Naibutaktak ti Antikristo

NO AMMOM nga adda agsaksaknap nga epidemia iti lugaryo, kasano a masalaknibam ti bagim? Mabalin a papigsaem ti resistensiam ken umadayoka kadagiti tattao a makaakar kenka. Kasta met ti aramidentayo iti naespirituan. Ibaga kadatayo ti Kasuratan a ti antikristo “addan ditoy lubong.” (1 Juan 4:3) Masapul a mailasintayo dagiti “addaan iti makaakar a sakit” ken liklikantayo ida, no kayattayo a lisian ti “pannakaimpeksion.” Naimbag laengen ta adu ti ipapaay ti Biblia nga impormasion maipapan iti daytoy a suheto.

Ti kaipapanan ti “antikristo” ket “maibusor (wenno maisukat ken) Kristo.” Isu a kaaduanna, agaplikar ti termino kadagiti amin a bumusbusor wenno siuulbod nga agkunkuna nga isuda ti Kristo wenno dagiti pannakabagina. Kinuna a mismo ni Jesus: “Daydiay awan iti dasigko bumusor kaniak [wenno maysa nga antikristo], ket daydiay saan a makipagurnong kaniak agiwara.”​—Lucas 11:23.

Insurat ni Juan ti maipapan iti antikristo nasurok nga 60 a tawen kalpasan a natay ken napagungar ni Jesus idiay langit. No kasta, masapul a maawatantayo no kasano a dagiti aramid ti antikristo apektaranda dagiti nasungdo a pasurot ni Jesus ditoy daga.​—Mateo 25:40, 45.

Ti Antikristo Busorenna Dagiti Pasurot ni Kristo

Pinakdaaran ni Jesus dagiti pasurotna a busoren ida ti kaaduan iti lubong. Kinunana: “Dagiti tattao iyawatdakayto iti rigat ken papatayendakayto, ket puntiriakayto ti pananggura ti amin a nasnasion maigapu iti naganko. Ket adu nga ulbod a mammadto ti tumakderto ket iyaw-awanda ti adu.”​—Mateo 24:9, 11.

Gapu ta dagiti adalan ni Jesus maidadanesda ‘gapu iti naganna,’ nalawag a dagiti manangidadanes maibilangda nga antikristo, wenno bumusbusor ken Kristo. Antikristo met dagiti “ulbod a mammadto,” a dadduma kadagitoy ket dati a Kristiano. (2 Juan 7) Dagitoy “adu nga antikristo,” insurat ni Juan, “rimmuarda manipud kadatayo, ngem saanda a kas kadatayo; ta no isuda ket kas kadatayo, nagtalinaedda koma a kaduatayo.”​—1 Juan 2:18, 19.

Nalawag nga ipamatmat dagiti sasao da Jesus ken Juan a saan a maymaysa a tao ti antikristo no di ket buklen ti adu nga indibidual nga antikristo. Ken gapu ta ulbodda a mammadto, ti maysa a kangrunaan a panggepda isu ti panangallilawda babaen ti relihion. Ania ti dadduma kadagiti pamay-anda?

Panangisaknap Kadagiti Narelihiosuan a Kinaulbod

Pinakdaaran ni apostol Pablo ti padana a trabahador a ni Timoteo nga agannad kadagiti pannursuro dagiti apostata, kas kada Himeneo ken Fileto, a ti ‘saoda agsaknap a kas gangrena.’ Kinuna pay ni Pablo: “Dagitoy met laeng a lallaki simiasida iti kinapudno, a kunkunada a napasamaken ti panagungar; ket iluluodda ti pammati ti sumagmamano.” (2 Timoteo 2:16-18) Nalawag a da Himeneo ken Fileto insuroda a simboliko ti panagungar ket kayariganna a napagungaren dagiti Kristiano iti naespirituan nga anag. Agpayso a no ti maysa a tao agbalin a pudno nga adalan ni Jesus, maibilang a sibibiag iti imatang ti Dios, kas nalawag nga imbaga ni Pablo. (Efeso 2:1-5) Nupay kasta, ti pannursuro da Himeneo ken Fileto dina ikabilangan ti kari ni Jesus a literal a panagungar dagiti natay iti sidong ti turay ti Pagarian ti Dios.​—Juan 5:28, 29.

