Ipadayagyo ti Namarsua Babaen Dagiti Naespirituan a Kalat

“NO SAAN nga ammo ti tao ti pagsangladanna, saan a napateg kenkuana ti direksion ti angin.” Dagitoy a sasao ti maysa a Romano a pilosopo idi umuna a siglo ipatuldona ti kinapudno a napateg dagiti kalat tapno maaddaan iti direksion ti biag.

Mangted ti Biblia kadagiti pagarigan dagiti indibidual a nangipasdek kadagiti kalat. Iti agarup 50 a tawen, “nangibangon [ni Noe] iti daong a pakaisalakanan ti sangakabbalayanna.” “Kimmita a sipapasnek [ni propeta a Moises] iti pannakabayad ti gunggona.” (Hebreo 11:7, 26) Ni Josue a kasuno ni Moises inawatna ti inted-Dios a kalatna a mangparmek iti daga ti Canaan.​—Deuteronomio 3:21, 22, 28; Josue 12:7-24.

Idi umuna a siglo K.P., naimpluensiaan dagiti naespirituan a kalat ni apostol Pablo babaen ti kinuna ni Jesus a “daytoy naimbag a damag ti pagarian maikaskasabanto iti intero a mapagnaedan a daga.” (Mateo 24:14) Gapu ta naparegta kadagiti personal a mensahe ken sirmata manipud ken ni Apo Jesus, agraman iti annongen nga ‘ipanna ti nagan ni Jesus kadagiti nasion,’ dakkel ti nagbalin a paset ni Pablo iti pannakaipasdek dagiti kongregasion Kristiano iti intero nga Asia Menor ken iti Europa.​—Aramid 9:15; Colosas 1:23.

Wen, iti intero a historia, adda dagiti natan-ok a kalat dagiti adipen ni Jehova ken naragpatda dagita a nagresulta iti pannakaipadayag ti Dios. Kasanotayo a mangipasdek kadagiti naespirituan a kalat? Aniada a kalat ti mabalintay a ragpaten, ken aniada a praktikal nga addang ti mabalintay nga aramiden tapno maragpattayo dagita?

Napateg Dagiti Umiso a Motibo

Mabalin ti mangipasdek kadagiti kalat iti dandani amin a benneg ti biag, ken addaan met daytoy a lubong kadagiti tattao a nangipasdek kadagiti kalat. Ngem agduma dagiti nateokratikuan a kalat ken dagiti nailubongan nga ambision. Ti kangrunaan a motibo ti adu a nailubongan a kalat ket nakaro a panagtarigagay iti kinabaknang ken di mapennek a pananggamgam iti saad ken pannakabalin. Anian a kamali ti panangipasdek iti kalat a gumun-od iti pannakabalin ken kinatan-ok! Dagiti kalat a mangipadayag ken ni Jehova a Dios ket direkta a mainaig iti panagdayawtayo kenkuana ken kadagiti interes ti Pagarian. (Mateo 6:33) Dagiti kasta a kalat ket maigapu iti panagayat iti Dios ken kadagiti pada a tattao ken panggepda a sukayen ti nadiosan a debosion.​—Mateo 22:37-39; 1 Timoteo 4:7.

Sapay koma ta umiso dagiti motibotayo bayat nga ipasdek ken gun-odentayo dagiti naespirituan a kalat, pananggun-od man dayta kadagiti kanayonan a pribilehio iti serbisio wenno panangparayray iti espiritualidadtayo. Kaskasdi, adda dagiti kalat a saan a maragpat uray no nabuyogan dagita iti nasayaat a motibo. Kasanotay a makaipasdek kadagiti kalat ken mapadakkel ti posibilidad a maragpat dagita?

Kasapulan ti Nasged a Tarigagay

Usigenyo no kasano nga imbanag ni Jehova ti pannakaparsua ti uniberso. Babaen ti sasao a “naadda ti rabii ken naadda ti bigat,” inkeddeng ni Jehova ti agsasaruno a periodo ti panamarsua. (Genesis 1:5, 8, 13, 19, 23, 31) Iti rugi ti kada periodo ti panamarsua, ammona no ania ti kayatna nga ibanag iti dayta nga aldaw. Ken tinungpal ti Dios ti panggepna a mangparsua kadagiti bambanag. (Apocalipsis 4:11) ‘Adda tarigagay ti bukod a kararua ni Jehova, ket aramidennanto dayta,’ kinuna ni patriarka a Job. (Job 23:13) Sigurado a makapnek ken ni Jehova idi makitana “ti isuamin nga inaramidna” ket kinunana a “nasayaat unay” dayta!​—Genesis 1:31.

