Ti Panangmatmat ti Biblia

Siasino ti Antikristo?

“NANGNGEGYO NGA UMAY TI ANTIKRISTO.”​—1 JUAN 2:18.

NO NAPAKDAARANKAYO nga adda napeggad a kriminal a nakitada nga agturturong iti sangakaarrubaanyo, ania ti aramidenyo? Nalabit nga ammuenyo dagiti umiso a detalye maipapan iti langa ken taktikana. Mabalin nga agsalukagkayo.

Umasping iti dayta ti kasasaad itatta. Napakdaarantayon babaen ti sasao ni apostol Juan: “Tunggal naipaltiing nga ebkas a saan a mangipudno ken Jesus saan a nagtaud iti Dios. Kanayonanna pay, daytoy ti naipaltiing nga ebkas ti antikristo a nangngegyo nga um-umay, ket ita addan ditoy lubong.” (1 Juan 4:3) Adda kadin dayta nga antikristo, a kabusor ti Dios ken manangallilaw iti tattao, a mamagpeggad iti nasayaat a kasasaad ti intero a sangatauan?

Naminlima nga inusar ni Juan ti termino nga “antikristo” iti dua kadagiti suratna. Tuktukoyenna ti gunglo a bumusbusor iti isursuro ti Biblia maipapan ken Jesu-Kristo ken pakairamanan dagiti impostor nga agpampammarang nga isuda ni Kristo wenno imbaon ni Kristo. Mangted ti Biblia iti mapagtalkan nga impormasion maipapan iti antikristo. Ngem kas iti mapasamak no dadduma kadagiti kriminal, dagiti awan nakaibasaranna a damag maipapan iti daytoy misterioso a gunglo ti ad-adda a mailatak ngem iti kinapudno.

Kaso Maipapan iti Di Umiso a Kinasiasino

Nanipud idi kaaldawan ni apostol Juan, adda tattao a nagkuna a ti sasao ni Juan maipapan iti antikristo tuktukoyenna ti maysa nga espesipiko a tao. Adda nadumaduma nga indibidual nga impagarup dagiti tattao kas ti antikristo. Adun a siglo ti napalabas, impagarup ti adu a ni Emperador Nero iti Roma ti antikristo. Idi agangay, gapu ta insaknap ni Adolf Hitler ti gura ken panagaligaget, adu ti nakombinsir nga isu ti antikristo. Nayawag pay ketdi dayta a termino iti Aleman a pilosopo a ni Friedrich Nietzsche. Nupay kasta, patien ti dadduma a dumtengto pay laeng ti antikristo ken agparangto kas masirib, naulpit a politiko a panggepna nga iturayan ti lubong. Patienda a ti atap nga animal iti Apocalipsis kapitulo 13 isu ti espesipiko a matuktukoy nga antikristo a dinakamat ni Juan. Kunada nga uray kaskasano, ti markana a 666 ti mangyam-ammo iti daytoy a manangitandudo iti kinadakes iti masanguanan.

Dagidiay mangitantandudo kadagitoy nga opinion ti mangipagarup a maymaysa ti antikristo a tuktukoyen ni Juan. Ngem ania ti ipakita dagiti sasaona? Amirisenyo ti 1 Juan 2:18: “Kas iti nangngegyo nga umay ti antikristo, uray pay ita timpuaren ti adu nga antikristo.” Wen, “adu nga antikristo,” saan a maymaysa, ti nangpataud iti naespirituan a riribuk idi umuna a siglo. Iti kaaldawantayo, saan a maymaysa, no di ket adu ti antikristo a mangbukel iti grupo ti antikristo. Sangsangkamaysa a daddadaelenda ti espiritualidad ti sangatauan. (2 Timoteo 3:1-5, 13) Siasino ti mangbukel iti antikristo?

Tapno maammuantayo ti maysa a posibilidad, amirisentayo ti atap nga animal iti Apocalipsis kapitulo 13. Insurat ni apostol Juan: “Ti atap nga animal a nakitak umasping iti leopardo, ngem dagiti sakana kas kadagiti saka ti oso, ken ti ngiwatna kas iti ngiwat ti leon.” (Apocalipsis 13:2) Ania ti ipasimudaag dagitoy a deskripsion?

