Nagbalin a Mannakikappia Dagiti Dati a Mannakigubat
ADDA iti Disiembre 8, 2002, a ruar ti Agriingkayo! ti kapadasan ni Toshiaki Niwa, maysa a Hapones a dati a piloto a nasanay iti mision a kamikaze, wenno panagpakamatay a mangbomba iti barko dagiti kabusor, kabayatan ti Gubat Sangalubongan II. Insalaysay ni Niwa nga idi Agosto 1945, isu ket adda iti base dagiti eroplano iti asideg ti Kyoto nga agur-uray iti bilin nga agpakamatay a mangraut kadagiti barko a pakigubat ti Estados Unidos. Saan a pulos a dimteng dayta a bilin, ta sumagmamano la nga aldaw kalpasanna, nagpatingga ti gubat. Adu a tawen kalpasanna, nangrugi ni Niwa a nakipagadal iti Biblia kadagiti Saksi ni Jehova. Naammuanna a saan a makigubat dagidiay mayat a mangay-ayo iti Dios. Pudno a raraemenda dagiti padada a tattao, sadinoman ti pagnanaedan wenno pagilianda. (1 Pedro 2:17) Ti dati a mannakigubat a ni Niwa ket mannakikappia itan a mangiranranud iti mamagkaykaysa a mensahe ti Sao ti Dios iti sabsabali.
Ni Russell Werts, a taga Estados Unidos, ket napikapik iti pakasaritaan ni Niwa. Ngamin, nakirupak idi iti isu met la a gubat—ngem iti sabali a dasig. “Imbagam nga idi Agosto 1945, addaka iti asideg ti Kyoto nga agur-uray iti iraraut,” insurat ni Werts ken ni Niwa. “Malmalpas met idin ti pannakasanayko a mangaramid iti dayta nga iraraut. No saan a nagpatingga ti gubat iti dayta a tiempo, nalabit agpadata koma a natay iti agsumbangir a dasig iti dayta a rinnupak. Kas kenka ken iti pamiliam, dakami nga agassawa ket nagbalin a Saksi ni Jehova idi agangay. Makaparagsak a maammuan a data a dati nga agbinnusor a desidido nga agpinnatay ket saan la nga aggayyem itan no di ket agkabsatta payen!”
Kas kada Toshiaki Niwa ken Russell Werts, adu a nakaro idi ti panagginnurada ti agbibiag itan a sitatalna ken agkaykaysada agsipud ta ad-adalen ken iyap-aplikarda ti Sao ti Dios a ti Biblia. Kadagiti Saksi ni Jehova, adda dagiti Judio ken Arabo, Armeniano ken Turko, Aleman ken Ruso, Hutu ken Tutsi, a mangpampaneknek nga isuda dagiti pudno a Kristiano. Kinapudnona, kinuna ni Jesus: “Babaen iti daytoy, maammuanto ti isuamin a dakayo dagiti adalak, no addaankayo iti ayat iti maysa ken maysa.”—Juan 13:35.
[Dagiti Ladawan iti panid 31]
Da Toshiaki Niwa ken Russell Werts kabayatan ti Gubat Sangalubongan II