Panangagas

Ti namilagruan a panangagas itoy tiempotayo maar-aramidda ngata babaen iti espiritu ti Dios?

Ti abilidad nga agaramid iti milagro adda ngata sabali a gubuayanna malaksid iti pudno a Dios?

Da Moises ken Aaron nagdatagda idi ken Faraon ti Egipto tapno kiddawenda a mapalubosan ti Israel a mapan idiay let-ang tapno agdatonda ken Jehova. Kas pammaneknek a sinuportaran ida ti Dios binilin ni Moises ni Aaron nga ipuruakna ti sarukodna ket nagbalin a dakkel nga uleg. Daydi a milagro ket gapuanan ti pannakabalin ti Dios. Ngem dagidi managsalamangka a papadi ti Egipto impuruakda met dagiti sarukodda ket dagitoy nagbalinda met a dadakkel nga uleg. (Ex. 7:8-12) Makimbileg a nakapagmilagroda?—Idiligyo ti Deuteronomio 18:10-12.

Itoy maika-20 a siglo adda panangagas babaen iti pammati a maang-angay kadagiti gimong nga idadauluan dagiti klero ti Kakristianuan. Kadagiti relihion a di-Kristiano addada papadi a voodoo, mangkukulam, mangngagas ken dadduma pay a makabael a mangpaimbag; masansan nga agaramatda iti salamangka ken panagbuyon. Dadduma a “psychic healers” kunada ti panangagasda awan pannakainaigna iti relihion. Kadagitoy nga ehemplo, Dios ngata ti paggapuan ti bilegda a mangagas?

Mat. 24:24: “Tumakderdanto dagiti ulbod a Kristo ken dagiti ulbod a mammadto ket mangipakitadanto iti dadakkel a pagilasinan [“dagiti milagro,” TEV] ken datdatlag tapno mangisiasida koma, no mabalin, uray pay kadagiti napili.”

Mat. 7:15-23: “Agaluadkayo kadagiti ulbod a mammadto . . . Adunto dagiti agkuna kaniak iti daydiay nga aldaw, ‘Apo, Apo, saankami aya a nagipadto iti naganmo, ket iti naganmo pinaruarmi dagiti demonio, ket iti naganmo nagaramidkami iti adu a nabileg nga ar-aramid [“dagiti milagro,” JB, NE, TEV]?’ Ket siak ipalgakkonto kadakuada: Uray kaano dikayo naam-ammo! Umadayokayo kaniak, dakayo nga agar-aramid ti dakes.”

Dagiti makapasiddaaw a panangagas ita maipada ngata kadagidi namilagruan a panangagas ni Jesus ken dagidi immuna nga adalanna?

Bayad ti serbisioda: “Paimbagenyo dagiti masaksakit, pagungarenyo dagiti natay, dalusanyo dagiti agkukutel, paruarenyo dagiti demonio. Ti inawatyo a libre, itedyo a libre.” (Mat. 10:8) (Kasta kadi ti ar-aramiden dagiti mangngagas ita—nga it-itedda a libre, kas imbilin ni Jesus?)

Kaadut’ maagasanda: “Amin dagiti umariwekwek inagawaanda a sagiden [ni Jesus], ta rummuar kenkuana ti pannakabalin ket pinaimbagna amin ida.” (Luc. 6:19) “Iti kasta nga ipanda dagiti masaksakit iti daldalan ket ikabilda ida kadagiti pagiddaan ken kadagiti langkapi, ta inton lumabas ni Pedro, bareng no ti aniniwanna linonganna ti dadduma kadakuada. Kasta met, napan a nagkukuyog dagiti umariwekwek a naggapu kadagiti siudad a kaparanget ti Jerusalem, a nangnangyeg kadagiti masaksakit ken kadagiti parparigaten dagiti espiritu a narugit, ket isuda amin naagasanda.” (Ara. 5:15, 16) (Itatta, amin kadi a mapan kadagiti relihioso a mangngagas wenno mapan kadagiti relihioso a tabernakulo ket umimbagda?)

Ti kabibiag dagiti miembro dagiti organisasion a nakaikamengan dagita a “mangngagas” ipampamatmatda aya nga ik-ikutanda ti espiritu ti Dios?

Kas maysa a grupo karkarna kadi ti panangiparangarangda iti bungbunga ti espiritu a kas iti ayat, nabayag a panagitured, kinaemma ken panagteppel?—Gal. 5:22, 23.

