“Agbalinka a Pasurotko”​—Ania ti Kayat a Sawen ni Jesus?

1, 2. Ania ti kasayaatan a mayawis iti maysa a tao, ken ania ti mabalintay nga isaludsod iti bagitayo?

ANIA ti kasayaatan pay laeng a nayawis kenka? Mabalin a malagipmo daydi panangawisda kenka iti naisangsangayan nga okasion, nalabit ti kasar ti dua a tao nga ipatpategmo unay. Wenno mabalin a malagipmo daydi aldaw a panangidiayada kenka iti napateg a trabaho. Sigurado a maragsakanka unay, ibilangmo pay ketdi a pakaidayawam, no makaawatka kadagiti kasta nga awis. Ngem iti kinapudnona, adda nayawis kenka a nasaysayaat nga amang. Nayawis dayta iti tunggal maysa kadatayo. Ket dakkel ti maaramidanna kadatayo no ipangagtayo dayta nga awis. Dayta ti kapatgan a pangngeddeng a mabalintay nga aramiden.

² Ania dayta nga awis? Naggapu dayta ken ni Jesu-Kristo, ti bugbugtong nga Anak ti Mannakabalin-amin a Dios a ni Jehova, ken nailanad dayta iti Biblia. Iti Marcos 10:21, mabasatayo a kinuna ni Jesus: “Umayka agbalinka a pasurotko.” Saan laeng a ti kasasao idi ni Jesus ti nakaiturongan dayta nga awis no di ket ti tunggal maysa kadatayo. Nasayaat nga isaludsodtayo iti bagitayo, ‘Ania ti sungbatko iti dayta nga awis?’ Nalabit ipagarupmo a nabatad ti sungbat. Siasino koma ti agkedked iti kasta a nagsayaat nga awis? Ngem kaskasdi a pagkedkedan dayta ti kaaduan a tattao. Apay?

3, 4. (a) Ania ti nalabit inapalan ti dadduma iti daydi lalaki nga immasideg ken ni Jesus tapno agsaludsod maipapan iti biag nga agnanayon? (b) Ania dagiti nasayaat a galad a nalabit nakita ni Jesus iti nabaknang ken agtutubo nga agturay?

³ Usigem ti maipapan iti lalaki nga inawis a mismo ni Jesus, agarup 2,000 a tawenen ti napalabas. Mararaem unay daytoy a lalaki. Ubing pay, nabaknang, ken adda iti turay​—dagiti banag a nalabit tartarigagayan ken ap-apalan pay ketdi ti dadduma. Nadeskribir iti Biblia kas maysa nga “agtutubo a lalaki,” “nakabakbaknang,” ken “maysa nga agturay.” (Mateo 19:20; Lucas 18:18, 23) Nupay kasta, adda banag a napatpateg maipapan iti daytoy nga agtutubo. Nadamdamagna ti maipapan iti Naindaklan a Mannursuro a ni Jesus, ket nagustuanna dagiti nangngegna.

⁴ Kadagidi a tiempo, kaaduan kadagiti agtuturay ti saan a nangipakita iti umno a panagraem a kaikarian ni Jesus. (Juan 7:48; 12:42) Ngem naiduma daytoy nga agturay. Kuna kadatayo ti Biblia: “Bayat [a ni Jesus] rumrummuaren, maysa a lalaki ti nagtaray nga immasideg ket nagparintumeng iti sanguananna ket insaludsodna kenkuana: ‘Naimbag a Mannursuro, ania ti masapul nga aramidek tapno agtawidak iti agnanayon a biag?’” (Marcos 10:17) Paliiwem ta magagaran unay daytoy a lalaki a makisarita ken ni Jesus. Nagtaray a napan kenkuana iti imatang dagiti tattao, kas iti nalabit aramiden met ti asinoman a napanglaw ken nanumo nga umili. Maysa pay, napnuan panagraem a nagparintumeng iti sanguanan ni Kristo. No kasta, napakumbaba dayta a tao ken sipapanunot iti naespirituan a kasapulanna. Napateg ken ni Jesus dagiti kasta a nasayaat a galad. (Mateo 5:3; 18:4) Di ngarud pakasdaawan a “minatmatan ni Jesus ket nariknana ti panagayat kenkuana.” (Marcos 10:21) Kasano a sinungbatan ni Jesus ti saludsod ti agtutubo?

Naisangsangayan nga Awis

5. Kasano a sinungbatan ni Jesus ti saludsod ti nabaknang nga agtutubo a lalaki, ken kasanotay nga ammo a saan a kinapanglaw ti kayat a sawen daydiay “maysa a banag” nga awan kenkuana? (Kitaem met ti footnote.)

