Makipagrag-okayo iti Naragsak a Dios

“Kamaudiananna, kakabsat, itultuloyyo ti agrag-o, . . . ket ti Dios ti ayat ken ti talna maaddanto kadakayo.”​—2 CORINTO 13:11.

1, 2. (a) Apay nga adu ti saan a naragsak ti biagda? (b) Ania ti rag-o, ket kasanotay a mapatanor dayta?

KADAGITOY naladingit nga al-aldaw, bassit la ti makita ti adu a tattao a rason tapno agrag-oda. No dumteng ti didigra kadakuada wenno iti asinoman nga ay-ayatenda, mariknada ti kas iti narikna ni Job idi ugma, a nagkuna: “Ti tao, a nayanak manipud babai, ababa ti biagna ken namelmelan iti pannakariribuk.” (Job 14:1) Saan a maliklikan dagiti Kristiano ti pakarikutan ken kinairteng kadagitoy “napeggad a tiempo a narigat a pakilangenan,” ket di pakasdaawan a no dadduma maupay dagiti matalek nga adipen ni Jehova.​—2 Timoteo 3:1.

² Kaskasdi, mabalinan dagiti Kristiano ti agrag-o uray no masusuotda. (Aramid 5:40, 41) Tapno maawatantayo no kasano a posible daytoy, usigentay pay nga umuna no ania ti rag-o. Nadepinar ti rag-o kas “ti emosion a matukay gapu iti pannakagun-od wenno panangsegsegga iti banag a naimbag.”a Gapuna, mabalintay ti agrag-o no iwayaantay a panunoten dagiti agdama a bendision a sagsagrapentayo bayat a mennamennaentayo dagiti makaparagsak a bambanag nga agur-uray kadatayo iti baro a lubong ti Dios.

3. Kasano a maikuna nga addaantay amin iti rason nga agrag-o?

³ Addaantay amin kadagiti bendision a pagyamyamanantayo. Mabalin a mapukaw ti maysa nga ulo ti pamilia ti trabahona, ket natural laeng a maseknan. Kayatna nga ipaay ti kasapulan dagiti ay-ayatenna. Kaskasdi, mabalinna latta ti agyaman gapu iti pisikal a kired ken nasayaat a salun-atna. No makasarak iti panggedan, makapagtrabaho manen iti napinget. Iti sabali a bangir, mabalin a ti maysa a Kristiano a babai ket bigla a nakaptan iti nakaro a sakit. Nupay kasta, mabalinna ti agyaman gapu iti pannaranay dagiti naayat a gagayyem ken kameng ti pamilia a mangtultulong kenkuana a mangsaranget iti sakitna buyogen ti dignidad ken tured. Ket amin a pudno a Kristiano, uray aniat’ kasasaadda, makapagrag-oda iti pribilehio a mangammo ken Jehova, “ti naragsak a Dios,” ken ni Jesu-Kristo, “ti naragsak ken maymaysa a Mannakabalin nga Agturay.” (1 Timoteo 1:11; 6:15) Wen, ni Jehova a Dios ken ni Jesu-Kristo ti kararagsakan. Nataginayonda ti rag-oda nupay dagiti kasasaad iti daga ket adayo a naiduma iti panggep ni Jehova idi damo. Adu ti masursurotayo iti ulidanda no kasanotay a mataginayon ti rag-otayo.

Pulos a Dida Napukaw ti Rag-oda

4, 5. (a) Ania ti inaramid ni Jehova idi nagrebelde dagiti immuna a tao? (b) Kasano a tinaginayon ni Jehova ti positibo a panangmatmat iti sangatauan?

⁴ Idiay minuyongan ti Eden, nakasalsalibukag ken perpekto ti isip da Adan ken Eva. Addaanda iti nabunga a trabaho ken maikanatad nga aglawlaw a pangaramidanda iti dayta. Kangrunaan iti amin, addaanda iti pribilehio a makikomunikar a kanayon ken Jehova. Panggep ti Dios a maaddaanda iti naragsak a masanguanan. Ngem di napnek dagiti immuna a nagannak kadatayo kadagitoy amin a naimbag a sagut; tinakawda ti maiparit a bunga manipud iti “kayo ti pannakaammo iti naimbag ken dakes.” Daytoy a panagsukir ti nangpatanor iti amin a ladingit a mapaspasarantayo a kaputotanda.​—Genesis 2:15-17; 3:6; Roma 5:12.

