Agimtuod Dagiti Agtutubo

Kasanok a Maragpat Dagiti Kalatko?

ANIA ti kayatmo kadagiti sumaganad?

● Dakdakkel a panagtalek iti bagi

● Ad-adu a gagayyem

● Agbalin a naragragsak

Kinapudnona, mabalin a maadda kenka amin dagita a tallo! Kasano? Mangaramidka kadagiti kalat ken ragpatem dagita. Usigem dagiti sumaganad.

Dakdakkel a panagtalek iti bagi No mangaramidka kadagiti babassit a kalat ken maragpatmo dagita, ad-addanto nga agkompiansaka a mangaramid kadagiti daddadakkel a kalat. Dakdakkelto met ti panagtalekmo a sumango kadagiti inaldaw a karit—kas iti panangsaranget iti panangpilit dagiti kapatadam. Nalabit makitanto ti sabsabali ti kompiansam ket raemendaka. Mabalin a didakanto unayen pilpiliten. Kinapudnona, mabalin nga apresiarendakanto payen.—Idilig ti Mateo 5:14-16.

Ad-adu a gagayyem Magustuan dagiti tattao ti makikadua kadagidiay addaan iti kalat—dagidiay ammoda ti kayatda ken sisasagana a mangragpat kadagita. No adda dagiti makigayyem kenka gapu kadagiti kalatmo, masansan nga isuda ti tumulong tapno maragpatmo dagita.—Eclesiastes 4:9, 10.

Agbalin a naragragsak Admitirentayo: Saanka unay a naragsak no agur-urayka lattan iti mapasamak iti biagmo. Ngem no nangaramidka kadagiti kalat ken naragpatmo dagita, naragragsakka gapu kadagiti nagapuanam. Di pakasdaawan nga idi umuna a siglo, kinuna ti Kristiano a ni apostol Pablo: “Diak tumaray no awan ti panggepko.” (1 Corinto 9:26, Contemporary English Version) Laglagipem a no dakdakkel ti kalatmo, naragragsakkanto met no maragpatmo dayta!

Nakasaganaka kadin? Kartibem samo kulpien ti panid iti kannawan. Kalpasanna, surotem dagiti nailista nga aramidem.a

Ad-adu pay nga artikulo ti masarakan iti serye a “Young People Ask” iti Web site a www.watchtower.org/ype

[Footnote]

UTOBEM DAGITOY

● Mapaggigiddanmo kadi ti adu unay a kalat?—Filipos 1:10.

● Ti kadi panangaramid kadagiti kalat kaipapananna a planuem ti tunggal minuto ti biagmo?—Filipos 4:5.

[Kahon/Dagiti Ladawan iti panid 25, 26]

Kasanom a maragpat dagiti kalatmo?

AMMUEM Proverbio 4:25, 26 1

“Dika bumdeng a mangaramid iti dadakkel a kalat. No naragpat dagita ti sabsabali, kabaelam met.”—Roben.

1. Mangpanunotka kadagiti kalat a ragpatem. Pagragsakam nga aramiden daytoy! Dimo pay la analisaren; basta isuratmo laeng ti amin a mapanunotmo. Kitaem no makailistaka iti nasurok a 10 wenno 20.

2. Tingitingem dagiti insuratmo. Ania kadagita ti magustuam unay? Ania ti karirigatan? Ania kadagita ti maipagpannakkelmo unay inton maragpatmon? Tandaanam, dagiti kasayaatan a kalat ket dagidiay kapatgan kenka.

3. Mangpilika iti ipangpangrunam. Umuna, mangpilika kadagiti kalat a maragpatmo iti las-ud ti sumagmamano nga aldaw. Kalpasanna, mangpilika kadagiti kalat a maragpatmo iti las-ud ti sumagmamano a lawas wenno bulan. Numeruam dagita sigun iti kayatmo a panagsasaganadda.

Pagarigan Dagiti Kalat

Pannakigayyem Maaddaanak iti gayyem a diak kaedad. Makisinningedak manen iti nabayagen a gayyem.

Salun-at Agehersisioak iti 90 a minuto iti kada lawas. Rinabii a maturogak iti walo nga oras.

Eskuelaan Ngumato ti gradok iti Math. No adda eksamen, ikagumaak ti di agsakar uray no masulisogak.

Relasion iti Dios Basaek ti Biblia iti 15 minuto kada aldaw. Kasabaak ti maysa a kaklasek ita a lawas.

Agplanoka Proverbio 21:5 2

“Nagsayaat no addaanka kadagiti kalat, ngem nasken met nga agplanoka tapno maragpatmo dagita. Ta no saan, kalat latta dagita a di maragragpat.”—Derrick.