⁵ Impakita ni Jesus no ania ti impalgak idin ni Amana mainaig iti napateg a saludsod maipapan iti pananggun-od iti biag nga agnanayon. Nagadaw iti Kasuratan, ket impatalged ti agtutubo a simamatalek a tinungpalna ti Mosaiko a Linteg. Ngem buyogen ti nauneg a pannakaawat, natukod ni Jesus ti adda iti kaunggan ti lalaki. (Juan 2:25) Adda nakitana a serioso a parikut daytoy nga agturay a mangapektar iti relasionna iti Dios. Gapuna, kinuna ni Jesus: “Maysa a banag ti agkurang kenka.” Ania dayta “maysa a banag”? Kinuna ni Jesus: “Inka, ilakom no ania a bambanag ti adda kenka ket itedmo kadagiti napanglaw.” (Marcos 10:21) Kayat kadi a sawen ni Jesus a masapul nga agbalin a napanglaw ti maysa a tao tapno makapagserbi iti Dios? Saan.a Adda napateg unay a banag nga ipalpalgak ni Kristo.

6. Ania ti indiaya ni Jesus, ket ti reaksion ti nabaknang ken agtutubo nga agturay impalgakna ti ania maipapan iti pusona?

⁶ Tapno maipanayag no ania ti pagkurangan daydi a lalaki, adda nagsayaat a gundaway nga indiaya kenkuana ni Jesus: “Umayka agbalinka a pasurotko.” Agasem​—mismo a ti Anak ti Kangatuan a Dios ti nangawis kenkuana nga agbalin a pasurotna! Adda pay awan kaaspingna a gunggona nga inkari kenkuana ni Jesus. Kinunana: “Maaddaankanto iti gameng idiay langit.” Ginundawayan kadi ti nabaknang ken agtutubo nga agturay daytoy nga oportunidad, daytoy a nadayag nga awis? Kuna ti salaysay: “Nagliday iti sao ket pimmanaw a sileleddaang, ta agik-ikut idi iti adu a sanikua.” (Marcos 10:21, 22) No kasta, ti di ninamnama a sasao ni Jesus impalgakna ti kasasaad ti puso daydi a lalaki. Napalalo ti panangilalana iti sanikuana ken, awan duadua, uray iti turay ken dayaw a kakuykuyog ti kinabaknangna. Nakalkaldaang ta napatpateg nga amang kenkuana dagita a banag ngem ni Kristo. Ti ngarud “maysa a banag” nga awan kenkuana isu ti naimpusuan, managsakripisio nga ayat ken Jesus ken ni Jehova. Gapu ta awanan daydi nga agtutubo a lalaki iti kasta nga ayat, pinagkedkedanna ti naisangsangayan nga awis! Ngem kasano a nairamanka?

7. Apay a masiguradotayo a karamantayo iti awis ni Jesus?

⁷ Saan laeng a daydi a lalaki ti nakaiturongan ti awis ni Jesus; saan met nga agpaay dayta iti sumagmamano laeng a tao. Kinuna ni Jesus: “No ti asinoman kayatna ti sumurot kaniak, . . . agtultuloy a surotennak.” (Lucas 9:23) Imutektekam ta maaw-awis nga agbalin a pasurot ni Kristo ti “asinoman” no talaga a “kayatna.” Ti Dios iyadanina iti Anakna dagiti kasta a tattao. (Juan 6:44) Saan laeng a dagiti nabaknang, saan laeng a dagiti napanglaw, saan laeng nga espesipiko a puli wenno nasion, ken saan laeng a dagidiay agbibiag iti daydi a panawen no di ket amin ti naipaayan iti gundaway a mangipangag iti awis ni Jesus. Isu nga iti kinapudnona, agaplikar kenka ti sasao ni Jesus nga “Umayka agbalinka a pasurotko.” Apay a rumbeng a tarigagayam ti agbalin a pasurot ni Kristo? Ken ania ti kayat a sawen ti panagbalin a pasurotna?

Apay nga Agbalinka a Pasurot ni Kristo?

