Naibangonen Idiay Malawi​—1,000 a Kingdom Hall!

“DIAK pulos impagarup a mapasamak daytoy ditoy Malawi,” kinuna ni Augustine. Tuktukoyenna ti pannakaibangon ti nagadu a Kingdom Hall​—awag dagiti Saksi ni Jehova iti pasdek a pagtataripnonganda nga agdaydayaw. Masarakan ti bassit a pagilian ti Malawi iti makin-abagatan a daya nga Africa. Ti 30,000 a Saksi sadiay idi 1993 ket awanan kadagiti maitutop a lugar para iti panagdaydayaw ken panagadalda iti Biblia.

Ngem naiduma unayen ti kasasaad ita. Idiay Blantyre idi Setiembre 2010 ti nakaibangonan dagiti Saksi iti Malawi ti maika-1,000 a Kingdom Hall-da!a Apay nga immabut pay iti 30,000 ti bilang dagiti Saksi sakbay a rinugianda ti nagibangon kadagiti paggigimonganda? Ket idi nangrugidan, kasanoda a nakaibangon iti 1,000 a pasdek iti las-ud ti ababa a tiempo iti pagilian a limitado laeng ti pondona? Ania met ti epektona kadagiti Saksi ken kaarrubada daytoy a nagsayaat a programa ti panagibangon?

Dagiti Panawen ti Pannubok

Idi rugrugi ti 1900’s, dagiti Saksi ni Jehova, a maaw-awagan idi iti Estudiante ti Biblia, ket nangrugi a mangisuro iti kinapudno iti Biblia idiay Malawi. Idi 1967, dimmanonen iti agarup 17,000 ti bilangda sadiay. Kas kadagiti Kristiano idi umuna a siglo, agdindinamagda kas natulnog iti linteg ken managraem kadagiti opisial ti gobierno. Sititibker met a nagtalinaedda a neutral no maipapan iti politika.​—Juan 18:36; Aramid 5:29.

Nakalkaldaang ta idi katengngaan ti dekada ’60, binusor ida ti gobierno gapu iti naibasar-Biblia a takderda. Idi 1967, naipariten ti aktibidadda. Di nagbayag, adu ti nasesante kadagiti trabahoda ken dagiti sanikuada ket kinompiskar wenno dinadael dagiti bumusbusor. Gapu iti nakaro a pannakaidadanes ken iti butengda a posible a mapapatayda amin, rinibu a Saksi ti nagkamang iti kabangibang a pagilian ti Mozambique ken Zambia.

Ngem idi agangay, simmayaat met laeng ti kasasaad dagiti Saksi ni Jehova idiay Malawi. Kaaduan kadakuada ti nagsubli idi rugrugi ti 1990’s. Idi Agosto 12, 1993, kasta unay ti ragsakda ta nagpatinggan ti 26 a tawen a pannakaiparit ti trabahoda! Ngem naipasangoda manen iti sabali a parikut. Agdagupda idin iti nasurok a 30,000 iti 583 a kongregasion ngem awan ti maitutop a lugar a pagdaydayawanda! Ania ti aramidenda?

Ayat nga Addaan Aramid!

Iti umuna nga innem a tawen kalpasan a nagpatingga ti pannakaiparit, makomendaran dagiti Saksi sadiay iti panagibangonda kadagiti Kingdom Hall nupay limitado ti kuartada. Ngem saan a kaskarina dayta ta naparpartak ti iyaadu dagiti Saksi ngem iti pannakaibangon dagiti paggigimonganda. Ania ti solusion? Ti pannakayaplikar ti prinsipio ti Biblia a mabasa iti 2 Corinto 8:14. “Babaen ti panamagpapada,” ti ‘pagkurkurangan’ dagiti pagilian a kas iti Malawi ket ‘an-anayan dagiti pagsursurokan’ ti sabsabali a pagilian. Isu nga idi 1999, rinugian ti Bagi a Manarawidwid dagiti Saksi ni Jehova ti espesial a programa a tumulong iti panagibangon kadagiti pasdek a mausar iti panagdaydayaw iti pagpagilian a limitado ti pondona. Babaen iti dayta a naayat a tulong, sipapartak a naibangon dagiti Kingdom Hall idiay Malawi.b

