“Umayka Agbalinka a Pasurotko”
“No ti asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan iti inaldaw-aldaw ket agtultuloy a surotennak.”—Luc. 9:23.
1, 2. (a) Ania a naayat nga awis ti ituktukon ni Jesus? (b) Kasanokayo a nagtignay iti iyaw-awis ni Jesus?
ITI maudi a paset ti ministeriona, nangasaba ni Jesus idiay Perea, maysa a rehion iti ballasiw ti Jordan, iti amianan a daya ti Judea. Immasideg ti maysa nga agtutubo a lalaki ket nagimtuod kenkuana no ania ti aramidenna tapno agtawid iti agnanayon a biag. Idi naammuan ni Jesus a ti agtutubo simamatalek nga an-annurotenna ti Mosaiko a Linteg, intukonna ti naisangsangayan nga awis. Kinunana: “Inka, ilakom no ania a bambanag ti adda kenka ket itedmo kadagiti napanglaw, ket maaddaankanto iti gameng idiay langit, ket umayka agbalinka a pasurotko.” (Mar. 10:21) Panunotenyo—maysa nga awis tapno agbalin a pasurot ni Jesus, ti bugbugtong nga Anak ti Kangatuan a Dios!
2 Nupay pinagkedkedan ti agtutubo dayta nga awis, adda dagidiay immawat. Sakbayna, kinuna ni Jesus kenni Felipe: “Agbalinka a pasurotko.” (Juan 1:43) Pinatgan ni Felipe ti awis ket nagbalin nga apostol idi agangay. Ni Jesus inawisna met ni Mateo ket inawatna dayta. (Mat. 9:9; 10:2-4) Kinapudnona, kasta met la ti iyaw-awis ni Jesus kadagiti amin nga agayat iti kinalinteg idi kinunana: “No ti asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan iti inaldaw-aldaw ket agtultuloy a surotennak.” (Luc. 9:23) No kasta, posible nga agbalin a pasurot ni Jesus ti asinoman nga agtarigagay iti dayta. Addaanka kadi iti kasta a tarigagay? Kaaduan kadatayo ti nangawat iti naayat nga awis ni Jesus, ket ituktukontayo met dayta kadagiti sabsabali iti ministeriotayo.
3. Kasanotayo a maliklikan ti summiasi manipud iti panangsurot ken Jesus?
3 Nakalkaldaang ta adda dagidiay interesado iti kinapudno ngem saanda a nagtultuloy a nagadal iti Biblia. Bimmaaw ti interesda ket simmiasida manipud iti panangsurot ken Jesus. (Heb. 2:1) Kasanotayo a maliklikan ti matnag iti kasta a silo? Makatulong no iyimtuodtayo iti bagitayo: ‘Ania a talaga ti makagapu a sinurotko ni Jesus? Ania ti kaipapanan ti panangsurot kenkuana?’ No silalagiptayo kadagiti sungbat kadagita a saludsod, bumileg ti determinasiontayo nga agtalinaed iti umiso a dana a pinilitayo. Matignaytayo met a mangparegta kadagiti sabsabali a sumurot ken Jesus.
Apay a Surotentayo ni Jesus?
4, 5. Apay a kualipikado ni Jesus nga agbalin kas panguluentayo?
4 Kinuna ni propeta Jeremias: “Pagaammok unay, O Jehova, a saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.” (Jer. 10:23) Paneknekan ti historia a pudno dagiti sasao ni Jeremias. Umad-adu dagiti pammaneknek a di kabaelan ti imperpekto a tao nga iturayan a sibaballigi ti bagina. Inawattayo ti awis a sumurot ken Jesus gapu ta naammuantayo nga isu laeng ti kualipikado a Panguluentayo. Usigenyo ti dadduma a kualipikasion ni Jesus.