8. Ania ti kasapulan ti amin a tao, ken apay?

⁸ Adda kinapudno a nasken a bigbigentayo: Kasapulantayo ti maysa a nasayaat a mangidaulo, uray no adda dagidiay mangipagarup a saantayo a kasapulan dayta. Napaltiingan ti propeta ni Jehova a ni Jeremias a mangisurat iti daytoy di agbalbaliw a kinapudno: “Pagaammok unay, O Jehova, a saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.” (Jeremias 10:23) Saan laeng a di kabaelan ti tao nga iturayan ti bagina no di pay ket awan ti kalinteganna a mangaramid iti dayta. Kinapudnona, paneknekan ti historia a dakes ti nagbanagan ti panagturay ti tao. (Eclesiastes 8:9) Dagiti panguluen idi kaaldawan ni Jesus inrurumen, ginundawayan, ken inyaw-awanda dagiti umili. Umiso unay ti panangiladawan ni Jesus iti kasasaad dagiti gagangay nga umili idi kinunana a “kaslada karkarnero nga awanan pastor.” (Marcos 6:34) Kasta met laeng ti kasasaad ita ti sangatauan. Kas grupo ken kas indibidual, kasapulantayo ti mangidaulo a mabalintay a talken ken raemen. Maikari kadi ni Jesus a mangidaulo? Usigentayo no apay a wen ti sungbat.

9. Ania ti nakaidumaan ni Jesus kadagiti amin a dadduma pay a panguluen?

⁹ Umuna, ni Jehova a Dios ti nangpili ken ni Jesus. Kaaduan a panguluen a tattao ket pinili dagiti padada met laeng nga imperpekto a tattao, a masansan a nalaka a maallilaw ken makaaramid iti di umiso a pangngeddeng. Naiduma ni Jesus kas panguluen. Ti mismo nga awag kenkuana ti mangipasimudaag iti dayta. Kas iti sao a “Mesias,” “Daydiay Napulotan” ti kayat a sawen ti sao a “Kristo.” Wen, awan sabali no di ti Soberano nga Apo iti uniberso ti nangpulot wenno nangdutok ken ni Jesus iti naisangsangayan a sagrado a saad. Maipapan iti Anakna, kinuna ni Jehova a Dios: “Adtoy! Ti adipenko a pinilik, ti dungdungnguek, nga inanamongan ti kararuak! Ikabilkonto kenkuana ti espirituk.” (Mateo 12:18) Awan ti ad-adda a makaammo ngem iti Namarsua kadatayo no ania a kita ti panguluen ti kasapulantayo. Di matukod ti sirib ni Jehova, isu nga adu ti panggapuantayo nga agtalek iti pinilina.​—Proverbio 3:5, 6.

10. Apay a ti ulidan nga impasdek ni Jesus ti kasayaatan a tuladen dagiti tattao?

¹⁰ Maikadua, nangipasdek ni Jesus iti awan pagkuranganna ken makapabileg nga ulidan para kadatayo. Ti kasayaatan a panguluen ket addaan kadagiti galad a mabalin a raemen ken tuladen dagiti iturayanna. Mangidaulo babaen ti ulidan, a gutugotenna dagiti sabsabali nga agbalin a nasaysayaat a tattao. Ania dagiti galad a raemem unay iti maysa a lider? Tured? Sirib? Asi? Ti ngay kinapinget iti laksid ti narigat a kasasaad? No adalem ti pakasaritaan ti biag ni Jesus ditoy daga, matakuatam nga adda kenkuana dagita a galad ken dadduma pay. Gapu ta isu ti naan-anay a ladawan ti nailangitan nga Amana, naan-anay nga adda kenkuana ti amin a galad ti Dios. Talaga a perpekto iti amin a wagas. Isu nga iti amin nga inaramidna, iti amin a sinaona, ken iti amin a riknana, adda masarakantayo a rumbeng a tuladen. Kuna ti Biblia a nangipaay ni Jesus iti “pagwadan tapno sisisinged a surotenyo dagiti addangna.”​—1 Pedro 2:21.

11. Kasano a pinaneknekan ni Jesus nga isu “ti nasayaat a pastor”?

¹¹ Maikatlo, naan-anay a nagbiag ni Jesus a mayannurot iti sasaona a: “Siak ti nasayaat a pastor.” (Juan 10:14) Dayta a piguratibo a pannao ket nalaka a maawatan dagiti tattao idi panawen ti Biblia. Dagiti pastor siaanep nga aywananda dagiti karnero a naitalek kadakuada. Ti kinatalged ken pagimbagan ti arbanna ti ipangpangruna ti “nasayaat a pastor,” saan ket a ti bukodna. Kas pagarigan, idi agtutubo pay ni David a kapuonan ni Jesus, maysa idi a pastor ken saan laeng a namnaminsan nga insebbana ti biagna tapno masalakniban ti karnerona iti narungsot nga atap nga animal. (1 Samuel 17:34-36) Saan laeng a kasta ti inaramid ni Jesus maipuon kadagiti tattao a pasurotna. Insakripisiona ti biagna gapu kadakuada. (Juan 10:15) Mano a panguluen ti makaaramid iti kasta a panagsakripisio?