⁵ Nupay kasta, saan nga impalubos ni Jehova a ti kinaawan panagyaman da Adan ken Eva ti mangikkat iti rag-ona. Adda panagkompiansana a ti puso ti uray sumagmamano laeng kadagiti kaputotanda ket matignay nga agserbi kenkuana. Kinapudnona, kasta unay ti panagkompiansana ta, uray pay sakbay a naipasngay ti umuna nga anak da Adan ken Eva, impakaammona ti panggepna a mangsubbot kadagiti natulnog a kaputotanda! (Genesis 1:31; 3:15) Kadagiti simmaganad a siglo, kaaduan iti sangatauan ti simmurot kadagiti addang da Adan ken Eva ngem saan a linaksid ni Jehova ti sangatauan gapu iti kasta a nasaknap a panagsukir. Imbes ketdi, impamaysana ti atensionna kadagiti lallaki ken babbai a ‘namagrag-o iti pusona,’ dagidiay pudpudno a nangikagumaan a mangay-ayo kenkuana agsipud ta ay-ayatenda.​—Proverbio 27:11; Hebreo 6:10.

6, 7. Ania ti nakatulong ken Jesus a mangtaginayon iti rag-ona?

⁶ Ni met ngay Jesus​—kasanona a tinaginayon ti rag-ona? Kas mannakabalin nga espiritu a parsua idiay langit, addaan ni Jesus iti amin a gundaway a makaimatang kadagiti aktibidad dagiti lallaki ken babbai ditoy daga. Nupay nakita ni Jesus dagiti pagkurkuranganda, ay-ayatenna ida. (Proverbio 8:31) Idi immay ditoy daga ken aktual a “nakipagnaed” kadagiti tattao, saan a nagbaliw ti panangmatmatna iti sangatauan. (Juan 1:14) Aniat’ nakatulong iti perpekto nga Anak ti Dios a mangtaginayon iti kasta a positibo a panangmatmat iti managbasol a sangatauan?

⁷ Umuna iti amin, nainkalintegan ni Jesus no maipapan iti ninamnamana a maaramidanna a mismo ken dagiti sabsabali. Ammona a dina makomberte ti lubong. (Mateo 10:32-39) Gapuna, maragsakan no adda uray maysa laeng a tao a mangipangag iti mensahe ti Pagarian. Nupay saan a kankanayon a makaay-ayo ti kababalin ken tigtignay dagiti adalanna, ammo ni Jesus nga iti pusoda talaga a tarigagayanda nga aramiden ti pagayatan ti Dios, ket maigapu iti dayta ay-ayatenna ida. (Lucas 9:46; 22:24, 28-32, 60-62) Imutektekanyo ta iti kararagna iti nailangitan nga Amana, ginupgop ni Jesus ti positibo a panagtignay dagiti adalanna agingga iti daydi a gundaway: “Tinungpalda ti saom.”​—Juan 17:6.

8. Mangdakamatkayo iti sumagmamano a pamay-an a mabalintay a tuladen ni Jehova ken ni Jesus no maipapan iti panangtaginayon iti rag-otayo.

⁸ Awan duadua a mabenepisiarantay amin no imutektekantay a naimbag ti ulidan ni Jehova a Dios ken ni Jesu-Kristo iti daytoy a banag. Mabalintay ngata nga ad-adda pay a tuladen a naan-anay ni Jehova, nalabit babaen ti di pannakaringgor unay no saan a mapasamak dagiti bambanag sigun iti ninamnamatayo? Mabalintay ngata nga ad-adda pay a suroten a naimbag dagiti addang ni Jesus babaen ti panangtaginayon iti positibo a panangmatmat iti agdama a kasasaadtayo, kasta met ti panagbalin a nainkalintegan kadagiti inanamaentayo iti bagbagitayo ken iti sabsabali? Kitaentayo no kasano a mayaplikar ti sumagmamano kadagitoy a prinsipio iti praktikal a wagas iti benneg a napateg kadagiti naregta a Kristiano iti uray sadinoman​—iti tay-ak ti ministerio.

Taginayonen ti Positibo a Panangmatmat iti Ministerio

9. Kasano a napabaro ti rag-o ni Jeremias, ket kasano a makatulong kadatayo ti ulidanna?

⁹ Kayat ni Jehova a pagrag-oantayo ti agserbi kenkuana. Ti rag-otayo saan koma nga agpannuray kadagiti resulta a magun-odtayo. (Lucas 10:17, 20) Adu a tawen a nangaskasaba ni propeta Jeremias iti di nabunga a teritoria. Napukawna ti rag-ona idi impamaysana ti atensionna iti negatibo a reaksion dagiti tattao. (Jeremias 20:8) Ngem idi inus-usigna no kasanot’ kasayaatna ti mismo a mensahe, napabaro ti rag-ona. Kinuna ni Jeremias ken Jehova: “Ti sasaom nasarakan, ket kinnanko ida; ket ti saom agbalin kaniak a panagragsak ken panagrag-o ti pusok; ta ti naganmo naipanagan kaniak, O Jehova.” (Jeremias 15:16) Wen, nagrag-oan ni Jeremias ti pribilehiona a mangikasaba iti Sao ti Dios. Posible met dayta kadatayo.