Dagiti Saksi ni Jehova idiay Malawi ket aggigimong idi kadagiti eskuelaan, palapala, wenno sirok ti kaykayo. Ita, ti 1,230 a kongregasion ket makapagtataripnongen tapno agdaydayaw ken agadal iti Biblia kadagiti presentable a pasdek a nairanta a mangparang-ay iti pudno a panagdaydayaw. Ti nasurok a 75,000 a Saksi idiay Malawi agyamyamanda unay iti tulong dagiti kapammatianda iti intero a lubong.

Adda pay sabali a rason no apay a napartak a nakaibangon dagiti Saksi iti nagadu a Kingdom Hall. Dida kayat dagiti nagarbo a pasdek. Simple laeng ngem praktikal ken presentable ti kayatda a disenio dagiti paggigimonganda, a pakaidayawan ti Dios ken komportable a pakailawlawagan ken pakaisuruan ti Biblia.

Magunggonaan Dagiti Lumugar

Mauy-uyaw idi dagiti Saksi idiay Malawi gapu ta awan kano ti pasdekda a paggigimongan. Isu a no dadduma, mabainda nga agawis kadagiti interesado a tumabuno kadagiti gimongda. Anian a ragsakda idi addan bukodda a napipintas a Kingdom Hall! Maay-ayatandan nga agawis kadagiti kaarrubada ken interesado a tattao a makigimong. Kinaagpaysuanna, iti maysa a lugar, napalalo a ragsak ti maysa a kongregasion idi 698 ti nakigimong iti kaibangbangon a Kingdom Hall!

Kinuna ti adu a Saksi ken umili a dida impagarup a maadda ti kasta kapintas ken katibker a pasdek iti lugarda. Ti nadakamat itay a ni Augustine malagipna pay ti maysa a kongregasion a naggigimong iti sirok ti maysa a kayo. “Nagmayat no panawen ti kalgaw,” kinunana. “Ngem problema dayta no panagtutudo!” No napadasamon ti kellaat a natuduan, maawatam ti kayat a sawen ni Augustine.

Malagipna pay ti maysa kadagiti ibibisitana iti kongregasion ti Chimwanje. “Naggimongkami iti bassit a patakder a kayo ti adigina ken pan-aw ti atepna,” kinunana. “Ngem dimi ammo nga adda gayam dakkel ken nagita a lawwalawwa a nagbalay iti atep. Pagammuan ta bayat nga agpalpalawagak, natnag ti lawwalawwa sa nagdisso iti abay ti sakak! Nakigtot ti maysa iti tallaong ket nangngegko nga impukkawna: ‘Baddekamon, Augustine, baddekamon!’ Dagus a binaddekak. Isu a kas makitayo ita, sibibiagak pay laeng.” Awanen dagiti kasta a mangsinga iti gimong daytoy a kongregasion ta addan baro a Kingdom Hall-da.

“Saniata iti Kagimongan”

Gapu iti nagsayaat a programa a panagibangon kadagiti Kingdom Hall, dagiti Saksi ni Jehova ket ap-apresiaren ken raraemen ti adu a komunidad ken agtuturay, kas ipakita dagiti sumaganad a komento:

✔ “Ti panangibangon iti baro a pasdek para iti panagdaydayaw, agraman ti ayat ken panagkaykaysa nga ipakpakita dagiti Saksi ni Jehova ket maysa a saniata iti kagimongan. Rumbeng laeng a tuladen dayta ti dadduma a relihion.”​—Panguluen ti Chabwenzi.

✔ “Ti magustuak unay kadagiti Saksi ket ti panagkaykaysada. Rinugianmi nga ibangon ti simbaanmi, ngem 10 met laengen a tawen, di pay nalpas. Dimi ammo no kaanonto a malpas dayta. Agyamanak ta nagibangonkayo iti kasta kapintas a pasdek ditoy lugartayo.”​—Panguluen ti Chigwenembe.