5 Umuna, ni Jehova a mismo ti nangpili ken Jesus kas Mesias a Panguluen. Adda pay kadi nasaysayaat a makaammo ngem iti Namarsua kadatayo no asino ti madutokan a Panguluentayo? Maikadua, addaan ni Jesus kadagiti agkakaimbag a galad a nagsayaat a tuladentayo. (Basaen ti Isaias 11:2, 3.) Isu ket perpekto nga ulidan. (1 Ped. 2:21) Maikatlo, ipatpateg unay ni Jesus dagidiay sumurot kenkuana, kas paneknekan ti panangidatonna iti biagna agpaay kadakuada. (Basaen ti Juan 10:14, 15.) Ipakpakitana met nga isu ket naayat a pastor bayat nga iturturongnatayo iti dana a mangyeg iti naragsak a biag ita ken iti nadayag a biag nga agnanayon iti masanguanan. (Juan 10:10, 11; Apoc. 7:16, 17) Gapu iti daytoy ken iti dadduma pay a rason, masiribtayo no surotentayo ni Jesus. Ania ngarud ti ramanen ti panangsurot kenkuana?
6. Ania ti ramanen ti panangsurot ken Jesus?
6 Kas pasurot ni Kristo, saan nga umdas nga ibagatayo a Kristianotayo. Agarup dua a bilion ita ti agkunkuna a Kristianoda, ngem ‘agar-aramidda met iti kinakillo.’ (Basaen ti Mateo 7:21-23.) No interesado ti maysa nga agbalin a pasurot ni Jesus, isurotayo kenkuana a masapul nga itunos dagiti pudno a Kristiano ti intero a panagbiagda kadagiti pannursuro ken ulidan ni Jesus—ket iyaplikarda dagita iti tunggal aldaw. Kas panangyilustrar, usigentayo ti dadduma kadagiti bambanag a naadaltayo maipapan ken Jesus.
Tuladen ti Kinasirib ni Jesus
7, 8. (a) Ania ti kinasirib, ken apay a naruay ni Jesus iti dayta a galad? (b) Kasano nga impakita ni Jesus ti kinasirib, ken kasanotayo a tuladen?
7 Imparangarang ni Jesus ti adu a nagsasayaat a galad, ngem usigentayo ti uppat kadagita: ti kinasirib, kinapakumbaba, kinaregta, ken ayatna. Umuna, usigentayo ti kinasiribna—ti abilidadna a mangusar iti pannakaammo ken pannakaawat iti praktikal a pamay-an. Insurat ni apostol Pablo: “Ti siaannad a naitalimeng [ken Jesus] ket amin a gameng ti sirib ken pannakaammo.” (Col. 2:3) Nangalaan ni Jesus iti siribna? Kinunana a mismo: “Kas iti insuro kaniak ni Ama sawek dagitoy a banag.” (Juan 8:28) Naggapu ken Jehova ti siribna, isu a ditay pakasdaawan a natimbeng ti panangmatmatna.
8 Kas pagarigan, inusar ni Jesus ti natimbeng a panangmatmatna iti panangpilina iti dana a surotenna. Pinilina ti simple a panagbiag ket impamaysana dayta iti panagaramid iti pagayatan ti Dios. Nainsiriban nga inusarna ti tiempo ken pigsana a mangyadelantar kadagiti interes ti Pagarian. Matuladtayo ti ulidan ni Jesus babaen ti panangtaginayontayo iti ‘simple a mata’ ket iti kasta, ditay mapadagsenan ti bagitayo kadagiti saan a napateg a bambanag a mangibus iti pigsa ken panawentayo. (Mat. 6:22) Adu a Kristiano ti nangpasimple iti panagbiagda tapno ad-adu ti panawenda iti ministerio. Dadduma ti nagpayunir. No maysaka kadakuada, makomendaranka. Ti ‘panangsapul nga umuna iti pagarian’ ket mangyeg iti dakkel a kinaragsak ken pannakapnek.—Mat. 6:33.
Tuladen ti Kinapakumbaba ni Jesus
9, 10. Kasano nga impakita ni Jesus ti kinapakumbabana?
9 Ti kinapakumbaba ti maikadua a galad ni Jesus nga usigentayo. Masansan nga agpannakkel ti imperpekto a tao no addaan daytoy iti autoridad. Anian a naiduma ni Jesus! Nupay nagpateg ti akemna iti pannakatungpal ti panggep ni Jehova, awan a pulos ti uray bassit laeng a kinatangsit kenkuana. Maparegtatayo a mangtulad ken Jesus. Insurat ni apostol Pablo: “Pagtalinaedenyo kadakayo daytoy a kababalin iti isip nga adda met ken Kristo Jesus, a, nupay adda idi iti langa ti Dios, saanna a pinanunot ti panangagaw, kayatna a sawen, nga isu makipada koma iti Dios. Saan, no di ket inuksobanna ti bagina ket innalana ti langa ti maysa nga adipen ket nagbalin a kaas-asping ti tattao.” (Fil. 2:5-7) Ania ti kayat a sawen dayta?