10. Kasanotay a mataginayon ti rag-otayo iti ministerio uray no saan a nabunga ti teritoriatayo iti agdama?

¹⁰ Uray no di ipangag ti kaaduan a tattao ti naimbag a damag, addaantayo iti amin a rason nga agrag-o no makiramramantayo iti ministerio iti tay-ak. Laglagipenyo a nalawag a ninamnama ni Jehova nga adda dagiti tattao a matignay nga agserbi kenkuana. Kas ken Jehova, pulos a ditay koma mapukawan iti namnama nga addanto met laeng makabigbig iti isyu ti kinasoberano ket ipangagda ti mensahe ti Pagarian. Ditay liplipatan nga agbaliwbaliw ti kasasaad dagiti tattao. No maipasangoda iti di ninamnama a pukaw wenno krisis, uray dagiti indibidual a kontenton iti kasasaadda mabalin a pagpanunotanda a naimbag ti kaipapanan ti biag. Sisasaganakayo kadi a tumulong no agbalinen dagiti kasta a tattao a “sipapanunot iti naespirituan a kasapulanda”? (Mateo 5:3) Kinapudnona, mabalin nga adda tao iti teritoriayo a madadaan nga umimdeng iti naimbag a damag iti sumaruno nga isasarungkaryo!

11, 12. Ania ti napasamak iti maysa nga ili, ket ania ti maadaltayo iti dayta?

¹¹ Agbaliwbaliw met ti pakabuklan ti teritoriatayo. Usigenyo ti maysa a pagarigan. Agnanaed iti maysa a bassit nga ili ti nasinged-panaglalangenna a grupo dagiti agkabannuag a pagassawaan nga addaan annak. Iti tunggal ruangan, no sumarungkar dagiti Saksi ni Jehova, agpapada ti maipasabat kadakuada a sungbat, “Saankami nga interesado!” No adda mangipakita iti interes iti mensahe ti Pagarian, dagus la nga upayen dagiti kaarruba tapno saanton a makisao kadagiti Saksi. Nalawag a maysa a karit ti mangasaba sadiay. Nupay kasta, saan a simmuko dagiti Saksi; intuloyda latta ti nangasaba. Aniat’ resultana?

¹² Idi agangay, dimmakkel ti adu kadagiti ubbing iti dayta nga ili, nangasawada, ket nagtaengda sadiay. Idi mabigbigda a saan a nangyeg iti pudpudno a kinaragsak ti wagas ti panagbiagda, ti sumagmamano kadagitoy nga agkabannuag a tattao inrugida a biroken ti kinapudno. Nasarakanda dayta idi impangagda ti naimbag a damag nga iwarwaragawag dagiti Saksi. Kalpasan ti adu a tawen, nangrugin a rumang-ay ti bassit a kongregasion iti dayta a lugar. Panunotenyo laengen ti rag-o dagiti agibumbunannag iti Pagarian a di simmuko! Sapay koma ta ti kinapinget a mangiranud iti nadayag a mensahe ti Pagarian mangyeg met kadatayo iti rag-o!

Saranayendakayo Dagiti Kapammatianyo

13. Siasino ti mabalintay nga asitgan no maupaytayo?

¹³ No mamuntuon dagiti parikut wenno dumteng ti didigra iti biagyo, sadinot’ mabalin a pakagun-odanyo iti liwliwa? Dagiti minilion a dedikado nga adipen ni Jehova umasidegda nga umuna ken Jehova babaen ti kararag, kalpasanna kadagiti Kristiano a kakabsatda. Idi adda ditoy daga, tinagipateg ni Jesus a mismo ti pannaranay dagiti adalanna. Iti daydi rabii sakbay ti ipapatayna, tinukoyna ida kas “dagidiay nagtalinaed kaniak kadagiti pannakasusuotko.” (Lucas 22:28) Siempre, imperpekto dagidiay nga adalan, ngem naliwliwa ti Anak ti Dios gapu iti kinasungdoda. Makagun-odtayo met iti bileg manipud kadagiti kapammatiantayo.

14, 15. Ania ti nakatulong iti maysa a pagassawaan tapno madaeranda ti ipapatay ti anakda, ket ania ti maadalyo iti kapadasanda?

