Nagbalin a “Soldado ni Kristo” ti Komander iti Militar

Kas insalaysay ni Mark Lewis

“Naimbag a bigatyo, Apo.” “Naimbag a malemyo, Madaydayaw a Mangiturturay.” “Naimbag a rabiiyo, Apo Presidente.” Dagitoy ti sumagmamano kadagiti pangkablaawko kas maysa a piloto ken Komandante iti buyot ti Royal Australian Air Force VIP. Impilotuak dagiti presidente ken opisial ti gobierno iti uneg ti Australia ken iti intero a lubong. Ngem adda ita ti nasaysayaat nga amang nga ar-aramidek. Palubosandak a mangisalaysay.

IDI 1951, nayanakak idiay Perth iti Makinlaud nga Australia. Militar ni tatangko. Idi agtawenak iti 15, nakimiembroak iti maysa a grupo dagiti agam-ampayag. Dayta ti nangrugian ti biagko iti tay-ak ti panagtayab.

Ngem di nagbayag, nagsina dagiti dadakkelko isu a nawarawara ti pamiliami. Ti komandante dagiti piloto iti Air Force ken ti pamiliana inampondak bayat ti kaaddak iti haiskul. Ti impluensiana ti nangtignay kaniak nga agbalin nga opisial dagiti kadete iti Royal Australian Air Force Academy.

Nagbalinak a Piloto

Agarup innem a tawen kalpasanna, nagraduarak kas maysa nga opisial iti Air Force nga addaan iti nalpas a kurso ken kas piloto. Ti umuna a trabahok ket mangpatayab kadagiti eroplano ti Air Force a mangitulod kadagiti kargamentoda iti intero nga Australia, iti Abagatan a Pacifico, ken iti Abagatan a Daya nga Asia. Masansan a lumasatkami iti nagbabaetan dagiti nangato a bambantay ken iti nauuneg a ginget sakami agdisso kadagiti naruot a kapanagan. Napeggad dayta a trabaho. Sumagmamano nga eroplano ken biag ti napukaw kadagidi a panawen. Ngem misionmi ngamin ti tumulong kadagidiay agnanaed kadagiti naiputputong a lugar. Agitulodkami kadagiti materiales a pagibangon kadagiti rangtay, babassit a buldoser a mausar a pagaramid kadagiti kalsada, pang-emerhensia a taraon, ken grupo dagiti mangngagas, agraman dagiti pasiente a delikado ti kasasaadda.

Idi 1978, nakualipikarak nga agisuro iti panagpatayab isu a nagsubliak iti Air Force Academy. Ditoy a naituloy ti panaggayyemmi ken Diane, maysa nga agkabannuag a balo nga addaan iti anak nga agtawen iti tallo. Kaeskuelaak idi ti asawa ni Diane ngem natay iti maysa nga aksidente iti panagpatayab. Idi indiayak ken Diane ti panagkallaysami, kinunana nga ikkak pay iti panawen nga agpanunot. Agpangadua ngamin no piloto manen ti pakiasawaanna.

Kabayatanna, inawatko ti pannakadutokko kas opisial nga assistant ti Gobernador Heneral ti Australia iti uneg ti 12 a bulan. Ti biag iti pagtaengan ti gobernador idiay Canberra ti nangpalawa iti pannakaammok iti tay-ak ti politika ken nangted kaniak iti gundaway a makalangen dagiti opisial ti gobierno, militar, ken relihion. Idi nalpas ti terminok, nagsubliak iti panangisuro nga agpatayab. Di nagbayag, nagkallaysakami ken Diane idi 1980.

Idi 1982, inawatko ti dua a tawen a panagsanay iti United States Air Force kas opisial a mangimaton iti kinatalged ti panagpatayab ken kas imbestigador iti aksidente mainaig iti panagpatayab. Nasursorko ti intero nga Estados Unidos agingga iti Amianan nga Ireland gapu iti dayta a trabaho, a ti panggepna ket tapno mapasayaat ti kinatalged ti panagpatayab.

