No Kasano a ti Pammati Matulonganna dagiti Masakit

DAGITI salaysay maipapan kadagiti namilagruan a panangagas idiay Biblia pasingkedanna kadatayo a maseknan ti Dios maipapan iti pagimbagantayo, ken ipakitada ti pannakabalinna a mangagas. Yantangay dagitoy a namilagruan a panangagas impadayagda ti Dios ken nangiyegdat’ adu unay a rag-o, nainrasonan nga iyimtuodtayo, Ti kadi sagut a panangagas babaen iti nasantuan nga espiritu ket agkurkurri pay laeng?

Ti sungbat iti dayta a saludsod ket saan​—ket ti rason mabalin a kellaatenna ti dadduma. Dagidiay namilagruan a panangagas idi umuna a siglo naitungpaldan ti panggepda. Siuumiso a kunaen ti The Illustrated Bible Dictionary: “Ti panggep dagiti milagro ti panangagas ket teolohikal, saan a medikal.” Aniat’ sumagmamano kadagiti teolohikal a panggep a nagserbian dagidiay a milagro?

Ti maysa ket, dagiti milagro ti panangagas ni Jesus nagserbianna ti panggep a panangbigbig kenkuana kas ti Mesias. Kalpasan ipapatayna, timmulongda a mangpaneknek a ti bendision ti Dios ket adda iti baro a Kristiano a kongregasion. (Mateo 11:2-6; Hebreo 2:3, 4) Ad-adda pay, impakitada a ti kari ti Dios a mangagas iti sangatauan idiay baro a lubong ket matungpalto. Pasingkedanda ti pammatitayo a dumtengto ti panawen inton “awan agtaeng nga agkuna: ‘Masakitak.’ Dagiti tattao nga agnanaed iti daga isudanto dagidiay napakawan kadagiti basolda.” (Isaias 33:24) Apaman a naragpaten dagitoy nga umuna-siglo a panggep, saanen a kasapulan dagiti milagro.

Nakadidillaw a mismo a dagidi umuna-siglo nga adalan ni Jesus nagsagabada met kadagiti sagubanit a saan a simimilagro a naagasan. Kanayonan pay daytoy a pammaneknek a ti trabaho a namilagruan a panangagas ni Jesus kasta met kadagiti apostol ket naisangrat tapno mangisuro kadagiti napapateg a kinapudno, saan a tapno mangipaay iti medikal a serbisio. Idi nangisingasing iti agas maipaay iti masansan a panagsakit ni Timoteo, intandudo ni Pablo ti medikal a pannakaaramat ti arak, saan a panangagas babaen pammati. Ni Pablo, a nagaramid kadagiti milagro ti panangagas, di immawat iti bang-ar manipud iti “siit iti lasag” a nagtultuloy a “nangparigat” kenkuana.​—2 Corinto 12:7; 1 Timoteo 5:23.

Idi natayen dagiti apostol, limmabasen ti sagut a panangagas. Impabigbig a mismo ni Pablo a mapasamak daytoy. Iti panangiyarigna iti Kristiano a kongregasion iti maysa a maladaga, kuna ni Pablo: “Idi ubingak, nagsasaoak a kasla ubing, nagpampanunotak kas maysa nga ubing, nagrasrasonak kas maysa nga ubing; ngem ita ta nataenganakon, binaybay-akon dagiti inuubingan a bambanag.” Ti punto ti pangngarigna ket dagiti namilagruan a sagut ti espiritu ket paset ti kinaubing ti Kristiano a kongregasion. Isuda idi dagiti “inuubingan a bambanag.” Ngarud, kunana: “Isuda [dagiti namilagruan a sagut] mabaybay-anto.”​—1 Corinto 13:8-11.

Makatulong Kadi ti Pammati no Agsakittayo?

Nupay kasta, uray no ditay agpannuray iti panangagas babaen pammati, maitutop la ketdi nga agkararagtayo iti Dios maipaay iti tulong no agsakittayo. Ken sigurado nga awan dakesna ti panangikararag kadatayo dagiti sabsabali. Ngem masapul nga agbalin a realistiko dagiti kararag ken maitunosda iti pagayatan ti Dios. (1 Juan 5:14, 15) Awan pakasarakantayo a bilinennatayo ti Biblia nga agkararag maipaay iti panangagas babaen pammati.a Imbes ketdi, ikararagtayo ti naayat a pannaranay ni Jehova kabayatan dagiti suot a parnuayen ti sakit.