Tapno pumudno dagiti kalattayo, masapul met a nasged ti tarigagaytayo a mangragpat kadagita. Ania ti tumulong kadatayo a mangsukay iti kasta a nasged a tarigagay? Uray idi awan pay ti porma ti daga ken langalang dayta, ammo ni Jehova no ania ti resultana​—maysa a gameng iti tangatang, a mangyeg kenkuana iti dayag ken dayaw. Umasping iti dayta, maparayray ti tarigagaytayo a mangitungpal iti inkeddengtayo nga aramiden no mennamennaentayo dagiti resulta ken gunggona ti panangragpat iti kalat. Kasta ti kapadasan ti agtawen iti 19 a ni Tony. Saanna pulos a malipatan ti damo a panagpasiarna iti sanga nga opisina dagiti Saksi ni Jehova idiay Makinlaud a Europa. Sipud idi, kanayon a pampanunoten ni Tony ti saludsod nga, ‘Ania ngata ti rikna ti agnaed ken agserbi iti kasta a lugar?’ Saan a naawanan iti namnama a posible dayta, ket intultuloyna a rinagpat dayta. Anian a ragsakna ta sumagmamano a tawen kalpasanna, napatgan ti aplikasionna nga agserbi iti sanga nga opisina!

Maparayray met ti tarigagaytayo a manggun-od iti kalattayo no makikaduatayo kadagiti tattao a nakaragpat kadagiti kalatda. Ni Jayson, nga agtawen iti 30, saanna a pagragsakan ti mangasaba idi tin-edyer pay laeng. Ngem idi nagturpos iti haiskul, sigagagar a nagpayunir ket amin-tiempo nga iwarwaragawagna ti Pagarian. Ania ti timmulong ken ni Jayson a mangsukay iti tarigagay nga agpayunir? Insungbatna: “Dakkel ti epektona kaniak ti pannakisarita kadagiti payunir ken pannakikadua kadakuada iti ministerio.”

Makatulong ti Panangisurat Kadagiti Kalattayo

Agbalin a nalawag ken napaypayso ti maysa a di makita a banag no pilientayo dagiti sasao a mangyebkas iti dayta. Kinuna ni Solomon a ti umiso a sasao ket nabileg a kas iti tirad a pagabug a mangiwanwan iti biag. (Eclesiastes 12:11) No maisurat dagita a sasao, nalakada a maitukit iti isip ken puso. Apay koma pay a binilin ni Jehova dagiti ar-ari ti Israel a mangaramidda iti personal a kopiada iti Linteg? (Deuteronomio 17:18) Nasayaat ngarud nga isurattayo dagiti kalattayo ken no kasanotay a ragpaten dagita, nga ilistatayo dagiti namnamaentayo a lapped agraman dagiti pamay-an no kasano a madaeran dagita. Makatulong met ti panangbigbig iti suheto a kayattay a masursuro, dagiti paglaingan a kayattayo a masukay, ken dagiti indibidual a makatulong ken makasuporta kadatayo.

Ti panangipasdek kadagiti naespirituan a kalat ket nakaliwliwa ken ni Geoffrey, maysa a nabayagen nga special pioneer iti naiputputong a teritoria iti maysa a pagilian iti Asia. Di ninamnama a natay ni baketna iti maysa a trahedia. Kalpasan a nasursurona nga akseptaren ti napasamak, inkeddeng ni Geoffrey a naan-anay nga ipamaysana ti bagina iti panagpayunir babaen ti panangikeddengna kadagiti kalat. Kalpasan nga insuratna dagiti planona, sikakararag nga inkagumaanna nga inrugi ti tallo a baro a panangyadal iti Biblia iti ngudo ti bulan. Iti kada aldaw, rinepasona ti aktibidadna, ket kada sangapulo nga aldaw, sukimatenna ti panagrang-ayna. Naragpatna kadi ti kalatna? Gapu iti uppat a kabbaro nga iyad-adalanna iti Biblia, siraragsak a maibagana ti wen!

Aramiden a Pagrukodan Dagiti Simple a Kalat

Dadduma a kalat ti kasla narigat a gun-oden no damo. Para ken ni Tony, a nadakamat itay, ti panagserbi iti sanga nga opisina dagiti Saksi ni Jehova ket maysa laeng nga arapaap. Awan ngamin idi ti direksion ti biagna, ken saan pay ketdi a nagdedikar iti Dios. Ngem inkeddeng ni Tony nga itunos ti panagbiagna iti dana ni Jehova ket inaramidna a kalat ti agbalin a kualipikado iti bautismo. Idi naragpatna dayta a kalatna, inkeddengna ti agbalin nga auxiliary ken regular pioneer, a minarkaanna ti kalendariona no kaano a mangrugi. Kalpasan a nakapagpayunir iti sumagmamano a panawen, nagbalin a realistiko a kalat ti panagserbi iti sanga nga opisina.

