Agtutubo . . . Kasano a Makateggedak?” (Agosto 22, 1998) Marigatanak idi nga agsapul iti panggedan. Ngem sinurotko dagiti singasingyo isu a nakasapulak met laengen iti panggedan!
S. D., Ghana
Panagsenias Kalpasan ti panangbasak iti artikulo a “Lenguahe a Makitam!” (Setiembre 8, 1998), masapul nga agsuratak tapno agyamanak. Makatulong kadakami dagiti artikulo a kas iti daytoy tapno maawatanmi dagiti sabsabali a naiduma ti kasasaadda ngem kadakami. Adda gayyemko a naipasngay a tuleng, ket kayatko nga adalen ti agsenias. Ngem adda rason nga awan a pulos idi ti tiempok a mangaramid iti dayta. Pulos a diak itantanen ti panagsursurok iti dayta!
M. E., Inglatera
Kayatko ti agyaman kadakayo iti dakkel a panagreggetyo a tumulong kadagiti tuleng. Nagibunongak iti sumagmamano a kopia ti artikuloyo kadagiti opisial ti gobierno. Agsipud ta nagsayaat ti pannakaisuratna, nagkiddawda iti ad-adu pay a kopia! Impakitak met dayta iti maysa a babai a bumusbusor idi iti pannakiadal ti balasangna iti Biblia kadagiti Saksi ni Jehova. Kalpasan a nabasana ti artikulo, uray la a nakalua gapu iti rag-ona. Supsuportaranna itan dagiti panagregget ti tuleng a balasangna a tumabuno kadagiti Nakristianuan a gimong ken inkarina payen nga ikkanna iti pagpletena a dumar-ay iti Nakristianuan a kombension!
E. R., Mexico
Kayatko laeng a maammuanyo no kasano ti panangapresiarko iti artikulo. Kalatko nga adalen ti American Sign Language ken tumulong iti sign-language a kongregasion dagiti Saksi ni Jehova iti lugarmi. Ngem naupayak. Talaga a pinaregtanak ti artikulo a mangragpat iti kalatko!
N. D., Estados Unidos
Nakaay-ayat a maammuan a talaga nga agpanunot dagiti Tuleng iti panagseniasda. Kas tao a makangngeg, ad-addanton a mangpanunotak kadagiti wagas tapno makasaok dagiti Tuleng iti positibo a pamay-an.
P. H., Estados Unidos