12, 13. (a) Iti ania nga anag a ti pastor am-ammona dagiti karnerona, ken iti ania a wagas a dagiti karnero am-ammoda ti pastorda? (b) Apay a kayatmo ti agpaidalan iti Nasayaat a Pastor?

¹² Ni Jesus “ti nasayaat a pastor” iti sabali pay nga anag. Kinunana: “Am-ammok dagiti karnerok ket dagiti karnerok am-ammodak.” (Juan 10:14) Utobem dayta nga ilustrasion ni Jesus. Iti imatang ti agpalpaliiw laeng, ti maysa nga arban dagiti karnero ket mabalin a kasla laeng pangen dagiti dutdotan a parsua. Ngem ti pastor am-ammona ti tunggal maysa kadagiti karnero. Ammona no ania kadagiti kabaian ti makasapul iti saranay no agpasngay, no ania kadagiti kordero ti nasken a sakruyen ta saanda pay a makapagna unay gapu ta babassit ken nakapsutda pay, ken no ania kadagiti karnero ti nabiit pay a nagsakit wenno nadangran. Dagiti karnero am-ammoda met ti pastorda. Mailasinda ti timekna, ket pulos a saanda a mapagriruan dayta iti timek ti asinoman a sabali a pastor. Ipangagda a dagus ti pastor no ayabanna ida. Sumurotda iti sadinoman a pangituronganna kadakuada. Ken ammo ti pastor ti pangituronganna kadakuada. Ammona no sadino ti ayan ti nalangto ken nalasbang a karuotan, no sadino ti ayan ti nadalus ken nalitnaw a waig, no sadino ti natalged a pagaraban. Bayat a bambantayanna ida, natalged ti rikna dagiti karnero.​—Salmo 23.

¹³ Saan kadi a kasta a kita ti panangidaulo ti kayatmo? Awan ti kas iti Nasayaat a Pastor no iti pannakilangenna kadagiti pasurotna iti kasta a wagas. Inkarina nga idalannaka iti naragsak ken makapnek a biag ita agingga iti agnanayon! (Juan 10:10, 11; Apocalipsis 7:16, 17) Nasken ngarud nga ammuentayo no ania a talaga ti kayat a sawen ti panagbalin a pasurot ni Kristo.

No Ania ti Kayat a Sawen ti Panagbalin a Pasurot ni Kristo

14, 15. Tapno agbalin a pasurot ni Kristo, apay a saan nga umdas ti panangibilang iti bagi kas maysa a Kristiano wenno ti panagbalin a debosionado ken ni Jesus?

¹⁴ Mabalin nga ipagarup ti riniwriw a tattao ita nga inawatda ti awis ni Kristo. Kinapudnona, ibilangda ti bagida a Kristiano. Nalabit nabuniaganda iti relihion dagiti dadakkelda. Wenno saan, mabalin nga ibagbagada a debosionadoda ken ni Jesus ken inawatda kas Manangisalakanda. Ngem dayta kadi ti mamagbalin kadakuada a pasurot ni Kristo? Dayta kadi ti adda iti panunot ni Jesus idi inawisnatayo nga agbalin a pasurotna? Adu pay ti ramanen dayta.

¹⁵ Usigem ti lubong ti Kakristianuan​—dagiti nasion nga agkunkuna a pasurot ni Kristo ti kaaduan kadagiti umilida. Iyan-anninaw kadi ti Kakristianuan dagiti pannursuro ni Jesu-Kristo? Saan kadi a guranggura, panangirurumen, krimen, ken kinaawan hustisia ti masarakantayo kadagita a pagilian a kas met laeng iti amin a dadduma pay a pagilian? Kinuna naminsan daydi mararaem a Hindu a lider a ni Mohandas Gandhi: “Awanen ti sabali pay nga ammok a dakdakkel ti naaramidanna nga agpaay iti pagimbagan ti sangatauan no di laeng ni Jesus. Kinapudnona, saan a ti Kristianidad ti problema.” Innayonna: “Adda kadakayo a Kristiano ti problema. Saankayo nga agbibiag a mayannurot kadagiti sursuroyo.”