Pudno kadi a saanda a “paset ti lubong,” a liklikanda amin a pannakinamin kadagiti napolitikaan a ganuat ti lubong? Dida aya nagibukbok iti dara bayat ti gubat? Nasayaat aya ti pakasarsaritaanda gapu ta liniklikanda ti imoral a kababalin ti lubong?—Juan 17:16; Isa. 2:4; 1 Tes. 4:3-8.

Dagiti pudno a Kristiano itatta mailasinda aya gapu ta nalaingda iti namilagruan a panangagas?

Juan 13:35: “Gapu itoy mailasindanto a dakayo dagiti adalak, no adda ayatyo iti maysa ken maysa.” (Daytoy ti kinuna ni Jesus. No talaga a mamatitay kenkuana, ayat, saan a ti namilagruan a panangagas, ti matmatantayo kas ebidensia ti pudno a Kinakristiano.)

Ara. 1:8: “Umawatkayto ti pannakabalin inton umay kadakayo ti nasantuan nga espiritu, ket dakayto ti saksik . . . agingga iti ungto ti daga.” (Sakbay a pinanawanna dagiti apostolna tapno agsublin idiay langit, daytoy ti imbaga kadakuada ni Jesus a nasken nga aramidenda, saan ket a ti panangagas. Kitaenyo met ti Mateo 24:14; 28:19, 20.)

1 Cor. 12:28-30: “Ti Dios insaadna dagidiay agsasagadsad iti kongregasion, umuna, dagiti apostol; maikadua, dagiti mammadto; maikatlo, dagiti mannursuro; sumaganad nabileg nga ar-aramid; sumaganad sagsagut ti panangagas; dagiti serbisio a panangtulong, dagiti abilidad a mangiturong, nagduduma a dildila. Saanda nga apostol amin, di ngamin? Saanda a mammadto amin, di ngamin? Saanda a mannursuro amin, di ngamin? Saanda a makaaramid amin iti nabileg nga ar-aramid, di ngamin? Saanda nga agikut amin iti sagsagut ti panangagas, di ngamin?” (No kasta, ipakita ti Biblia a sibabatad a saan nga amin a pudno a Kristiano ket maaddaan iti sagut ti panangagas.)

Saan aya nga ipakita ti Marcos 16:17, 18 a ti abilidad a mangagas kadagiti masaksakit ket pagilasinan kadagiti mammati?

Mar. 16:17, 18, KJ: “Dagitoy a pagilasinan kuyogendanto dagiti mammati; Iti naganko paruarendanto dagiti diablo; agsaodanto kadagiti baro a dildila; agpidutdanto ti ul-uleg; ket no uminumdanto ti makagamut, saandanto a maan-ano; ipataydanto ti im-imada kadagiti masaksakit, ket umimbagdanto.”

Dagitoy a bersikulo agparangda kadagiti dadduma a manuskrito ken bersion ti Biblia iti maika-5 ken maika-6 a siglo K.P. Ngem di masarakan dagitoy kadagiti immun-una a Griego a manuskrito, ti Sinaiticus ken Vatican MS. 1209 iti maika-4 a siglo. Kuna ni Dr. B. F. Westcott, autoridad kadagiti manuskrito ti Biblia, a “dagita a bersikulo . . . saan ida a paset ti orihinal a texto no di nainayonda laeng.” (An Introduction to the Study of the Gospels, Londres, 1881, p. 338) Ni Jerome a nagipatarus iti Biblia, idi maika-5 a siglo, kinunana a “nganngani amin a Griego a manuskrito awananda kadagitoy a texto.” (The Last Twelve Verses of the Gospel According to S. Mark, Londres, 1871, J. W. Burgon, p. 53) Kuna ti New Catholic Encyclopedia (1967): “Ti bokabulariona ken ti wagas ti pannakaisuratna nagpaiduma unay no idilig iti intero nga Ebanghelio ket kasla imposible a ni Marcos a mismo ti nangputar iti dayta [kayatna a sawen, dagidiay bersikulo 9-20].” (Tomo IX, p. 240) Awan ti rekord nga agkuna a dagidi immuna a Kristiano ket imminumda iti sabidong wenno nagpidutda kadagiti uleg tapno paneknekanda a mamatida.

Apay a ti sagsagut kas iti namilagruan a panangagas ket naited kadagiti Kristiano idi immuna a siglo?