Iti tunggal kalat a napilim, aramidem dagiti sumaganad:

1. Isuratmo ti kalatmo.

2. Ikeddengmo no kaano ti rumbeng a pannakaragpatna. Ti ngamin kalat nga awan tiempo ti pannakaragpatna ket arapaap laeng!

3. Planuem dagiti aramidem.

4. Ammuem dagiti posible a lapped. Kalpasanna, panunotem dagiti solusion.

5. Pabilgem ti determinasionmo. Ikarim iti bagim nga aramidem ti amin a kabaelam tapno maragpatmo ti kalatmo. Pirmaam ken petsaam.

Agsursuroak iti Espaniol para iti ipapanko idiay Espania inton Hulio 1

Dagiti aramidek

1. Gumatangak iti libro a pagsursuruan.

2. Agsursuroak iti 10 a baro a sasao iti kada lawas.

3. Dumngeg kadagiti agsasao iti Espaniol.

4. Ipangngegko iti sabali no husto met la ti panagbalikasko ken ti gramatika ti ibagbagak.

Posible a lapped

Awan ti kalugarak nga agsasao iti Espaniol

Solusion

I-download-ko dagiti Espaniol nga “audio recording” manipud iti www.jw.org.

․․․․․ ․․․․․

Pirma Petsa

Agtignayka! Juan 13:17 3

“Nalaka laeng a malipatam dagiti kalatmo, isu a nasken a naipamaysa ti panunotmo ken ikagumaam a ragpaten dagita.”—Erika.

Rugiam a dagus. Isaludsodmo iti bagim, ‘Ania ti mabalinko nga aramiden ita tapno marugiakon a ragpaten ti kalatko?’ Nupay dimo pay naiplano ti tunggal detalye ti aramidem, saan a dayta ti lapped iti panangrugim. Kas kuna ti Biblia, “no ur-urayem a sumayaat ti angin ken panawen, awan a pulos ti maimulam ket awanto met ti apitem.” (Eclesiastes 11:4, Ti Baro a Naimbag a Damag Biblia) Mangpanunotka iti aramidem ita—uray no bassit—ket itungpalmo dayta.

Inaldaw nga amirisem dagiti kalatmo. Lagipem no apay a napateg kenka ti tunggal kalatmo. Tapno makitam ti maar-aramidam, ikkam iti ✔ (wenno petsa ti pannakalpas) ti abay ti tunggal inlistam nga aramiden apaman a malpasmo dayta.

Saganaam dagiti panagbalbaliw. Kasanoman kasayaat dagiti planom, nalabit nasken a baliwam dagita bayat a ragragpatem dagiti kalatmo. Okey laeng dayta. Dika madanagan no dimo masurot a naan-anay ti planom. Ti napateg ket itultuloymo a pagreggetan a ragpaten ti kalatmo.

Usarem ti imahinasionmo. Papartakem dagiti pasamak. Ipapanmon a naragpatmo ti kalatmo. Ania ti mariknam? Saan kadi a nakaragragsakka? Sumaganad, sublianam nga iladawan iti panunotmo ti tunggal maysa kadagiti aramidem. Ita, ipapanmon nga ar-aramidem ken mairingringpasmon ti tunggal maysa kadagita. Kamaudiananna, iladawanmo ti karagsakmo no naragpatmon ti kalatmo. Agtignayka ngaruden!

[Ladawan]

Dagiti kalat ket kasla plano—nasken nga aramidem tapno pumaysoda!

[Kahon/Dagiti Ladawan iti panid 25]

TI MAKUNA DAGITI KAPATADAM 4

“Nalakaka a maupay no awan ti namnamaem wenno nakaipamaysaan ti panunotmo. Ngem no mangaramidka kadagiti kalat ken ragpatem dagita, naragragsakkanto.”—Reed.

“Dimo babalawen ti bagim no dimo naan-anay a naragpat ti kalatmo wenno dimo naragpat dayta iti tiempo nga inkeddengmo. Saan a makatulong ti kasta a rikna. Dika sumuksuko!”—Cori.

“Makisaritaka kadagidiay nakaragpaten kadagiti kalat a kas iti ragragpatem. Maparegta ken maipaayandaka kadagiti praktikal a singasing. Ipakaammom met kadagiti kapamiliam dagiti kalatmo tapno matulongandaka a mangragpat kadagita.”—Julia.

[Diagram iti panid 24]

(Para iti aktual a pannakaurnosna, kitaem ti publikasion)

Kartibem

Kulpiem