Ipakita ti Biblia no ania ti mabalin nga ikararag dagiti matalek a tattao no agsakitda idi a kunana: “Ni Jehova sumaranayto kenkuana iti pakaidalitan; sika baliwamto amin nga iddana iti panagsakitna.” (Salmo 41:3) Ti panagmennamenna iti Sao ti Dios tulonganna dagidiay agsagsagaba kadagiti emosional a sakit. Insurat ti salmista: “Ti naayat a kinamanangaasim, O Jehova, tinaginayonnak. Idi a dagiti mangriribuk a pampanunotko immaduda ditoy unegko, dagiti pangliwliwam nangrugida a nangpatalged itoy kararuak.”​—Salmo 94:18, 19; kitaenyo met ti 63:6-8.

Mainayon pay, kasapulantayo nga ipakita ti naimbag a rikrikna kadagiti bambanag maipapan iti salun-at, ken balakadannatayo ti Biblia maipapan iti daytoy. Nasaysayaat nga amang ti agbiag maitunos kadagiti prinsipio ti Biblia ngem ti maigamer iti panangabuso iti droga, panagsigarilio, nalabes a panaginum, wenno kinabuklis ket kalpasanna inton dumtengen ti sakit, siuupay a pamrayanda ti panangagas babaen pammati. Ti panangikararag iti milagro no ti maysa ket kinaptan ti sakit ket saan nga isu ti sandi maipaay iti nainsiriban a kababalin nga aglisi kadagiti maliklikan a saksakit, kas iti pannangan iti nasustansia a taraon no adda dayta wenno panangbiruk iti maawat a medikal a tulong no daytat’ mabalin.

Paregtaennatayo met ti Sao ti Dios a mangsukay kadagiti nasalun-at a mental a kababalin a makagunggona iti pisikal a salun-attayo. Ibalakad ti libro dagiti Proverbio: “Ti natalna a puso isu ti biag ti lasag, ngem ti imun isu ti panagtumoy dagiti tultulang.” “Ti narag-o a puso naimbag nga agas, ngem ti sidudukot nga espiritu magmaganna ti tultulang.” (Proverbio 14:30; 17:22) Ti panangikararag maipaay iti nasantuan nga espiritu tapno mamatanur iti kinatalinaay ken rag-o kadatayo ket maaddaan laeng makagunggona nga epekto iti pisikal a salun-attayo.​—Filipos 4:6, 7.

Ti Ngay Panangagas Babaen Pammati?

Siempre, uray pay agbiag a sisasalun-at ti maysa a tao kas ipalubos ti kasasaadna, mabalin latta a dumteng ni sakit. Ania ngayen? Adda kadi pagdaksanna ti ipapan iti maysa a mangngagas babaen pammati iti inanama ti pannakaagas? Wen, adda pagdaksanna. Dagiti moderno a mangngagas babaen pammati mammano a mangagasda nga awan bayadna. Ken dakkel a pukaw kadatayo ti panangbusbos iti kuarta iti maysa a mangngagas babaen pammati idinto a dayta a kuarta ket mabusbos koma maipaay iti medikal a tulong. Malaksid pay, apay a mangtedkayo ti kuarta kadagiti indibidual a manggunggundaway iti kinalaka a mamatpati dagiti tattao?

Mabalin a sumuppiat dagiti dadduma: ‘Sigurado, ti panangagas babaen pammati ket addaan la ketdi iti pateg no uray iti bassit laeng a porsiento dagidiay mapan kadagiti “mangngagas” ket maagasanda.’ Ngem mapagsusuppiatan no dagiti mangngagas babaen pammati pudpudno met laeng a maagasanda ti maysa iti permanente a pamay-an. Bigbigen ti Encyclopædia Britannica: “Nakabasbassit laeng a panagsirarak maitunos kadagiti masinunuo a wagas ti nagun-odan kadagiti adu a di ammo a bambanag iti panangagas babaen pammati.”

Uray no kasla naagasan ti sumagmamano, saan a pammaneknek daytoy iti panagkurri ti nasantuan nga espiritu. Idiay Sermonna idiay Bantay, kuna ni Jesus: “Adunto ti agkuna kaniak iti dayta nga aldaw, ‘Apo, Apo, saankami aya a nagipadto gapu iti naganmo, ken pinaruarmi dagiti sairo gapu iti naganmo, ken nagaramid kadagiti datdatlag gapu iti naganmo?’ Ket kaskasdi kunaekto kadakuada: Dikay pulos naam-ammo! Umadayukayo kaniak, dakayo a managaramid ti kinadakes.” (Mateo 7:22, 23) Kuna met ni Jesus a dadduma a tattao, nupay di inanamongan ti Dios, ti agpadlaw babaen kadagiti pagilasinan: “Ta tumakderto dagiti saan a pudno a Kristo ken dagiti ulbod a mammadto ket mangteddanto kadagiti dadakkel a pagilasinan ken datdatlag tapno isiasida, no mabalin, uray pay dagiti napili.” (Mateo 24:24) Sigurado, mairaman dagiti moderno a mangngagas babaen pammati iti pannakaipakat dagitoy a sasao, buyogen dagiti dramatiko a panagpabuyada, kankanayon a panagdawatda ti kuarta, ken maipatpato a namilagruan a panangagasda.

