Stress—Peggad iti Salun-at

“Napaut ken agbaliwbaliw ti oras ti trabahok iti aldaw ken rabii. Masansan a kalpasan ti panagoperak iti maysa nga ospital, agdardarasak manen a mapan iti sabali nga ospital. Nagkaro pay met ti trapik.”—Dr. Peter Stuart, South Africa.

NALABIT adda pamalatpatam iti marikrikna ni Dr. Stuart uray no naan-anay nga agduma ti pakaigapuan ti stress a mapaspasaranyo. Aniaman dayta—nakaro a trapik, di pagkikinnaawatan iti balay wenno iti pagtrabahuan, wenno sabali pay—ti stress ket gagangayen kadagiti tattao.

Nasurok a 3,000 a tawenen ti napalabas, sipaprangka nga inamin ti batidon a mannakigubat: “Ti buteng, wen, ti met laeng panagpigerger sumrek kaniak, ket ti panagkuyegyeg abbongannak.” (Salmo 55:5) Isu ket na-stress. Idi ubing pay a pastor, nasken a sarangtenna ti maysa a leon, oso, ken nakabutbuteng a mannakigubat a porsegido a mangpapatay kenkuana.—1 Samuel 17:4-10, 23, 24, 34-36, 41-51.

Saan met ketdi nga interamente a makadangran ti stress. Kinapudnona, makatulong dayta tapno masarangettayo ti narigat a situasion. Kadagiti situasion a mamagpeggad iti biag, ti stress ket nakatulong kadagiti tattao tapno makaaramidda kadagiti banag a dida pulos ipagarup a kabaelanda. No adda napateg nga aramidem, ti stress ti mangpaadu iti adrenaline iti bagim tapno mairingpasmo dayta iti naituding a tiempo.a

Nupay kasta, tumaud dagiti problema no kanayontayo a ma-stress ken saan a makapagrelaks ti bagitayo. Sigun iti maysa a managsirarak, “ti stress ti numero uno a peggad iti salun-attayo.” No panagriknam ket nalabesen ti stress-mo wenno dimo kayat a mapasaran ti kasta a kasasaad, nalabit mayimtuodmo, “Adda kadi maaramidak tapno mabang-aranak manipud iti stress?”

Wen, adda! Ti pakabangbang-aran ti adu ket magun-odan ti amin. Aggapu dayta iti nalabit dimo ninamnama a gubuayan—ti Biblia a Sao ti Dios. Nupay saan a libro iti medisina, mangipaay ti Biblia iti praktikal a sirib a makatulong kadatayo. Ilawlawagna no apay a napno iti stress ti biagtayo ita ken ipabigbigna dagiti makagapu wenno mangpakaro iti dayta. Naglaon met kadagiti praktikal a singasing tapno maksayan ken madaerantayo ti stress.

[Footnote]