Nasayaat met no in-inutentayo a ragpaten dagiti dadakkel a kalattayo babaen kadagiti simple a kalat. Mabalin nga agserbi dagita a pagrukodan no kasanot’ kaasidegtayon iti ragragpatentayo a napapaut a kalat. Ti regular a panangrukod iti panagrang-aytayo ket makatulong iti panagbalintayo a silalagip iti kalattayo. Makatulong met no kanayon nga ikararagtayo ken ni Jehova dagiti planotayo tapno silalagiptayo a kanayon iti dayta. “Agkararagkayo a di agressat,” imbalakad ni apostol Pablo.​—1 Tesalonica 5:17.

Kasapulan ti Determinasion ken Kinaanep

Nupay natinong a naimbag dagiti planotayo ken nasged ti tarigagaytayo a mangibanag kadagita, adda latta dagiti kalat a saan a maragpat. Ania la ketdi a pannakadismaya ni adalan a Juan Marcos idi nagkedked ni apostol Pablo a mangikuyog kenkuana iti maikadua a panagdaliasatna kas misionero! (Aramid 15:37-40) Masapul a makasursuro ni Marcos iti dayta ket balbaliwanna ti kalatna agpaay iti dakdakkel a panagserbi. Nabatad nga inaramidna ti kasta. Idi ngamin agangay, isu ket buyogen ti anamong a dinakamat ni Pablo ken tinagiragsakna ti nasinged a pannakikadua ken ni apostol Pedro idiay Babilonia. (2 Timoteo 4:11; 1 Pedro 5:13) Nalabit a ti kadakkelan a pribilehiona isu ti panangisuratna iti maysa a naipaltiing a salaysay maipapan iti biag ken ministerio ni Jesus.

Iti panangragpattayo kadagiti kalattayo iti naespirituan, makapasartayo met kadagiti pannakapaay. Ngem imbes a sumuko, masapul a repasuen, tinongen, ken balbaliwan ti kalat no kasapulan. No rumsua dagiti lapped, masapul nga ikagumaantayo latta ti rumang-ay buyogen ti determinasion ken kinaanep. “Iyadanim dagiti aramidmo ken Jehova a mismo ket dagiti gakatmo maipasdekto a sititibker,” nainsiriban nga impanamnama ni Ari Solomon.​—Proverbio 16:3.

Ngem gapu kadagiti kasasaad, adda dagiti kalat a kasla saanen a realistiko a ragpaten. Kas pagarigan, gapu iti kimmapuy a salun-at wenno obligasion iti pamilia, mabalin nga imposiblen a maragpat ti dadduma a kalat. Saantay koma a liplipatan ti kinapudno a ti kangrunaan a gunggona isu ti biag nga agnanayon​—idiay langit man wenno iti Paraiso a daga. (Lucas 23:43; Filipos 3:13, 14) Kasano a maragpat dayta? “Ti agaramid iti pagayatan ti Dios agtalinaed iti agnanayon,” insurat ni apostol Juan. (1 Juan 2:17) Nupay ditay maragpat ti maysa a kalat gapu iti kasasaadtayo, mabalintay latta ti ‘agbuteng iti pudno a Dios ken salimetmetan dagiti bilinna.’ (Eclesiastes 12:13) Tumulong kadatayo dagiti naespirituan a kalat tapno makapagtalinaedtayo a silalagip iti pagayatan ti Dios. Usarentayo ngarud dagita a mangipadayag iti Namarsua kadatayo.

[Kahon iti panid 22]

Dagiti Naespirituan a Kalat a Ragpaten

○ Inaldaw a panagbasa iti Biblia

○ Panangbasa iti tunggal isyu Ti Pagwanawanan ken Agriingkayo!

○ Panangparang-ay iti kalidad dagiti kararagtayo

○ Panangiparangarang iti bunga ti espiritu

○ Panangparayray iti panagserbitayo

○ Panagbalin a mas epektibo iti panangasaba ken panangisuro

○ Panangsukay kadagiti abilidad a kas iti panangasaba babaen ti telepono, di pormal a panangasaba, ken panangasaba iti lugar ti negosio