Ti Abilidad ti Bagi ti Tao a Mangpaimbag iti Sugat

MAYSA kadagiti adu a proseso a kasapulan iti panagbiag ti tao ket ti abilidad ti bagi a mangpaimbag iti sugat ken mangsukat iti nadadael a tisyu. Dagus a mangrugi dayta apaman a masugat ti maysa a tao.

Usigem: Agbalin a posible ti panagimbag ti sugat iti tulong ti adu a komplikado a trabaho dagiti selula:

• Kumpet dagiti platelets kadagiti tisyu iti aglawlaw ti sugat, isu nga agbalay ti dara ken mapullatan dagiti nadadael nga urat.

• Lumteg ti sugat tapno saan a maimpeksion ken tapno maikkat ti aniaman a “rugit” a resulta ti pannakasugat.

• Iti uneg laeng ti mano nga aldaw, suktan ti bagi ti nadadael a tisyu ken pabassitenna ti sugat, ken tarimaanenna dagiti nadadael nga urat.

• Kamaudiananna, agkeggang ti sugat tapno ad-adda nga umimbag ken tumibker ti naapektaran a paset ti bagi.

Tinulad dagiti researcher ti proseso ti panagbalay ti dara (blood clotting) tapno makaaramidda kadagiti plastik nga addaan iti abilidad a “mangtarimaan” iti nadadael a pasetna. Naikonektar kadagita a plastik ti babassit a nagabay a tubo a naglaon iti dua a klase ti kemikal nga agayus no adda madadael a pasetna. No aglaok ti dua a kemikal, agbalinda a gel, nga agwaras iti amin a nadadael a pasetna, iti kasta, maserraan dagiti abut ken rikki wenno birri. No tumangkenen ti gel, maisubli ti dati a tibker ti nadadael a paset ti plastik. Inamin ti maysa a researcher a daytoy nga artipisial a proseso ti panagtarimaan a madama pay laeng a mapaspasayaat ket “ipalagipna” ti panangpaimbag dagiti sibibiag a banag iti mismo a bagida.

Ania ti makunam? Resulta kadi ti ebolusion ti abilidad ti bagi a mangpaimbag iti sugat? Wenno adda nangdisenio iti dayta?