10 Nupay tinagiragsak ni Jesus ti nadayag a pribilehio a makipagtaeng ken Amana idiay langit, situtulok nga “inuksobanna ti bagina.” Nayakar ti biagna iti aanakan ti maysa a birhen a Judio, sa naipasngay kalpasan ti siam a bulan kas awan gawayna a maladaga iti sangakabbalayan ti nanumo a karpintero. Dimmakkel ni Jesus iti poder ni Jose agingga iti kinatin-edyerna. Nupay isu ket perpekto, nagtultuloy a nagpasakup kadagiti imperpekto ken managbasol a nagannakna. (Luc. 2:51, 52) Anian a naisangsangayan ti kinapakumbabana!
11. Kadagiti ania a pamay-an a matuladtayo ti kinapakumbaba ni Jesus?
11 Matuladtayo ti kinapakumbaba ni Jesus no situtulok nga awatentayo dagiti annongen nga agparang a nanumo. Kas pagarigan, usigentayo ti annongen a mangikasaba iti naimbag a damag. Agparang a nanumo dayta a trabaho, nangnangruna no mangyaleng-aleng, manglais, wenno bumusor dagiti tattao. Nupay kasta, babaen ti naganetget a panangasaba, matulongantay dagiti dadduma a mangawat iti awis ni Jesus a sumurot kenkuana. Iti kasta, makatulongtayo a mangispal iti biag. (Basaen ti 2 Timoteo 4:1-5.) Sabali pay a pagarigan ti panangmantener iti Kingdom Hall. Ramanen dayta ti panangibelleng iti basura, panangdalus iti datar ken iti kasilias—nanumo amin dagita a trabaho! Kaskasdi, bigbigentayo a ti panangmantener iti Kingdom Hall—ti sentro ti nasin-aw a panagdayaw iti lugartayo—ket paset ti sagrado a panagserbitayo. Babaen ti situtulok a panangaramid kadagiti annongen nga agparang a nanumo, maipakitatayo ti kinapakumbaba ket matuladtayo ti ulidan ni Kristo.
Tuladen ti Kinaregta ni Jesus
12, 13. (a) Kasano nga impakita ni Jesus ti kinaregtana, ken ania ti nakatignayanna? (b) Ania ti mangtignay kadatayo nga agbalin a naregta iti ministerio?
12 Usigentayo ti kinaregta ni Jesus iti ministerio. Adu ti inaramid ni Jesus idi adda ditoy daga. Idi ubing pay, nalabit a nakipagtrabaho iti pannakaamana a ni Jose kas karpintero. Bayat ti ministeriona, nagaramid ni Jesus kadagiti milagro, a pakairamanan ti panangpaimbag kadagiti masakit ken panangpagungar kadagiti natay. Ngem ti kangrunaan a trabahona isu ti panangikasaba iti naimbag a damag ken panangisuro kadagiti interesado a dumngeg. (Mat. 4:23) Kas pasurotna, kasta met la ti trabahotayo. Kasanotayo a matulad ti ulidanna? Ti maysa ket babaen ti panangpatanor iti umiso a motibo a kas ken Jesus.
13 Ti panagayatna iti Dios ti kangrunaan a nangtignay ken Jesus a mangasaba ken mangisuro. Malaksid iti dayta, impateg met ni Jesus dagiti kinapudno nga insurona. Para kenkuana, di magatadan a gameng dagita a kinapudno, ken magagaran a mangiranud kadagita. Kasta met koma ti panangmatmattayo kas “manangisuro iti publiko.” Panunotenyo laengen ti dadduma kadagiti agkakapateg a kinapudno a naadaltayo manipud iti Sao ti Dios! Ammotayo ti isyu maipapan iti sapasap a kinasoberano ken no kasano a marisut dayta. Pagaammotayo ti isursuro ti Kasuratan maipapan iti kasasaad dagiti natay ken dagiti bendision iti baro a lubong ti Dios. Uray nabayagen wenno nabiit pay a naammuantayo dagita a kinapudno, saan a kimmupas ti pategda. Agtalinaedda a di magatadan a gameng. (Basaen ti Mateo 13:52.) Babaen ti naimpusuan ken narayray a panangasaba, maipakitatayo kadagiti sabsabali nga ipatpategtayo dagiti naadaltayo ken Jehova.