Idi agangay, maysa a grupo a maawagan iti Gnostics ti nangparbo iti pannursuro maipapan iti naan-anay a simboliko a panagungar. Gapu ta patienda a magun-odan ti pannakaammo (gnoʹsis iti Griego) iti misterioso a pamay-an, pinagtitipon dagiti Gnostics ti apostata a Kristianidad, dagiti pilosopia a Griego, ken ti pammati dagiti taga-Daya a mistisismo wenno pannakikadua iti Dios. Kas pagarigan, patienda a dakes ti amin a pisikal a banag, isu a ni Jesus saan a nagbalin a lasag no di ket kasla nagparang laeng a tao. Kinapudnona, daytoy ti makagapu a namakdaar ni apostol Juan.​—1 Juan 4:2, 3; 2 Juan 7.

Ti sabali pay a kinaulbod a naparbo adu a siglon ti napalabas isu ti doktrina a naawagan iti nasantuan a Trinidad, maysa a sursuro a mangipasimudaag a ti Anak ti Dios a ni Jesus isu met laeng ti Mannakabalin-amin a Dios. Sigun iti libro ni Dr. Alvan Lamson a The Church of the First Three Centuries, ti doktrina a Trinidad ket “saan a pulos a masarakan kadagiti Judio ken Kristiano a Kasuratan; timmaud laeng dayta ken nainayon iti Kristianidad babaen kadagiti Amma a mamatpati ken Plato.” Siasino dagitoy nga “Amma a mamatpati ken Plato”? Dagitoy dagiti apostata a klero a naallukoy kadagiti pannursuro ti pagano a pilosopo a Griego a ni Plato.

Maysa a panangallilaw ti pananginayon ti antikristo iti doktrina a Trinidad, yantangay daytoy a doktrina pinagparangna a misterioso ti Dios ken pinagbalinna a makariro ti relasion ti Dios ken ti Anak. (Juan 14:28; 15:10; Colosas 1:15) Panunotem laengen, kasano nga ‘umadani iti Dios’ ti maysa a tao, kas iparparegta ti Kasuratan, no misterioso ti Dios?​—Santiago 4:8.

Dayta ti pinakaro pay ti adu a managipatarus iti Biblia a nangikkat iti nagan ti Dios a Jehova iti patarusda, uray no nasurok a 7,000 a daras a masarakan dayta iti orihinal a Biblia! Nalawag a maysa a panangtabbaaw iti Namarsua kadatayo ken iti naipaltiing a Saona ti panangiladawan iti Mannakabalin-amin a Dios kas maysa nga awan naganna a misterio. (Apocalipsis 22:18, 19) Maysa pay, ti panangsukat iti nagan ti Dios babaen dagiti titulo a kas iti Apo ken Dios ket pananglabsing iti modelo a kararag ni Jesus, a kastoy ti kuna ti pasetna: “Masantipikar koma ti naganmo.”​—Mateo 6:9.

Ti Antikristo Laksidenna ti Pagarian ti Dios

Dagiti antikristo aktiboda a nangnangruna bayat ‘ti maudi nga al-aldaw,’ ti tiempo a pagbibiagantayo ita. (2 Timoteo 3:1) Ti panangallilaw kadagiti tattao maipapan iti akem ni Jesus kas Ari iti Pagarian ti Dios, maysa a nailangitan a gobierno a mabiiten a mangituray iti intero a daga, ti kangrunaan a panggep dagitoy a manangallilaw iti kaaldawantayo.​—Daniel 7:13, 14; Apocalipsis 11:15.

