Umadanika iti Dios

“Bagkatem ti Anakmo”

2 AR-ARI 4:8-37

TI IPAPATAY ti anak ti maysa kadagiti kasaeman a pagteng a mabalin a mapadasan ti tao. Adda pannakabalin ni Jehova a Dios a mangpagungar kadagiti natay. Ammotayo a pudno dayta yantangay adda sumagmamano a tattao idi tiempo ti Biblia nga inikkanna iti pannakabalin a mangpagungar kadagiti natay. Ti maysa a pagarigan, a naisalaysay iti 2 Ar-ari 4:8-37, ket mainaig iti panangpagungar ni propeta Eliseo iti maysa a barito.

Napasamak dayta iti siudad ti Sunem. Maysa a lupes ken ti asawana ti tumultulong ken Eliseo, a regular nga ipapaayanda iti taraon ken pagdagusan. Naminsan, ti managyaman a propeta kinunana iti babai: “Iti daytoy naituding a tiempo iti sumaganad a tawen ar-arakupemton ti maysa nga anak a lalaki.” Di pulos napanunot ti Sunamita ti posibilidad a maaddaan iti anak, ngem naaddaan nga agpayso iti anak kas iti imbaga kenkuana ni Eliseo. Ngem nakalkaldaang ta apagbiit laeng ti ragsakna. Kalpasan ti sumagmamano a tawen, nakaro a nagsakit ti ulo ti ubing bayat nga adda iti taltalon isu a binagkatda nga inyawid, ket natay iti “tumeng ni inana.” (Bersikulo 16, 19, 20) Binagkat ti ina ti bangkay ti ubing sa inin-inayadna nga impaidda iti masansan a pagid-iddaan ti propeta.

Iti pammalubos ti asawana, saan a nagtaktak ti babai a nagdaliasat iti agarup 30 a kilometro tapno mapan ken Eliseo idiay Bantay Carmelo. Apaman a nagkitada, saan a nagsangit wenno nagdung-aw ti babai, ket saan met a nangipakita iti napalalo a ladingit. Gapu kadi ta nadamagna ti inaramid idi ni Elias, a sinunuan ni Eliseo, a panangpagungar iti anak ti maysa a balo? (1 Ar-ari 17:17-23) Mamati kadi ti Sunamita a kabaelan met a pagungaren ni Eliseo ti anakna? Aniaman ti makagapu, saan a nagawid ti babai agingga a saan nga immanamong ni Eliseo a sumurot kenkuana.

Idi addadan idiay Sunem, ni laeng Eliseo ti simrek iti kuarto a pamiliar unay kenkuana ket nakitana ti bangkay a naipaidda “iti sopana.” (Bersikulo 32) Mabalin a sipapasnek a nagpakpakaasi ti propeta ken Jehova. Kalpasanna, bayat ti panangarakup ni Eliseo iti bagi ti ubing, “in-inut a pimmudot ti lasag ti ubing” ket nangrugi nga agbitik manen ti pusona! Inayaban ni Eliseo ti ina ti ubing ket kinunana: “Bagkatem ti anakmo.” Dagita a sasao ti nangparagsak unay kenkuana.​—Bersikulo 34, 36.

Mangted namnama ken liwliwa dayta a pakasaritaan ti pannakapagungar ti anak ti Sunamita. Maawatan ni Jehova ti panagladingit dagiti nagannak a natayan iti anak. Maysa pay, tarigagayanna a pagungaren dagiti natay. (Job 14:14, 15) Dagiti panangpagungar nga inaramid da Eliseo ken ti dadduma pay idi panawen ti Biblia ket pagarigan laeng ti aramidento ni Jehova nga ad-adu nga amang a panangpagungar iti um-umayen a baro a lubong.a

Ti kari ti Biblia maipapan iti panagungar saanna a naan-anay a maikkat ti saem a resulta ti ipupusay ti maysa nga ing-ingungoten. Kinuna ti maysa a matalek a Kristiano a lalaki a natayan iti anak: “Makariknaakto pay latta iti saem agingga a diak maarakup manen ti anakko.” Darepdepem ti namnama a makaduamto manen dagiti pimmusay nga ipatpategmo. Nalaklakam a daeran ti saem no panunotem a mabalinmonto manen nga arakupen ida. Kayatmo kadi a maammuan ti ad-adu pay maipapan iti Dios a nangipaay iti dayta a nagpateg a namnama?

[Footnote]