Ania a Talaga ti Mapasamak No Matay ti Tao?

“Saan a matay ti amin a kararua, uray dagidiay nadangkes . . . Madusada iti agnanayon a panagibales ti apuy a di maiddep, ket dida matay, dida pulos kabaelan [a pagpatinggaen] ti rigatda.”​—Clement iti Alexandria, mannurat idi maikadua ken maikatlo a siglo K.P.

KAS ken Clement, dagidiay mangisursuro a ti impierno ket pagtutuokan ipagarupda a dagiti tattao ket addaan iti di matay a kararua. Anamongan kadi ti Biblia dayta a pannursuro? Usigem ti ibagbaga ti Sao ti Dios kas sungbat kadagiti sumaganad a saludsod.

Ti kadi immuna a tao a ni Adan ket addaan iti di matay a kararua? Kastoy ti kuna Ti Biblia, nga impablaak ti Philippine Bible Society (PBS), maipapan iti pannakaparsua ni Adan: “Ni Jehova Dios binukelna ti tao iti tapuc ti daga, ket impuyotna iti agongna ti anges ti biag; ket ti tao nagbalin a cararua a sibibiag.” (Genesis 2:7) Imutektekam ta saan nga ibagbaga dayta a teksto a ni Adan ket naikkan iti kararua.

Ania ti napasamak ken Adan kalpasan a nagbasol? Saan nga agnanayon a pannakatutuok iti impierno ti pannusa ti Dios kenkuana. Imbes ketdi, kastoy ti kinuna Ti Baro a Naimbag a Damag Biblia maipapan iti sentensia ti Dios: “Masapul nga agling-etka ket agtrabahoka iti nadagsen tapno adda ibunga ti daga agingga nga agsublika iti daga a nakaparsuaam. Nabukelka iti tapok ket agsublikanto met laeng iti tapok.” (Dakami ti nangitaliko; Genesis 3:19) Saan nga imparipirip ti Dios nga adda aniaman a paset ni Adan nga agtultuloy nga agbiag kalpasan ti ipapatayna. Idi natay ni Adan, ti kararua a ni Adan ket natay.

Adda kadi asinoman a tao nga addaan iti di matay a kararua? Kinuna ti Dios ken propeta Ezequiel: “Ti cararua nga agbasol matayto.” (Ezequiel 18:4, Ti Biblia) Insurat ni apostol Pablo: “Babaen iti maysa a tao [a ni Adan], immay ti basol ditoy lubong ket babaen iti basol, immay met ti ipapatay. Iti kasta, nagsaknap ti ipapatay iti entero a sangkataoan, agsipud ta nagbasol amin a tattao.” (Roma 5:12, Ti Baro a Naimbag a Damag Biblia) No nagbasol ti amin a tattao, ti ngarud lohikal a konklusion ket matay amin a kararua.

Adda kadi pay mapanunot wenno marikna ti natay a kararua? Kuna ti Sao ti Dios: “Dagiti sibibiag ammoda a mataydanto: ngem dagiti natay dida ammo ti aniaman.” (Eclesiastes 9:5, Ti Biblia) Kas panangdeskribirna no ania ti mapasamak iti tao no matay, kuna ti Biblia: “Isu agpulang iti dagana; iti dayta met la nga aldaw dagiti panpanunotna mapucawda.” (Salmo 146:4, Ti Biblia) No dagiti natay ket “dida ammo ti aniaman” ken ‘dagiti panpanunotda mapucaw,’ kasano koma a mariknada pay ti aniaman a pannakatutuok idiay impierno?

Ni Jesu-Kristo inyarigna ti ipapatay saan nga iti kaadda ti puot no di ket iti pannaturog.a (Juan 11:11-14) Ngem mabalin a di umanamong ti dadduma yantangay ibagbagada nga insuro ni Jesus a nabara ti impierno ken maitapuak dagiti managbasol iti umap-apuy nga impierno. Usigentayo no ania a talaga ti kinuna ni Jesus maipapan iti impierno.

[Footnote]