Dagiti ‘Namilagruan a Panangpaimbag’ Ita—Gapuanan Kadi ti Dios?
ITI dadduma a pagilian, gagangay ti pannakakita kadagiti peregrino a sumarsarungkar kadagiti sagrado a lugar. Adu ti agkuna a sadiay a napaimbag dagiti “di maagasan” a sakit ken an-annayenda. Iti met dadduma a lugar, addada mangngagas nga agkunkuna a mapaimbagda dagiti tattao babaen iti naisangsangayan a pannakabalin. Iti pay sabsabali a lugar, maang-angay dagiti narelihiosuan ken emosional a taripnong a sadiay dagiti masakit ket mabalin a lumagto manipud kadagiti wheelchair-da wenno ipalladawda dagiti saklayda ken ibagbagada nga immimbagdan.
Nagduduma ti relihion ti kaaduan kadagita a mangar-aramid iti panangpaimbag ken masansan nga akusaranda ti maysa ken maysa kas apostata, ulbod, wenno pagano. Tumaud ngarud ti saludsod a: Ti kadi Dios ket agar-aramid kadagiti milagro babaen ti adu nga agsusupadi a pamay-an wenno grupo a masansan nga agbibinnusor? Imutektekam ta kuna ti Biblia: “Ti Dios ket Dios, saan a ti riribuk, no di ket ti talna.” (1 Corinto 14:33) No kasta, talaga kadi a gapuanan ti Dios dagita a ‘namilagruan a panangpaimbag’? Ibagbaga ti dadduma a mangngagas a mangpapaimbagda babaen ti pannakabalin ni Jesus. Usigentayo no kasano a pinaimbag ni Jesus dagiti tattao.
No Kasano a Pinaimbag ni Jesus Dagiti Tattao
No idilig kadagiti mangngagas ita, naiduma unay ti wagas ti panangpaimbag idi ni Jesus kadagiti masakit. Kas pagarigan, pinaimbag ni Jesus dagiti amin a napan nagpaagas kenkuana. Saanna a pinaimbag ti sumagmamano la a tattao a pinilina manipud iti bunggoy sana pinagawid lattan ti dadduma a dida man la naagasan. Naan-anay met ken dandani kanayon a giddato ti panangpaimbag ni Jesus. Kuna ti Biblia: “Isu tinarigagayan a sagiden ti intero a bunggoy, agsipud ta ti pannakabalin rumrummuar idi kenkuana ken mangpapaimbag kadakuada amin.”—Lucas 6:19.
Dagiti mangngagas ita babaen ti pammati masansan nga ibagbagada a no saan nga immimbag ti maysa a masakit, kurang kano ti pammatina. Naiduma ni Jesus ta pinaimbagna uray ti dadduma a saan pay idi a mamati kenkuana. Kas pagarigan, sibubulos ti nakemna nga immasideg iti maysa a bulsek a lalaki sana inagasan. Idi agangay, insaludsod kenkuana ni Jesus: “Addaanka kadi iti pammati iti Anak ti tao?” Simmungbat ti lalaki: “Siasino, apo, tapno maaddaanak iti pammati kenkuana?” Kinuna kenkuana ni Jesus: “Ti makisasao kenka isu dayta.”—Juan 9:1-7, 35-38.
Mabalin a maisaludsodmo, ‘No saan a kasapulan ti pammati tapno ti maysa ket mapaimbag ni Jesus, apay ngarud a kastoy ti masansan a kinunana kadagidiay pinaimbagna: “Ti pammatim pinaimbagnaka”?’ (Lucas 8:48; 17:19; 18:42) Idi imbagana dayta, pinagminar ni Jesus a dagidiay immasideg kenkuana gapu iti pammati ket immimbag, idinto ta dagidiay nagkedked nga umasideg kenkuana ket naikapis iti gundaway a maagasan. Dagidiay naagasan ket napaimbag gapu iti pannakabalin ti Dios, saan a maigapu iti pammatida. Kuna ti Biblia maipapan ken Jesus: “Pinulotan ti Dios iti nasantuan nga espiritu ken pannakabalin, ket namagpagna iti daga nga ar-aramidenna ti naimbag ket papaimbagenna amin dagidiay inrurumen ti Diablo; agsipud ta ti Dios adda kenkuana.”—Aramid 10:38.
Masansan nga agparang a ti kuarta ti kangrunaan nga adda iti likudan dagiti makuna a panangpaimbag ita. Dagiti mangngagas babaen ti pammati ket nalatak kas nalaing nga agur-or iti pondo. Naipadamag a maysa kadagita a mangngagas ti nakaur-or iti 89 a milion a doliar (U.S.) iti makatawen babaen ti sangalubongan a programana. Adu met a kuarta ti mapastrek dagiti organisasion ti simbaan manipud kadagiti peregrino a mapan agpaagas kadagiti sagrado a lugar. Iti sabali a bangir, di pulos nagpabayad ni Jesus kadagiti tattao a pinaimbagna. Adda pay ketdi tiempo nga impaayanna ida iti taraon. (Mateo 15:30-38) Idi imbaon ni Jesus dagiti adalanna tapno mangasaba, imbagana kadakuada: “Agasanyo dagiti masakit a tattao, ibangonyo dagiti natay a tattao, pagbalinenyo a nadalus dagiti agkukutel, paruarenyo dagiti sairo. Inawatyo nga awan bayadna, itedyo nga awan bayadna.” (Mateo 10:8) Apay a naiduma unay ti ar-aramiden dagiti mangngagas ita no idilig iti inaramid idi ni Jesus?