Heb. 2:3, 4: “Kasanonto ti panaglisitayo no ditay ikankano ti kasta unay a nagdakkel a pakaisalakanan isu nga idinto nga impakaammo ti Apo idi damo pinaneknekan kadatayo dagiti nakangngeg kenkuana, ket bimmuyog met kadakuada ti Dios a sinaksianna kadagiti pagilasinan ken nakaskasdaaw ken nadumaduma a nabileg nga ar-aramid ken pannakaiwaras ti nasantuan nga espiritu kas iti pagayatanna?” (Adtoy a talaga ti makakumbinsir nga ebidensia, a ti Nakristianuan a kongregasion, a kabbaro la idi, ket pudpudno a kukua ti Dios. Ngem idi a napaneknekanen a kasta, masapul pay aya a maulit-ulit manen a mapaneknekan pay?)

1 Cor. 12:29, 30; 13:8, 13: “Saanda a mammadto amin, di ngamin? . . . Saanda nga agikut amin iti sagsagut ti panangagas, di ngamin? Saanda nga agsao amin iti dildila, di ngamin? . . . Ti ayat saan a maibus uray kaano. Ngem uray pay adda sagsagut ti pammadto, manungpaldanto; uray pay adda dildila, agsardengdanto . . . Ita, nupay kasta, mataginayon ti pammati, namnama, ayat, dagitoy a tallo; ngem ti kadaklan kadakuada isu ti ayat.” (Idi nalpasen ti nakairantaanda, simmardengen dagita a namilagruan a sagsagut. Ngem dagiti nakapatpateg a galad nga isuda ti bungbunga ti espiritu ti Dios kaskasdi nga agminarda no iti kabibiag dagiti pudno a Kristiano.)

No maagasan la ketdi ti maysa, nasken pay aya no kasanot’ pannakaagasna?

2 Tes. 2:9, 10: “Ti kaadda daydiay nadangkes mayalubog iti panangaramid ni Satanas a mapakuyogan iti amin a nabileg nga aramid [“amin a kita dagiti milagro,” JB] ken ulbod a pagilasinan ken dagiti datdatlag ken ti amin a nakillo a panangallilaw a maipaay kadagidiay mapukaw, a kas dusa agsipud ta dida inawat ti ayat ti kinapudno a maipaay koma a pakaisalakananda.”

Luc. 9:24, 25: “Ta uray siasino a mayat koma a mangisalakan iti kararuana [“biagna,” RS, JB, TEV] mapukawnanto; ngem uray siasino a makapukaw iti kararuana gapu kaniak maisalakannanto. Talaga, ania ti magunggona ti tao no maalana amin a lubong ngem mapukawna ti mismo a bagina wenno agsagaba ti pannakadadael?”

Adda aya mainanamatayo a napudno a pannakaagas kadagiti amin a saksakit?

Apoc. 21:1-4: “Nakitak ti maysa a langit a baro ken maysa a daga a baro; ta daydi immuna a langit ken daydi immuna a daga napalabasdan . . . ‘Ket [ti Dios] punasennanto ti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Ta dagidi immuna a bambanag napalabasdan.’”

Isa. 25:8: “Isu talaga nga alimonenna nga agnanayon ni patay, ket ti Soberano nga Apo Jehova sigurado a punasennanto ti lulua iti isuamin a ruprupa.” (Kasta met, ti Apocalipsis 22:1, 2)

Isa. 33:24: “Awanto ti agtaeng nga agkuna: ‘Masakitak.’”

No Adda Agkuna—

‘Mamatikayo kadi iti panangagas?’

Kunaenyo: ‘Siasinoman a di mamati a ti Dios kabaelanna ti mangagas dina patien ti Biblia. Ngem madukotannak no umiso met laeng ti panangag-agas nga ar-aramidenda itatta.’ Sayonto inayon: (1) ‘Ibasak man kadakayo ti maysa a texto, ket paliiwenyo man no adda nakaidumaanna ti maar-aramid itatta. (Mat. 10:7, 8) . . . Nadlawyo kadi ditoy nga adda imbaga ni Jesus a kabaelan nga aramiden dagidi disipulona ngem di kabaelan ita dagiti mangngagas? (Dida mapagungar dagiti natay.)’ (2) ‘Saantayo nga ukomen ti sabali a tattao, ngem makapainteres unay ta nadakamat ti Mateo 24:24 ti banag a masapul nga annadantayo.’

Wenno: ‘Talaga a mamatiak a ti kunaen ti Biblia maipapan iti panangagas ket pudno. Ngem ti panangagas a maar-aramid iti daytoy a sistema ti bambanag ket temporario laeng ti maitedna a pagimbagan, di ngamin? Inton agangay mataytay met la amin. Addanto ngata tiempo nga isuamin a sibibiag ket tagiragsakenda ti naimbag a salun-at ket didan pulpulos a matay? (Apoc. 21:3, 4)’