14. Kasanotayo a matulad ti pamay-an ni Jesus a mangisuro?
14 Imutektekanyo met no kasano a nangisuro ni Jesus. Kanayon nga intampokna ti Kasuratan kadagiti agdengdengngeg. Masansan idi nga iruanganna ti maysa a napateg a punto babaen ti panangikunana: “Adda a naisurat.” (Mat. 4:4; 21:13) Sigun kadagiti nailanad a sasaona, direkta a nagadaw wenno nangdakamat manipud iti nasurok a kagudua kadagiti libro ti Hebreo a Kasuratan. Kas ken Jesus, kanayontayo nga ibatay iti Biblia ti isursurotayo ken ikagumaantayo nga itampok ti Kasuratan agingga a mabalin. Iti kasta, matulongantayo dagiti nalinteg ti panagpuspusoda a tattao tapno makitada a ti isursurotayo ket kapanunotan ti Dios, saan a ti bukodtayo. Anian a ragsaktayo no adda makasaritatayo a mayat a mangbasa iti Biblia ken makipatang maipapan iti pateg ken kaipapanan ti Sao ti Dios! Ken aglaplapusanan ti rag-otayo no awatenna ti awis a sumurot ken Jesus.
Tuladen ti Panagayat ni Jesus Kadagiti Sabsabali
15. Ania ti naisangsangayan a galad ni Jesus, ken ania ti epektona kadatayo ti panangutob iti dayta?
15 Makaay-ayo unay ti maudi a galad ni Jesus nga usigentayo—ti panagayatna kadagiti tattao. Insurat ni apostol Pablo: “Ti ayat nga adda iti Kristo pilitennakami.” (2 Cor. 5:14) Bayat nga ut-utobentayo ti panagayat ni Jesus iti sangatauan ken kadatayo kas indibidual, matukay ti pusotayo ket magutugottayo a mangtulad iti ulidanna.
16, 17. Kadagiti ania a pamay-an nga impakita ni Jesus ti panagayatna kadagiti sabsabali?
16 Kasano nga impakita ni Jesus ti panagayatna kadagiti sabsabali? Ti situtulok a panangidatonna iti biagna agpaay iti sangatauan ti kadakkelan nga ebkas ti panagayatna. (Juan 15:13) Ngem bayat ti ministeriona, impakita met ni Jesus ti panagayatna iti dadduma pay a pamay-an. Kas pagarigan, nariknana ti panagsagaba dagiti tattao. Idi nakitana ti panagdung-aw ni Maria ken dagiti dadduma gapu iti ipapatay ni Lazaro, naibuyog ti riknana gapu iti panagladingitda. Nupay dandani idin a pagungarenna ni Lazaro, nagladingit ni Jesus nga uray la ‘nagarubos dagiti luana.’—Juan 11:32-35.
17 Idi rugrugi ti ministerio ni Jesus, immasideg kenkuana ti maysa nga agkukutel ket kinunana: “No kayatmo laeng koma, kabaelannak a dalusan.” Ania ti reaksion ni Jesus? Kuna ti salaysay: “Simnek ti asina.” Kalpasanna, nangaramid iti maysa a milagro. “Inunnatna ti imana ket sinagidna, ket kinunana kenkuana: ‘Kayatko. Madalusanka koma.’ Ket dagus a nagpukaw kenkuana ti kukutel, ket nagbalin a nadalus.” Iti sidong ti Mosaiko a Linteg, maibilang a narugit dagiti agkukutel, isu a mabalin koma a pinaimbag ni Jesus ti agkukutel uray dina sagiden. Ngem kaskasdi a sinagid ni Jesus, isu a narikna manen ti agkukutel ti apros ti padana a tao, nalabit kalpasan ti adu a tawen. Anian a nagdungngo a panangipakita iti asi!—Mar. 1:40-42.