✔ “Bilibak iti panagtrabahoyo. Nakaal-alisto ken nakadaldalimanekkayo! Agkaykaysakayo la ketdi.”​—Panguluen ti Chiuzira.

Naisangsangayan met ti programa a panagibangon kadagiti Kingdom Hall ta uray la napaliiw dayta dagiti editor ti Chichewa/Chinyanja​—English Dictionary, a nagkuna maipapan kadagiti Saksi: “Nakaibangonen dagiti Saksi ni Jehova iti adu [a Kingdom Hall].”

“Daytoy a Kingdom Hall ket Milagro”

Idi Enero 30, 2011, indedikar ti kongregasion ti Manyowe idiay Blantyre, a nadakamat iti rugi, ti baro a Kingdom Hall-da​—ti maika-1,000 a Kingdom Hall a naibangon idiay Malawi. “Ti pannakaibangon daytoy a Kingdom Hall ket milagro,” kinuna ti maysa a miembro ti kongregasion. “Kasla arapaap a pimmudno.”

“Inaldawak a tumulong bayat ti panagibangon,” kinuna ti maysa a balasitang iti kongregasion ti Manyowe. “Nakaragragsakak a nakipagtrabaho iti pannakaipatakder ti nagpintas a paggigimongan iti lugarmi.”

“Narigatankami a mangala iti permit manipud kadagiti autoridad iti lugarmi tapno maibangon ti Kingdom Hall-mi,” kinuna ti maysa kadagiti panglakayen iti kongregasion. “Namin-adu a nagkedked dagiti opisial ti siudad a mangpirma kadagiti kasapulan a permit. Ngem ti panguluen iti lugarmi a ni Mrs. Liness Chikaoneka inkagumaanna a kinombinsir dagiti opisial nga agpirma.”

Maysa nga aldaw, kinuyog ni Mrs. Chikaoneka ti maysa a panglakayen a mapan agpapirma iti permit. “Kayatko a mangaramid dagiti Saksi iti Kingdom Hall-da ditoy bariok,” kinunana iti opisial. “Nasayaatda a tattao. Awan pay pulos ti problema wenno kaso a nakainaiganda a naisaklang kaniak.” Gapu iti dayta, pinirmaan ti opisial dagiti papeles.

Maay-ayatan ni Mrs. Chikaoneka idi naidedikar ti Kingdom Hall. “Maragsakanak unay ken ipagpannakkelko ti pannakaibangon daytoy a nagpintas a pasdek iti bariok!”

Iti intero a Malawi, ap-apresiaren dagiti Saksi ni Jehova ken kakaarrubada ti programa a panagibangon iti Kingdom Hall. Gapu iti mapagwadan a kinamanagsakripisio ken kinagaget dagiti Saksi ni Jehova iti daytoy a pagilian, bassit laengen ti kasapulan nga ibangonda a Kingdom Hall no idilig idi 1993. Ngem masapul nga agtultuloy ti panagibangonda iti Kingdom Hall ta umad-adu ti mabubuangay a kongregasion gapu iti iyaadu dagiti mangipangpangag iti “naimbag a damag ti pagarian” ti Dios. (Mateo 24:14) Gapuna, yamanen unay dagiti Saksi ti naayat a suporta ken naparabur a donasion dagiti kapammatianda iti intero a lubong.c

Kangrunaan iti amin, agyaman dagiti Saksi iti Diosda a ni Jehova. Ti kaririknada ket kas iti salmista a nagkuna: “Amin dagiti nasion nga inaramidmo umaydanto, ket agruknoydanto iti sanguanam, O Jehova, ket idayawdanto ti naganmo. Ta naindaklanka ken agar-aramidka iti nakaskasdaaw a bambanag.”​—Salmo 86:9, 10.

[Footnotes]

[Ladawan iti panid 24]

Sakbay a nangrugi ti programa a panagibangon iti Kingdom Hall, masansan idi nga aggigimongda iti palapala a pan-aw laeng ti atepna

[Ladawan iti panid 24]

Aggigimongen dagiti kongregasion kadagiti Kingdom Hall a kas iti daytoy