“Panangpaimbag”—Makinggapuanan?
Adu a tawenen nga ad-adalen ti dadduma nga eksperto iti tay-ak ti medisina ti ar-aramiden dagiti relihioso a mangngagas. Ania ti natakuatanda? Sigun iti Daily Telegraph iti London, kastoy ti kinuna ti maysa a doktor idiay England a 20 a tawen a nangusig iti dayta a banag: “Dagiti maipadpadamag a namilagruan a panangpaimbag ket saan pulos a suportaran ti uray maysa nga ebidensia iti tay-ak ti medisina.” Kaskasdi nga adu a tattao ti mamati unay nga immimbagda babaen iti pannakabalin dagiti relikia, sagrado a lugar, wenno relihioso a mangngagas. Saan ngata a naallilawda laeng?
Iti nalatak a Sermonna iti Bantay, kinuna ni Jesus a dagiti relihioso nga impostor kunaendanto kenkuana: “Apo, Apo, saankami aya a . . . nagaramid iti adu a mannakabalin nga aramid iti naganmo?” Ngem kunaennanto kadakuada: “Saankay a pulos am-ammo! Umadayokayo kaniak, dakayo nga agar-aramid ti kinakillo.” (Mateo 7:22, 23) Maipapan iti nagtaudan ti pannakabalin kano dagita a mangngagas, impakdaar ni apostol Pablo: “Ti kaadda daydiay nakillo ket maitunos iti panagtignay ni Satanas buyogen ti tunggal mannakabalin nga aramid ken dagiti ulbod a pagilasinan ken dagiti tanda ken buyogen ti tunggal nakillo a panangallilaw.”—2 Tesalonica 2:9, 10.
Kanayonanna, ti “panangpaimbag” a nainaig kadagiti narelihiosuan a relikia, idolo, ken imahen ket saan a mabalin a nagtaud iti Dios. Apay? Agsipud ta silalawag nga imbilin ti Biblia: “Pagtalawanyo ti idolatria” ken “Igagayo ti bagbagiyo manipud kadagiti idolo.” (1 Corinto 10:14; 1 Juan 5:21) Dagita a “panangpaimbag” ket paset ti pangallilaw ti Diablo tapno mayadayona dagiti tattao iti pudno a panagdayaw. Kuna ti Biblia: “Ni Satanas a mismo pagbalbalinenna ti bagina a kasla anghel ti lawag.”—2 Corinto 11:14.
No Apay a Nangpaimbag ni Jesus ken Dagiti Apostol
Dagiti pudno a namilagruan a panangpaimbag a nailanad iti Kristiano a Griego a Kasuratan silalawag nga impabigbigda a ni Jesus ken dagiti apostol ket imbaon ti Dios. (Juan 3:2; Hebreo 2:3, 4) Dagiti namilagruan a panangagas ni Jesus patalgedanda met ti mensahe nga inkasabana: “Linikmutna ti intero a Galilea, a nangisursuro kadagiti sinagogada ken nangikaskasaba iti naimbag a damag ti pagarian ken nangag-agas iti tunggal kita ti sagubanit.” (Mateo 4:23) Dagiti mannakabalin nga ar-aramid ni Jesus a pakairamanan ti panangpaimbagna kadagiti masakit, panangipaayna iti taraon iti umariwekwek, panangkontrolna iti paniempo, ken uray pay ti panangpagungarna kadagiti natay, impakpakaunada ti aramidennanto para iti natulnog a sangatauan inton agturayen iti Pagarianna. Talaga a naimbag a damag dayta!
Nagpatinggan dagita a mannakabalin nga aramid ken sagut ti espiritu idi natayen ni Jesus ken dagiti apostol ken ti asinoman nga impaayanda kadagita a sagut. Insurat ni apostol Pablo: “Adda dagiti naipaltiing a kaskasaba, ngem saanda nga agpaut. Adda sagut a mangted iti kabaelan nga agsao iti sabali a pagsasao [a namilagruan ti pannakayebkasda], ngem aggibus. Adda pannakaammo [a nadibinuan ti pannakaipalgakna], ngem agpatingganto.” (1 Corinto 13:8, Ti Baro a Naimbag a Damag Biblia) Apay? Agsipud ta natungpalen ti panggep dagita nga isu ti panangipabigbigda ken Jesus kas ti naikari a Mesias ken iti kongregasion Kristiano nga inanamongan ti Dios. Gapuna, dagiti kasta a mannakabalin nga aramid, agraman panangpaimbag, ket saanen a kasapulan; ‘nagpatinggadan.’
Kaskasdi, adda napateg a masursurotayo kadagiti namilagruan a panangpaimbag ni Jesus. No ipangag ken patientayo dagiti insuro ni Jesus maipapan iti Pagarian ti Dios, mainanamatayo ti tiempo inton ti naipaltiing a padto matungpalen agpadpada iti naespirituan ken pisikal a wagas: “Awanto ti agtataeng nga agkuna: ‘Masakitak.’”—Isaias 33:24; 35:5, 6; Apocalipsis 21:4.