No Kasano a Ragpaten Dagiti Naespirituan a Kalatyo
1. Ania dagiti naespirituan a kalat dagiti adu nga agtutubo a Kristiano?
1 Kas agtutubo a Kristiano, awan duadua a dagiti kalatyo iti biag ket naimpluensiaan iti ayatyo ken ni Jehova ken kadagiti sasao ni Jesus agpaay kadagiti amin a Kristiano a “sapulen nga umuna ti pagarian.” (Mat. 6:33) Mabalin a kayatyo a palawaen ti ministerioyo babaen ti panagpayunir wenno panagserbi iti lugar a dakdakkel ti panagkasapulan kadagiti manangiwaragawag iti Pagarian. Nalabit pampanunoten ti dadduma nga agboluntarioda iti panagibangon iti Kingdom Hall, agserbi iti Bethel, wenno agmisionero. Anian a makapnek ken makomendaran dagita a kalat!
2. Ania ti makatulong kadakayo a mangragpat kadagiti naespirituan a kalatyo?
2 Makatulong ti panangisurat kadagiti naespirituan a kalat tapno maragpatyo dagita. Ti Hulio 15, 2004 a Pagwanawanan, kunana: ‘Agbalin a nalawag ken napaypayso ti maysa a di makita a banag no pilienyo dagiti sasao a mangyebkas iti dayta. Nasayaat ngarud nga isuratyo dagiti kalatyo ken no kasanoyo a ragpaten dagita.’ Maysa pay, makatulong dagiti simple a kalat tapno marukod ti panagrang-ayyo ken maipamaysayo a kanayon ti panangragpat iti dakdakkel a kalat.
3. Mangibagakayo kadagiti sumagmamano a simple a kalat a makatulong iti maysa tapno makualipikar iti bautismo.
3 Dagiti Simple a Kalat: No saankayo pay a bautisado, usigenyo no ania ti nasken nga aramidenyo tapno maragpat dayta a kalat. Mabalin a kasapulanyo ti naun-uneg a pannakatarus kadagiti pamunganayan a sursuro ti Biblia. Ngarud, aramidenyo a kalat nga adalen a naimbag ti libro nga Isursuro ti Biblia, a kitaenyo amin a naisitar a teksto. (1 Tim. 4:15) Aramidenyo pay a kalat ti panangbasa iti intero a Biblia manipud Genesis agingga iti Apocalipsis, kas iti naikalikagum kadagiti Bethelite ken estudiante iti Gilead. Kalpasanna, taginayonenyo ti regular a programa nga inaldaw a panagbasa iti Biblia. (Sal. 1:2, 3) Panunotenyo no kasano kadakkel ti maitulong dayta kadakayo a rumang-ay iti naespirituan! Naimpusuan nga agkararagkayo sakbay ken kalpasan ti tunggal panagbasa ken panagadal iti Biblia, ken kanayon nga iyaplikaryo ti masursuroyo.—Sant. 1:25.
4. Ania dagiti simple a kalat a mabalin nga ikeddeng ti maysa a Kristiano nga addaan iti dakdakkel a kalat nga agserbi iti Bethel wenno kas misionero?
4 No bautisadokayon, ania dagiti kanayonan a kalat a mabalinyo a ragpaten? Kasapulan kadi a parang-ayenyo ti abilidadyo a mangasaba? Kas pagarigan, determinadokayo kadi nga agbalin a nasigsigo a mangusar iti Sao ti Dios iti ministerio iti tay-ak? (2 Tim. 2:15) Kasanoyo a mapalawa ti ministerioyo? Mangipasdekkayo kadagiti espesipiko a simple a kalat a mayanatup iti edad ken kasasaadyo ken makatulong kadakayo a mangragpat kadagiti dakdakkel a kalat.
5. Kasano a nakatulong iti maysa a kabsat a lalaki ti panangipasdek kadagiti simple a kalat tapno maragpatna ti kalatna nga agserbi iti Bethel?
5 Ti Naballigi a Kapadasan: Idi a ni Tony nga agtawen iti 19 ket bimmisita iti sanga nga opisina dagiti Saksi ni Jehova, natukay ti interesna nga agserbi iti Bethel. Nupay kasta, aleng-aleng ti estilo ti panagbiagna, ken saan pay a nagdedikar iti Dios. Inkeddeng ni Tony ti agbiag a maitunos kadagiti pagalagadan ni Jehova ken inaramidna a kalat ti makualipikar iti bautismo. Kalpasan a naragpatna dayta a kalat, inkeddengna ti agserbi kas auxiliary pioneer ken kalpasanna kas regular pioneer, sa minarkaanna ti kalendariona no kaano ti kayatna a panangrugi. Iladawanyo ti rag-ona idi naawis nga agserbi iti Bethel kalpasan ti sumagmamano a tiempo a panagpayunirna!
6. Ania ti makatulong kadakayo a mangragpat kadagiti naespirituan a kalatyo?
6 Maragpatyo met dagiti naespirituan a kalatyo bayat nga iyun-unayo dagiti interes ti Pagarian. Iyadaniyo ken Jehova ‘dagiti aramidyo’ babaen ti kararag ken sigaganetget nga ikagumaanyo a ragpaten dagita.—Prov. 16:3; 21:5.