Dagiti Pagsayaatan ti Panagteppel

ANIA TI PANAGTEPPEL?

Ti panagteppel ramanenna ti abilidad nga

• aguray imbes a maala a dagus ti kayat

• mangkontrol iti rikna

• mangileppas kadagiti maipatrabaho uray medio narigat

• mangyun-una iti dadduma imbes a ti bagi

APAY A NAPATEG TI PANAGTEPPEL?

Dagiti ubbing a mas makapagteppel malabananda ti sulisog, uray kasla mangyeg kadagiti apagbiit a pagragsakan. Ngem dagiti ubbing a di unay makapagteppel dakdakkel ti posibilidadna nga

• agbalin nga agresibo

• madepres

• agsigarilio wenno agbartek wenno agdroga

• mangan kadagiti saan a nasustansia

Sigun iti maysa a panagadal, dagiti ubbing a mas makapagteppel ket basbassit ti posibilidadna nga agsakit, agproblema iti kuarta, ken sumukir iti linteg inton adultodan. Gapu iti dayta a panagadal, kastoy ti konklusion ni Propesor Angela Duckworth iti University of Pennsylvania: “Saanmo a pulos pagdaksan ti panagteppel.”

NO KASANO NGA ISURO TI PANAGTEPPEL

Sursuruem ti agsaan ken paypaysuem dayta.

PRINSIPIO TI BIBLIA: “No kunayo a ‘Wen,’ wen; ngem no ‘Saan,’ saan.”​—Mateo 5:37.

Mabalin nga agmuriot dagiti ubbing​—nalabit uray iti publiko—​tapno subokenda no paypaysuen ti nagannak ti imbagana. No pagustuan ti nagannak ti ubing, masursurona a no agmuriot, matungpal ti kayatna.

Ngem no agsaan dagiti nagannak ket paypaysuenda dayta, masursuro ti ubing ti maysa a napateg a kinapudno uray di makaay-ayo​—a ditay kanayon a maala ti kayattayo. “Nupay kasta, naragragsak nga amang dagidiay nakasursuro iti dayta a leksion,” insurat ni Dr. David Walsh. “Ditay matulongan dagiti annaktayo nga agnakem no kanayon nga itedtayo ti kayatda.”a

No agsaanka itan iti anakmo, makatulong dayta kenkuana nga agsaan inton adulton​—kas pagarigan, no masulisogto nga agdroga, makiseks iti dina asawa, wenno mangaramid iti dadduma pay a pagdaksanna.

Ipaawatmo kadagiti annakmo dagiti naimbag ken dakes nga epekto dagiti aramidenna.

PRINSIPIO TI BIBLIA: “Aniaman nga imulmula ti maysa a tao, daytanto met ti apitenna.”​—Galacia 6:7.

Masapul a maawatan ti anakmo nga adda epekto dagiti aramidenna ken saan a nasayaat dagiti resulta ti di panagteppel. Kas pagarigan, no ugalina ti agunget a dagus no masuron, mabalin nga adaywan dagiti tattao. Ngem no masursurona ti agteppel no adda mangsuron kenkuana​—wenno siaanus nga aguray imbes a bumallaet a dagus—​kaykayatto isuna dagiti tattao. Ipaawatmo nga adayo a nasaysayaat ti pagbanaganna no kanayon nga agteppel.

Isurom iti anakmo no ania dagiti banag a kapatgan.

PRINSIPIO TI BIBLIA: ‘Siguraduenyo ti napatpateg a bambanag.’—Filipos 1:10.

Ti panagteppel ket saan la a basta panangliklik nga agaramid iti di umiso, karamanna ti panagaramid iti napateg, uray no di makaparagsak nga aramiden dagita. Masapul a masursuro ti anakmo nga ikeddeng dagiti kapatgan ken aramiden nga umuna dagita. Kas pagarigan, masapul nga iyun-unana ti homework-na imbes nga agay-ayam.

Agbalinka a nasayaat a pagtuladan.

PRINSIPIO TI BIBLIA: “Inikkankayo iti pagtuladan tapno aramidenyo met ti inaramidko.”—Juan 13:15.

Makita ti anakmo ti reaksionmo kadagiti makapadismaya wenno makapapungtot a situasion. Ipakitam babaen ti aramidmo a nasaysayaat dagiti epekto ti panagteppel. Kas pagarigan, no adda aramiden ti anakmo a mangibus iti pasensiam, agungetka wenno kalmadoka latta?