Saan a sumursurot dagita a tattao kadagiti addang ni Jesus. Asino, ngarud, ti sursurotenda? Ikkannatayo ni apostol Pablo iti pamalatpatan idi a kunana: “Ni Satanas met laeng agbalin a kasla anghel ti lawag. Saan ngarud a pakasdaawan a dagiti katulonganna agparangda a kakasla katulongan ti kinalinteg. Ngem ti panungpalanda maiyannurotto kadagiti aramidda.” (2 Corinto 11:14, 15) No dagiti mangngagas babaen pammati dida makaagas kas iti kunkunada, mangallilawda ngarud, a sursurotenda ti dalan ni Satanas, “isu a mangal-allilaw iti isuamin a mapagnaedan a daga.” (Apocalipsis 12:9) Ngem ania ngay no, iti sumagmamano a kaso, ket makaagasda? Saan ngata a dagiti “mannakabalin nga aramidda” ket babaen iti pannakabalin ni Satanas ken dagiti demoniona? Wen, kasta la ketdi ti kaso!

Ti Tiempo ti Napaypayso a Panangagas

Dagiti namilagruan a panangagas ni Jesus ket naaramid babaen iti tulong ti nasantuan nga espiritu ti Dios. Impakitada ti panggepna a mangrisut iti amin a parikut ti salun-at ti tao iti tiempo nga inkeddengna. Inkari ni Jehova “ti panangagas kadagiti nasnasion.” (Apocalipsis 22:2) Ket saannanto laeng nga agasan dagiti sakit no di ket pukawenna pay ni patay. Inlawlawag ni Juan nga immay ni Jesus “tapno isuamin a mangalagad ti pammati kenkuana ket saan koma a madadael no di ket adda koma biagna nga agnanayon.” (Juan 3:16) Anian a nagsayaat a pannakaagasto dayta! Agaramidto manen ni Jesus kadagiti panangagas kas kadagidiay nairekord idiay Biblia ngem iti adayo a dakdakkel a rukod. Pagungarennanto pay dagiti natay! (Juan 5:28, 29) Kaanonto a mapasamak daytoy?

Idiay baro a lubong ti Dios, a, sigun iti amin a pammaneknek, ket asidegen. Dayta a baro a lubong, a maipagtengto kalpasan ti agnanayonen a pannakaikkat ti kinadakes daytoy a sistema ti bambanag, ket napaypaysonto a bendision para kadagiti nalinteg-panagpuspusona a tattao. Agbalinto a maysa a lubong nga awanan panagsagaba. “[Ti Dios] punasennanto ti amin a lulua kadagiti matada, ket awanton ni patay, awanto metten ti sasaibbek wenno sangsangit wenno rigrigat. Dagiti immuna a bambanag napalabasdan.” (Apocalipsis 21:4) Anian a pannakaigiddiat manipud iti makitkitatayo iti aglawlawtayo ita!

No kasta, kadagiti panagsakityo, agkararagkayo iti Dios a maipaay iti pannaranay. Ken masakitkayo man wenno nasalun-at, adalenyo no kasano a ti biag nga agnanayon nga awanan saksakit ket talaga a posiblento. Pabilgenyo ti pammatiyo iti daytoy a mapagtalkan a kari ti Dios babaen ti panagadalyo kadagiti adu a pangibatayan iti dayta idiay Biblia. Ammuenyo no kasano a ti panggep ti Dios iti daytoy a banag ket asidegen ti pannakatungpalna sigun iti bukodna a pagorasan. Dikay agduadua, ta ipasigurado ti Sao ti Dios kadatayo: “Alimunennanto nga agnanayon ni patay, ket ni Soberano nga Apo Jehova punasennanto dagiti lulua kadagiti isuamin a ruprupa.”​—Isaias 25:8.

[Footnote]

[Ladawan iti panid 7]

Dagiti namilagruan a panangagas ni Jesus intungpalda ti panggepda

[Ladawan iti panid 8]

Uliten ken paaduento ni Jesus dagiti milagro ti panangagas