Ilawlawag ti Maysa a Consultant Surgeon No Apay a Mamati iti Dios

Apay a mamatika idi iti ebolusion?

Nupay napadakkelak kas maysa a Katoliko, adda dagiti panagduaduak maipapan iti Dios. Kas pagarigan, diak mamati iti Dios a mangtutuok kadagiti tattao iti impierno. Isu nga idi insuro kaniak dagiti propesor iti unibersidad a dagiti sibibiag a banag ket timmaud babaen iti ebolusion imbes a pinarsua ti Dios, pinatik dayta ta impagarupko no adda ebidensia a mangpaneknek iti dayta. Ti ebolusion ket saan met a linaksid ti relihionko. Insurona ketdi a ti Dios ti nangiwanwan iti dayta.

Apay a nagintereska iti Biblia?

Ni baketko a Susana ket nangrugi a nakipagadal iti Biblia kadagiti Saksi ni Jehova. Impakitada kenkuana ti kuna ti Biblia a saan a tutuoken ti Dios dagiti tattao iti umap-apuy nga impierno,a agraman ti kari ti Dios a pagbalinenna a pagtaengan a paraiso ti planetatayo.b Nakasarakkami met laengen kadagiti nakappapati a pannursuro! Idi 1989, rinugiannak a sarungkaran ti maysa a Saksi nga agnagan iti Nick. Idi pagsarsaritaanmi ti maipapan iti bagi ti tao ken ti nagtaudan dayta, nasdaawak iti simple a lohika a mabasa iti Biblia iti Hebreo 3:4: “Tunggal balay adda nangibangon, ngem ti nangibangon iti amin a bambanag isu ti Dios.”

Nakatulong kadi kenka ti panangadalmo iti bagi ti tao tapno mamatika iti panamarsua?

Wen. Kas pagarigan, nadisenio a naimbag ti pamay-an ti bagitayo a mangtarimaan iti bukodna a bagi. Kas koma iti iyiimbag ti sugat—uppat nga agiinnabut a paset ti nairaman. Amin dagita ti mangipalagip kaniak a kas maysa a siruhano, makipagtrabtrabahoak laeng iti nainkasigudan a sistema ti bagi a mangtarimaan.

Ania ti mapasamak no masugat ti bagitayo?

Insigida nga agtignay ti umuna a paset ti agsasaruno a proseso a nadisenio a mangpasardeng iti panagdara. Nakakomkomplikado ken nakaan-annayas dagita a proseso. Ti met sistema ti panagrikus ti daratayo nga addaan iti 100,000 a kilometro nga ur-urat ket talaga nga ap-apalan dagiti inheniero iti tay-ak ti panagtubero (plumbing engineers) ta kabaelan dayta a sullatan dagiti agtedted ken tarimaanen ti bagina.

Ania ti karaman iti maikadua a paset ti panagtarimaan?

Sumardeng ti panagdara iti las-ud ti sumagmamano nga oras sa mangrugin a lumteg. Ti nainaig iti dayta ket ti nakaskasdaaw nga agsasaruno a pasamak. Umuna, dagiti urat ti dara nga immilet idi damo tapno maksayan ti panagdara ket lumawan tapno ad-adu a dara ti agtaray iti nasugat a paset. Sumaganad, lumteg ti intero a nasugat a paset gapu iti napnuan protina a pluido. Dayta a pluido ket nagpateg iti pananglaban iti impeksion, panangkissay kadagiti sabidong, ken panangikkat kadagiti nadadael a tisyu. Tunggal agsaruno a pasamak ket agkasapulan iti pannakapataud ti minilion a molekula ken selula nga adda espesipiko a pakausaranda iti agsasaganad a pasamak. Dadduma kadagita ti mangtignay iti panangrugi ti sumaganad a paset. Kalpasanna, sumardengdan.

Kasano nga agtultuloy ti iyiimbag?

Iti sumagmamano nga aldaw, mangrugin a mangpataud ti bagitayo kadagiti materiales a mausar iti panagtarimaan. Dayta a proseso ket senial iti panangrugi ti maikatlo a paset ken agpaut iti agarup 2 a lawas. Dagiti selula a mangpataud kadagiti ammurat (fiber) iti intero a sugat ket umakar iti nasugat a paset sada agpaadu. Agtubo met dagiti nagbabassit nga urat ti dara ken umatiddog agingga iti nasugat a paset. Sadiay nga ikkatenda ti rugit ken mangsuplayda kadagiti kanayonan a sustansia bayat ti demolision ken panagtarimaan. Iti sabali pay a komplikado a panagsasaganad dagiti pasamak, mausar dagiti espesial a selula a mamaglunit iti sugat.

Nagadu gayam a trabaho dayta! Kasano kabayag a malpas ti panagtarimaan?

Agpaut iti adu a bulan ti maudi a paset—ti panangbalbaliw. Agsubli dagiti natukkol a tulang iti sigud a kapigsada. Dagiti met ammurat a napataud idi damo iti intero a sugat a nalukneng pay laeng dagiti tisyuda ket masukatan kadagiti nalaglagda a materiales. No dagupen, ti iyiimbag ti sugat ket maysa a nakaskasdaaw a pagarigan ti panagtutunos a nagsayaat ti pannakaiprogramana.

Adda kadi pasientem a talaga a nagsiddaawam?

Adda. Malagipko idi inagasak ti 16 anyos a biktima ti nakaro nga aksidente iti lugan. Kritikal idi ti kasasaadna ta nasugat ti palina ket agpadpadara iti uneg ti bagina. Adu a tawenen ti napalabas, gagangay idi nga operaenmi tapno tarimaanen wenno ikkatenmi ti pali (spleen). Ngem ita, ad-addan nga agpannuray dagiti doktor iti pannakabalin ti bagi a mangtarimaan iti bagina. Inagasak laeng ti anemia ken impeksionna, inep-epko ti ut-otna, ken insublik ti napukaw a pluido ti bagina. Sumagmamano a lawas kalpasanna, nakitami iti resulta ti scan nga immimbagen ti palina! Masdaawak no makitak ti panangtarimaan ti bagi iti bukodna a bagi isu a mas kombinsidoakon nga adda Dios a nangdisenio kadatayo.

Ania ti nagustuam kadagiti Saksi ni Jehova?

Mannakigayyemda ken kanayon a Biblia ti pangsungbatda kadagiti saludsodko. Bilibak met iti kinaturedda a mangiranud kadagiti patpatienda ken tumulong iti sabsabali a mangammo maipapan iti Dios.

Nakatulong kadi iti propesionmo ti panagbalinmo a maysa kadagiti Saksi ni Jehova?

Wen. Tinulongannak a manglaban iti compassion fatigue, maysa a kita ti emosional a pannakapaksuy a masansan a mangapektar kadagiti doktor ken nars a kanayon a mangasikaso kadagiti masakit wenno nadunor. No met kayat dagiti pasiente ti makisarita, kabaelakon nga ilawlawag ti kari ti Namarsua kadatayo a pagpatinggaenna dagiti sakit ken panagsagabac ken mangyeg iti lubong a sadiay awanton ti agkuna, “Masakitak.”d