Kas pagarigan, ikasaba ti dadduma a pangulo ti relihion a ti Pagarian ti Dios ket maysa a kasasaad iti puso dagiti tattao, maysa a panangmatmat a saan a naibatay iti Kasuratan. (Daniel 2:44) Dadduma ti mangibaga nga agtigtignay ni Kristo babaen kadagiti gobierno ken institusion dagiti tattao. Ngem kinuna ni Jesus: “Ti pagariak saan a paset daytoy a lubong.” (Juan 18:36) Kinapudnona, ni Satanas, saan a ni Kristo, “ti agturay iti lubong” ken “ti dios daytoy a sistema ti bambanag.” (Juan 14:30; 2 Corinto 4:4) Daytoy ti mangilawlawag no apay a din agbayag, pukawen ni Jesus dagiti amin a gobierno ti tao ket isu ti agbalin a kakaisuna a Mangituray iti daga. (Salmo 2:2, 6-9; Apocalipsis 19:11-21) Ikarkararag dagiti tattao a kastoy ti mapasamak no ikararagda ti Kararag ti Apo, a kunkunada: ‘Umay koma ti pagariam. Maaramid koma ti pagayatam ditoy daga.’​—Mateo 6:10, King James Version.

Gapu ta supsuportaranda ti napolitikaan a sistema iti lubong, adu a pangulo ti relihion ti nangbusor, nangidadanes pay ketdi, kadagidiay mangiwarwaragawag iti kinapudno maipapan iti Pagarian ti Dios. Ngem makapainteres ta dinakamat ti libro ti Biblia nga Apocalipsis ti maysa a simboliko a balangkantis​—ti “Babilonia a Dakkel”​—a “nabartek iti dara dagiti sasanto ken iti dara dagiti saksi ni Jesus.” (Apocalipsis 17:4-6) Makikamkamalala met iti naespirituan babaen ti panangsuportarna kadagiti “ar-ari” iti daga, wenno dagiti napolitikaan nga agtuturay, ket makagun-od met iti pabor. Daytoy a simboliko a babai ket awan sabali no di dagiti palso a relihion iti lubong. Isu ti kangrunaan a paset ti antikristo.​—Apocalipsis 18:2, 3; Santiago 4:4.

Ti Antikristo ‘Gagatelenna Dagiti Lapayag’

Malaksid iti panangilaksidda iti kinapudno ti Biblia, adu nga agkunkuna a Kristiano ti nangbaybay-a kadagiti pagalagadan ti kababalin tapno surotenda ti agraraira ita a moralidad. Ti Sao ti Dios impakpakaunana daytoy a kasasaad, a kunkunana: ‘Addanto tiempo a, dagiti tattao nga agkunkuna nga agserserbi iti Dios, saandanto nga anusan ti makapasalun-at a sursuro, no di ket, maitunos kadagiti bukodda a tarigagay, mangurnongdanto kadagiti mannursuro a maipaay iti bagbagida tapno gagatelenda dagiti lapayagda.’ (2 Timoteo 4:3) Dagitoy a mangisursuro iti narelihiosuan a kinaulbod nadeskribirda met kas ‘ulbod nga apostol, manangallilaw a trabahador, a pagbalbalinenda ti bagbagida a kasla apostol ni Kristo.’ Kastoy ti kuna ti Biblia: “Ti panungpalanda maitunosto iti ar-aramidda.”​—2 Corinto 11:13-15.

Dagiti aramidda ramanenna ti “nalulok a kababalin,” nga agdadata a di panangikabilangan kadagiti natan-ok a moral a prinsipio. (2 Pedro 2:1-3, 12-14) Saan kadi a makitatayo ti umad-adu a pangulo ti relihion ken dagiti pasurotda a mangar-aramid​—wenno mangpampanuynoy​—kadagiti saan a nakristianuan nga ar-aramid, kas iti homoseksualidad ken pannakidenna iti saan nga asawa? Pangngaasiyo ta idiligyo dagitoy a nalatak a panangmatmat ken estilo ti panagbiag iti kunaen ti Biblia iti Levitico 18:22; Roma 1:26, 27; 1 Corinto 6:9, 10; Hebreo 13:4; ken Judas 7.

“Subokenyo Dagiti Naipaltiing nga Ebkas”

Gapu kadagiti nadakamaten, ipangagtayo koma dagiti sasao ni apostol Juan a masapul nga ipategtayo dagiti narelihiosuan a patpatientayo. Namakdaar: “Saanyo a patien ti tunggal naipaltiing nga ebkas, no di ket subokenyo dagiti naipaltiing nga ebkas tapno makitayo no nagtaudda iti Dios, agsipud ta adu nga ulbod a mammadto ti nakastrek ditoy lubong.”​—1 Juan 4:1.