18. Kasanotayo a maipakita ti “pannakipagmaymaysa ti rikna”?
18 Kas paspasurot ni Kristo, maidagadag nga ipakitatayo ti ayattayo babaen ti “pannakipagmaymaysa ti rikna.” (1 Ped. 3:8) Mabalin a saantayo unay a maawatan ti rikna ti maysa a kapammatian nga addaan iti nakaro a sakit wenno depresion—nangnangruna no ditay pay napasaran dagita. Kaskasdi, narikna ni Jesus ti sagsagabaen dagiti masakit uray dina pulos napasaran dayta. Kasano a matuladtayo ti kasta nga empatia? Babaen ti panagimdeng a naimbag bayat a dagiti agsagsagaba ipeksada ti riknada. Isaludsodtayo met iti bagitayo: ‘Ania ngata ti riknak no siak ti adda iti kasasaadda?’ No ammotay nga ikabilangan ti rikna ti dadduma, ad-adda a ‘makapagsaotayo iti makaliwliwa kadagiti malmaldaangan a kararua.’ (1 Tes. 5:14) Iti kasta, matuladtayo ni Jesus.
19. Ania dagiti epektona kadatayo ti ulidan ni Jesus?
19 Anian a nagsayaat dagiti maadaltayo manipud iti sasao ken ar-aramid ni Jesu-Kristo! Bayat nga umad-adu ti maad-adaltayo maipapan kenkuana, ad-adda a tarigagayantayo ti mangtulad kenkuana—ken ad-adda a kayattayo a tulongan dagiti sabsabali tapno kasta met ti aramidenda. Ngarud, pagragsakantayo koma a tuladen ti Mesianiko nga Ari—itan ken iti agnanayon!
Mailawlawagyo Kadi?
• Kasanotayo a maipakita ti kinasirib, kas inaramid ni Jesus?
• Kadagiti ania a pamay-an a maipakitatayo ti kinapakumbaba?
• Kasanotayo a maparayray ti kinaregtatayo iti ministerio?
• Kadagiti ania a pamay-an a matuladtayo ti panangipakita ni Jesus iti ayat kadagiti sabsabali?
[Kahon/Ladawan iti panid 5]
PUBLIKASION A TUMULONG KADATAYO A MANGTULAD KEN KRISTO
Bayat ti programa ti 2007 a kombension distrito, nairuar ti 192 ti panidna a libro a napauluan iti “Umayka Agbalinka a Pasurotko.” Nairanta daytoy a publikasion a tumulong kadagiti Kristiano a mangtulad ken Jesus, nangnangruna kadagiti galad ken ar-aramidna. Kalpasan ti dua a panglukat a kapitulo, mangted ti umuna a seksion iti pamalatpatan mainaig kadagiti naisangsangayan a galad ni Jesus, kas iti kinapakumbaba, kinatured, kinasirib, kinatulnog, ken kinaanusna.
Kalpasan dayta, adda met dagiti benneg a mangisalaysay kadagiti aktibidad ni Jesus kas mannursuro ken manangaskasaba iti naimbag a damag ken kadagiti dadduma a pamay-an nga impakitana ti dakkel a panagayatna. Iti intero a libro, naidatag dagiti impormasion tapno matulongan ti maysa a Kristiano a mangtulad ken Jesus.
Mangnamnamakami a daytoy a publikasion tignayennatayo a mangusig ken mangisaludsod iti bagitayo: ‘Sursurotek kadi a talaga ni Jesus? Kasano nga ad-adda a matuladko ni Jesus?’ Tulonganna met “amin dagidiay siuumiso nga agannayas iti agnanayon a biag” tapno agbalinda a pasurot ni Kristo.—Ara. 13:48.
[Ladawan iti panid 4]
Situtulok nga immay ni Jesus ditoy daga tapno mayanak kas maysa a maladaga. Ania a galad ti kalikaguman dayta?
[Ladawan iti panid 6]
Ania ti mangtignay kadatayo nga agbalin a naregta iti ministerio?