Antikristo
Kayuloganna: Ti antikristo kaipapanannat’ kontra wenno imbes a ni Kristo. Dayta a termino agaplikar kadagiti amin a mangilibak iti kuna ti Biblia maipapan ken Jesu-Kristo, kadagiti amin a bumusbusor iti Pagarianna, ken amin a mangirurumen kadagiti pasurotna. Saklawenna met dayta dagiti indibidual, organisasion, ken nasnasion a siuulbod a kunaenda nga irepresentarda ni Kristo wenno di maikanatad nga akuenda ti papel ti Mesias.
Maymaysa kadi nga antikristo ti tuktukoyen ti Biblia?
1 Juan 2:18: “Annakko a dungdunguen, isu ti kamaudianan nga oras, ket, kas iti nangngegyo nga umay ti antikristo, uray ita timmakderdan dagiti adu nga antikristo; ket daytoy ti pakaamuantayo nga isu ti kamaudiananen nga oras.”
2 Juan 7: “Ta adu dagiti mangallilaw a limtuad ditoy lubong, a dida umanamong a ni Jesu-Kristo immay naglasag. Daytoy ti mangal-allilaw ken isu ti antikristo.” (Paliiwenyo ta dagidiay “adu nga antikristo” a nadakamat ti 1 Juan 2:18 ket nasao ditoy a sangsangkamaysada kas “ti antikristo.”)
Masanguanan a tiempo ngata ti naisadia nga umayan ti antikristo?
1 Juan 4:3: “Amin a napaltiingan nga ebkas a di mangipudno ken Jesus saan a namunganay iti Dios. Mainayon pay, daytoy ti napaltiingan nga ebkas ti antikristo a nangngegyo nga umay, ket ita addan ditoy lubong.” (Naisurat dayta idi arinunos ti umuna a siglo K.P.)
1 Juan 2:18: “Uray ita timmakderdan dagiti adu nga antikristo; ket daytoy ti pakaammuantayo nga isu ti kamaudiananen nga oras.” (Daydiay “kamaudiananen nga oras” nabatad a daydiay panagngudo ti panawen dagiti apostol ti tuktukoyen ni Juan. Natay idin dagiti dadduma nga apostol, ket ni Juan a mismo lakay unayen.)
Sumagmamano kadagidiay makuna nga antikristo—
Dagidiay mangilibak a ni Jesus ket pudno a Mesias
1 Juan 2:22: “Asino ti naulbod no di daydiay mangilibak a ni Jesus isu ti Kristo [wenno, Mesias, daydiay napulotan]? Daytoy isu ti antikristo.”
Amin a mangilibak a ni Jesus isut’ naisangsangayan nga Anak ti Dios
1 Juan 2:22: “Daytoy isu ti antikristo, daydiay mangilibak iti Ama ken iti Anak.”
Idiligyo ti Juan 10:36; Lucas 9:35.
Dagiti apostata
1 Juan 2:18, 19: “Timmakderdan dagiti adu nga antikristo . . . Rimmuarda kadatayo, ngem ditay ida kadua.”
Dagidiay bumusbusor kadagiti pudno a pasurot ni Kristo
Juan 15:20, 21: “No indadanesdak, idadanesdakayto met . . . Ngem amin dagitoy aramidendanto kadakayo gapu iti naganko.”
Dagiti indibidual ken nasnasion a bumusbusor ken Kristo kas Ari wenno siuulbod nga akuenda nga isuda ti Mesias
Sal. 2:2: “Ti ar-ari ditoy daga pabilgenda dagiti bagida met laeng ken dagiti turayen agpipinnatigmaanda a maibusor ken Jehova ken maibusor met iti pinulotanna [ni Kristo, wenno Mesias].”
Kitaenyo met ti Apocalipsis 17:3, 12-14; 19:11-21.
Mat. 24:24: “Ta tumakderto dagiti ulbod a Kristo ken dagiti ulbod a mammadto ket mangipakitadanto iti dadakkel a pagilasinan ken datdatlag tapno mangisiasida koma, no mabalin, uray pay dagiti napili.”