Sigun kadagiti eskolar ti Biblia, nadlawda a ti Apocalipsis 13 ket nainaig iti Daniel kapitulo 7. Impasirmata ti Dios ken Daniel dagiti piguratibo nga animal, a pakairamanan ti leopardo, oso, ken leon. (Daniel 7:2-6) Ania ti imbaga ti mammadto ti Dios nga isimbolo dagitoy? Insuratna a dagidiay nga atap nga animal isimboloda dagiti ari, wenno gobierno ditoy daga. (Daniel 7:17) Nainkalintegan ngarud a makunatayo a ti atap nga animal iti Apocalipsis irepresentarna dagiti natauan a gobierno. Tangay busbusoren dagitoy a gobierno ti Pagarian ti Dios, paset ida ti antikristo.

Siasino Pay ti Mangbukel iti Antikristo?

Idi adda ditoy daga ti Anak ti Dios a ni Kristo, adu ti kabusorna. Nupay ditay makita itan ni Jesus, adda pay laeng dagiti bumusbusor kenkuana kadagitoy nga aldaw. Kitaenyo no siasino ti karaman kadakuada.

Kinuna ni apostol Juan: “Siasino ti naulbod no di daydiay mangilibak a ni Jesus isu ti Kristo? Isu daytoy ti antikristo, daydiay mangilibak iti Ama ken iti Anak.” (1 Juan 2:22) Dagiti apostata ken lider ti palso a panagdayaw ballikugenda dagiti umiso a pannursuro ni Jesus babaen ti narelihiosuan a panangallilaw. Ilaksid dagita a tattao ti kinapudno nga isursuro ti Biblia ken mangirakurakda iti kinaulbod iti nagan ti Dios ken Kristo. Ilibakda ti pudno a relasion ti Ama ken ti Anak babaen ti makariro a doktrinada a Trinidad. No kasta, paset met ida ti antikristo.

Kastoy ti impakpakauna ni Jesus kadagiti adalanna iti Lucas 21:12: “Tiliwendakayto dagiti tattao ket idadanesdakayo, nga iyawatdakayo kadagiti sinagoga ken kadagiti pagbaludan . . . maigapu iti naganko.” Nanipud idi umuna a siglo, ib-ibturanen dagiti pudno a Kristiano ti narungsot a pannakaidadanes. (2 Timoteo 3:12) Dagiti mangisungsong iti kasta a panangtrato busorenda ni Kristo. Paset met ida ti antikristo.

“Daydiay awan iti dasigko bumusor kaniak, ket daydiay saan a makipagurnong kaniak agiwara.” (Lucas 11:23) Impakaammo ditoy ni Jesus nga amin a bumusor kenkuana ken kadagiti panggep ti Dios nga itantandudona ket mapaneknekan a paset ida ti antikristo. Ania ti pagtungpalanda?

Ania ti Pagtungpalan Dagiti Antikristo?

‘Ti Dios dadaelennanto dagidiay agsasao iti kinaulbod. Ti tao ti panagibukbok iti dara ken panangallilaw karimon ni Jehova,’ kuna ti Salmo 5:6. Agaplikar kadi daytoy kadagiti antikristo? Wen. Insurat ni apostol Juan: “Adu a manangallilaw ti nakastrek ditoy lubong, tattao a saan a mangipudpudno ken Jesu-Kristo kas immay a naglasag. Isu daytoy ti manangallilaw ken ti antikristo.” (2 Juan 7) Gapu iti kinaulbod ken panangallilawda, ti Dios a Mannakabalin-amin dadaelennanto dagiti antikristo.

Bayat nga umas-asidegen ti pannakaibanag dayta a sentensia, nasken a di ipalubos dagiti pudno a Kristiano a ti pammatida ket pakapuyen dagiti di Nakristianuan a panangallilaw ken impluensia, a nangnangruna nga agtaud kadagiti apostata. Naganat ti pakdaar ni Juan: “Siputanyo ti bagbagiyo, tapno saanyo a mapukaw ti bambanag nga intrabahomi a patauden, no di ket tapno makagun-odkayo koma iti naan-anay a gunggona.”​—2 Juan 8.

[Picture Credit Line iti panid 20]

Ni Nero iti panid 2 ken 20: Impaay ti Visitors of the Ashmolean Museum, Oxford