Panagawid Idiay Australia

Idi nakaawidakon idiay Australia, nanayonan iti maysa ti pamiliami idi naipasngay ti anakmi a ni Kerry. Gapu iti kadagsen ti trabahok, ni Diane ti nagserbi kas ina ken ama dagiti annakmi, isu a nagsagaba ti pamiliami. Tallo a tawen kalpasanna, nadutokanak a mangimaton iti kaunaan a buyot a naitalek kaniak—ti Air Force VIP, kas nadakamat iti rugrugi. Idi bimtak ti gubat iti Gulpo ti Persia idi 1991, nakibinnulig ti buyotko iti dayta nga operasion ti UN ken iti dadduma pay idiay Pakistan, Afghanistan, Africa, ken Israel.

Idi 1992, nagbalinak a katulongan nga opisial ti Komandante ti Buyot ti Salaknib iti Australia. Gapu iti dayta a saadko, ad-adda a napaliiwko ti relasion ti militar, politika, ken ti UN. Nakitak ti adu a pagkurangan ti UN. Ngem agparang idi a dayta ti kakaisuna a namnama a makaipaay iti nasaysayaat a lubong. Nupay kasta, adda dagiti napasamak iti pagtaenganmi a namagpanunot kaniak.

Nasungbatan Dagiti Saludsod ni Diane

Dati a Katoliko ni Diane. Kalpasan a natay ti immuna nga asawana, binirbirokna dagiti sungbat kadagiti saludsodna ngem napaay. Dimmakes ti kasasaad idi naginteres iti okulto ti inauna nga anakmi a ni Renee. Iti pagtaengan ti maysa a gayyemmi, nakita ni Diane ti magasin nga Agriingkayo! a mangipakpakaammo iti sumaganad nga isyu maipapan iti Satanismo.a Damona a makakita iti magasin nga Agriingkayo! Idi agawid, pampanunotenna no kasano a makaala iti kopia dayta nga isyu.

Tallo nga aldaw kalpasanna, simmarungkar dagiti Saksi ni Jehova iti pagtaenganmi ket nakaala ni Diane iti kopia dayta a magasin. Idi agangay, nagpayadal iti Biblia ken nangrugi a makigimong. Maragsakanak iti pannakipagadalna ken kinaduaak pay ketdi kadagiti dadduma a gimong, ngem diak interesado nga agadal iti Biblia. Saan a napateg ti relihion kaniak. Mamatiak iti Dios ngem adu unay ti nakitak a panaginsisingpet iti relihion isu a diak interesado iti dayta. Diak maawatan, kas pagarigan, no apay nga isursuro dagiti papadi ti ayat ken talna ngem supsuportaranda met ti gubat.

Mangikabil idi ni Diane kadagiti kopia Ti Pagwanawanan ken Agriingkayo! iti nagduduma a paset ti balay tapno basaek. Ilimedko a basaen ti dadduma kadagita sa isublik met laeng kas iti dati a pannakaipuestona. Diak ngamin kayat a panunotenna nga interesadoak. Ngem bayat nga umad-adu ti pannakaammok iti Biblia, dua a teksto ti namagpanunot kaniak. Ti maysa ket ti Apocalipsis 19:17, 18 a nangdakamat kadagiti tumatayab a manganto kadagiti nalasag a paset dagiti “komandante ti militar.” Ti maikadua isu ti Apocalipsis 17:3 a nangdakamat iti “eskarlata ti marisna nga atap nga animal.” Patien dagiti Saksi a ti UN ti isimsimbolo daytoy nga atap nga animal, maysa a panangmatmat a maisupadi iti panangmatmatko iti dayta nga organisasion.b Ngem diak sinerioso dayta.

Idi 1993, inawisnak ni Diane a tumabuno iti aldaw ti bautismona. Diak ninamnama dayta nga awisna. Inyimtuodko kenkuana, “No kas pagarigan ta kasapulam ti agpili, asino ti piliem, siak wenno ni Jehova?” Ti sungbatna: “Ni Jehova. Ngem sapay koma ta diak maipasango iti kasta a panagpili yantangay agpada a napategkayo iti biagko.” Nabigbigko a masapul nga am-ammuek a naimbag no asino daytoy a sabali a persona nga ipatpategna. Maysa a panglakayen ti nangitukon a mangyadal kaniak iti Biblia ket inawatko dayta.