Usigenyo ti nagsayaat a pagwadan ti dadduma a “nataktakneng-panagpampanunotda” a tattao nga agnanaed iti siudad ti Berea idi umuna a siglo. Dagitoy ‘inawatda ti sao buyogen ti napalalo a kinagagar ti panunot, a siaannad a suksukimatenda ti Kasuratan iti inaldaw no agpayso dagitoy a banag a sinarita da Pablo ken Silas.’ (Aramid 17:10, 11) Wen, nupay magagaranda a makasursuro, sinigurado dagiti taga-Berea a talaga a naibatay iti Kasuratan ti nangngeg ken inawatda.

Ita, dagiti met pudno a Kristiano saanda nga agpapaimpluensia kadagiti agbaliwbaliw a nalatak a kapanunotan no di ket siiirut a salimetmetanda ti kinapudno ti Biblia. Insurat ni apostol Pablo: “Daytoy ti agtultuloy nga ikarkararagko, a ti ayatyo umadu koma nga ad-adda pay buyogen ti umiso a pannakaammo ken naan-anay a panangilasin.”​—Filipos 1:9.

No dikay pay naaramid dayta, aramidenyo a kalat ti manggun-od iti “umiso a pannakaammo ken naan-anay a panangilasin” babaen ti panangammo no ania a talaga ti isursuro ti Biblia. Dagidiay mangtulad kadagiti taga-Berea saanda a maallilaw kadagiti “parparbo a sasao” dagiti antikristo. (2 Pedro 2:3) Imbes ketdi, nawayawayaanda babaen ti naespirituan a kinapudno ti pudpudno a Kristo ken dagiti pudno a pasurotna.​—Juan 8:32, 36.

[Kahon/Ladawan iti panid 4]

NO ANIA TI KUNAEN TI BIBLIA MAIPAPAN ITI ANTIKRISTO

“Ubbing, daytoy ti kamaudianan nga oras [nalawag a ti panagngudo ti tiempo dagiti apostol], ket, kas iti nangngegyo nga umay ti antikristo, uray pay ita timpuaren ti adu nga antikristo.”​—1 Juan 2:18.

“Siasino ti naulbod no di daydiay mangilibak a ni Jesus isu ti Kristo? Isu daytoy ti antikristo, daydiay mangilibak iti Ama ken iti Anak.”​—1 Juan 2:22.

“Tunggal naipaltiing nga ebkas a saan a mangipudno ken Jesus saan a nagtaud iti Dios. Kanayonanna pay, daytoy ti naipaltiing nga ebkas ti antikristo a nangngegyo nga um-umay, ket ita addan ditoy lubong.”​—1 Juan 4:3.

“Adu a manangallilaw ti nakastrek ditoy lubong, tattao a saan a mangipudpudno ken Jesu-Kristo kas immay a naglasag. Isu daytoy ti manangallilaw ken ti antikristo.”​—2 Juan 7.

[Kahon/Dagiti Ladawan iti panid 5]

MANANGALLILAW NGA AGPAMPAMMARANG ITI ADU A PAMAY-AN

Agaplikar ti sao nga “antikristo” kadagiti amin a mangilibak iti ibagbaga ti Biblia maipapan ken Jesu-Kristo, amin a bumusor iti Pagarianna, ken amin a mangmaltrato kadagiti pasurotna. Karaman met dagiti tattao, organisasion, ken nasion nga agkunkuna a mangirepresentar ken Kristo wenno sibibiddut a mangibagbaga nga isuda ti Mesias babaen ti sipapangas a panangikarida a kabaelanda nga aramiden dagiti bambanag a ni laeng Kristo ti makabael a mangaramid​—ti mangyeg iti pudpudno a talna ken talged.

[Credit Line]

Augustine: ©SuperStock/age fotostock

[Ladawan iti panid 7]

Kas kadagiti taga-Berea, ‘inaldaw koma a sukimatentayo ti Kasuratan’