Insuro ni Esdras ti Linteg ti Dios

Agarup 70 a tawenen ti napalabas sipud idi nagsubli idiay Jerusalem ti adu nga Israelita. Ngem adda latta aggigian iti nagduduma a paset ti Imperio ti Persia. Maysa kadakuada ti padi a ni Esdras, a nangisuro iti Linteg ni Jehova. Naammuan ni Esdras a saan a tungtungpalen dagiti tattao idiay Jerusalem ti Linteg, ket kayatna ida a tulongan. Imbaga kenkuana ni Artaxerxes nga ari ti Persia: ‘Pinagbalinnaka ti Dios a nalaing tapno maisurom ti Lintegna. Mapanka, ket itugotmo dagiti mayat a sumurot.’ Inummong ni Esdras ti amin a mayat nga agsubli idiay Jerusalem. Inkararagda ken Jehova nga aywananna ida iti napaut a biaheda.

Kalpasan ti uppat a bulan, nakadanondan idiay Jerusalem. Imbaga dagiti prinsipe ken Esdras: ‘Nagsukir dagiti Israelita ken Jehova ket nangasawada kadagiti babbai nga agdaydayaw kadagiti ulbod a dios.’ Ania ti inaramid ni Esdras? Iti sanguanan dagiti tattao, nagparintumeng ni Esdras ket inkararagna: ‘Jehova, nakaim-imbagka kadakami, ngem nagbasolkami kenka.’ Nagbabawi dagiti tattao, ngem agar-aramidda latta iti dakes. Nangpili ni Esdras kadagiti lallakay ken ukom a mangasikaso iti dayta. Iti simmaruno a tallo a bulan, napapanaw dagiti saan nga agdaydayaw ken Jehova.

Kalpasan ti 12 a tawen, naibangon manen dagiti pader ti Jerusalem. Isu nga inummong ni Esdras dagiti umili iti plasa tapno ibasana ti Linteg ti Dios. Idi linuktan ni Esdras ti libro, timmakder dagiti tattao. Indaydayawna ni Jehova, ket inngato dagiti umili dagiti imada a mangipakita nga umanamongda. Idi kuan, imbasa ken inlawlawag ni Esdras ti Linteg, ket dimngeg a naimbag dagiti tattao. Inaminda a nagbasolda manen ken Jehova, ket nagsangsangitda. Iti simmaruno nga aldaw, intuloy ni Esdras ti nagbasa iti Linteg. Naammuanda nga asidegen ti Piesta ti Abong-abong ket dagus a nagsaganada.

Bayat ti piesta, pito nga aldaw a nagragragsak dagiti umili ken nagyamyamanda ken Jehova iti adu nga apitda. Awan pay ti kasta a pannakaselebrar ti Piesta ti Abong-abong manipud iti tiempo ni Josue. Kalpasan ti piesta, naguummong dagiti tattao ket inkararagda: ‘Jehova, insalakannakami iti pannakaadipen, inikkannakami iti makan idi addakami iti desierto, ken intedmo daytoy nagpintas a daga. Ngem maulit-ulit a sinukirdaka. Nangibaonka kadagiti propeta a nangibaga iti masapul nga aramidenmi, ngem dikam nagtulnog. Uray no kasta, nakaan-anuska latta. Tinungpalmo ti karim ken Abraham. Ikarimi ita nga agtulnogkami kenka.’ Insuratda ti karida, sa sinelioan dagiti prinsipe, Levita, ken papadi.