Naginteresak unay kadagiti padto ti Biblia, nangnangruna dagidiay mainaig kadagiti pakasaritaan ti militar ken politika. Kas pagarigan, bayat ti panagsanayko iti Air Force, naadalko dagiti namilitariaan a gapuanan dagiti nagkauna a Griego. Ita, naadalko a dakkel a paset dayta a pakasaritaan ti sinigsiglo a nasaksakbay a naisurat iti Daniel kapitulo 8. Dayta a padto ken ti dadduma pay ti in-inut a nangkombinsir kaniak a ti Biblia ket impaltiing ti Dios.

Nagbaliw metten ti panangmatmatko iti UN. Naamirisko a ti militar dina marisut dagiti parikut ti sangatauan, a saan a ti gubat ti mangyeg iti pudpudno a talna, ken saan a ti UN ti makarisut kadagiti panagsisina maigapu iti politika, relihion, ken puli a pakaigapuan dagiti gubat. Mangrugin a mabigbigko a ti laeng Dios ti makasolbar kadagiti parikut ti sangatauan. Kinapudnona, agparang nga ar-aramidennan dayta kas paneknekan ti sangalubongan a panagkakabsat dagiti Saksi ni Jehova. (Salmo 133:1; Isaias 2:2-4) ‘Ngem kabaelak ngata a tallikudan ti biagko iti militar tapno agserbiak iti Dios?’ napanunotko.

Panagbiag a Mayannurot iti Biblia

Idi 1994, nakapampanunotak met laeng idi timmabunoak iti kombension distrito dagiti Saksi ni Jehova idiay Sydney. Naiparang iti dayta a programa ti maysa a naibatay-Biblia a drama a nangitampok iti panagpili a nasken nga aramiden ti nagkauna nga ili ti Israel: Agserbida ken Jehova wenno ken Baal, ti didiosen dagiti Canaanita. Ni Elias a propeta ni Jehova kinaritna dagiti Israelita: “Kasanonto kabayag nga agallaallatiwkayo iti dua a nagduma a kapanunotan? No ni Jehova ti pudno a Dios, sumurotkayo kenkuana; ngem no ni Baal, sumurotkayo kenkuana.” (1 Ar-ari 18:21) Simmarut iti pusok dagita a sasao. Kas kadagiti Israelita, saanak a makadesision. Ngem masapul nga agdesisionakon: Agserbiak kadi ken Jehova wenno itultuloyko ti biagko iti militar?

Bayat ti panagawidmi ken Diane iti dayta a rabii, imbagak kenkuana a panawakon ti Air Force ket kayatkon ti agbalin a Saksi ni Jehova. Nasdaaw iti bigla a desisionko ngem naan-anay a sinuportaranna. Sumagmamano nga aldaw ti naglabas ngem saanen a nagbalbaliw ti desisionko isu nga impakaammokon ti panagikkatko iti militar.

Iti dayta a tiempo, siak ti Komandante ti grupo dagiti opisial ti kadete iti Australian Defence Force Academy idiay Canberra, ti kabesera ti pagilian. Imatmatonak ti militar ken ti panageskuela ti agarup 1,300 a kadete ken opisial ti Army, Navy, ken Air Force. Iti panagturpos ti klase iti dayta a tawen, impakaammok iti tallaong a buklen dagiti opisial ken dagiti 400 a kadete nga addan iti maikapat a tawen ti panagsanayda, a panawakon ti militar tapno isurok ti maipapan iti Biblia kadagiti binalaybalay kas maysa a boluntario a Kristiano a ministro. Dayta a pakaammo ti namataud kadagiti makapainteres a saritaan.

Iseserrek iti Amin-Tiempo a Ministerio

Inrugik ti nangasaba iti aldaw kalpasan unay ti panagepekto ti panagikkatko. Tallo a bulan kalpasanna, nagpabautisarak idi Abril 1995. Iti kabiitan a panawen, nagpasalistaak kas regular pioneer. Kaipapanan dayta nga ad-adu nga oras ti busbosek iti trabaho a panangasaba.