¹⁴ Dagiti Kristiano nga agassawa a da Michel ken Diane nabigbigda no kasanot’ kapateg ti pannaranay dagiti kakabsatda. Natakuatan nga addaan tumor iti utek ti anakda a ni Jonathan nga agtawen iti 20, maysa a Kristiano a nasaranta ken naraniag ti masakbayanna. Inkagumaan a salbaren dagiti doktor, ngem kimmaro ti pisikal a kasasaad ni Jonathan agingga nga iti maysa a malem, isut’ naturog ken patay. Nalapunos iti liday da Michel ken Diane. Gistay dida napuotan a dandanin agleppas ti Gimong ti Serbisio a maang-angay iti daydi a rabii. Ngem gapu ta kasapulanda ti liwliwa, kiniddawda iti kaduada a panglakayen a kuyogenna ida a mapan idiay Kingdom Hall. Idi simmangpetda, apag-isu a mayan-anunsio iti kongregasion a natayen ni Jonathan. Kalpasan ti gimong, dagiti aglulua a nagannak ket pinalawlawan dagiti kakabsatda, a nangarakup ken nangliwliwa kadakuada. Kinuna ni Diane: “Napalalo ti ladingitmi idi simmangpetkami idiay Kingdom Hall, ngem anian a liwliwa ti impaay kadakami dagiti kakabsat​—anian a panangpakiredda kadakami! Nupay dida maikkat ti saem a nariknami, tinulongandakami a mangandur iti rigat a sagsagabaenmi!”​—Roma 1:11, 12; 1 Corinto 12:21-26.

¹⁵ Gapu iti rigat, nagbalin a nasingsinged da Michel ken Diane kadagiti kakabsatda. Dayta ti nangpasinged met kadakuada nga agassawa. Kinuna ni Michel: “Nasursurok nga ipateg nga ad-adda pay ti ing-ingungotek nga asawa. No maup-upaykami, pagsaritaanmi a dua ti kinapudno a linaon ti Biblia ken no kasano a sarsaranayennakami ni Jehova.” Innayon ni Diane: “Dakdakkel ti kaipapananna kadakami ita ti namnama nga ipaay ti Pagarian.”

16. Apay a nasken a datayo ti umuna nga agtignay a mangibaga kadagiti kakabsattayo no ania dagiti kasapulantayo?

¹⁶ Wen, dagiti kakabsattayo agserbida a kas “makapabileg a tulong” kadatayo kabayatan dagiti narigat a kanito iti biag ket iti kasta tumulong kadatayo a mangtaginayon iti rag-otayo. (Colosas 4:11) Siempre, saanda a mabasa dagiti panunottayo. Nasayaat ngarud nga ibagatay kadakuada no kasapulantay ti tulong. Iti kasta mabalintay nga iyebkas ti napasnek a panangipategtayo iti aniaman a liwliwa a kabaelan nga ipaay dagiti kakabsattayo, a matmatantay dayta a kas naggapu ken Jehova.​—Proverbio 12:25; 17:17.

Imutektekanyo ti Kongregasionyo

17. Aniada a karit ti sangsanguen ti maysa nga agsolsolo nga ina, ket kasanotay a matmatan dagiti kas kenkuana?

¹⁷ No imutektekanyo nga ad-adda dagiti kapammatianyo, ad-adda met a masursuroyo nga apresiaren ida ken pagrag-oanyo ti makitimpuyog kadakuada. Imutektekanyo ti kongregasionyo. Aniat’ makitayo? Adda kadi agsolsolo nga ina a mangikagkagumaan a mangpadakkel kadagiti annakna iti dalan ti kinapudno? Inut-utobyo kadin ti nasayaat nga ulidan nga ipakpakitana? Panunotenyo ti sumagmamano kadagiti problema a sangsanguenna. Ti maysa nga agsolsolo nga ina nga agnagan Jeanine dinakamatna ti dadduma kadagitoy: kinaliday, seksual a panangriribuk dagiti lallaki a katrabahuan, limitado unay a badyet. Ngem kinunana a ti kadakkelan a karit isut’ panangasikaso iti emosional a kasapulan dagiti annak, yantangay naisalsalumina ti tunggal ubing. Dinakamat ni Jeanine ti sabali pay a problema: “Pudno a maysa a karit ti panangliklik iti pagannayasan a mangipabiang iti anak a lalaki ti kinaulo iti sangakabbalayan tapno masulnitan ti kaawan ti asawa a lalaki. Adda balasangko, ket no dadduma malipatak a padpadagsenak gayam gapu ta isut’ pagipekpeksaak kadagiti personal a problemak.” Kas iti rinibu a managbuteng-Dios nga agsolsolo a nagannak, amin-tiempo nga agtartrabaho ni Jeanine ken mangtartaripato iti sangakabbalayanna. Iyad-adalanna met iti Biblia dagiti annakna, sansanayenna ida iti ministerio, ken ikuykuyogna ida kadagiti gimong ti kongregasion. (Efeso 6:4) Anian a ragsak ni Jehova nga inaldaw a makaimatang iti panagregget daytoy a pamilia nga agtalinaed a natarnaw! Saan kadi a maragsakantayo no adda kasta a kakabsat iti nagtetengngaantayo? Pudno a kasta.