16, 17. Ania ti masansan a kurang kadagiti agkunkuna a Kristiano, ken ania ti nakaidumaan dagiti pudno a pasurot ni Kristo?

¹⁶ Kinuna ni Jesus a mailasin dagiti pudno a pasurotna saan laeng a babaen ti ibagbagada wenno ti awagda iti bagbagida no di ket kangrunaanna babaen kadagiti aramidda. Kas pagarigan, kinunana: “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit, no di ket daydiay mangar-aramid ti pagayatan ni Amak nga adda iti langlangit.” (Mateo 7:21) Apay a nagadu dagiti agkunkuna a ni Jesus ti Apoda ngem saanda nga ar-aramiden ti pagayatan ni Amana? Lagipem daydi nabaknang ken agtutubo nga agturay. Masansan a ti ‘pagkurangan’ dagiti agkunkuna a Kristiano ket isu ti naimpusuan nga ayat ken ni Jesus ken iti Daydiay nangibaon kenkuana.

¹⁷ Kasano a mapasamak ti kasta? Saan kadi a dagiti riniwriw nga agkunkuna a Kristiano ibagbagada met nga ay-ayatenda ni Kristo? Di mailibak dayta. Ngem saan laeng nga iti sao a mapaneknekan ti panagayat ken Jesus ken ni Jehova. Kinuna ni Jesus: “No ti asinoman agayat kaniak, tungpalennanto ti saok.” (Juan 14:23) Ken kas maysa a pastor, kinunana pay: “Imdengan dagiti karnerok ti timekko, ket am-ammok ida, ket surotendak.” (Juan 10:27) Wen, dagiti aramidtayo ti kangrunaan a pakakitaan no pudno met laeng nga ay-ayatentayo ni Kristo, saan ket nga iti laeng sao ken riknatayo.

18, 19. (a) Ania ti rumbeng nga epektona kadatayo ti panagsursuro maipapan ken ni Jesus? (b) Ania ti panggep daytoy a libro, ken kasano a makagunggona daytoy kadagidiay nabayagen a mangibilbilang iti bagida a pasurot ni Kristo?

¹⁸ Nupay kasta, dagiti aramidtayo iyanninawda ti adda iti kaunggantayo. Masapul a dita ti pangrugiantayo. Kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) No gumun-od ken utobentayo ti umiso a pannakaammo maipapan ken ni Jesus, maapektaran ti pusotayo. Dumakkel ti panagayattayo kenkuana ken rumayray ti tarigagaytayo a mangsurot kenkuana iti inaldaw.

¹⁹ Dayta ti panggep daytoy a libro. Nairanta daytoy, saan a tapno salaysayenna ti pakagupgopan ti biag ken ministerio ni Jesus, no di ket tapno tulongannatayo a mangtarus nga ad-adda pay no kasano ti agbalin a pasurotna.b Nadisenio daytoy a tumulong kadatayo nga agsarming iti Kasuratan ket isaludsodtayo iti bagitayo, ‘Pudno met laeng kadi a sursurotek ni Jesus?’ (Santiago 1:23-25) Nalabit a nabayagen nga imbilangmo ti bagim kas maysa a karnero nga idaldalan ti Nasayaat a Pastor. Ngem saan kadi nga adda latta dagiti mabalintayo a parang-ayen? Idagadag kadatayo ti Biblia: “Itultuloyyo a suboken no addakayo iti pammati, itultuloyyo a paneknekan no aniakayo.” (2 Corinto 13:5) Pudno a makagunggona ti panangsierto no pudno met laeng nga agpapaidalantayo iti naayat a Nasayaat a Pastortayo a ni Jesus, a dinutokan ni Jehova a mismo a mangidalan kadatayo.

20. Ania ti usigentayo iti sumaganad a kapitulo?

²⁰ Sapay koma ta ti panangadalmo iti daytoy a libro tulongannaka a mangpabileg iti ayatmo ken Jesus ken ni Jehova. Bayat nga idaldalannaka ti kasta nga ayat, masagrapmo ti natalna ken makapnek unay a biag iti daytoy daan a lubong, ken agbiagkanto iti agnanayon tapno idaydayawmo ni Jehova gapu iti panangtedna kadatayo iti Nasayaat a Pastor. Siempre, masapul a maibatay iti umiso a pundasion ti panagadaltayo iti maipapan ken Kristo. Mayanatup ngarud nga iti Kapitulo 2, usigentayo ti akem ni Jesus iti pannakaibanag ti panggep ni Jehova maipaay kadagiti parsuana.