Ti Panangmatmat ti Biblia
Madusa Kadi Dagiti Dakes a Tattao iti Umap-apuy nga Impierno?
NI Gertrude, maysa a mannursuro a Pentecostal, ket napeklan a manamati iti umap-apuy nga impierno. Para kenkuana, awan ti hustisia no awan ti kasta a lugar a pakadusaan dagiti nakaaramid iti nakaam-ames a krimen. Saan a nagbalbaliw dayta a pammati ni Gertrude. Kinunana, “Diak la ketdi kayat ti agserbi iti Dios no awan ti umap-apuy nga impierno a pakadusaan dagiti managdakdakes.”
Mapuoran kadi idiay impierno dagiti dakes a tattao, kas isursuro ti adu a relihion? No saan, ania ngarud a pannusa ti awatenda?
Ti Damo a Panangdusa ti Dios
Sigun iti Biblia, ti Dios pinarsuana a perpekto ti umuna a pagassawaan, da Adan ken Eva. (Genesis 1:27; Deuteronomio 32:4) Inkabilna ida iti paraiso a minuyongan ken inikkanna ida iti gundaway nga agbiag nga agnanayon. Nupay kasta, adda maysa a naiparit kadakuada. Pinakdaaran ida ti Dios: “Manipud iti tunggal kayo iti minuyongan mabalinmo ti agpennek a mangan. Ngem no maipapan iti kayo ti pannakaammo iti naimbag ken dakes dika mangan manipud iti dayta, ta iti aldaw a manganka manipud iti dayta mataykanto a di bumurong.”—Genesis 2:16, 17.
Nakalkaldaang ta saanda a nasalimetmetan ti kinasungdo ken kinatulnogda iti dayta a simple a pannubok. Gapuna, masapul nga ipataw kadakuada ti Namarsua ti dusa nga ipapatay. “Iti ling-et ta rupam mangankanto iti tinapay agingga nga agsublika iti daga, ta dayta ti nakaalaam. Ta tapokka ket iti tapok agsublikanto.”—Genesis 3:19.
No mapuoran da Adan ken Eva idiay impierno, saan ngata a binallaagan koma ida ti Dios mainaig iti kasta a pannusa? Ngem ti kinapudnona, awan ti dinakamatna a panagsagaba kalpasan ti ipapatay. Kasano koma nga agsagabada? Awan met ti imortal a kararuada nga agtultuloy nga agbiag kalpasan ti ipapatayda. Imbatad dayta ti Biblia: “Ti kararua nga agbasbasol—dayta a mismo matayto.”—Ezequiel 18:4.a
Kas ti Gubuayan ti biag, ammo ti Namarsua kadatayo ti amin a banag maipapan iti biag ken ipapatay. Kuna ti Saona a dagiti “natay . . . saanda a pulos [a] sipapanunot iti aniaman.” (Eclesiastes 9:5) Dayta ti makagapu a saan a nagsagaba da Adan ken Eva iti maysa nga umap-apuy nga impierno kalpasan ti ipapatayda. Imbes ketdi, nagsublida iti tapok ket awandan. “Saanda a pulos [a] sipapanunot iti aniaman.”
Agsagabatayo Kadi Kalpasan ti Ipapatay?
Kuna ti Biblia iti Roma 5:12: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao.” No kasta, nainkalintegan kadi a patien nga agsagaba dagiti tattao iti maysa nga umap-apuy nga impierno tapno ikaroda dagiti basolda, idinto ta ni Adan a nangyeg iti ipapatay iti amin a sangatauan ket nagsubli laeng iti tapok kalpasan ti ipapatayna?—1 Corinto 15:22.
Amintayo agraman ni Adan ket naipasidong iti maymaysa a linteg. “Dagiti isupapak ti basol isu ti ipapatay.” Kanayonanna, no matay ti maysa a tao, “naluk-atanen iti basolna.” (Roma 6:7, 23) No matay ti naimbag ken dakes a tao ket awan kadakuada ti agsagaba kalpasan ti ipapatayda, kasano ngarud a maipaay ti Dios ti hustisia?
Ti Kinahustisia ti Dios
Saan a nagbalbaliw ti panggep ti Dios agpaay iti sangatauan sipud idi pinarsuana ti umuna a pagassawaan ken imbilinna kadakuada nga agpaaduda ken aywananda ti daga. (Genesis 1:28) Nalawag a daytoy ti nagtultuloy a panggepna kas indeklarana idi agangay: “Dagiti nalinteg tagikuaendanto ti daga, ket agtaengdanto nga agnanayon iti dayta.”—Salmo 37:29.
Imutektekanyo ta agbiag ditoy daga dagiti nalinteg. Naragsak ti biagda ken perpekto ti salun-atda. “Sigurado nga agballiginto” ti orihinal a panggep ti Dios a mapno ti daga kadagiti nalinteg a tattao. Mapasamakto dayta inton ti agdama a dakes a sistema ket sukatan ti Dios iti baro a lubong.—Isaias 55:11; Daniel 2:44; Apocalipsis 21:4.
Mapagungarto dagiti binilion a tattao a saan a makaammo kadagiti paglintegan ti Dios ken umawatda kadagiti instruksion tapno agbiagda iti baro a lubongna. (Isaias 11:9; Juan 5:28, 29) Iti kasumbangirna, asinoman a di mangannurot kadagiti linteg ti Dios ket madusanto iti “maikadua nga ipapatay,” ti agnanayon nga ipapatay.—Apocalipsis 21:8; Jeremias 51:57.
Kas Dios ti ayat, nalawag a saan a tuoken ni Jehova dagiti tattao iti maysa nga umap-apuy nga impierno. (1 Juan 4:8) Saanna met a palubosan nga agtultuloy ti kinadakes. Maitutop laeng nga ipanamnama kadatayo ti Salmo 145:20 a “ni Jehova saluadanna amin dagidiay mangay-ayat kenkuana, ngem amin dagidiay nadangkes talipuposennanto.” Saan kadi a pammaneknek dayta a ni Jehova ket Dios ti ayat ken kinahustisia?
[Footnote]
a Iti Biblia, ti “kararua” tukoyenna ti mismo a persona—saan ket a maysa a banag a naisina iti bagi. Kuna ti Genesis 2:7: “Ni Jehova a Dios binukelna ti tao manipud tapok a naggapu iti daga ket impuyotna kadagiti abut ti agongna ti anges ti biag, ket ti tao nagbalin a kararua a sibibiag.” Saan a naikkan ni Adan iti kararua a naisina iti bagina. Imbes ketdi, ni Adan a mismo ti sibibiag a kararua.
NAPANUNOTYO KADIN?
◼ Adda kadi imortal a kararuatayo?—Ezequiel 18:4.
◼ Ania ti kasasaad dagiti natay?—Eclesiastes 9:5.
◼ Kasano a dusaen ti Dios dagiti nadangkes?—Salmo 145:20.
[Blurb iti panid 11]
‘Dagiti natay saanda a pulos a sipapanunot iti aniaman.’—Eclesiastes 9:5
[Picture Credit Line iti panid 10]
Ladawan: www.comstock.com