18, 19. Iyilustraryo no kasanotay a mapauneg ti panangipategtayo kadagiti kameng ti kongregasion.

¹⁸ Imutektekanyo manen ti kongregasionyo. Mabalin a makitayo dagiti matalek a balo “a saan a pulos limmanglangan” kadagiti gimong. (Lucas 2:37) Adda kadi tiempo a malidlidayda? Siempre, mailiwda unay kadagidi assawada! Ngem okupadoda nga agserserbi ken Jehova ken maseknanda kadagiti sabsabali. Ti natimbeng ken positibo a kababalinda parayrayenna ti rag-o ti kongregasion! Kinuna ti maysa a Kristiano a nasurok a 30 a tawennan iti amin-tiempo a ministerio: “Ti maysa kadagiti kangrunaan a pagrag-oak isut’ pannakakitak kadagiti lallakay ken babbaketen a kakabsat a naglasat iti adu a pakasuotan ngem simamatalek nga agserserbida pay laeng ken Jehova!” Wen, dakkel a pammaregta kadagiti ub-ubing dagiti lallakayen a Kristiano iti nagtetengngaantayo.

¹⁹ Dagiti met ngay kabbaro a nabiit pay a nakitimpuyog iti kongregasion? Saan kadi a maparegtatayo no iyebkasda ti pammatida bayat dagiti gimong? Panunotenyo ti nagrang-ayandan sipud idi nangrugida nga agadal iti Biblia. Sigurado a maay-ayo unay kadakuada ni Jehova. Kastatay met kadi? Iyeb-ebkastay kadi ti anamong ken komkomendarantay ida iti nagapuananda?

20. Apay a maikuna a ti tunggal kameng ti kongregasion adda napateg nga akemna iti kongregasion?

²⁰ Naasawaanka kadi, agwaywayas, wenno agsolsolo a nagannak? Ulilaka kadi iti ama (wenno ina), wenno baloka kadi? Adu kadin a tawen a naitimpuyogka iti kongregasion wenno karugrugim pay laeng ti makitimpuyog? Inanamaem a ti kinamatalekmo ket makaparegta kadatayo amin. Ket no makiramanka iti panagkanta iti kanta ti Pagarian, no agkomentoka wenno adda pasetmo iti Teokratiko nga Eskuelaan ti Panagministro, mangnayon dagita iti rag-otayo. Kangrunaanna, pagrag-oenna ti puso ni Jehova.

21. Addaantay iti adu a rason a mangaramid iti ania, ngem ania a salsaludsod ti tumaud?

²¹ Wen, uray kadagitoy nariribuk a panawen, mabalintay ti agrag-o nga agdaydayaw iti naragsak a Diostayo. Addaantay iti adu a rason a mangipangag iti pammaregta ni Pablo: “Itultuloyyo ti agrag-o, . . . ket ti Dios ti ayat ken ti talna maaddanto kadakayo.” (2 Corinto 13:11) Ngem kasanon no maipasangotayo iti natural a didigra, pannakaidadanes, wenno nakaro a kinapanglaw? Posible kadi a mataginayon ti rag-otayo uray iti sidong dagiti kasta a kasasaad? Ammuenyo ti sungbat kadagita a saludsod bayat nga usigenyo ti sumaganad nga artikulo.

[Footnote]

Masungbatanyo Kadi?

• Ania ti rag-o?

• Kasano a ti panangmantener iti positibo a kababalin tumulong kadatayo a mangtaginayon iti rag-otayo?

• Ania ti tumulong kadatayo a maaddaan iti positibo a panangmatmat iti teritoria ti kongregasiontayo?

• Kadagiti ania a pamay-an nga ipakpakitayo ti panangipategyo kadagiti kakabsat iti kongregasionyo?

[Dagiti Ladawan iti panid 10]

Mabalin nga agbalbaliw dagiti tattao iti teritoriatayo

[Ladawan iti panid 12]

Aniada a karit ti sangsanguen dagiti kameng ti kongregasionyo?