Nupay sigud a maysaak a komandante iti militar, nagbalinak itan “soldado ni Kristo.” Agkalikagum dayta iti adu a panagbalbaliw. (2 Timoteo 2:3) Maysa kadagiti damo nga annongek isu ti panangyawat kadagiti mikropono kabayatan dagiti gimong. Imbes a mangmandar, masapul a sursuruek ti naasi a panagkiddaw. Nagbalin a napatpateg kaniak ti konsiderasion ken ayat imbes a ti panagbalin nga episiente, nupay marigrigatanak latta a mangtimbeng kadagitoy a galad. Ken gapu ta bimmasiten ti sapulko, masapul a pasimplienmi a sangapamilia ti panagbiagmi.

Talaga a maragragsakanak iti trabaho a panangasaba agingga ita. Naminsan, bayat a kaduami ti balasitangmi a ni Kerry nga agtawen idi iti siam, pinaregtami a paliiwenna ti reaksion dagiti bumalay. Nakitami nga adu ti saan nga interesado ngem adda met dagidiay nadayaw ken interesado pay ketdi. Makaparegta kadakami dayta. Nagadal met iti Biblia ti inauna nga anakmi ngem iti agdama, pinilina ti saan nga agserbi ken Jehova.

Imparegtami ken Kerry a ragpatenna ti amin-tiempo a ministerio. Iti nabiit pay, naggiddankami a nageskuela iti Pioneer Service School. Damona dayta ket maikadua met kaniak. Anian a rag-o a makita ti balasangmi ken ti dadduma pay nga agtutubo a rumangrang-ay iti naespirituan ken mangipangpangruna iti Nakristianuan a ministerio!​—Salmo 110:3.

Aglaplapusanan a Bendision

No lagipek ti napalabas, adda dagiti nagpadaan ken nagdumaan ti militar ken ti panagbalin a soldado ni Kristo. Agpada a kalikagumanda ti kinasungdo, kinatulnog, kinatarnaw, disiplina ti bagi, ken panagsakripisio. Ngem nupay adu iti militar ti situtulok a matay maigapu iti pagilian ken gagayyemda, makalikaguman kadagiti pudno a Kristiano nga ayatenda uray dagiti kabusorda. (Mateo 5:43-48) Maysa pay, malaksid a mapadayawan dagiti bannuar iti militar gapu iti maysa a nagapuananda a pammaneknek ti kinaturedda, dagiti pudno a Kristiano magun-odda ti anamong ti Dios babaen ti panagtultuloyda a matalek​—nga agkalikagum iti agtultuloy a panagbalinda a natured iti sidong ti awan sarday nga ibubusor, pangumsi, ken dadduma pay a pannubok. (Hebreo10:36-39) Dagiti pada a Kristiano ti kasisingpetan a naam-ammok a tattao.

Maisupadi kadagiti kablaaw a nadakamat iti rugrugi daytoy a pakasaritaan, ti pangkablaawko ita ket “Naimbag a bigatmo, Kabsat,” wenno “Naimbag a rabiim, Kabsat.” Anian a nakaragragsak ti agserbi iti Nakristianuan a ministerio a kadua dagiti tattao a pudno nga agayat iti Dios! Ngem ti kadakkelan a dayaw isu ti panagserbi iti mismo a Kangatuan, ni Jehova! Daytoyen ti kasayaatan a pangbusbosak iti biagko.

[Footnotes]

[Blurb iti panid 14]

Nupay adu a kameng ti militar ti sidadaan a matay para iti pagilian ken gagayyemda, naibilin kadagiti pudno a Kristiano nga ayatenda uray dagiti kabusorda

[Ladawan iti panid 12, 13]

Panagpatayab iti eroplano ti Air Force VIP iti ngatuen ti Parliament House, Canberra

[Ladawan iti panid 15]

Drama a naibatay iti Biblia bayat ti 1994 a kombension distrito idiay Sydney, Australia

[Ladawan iti panid 15]

Dakami ken Kerry iti Pioneer Service School

[Ladawan iti panid 15]

Dakami kada Diane ken Kerry ita