MAKAAY-AYO A TIEMPO

Iti 2 Corinto 6:2, inadaw ni apostol Pablo ti sasao manipud padto iti Isaias 49:8, a kinunana: “Daytoy ti kinuna ni Jehova: ‘Iti tiempo ti naimbag a nakem sinungbatanka, ket iti aldaw ti pannakaisalakan tinulonganka; ket sinalsaluadanka tapno maitedka a kas maysa a tulag maipaay kadagiti tattao, tapno maipulang ti daga iti sigud a kasasaadna, tapno iyeg ti panangtagikua manen iti nalangalang a pagtatawidan a sansanikua.’” Daytoy a sasao ket nabatad a naisawang ken Isaias bilang pannakabagi ti nasion ti Israel. (Isa 49:3) Nalawag a dayta ket padto ti pannakaisubli. Naaddaan ngarud daytoy iti umuna a kaitungpalan idi tiempo ti pannakaluk-at ti Israel manipud Babilonia idi nayawis kadagiti balud nga Israelita, “Rummuarkayo!” Kalpasanna nagsublida iti pagtaenganda a daga ket impulangda ti sigud a kasasaad dayta nalangalang a daga.​—Isa 49:9.

Nupay kasta, gapu iti sasao a “tapno maitedka a kas maysa a tulag maipaay kadagiti tattao” iti bersikulo 8 daytoy a kapitulo ken gapu iti immuna a sasao iti bersikulo 6 a daytoy nga “adipen” ni Jehova maited ‘kadagiti nasion kas silaw, tapno ti panangisalakan ti Dios adda koma agingga iti ungto ti daga,’ sigurado a padto daytoy mainaig iti Mesias ken agaplikar ngarud ken Kristo Jesus kas “adipen” ti Dios. (Idiligyo ti Isa 42:1-4, 6, 7 iti Mt 12:18-21.) Yantangay ti “tiempo ti naimbag a nakem” ket maysa a tiempo idi ‘sungbatan’ ken ‘tulongan’ ni Jehova ti adipenna, agaplikar la ketdi dayta iti naindagaan a biag ni Jesus idi “nangidaton . . . kadagiti araraw ken kasta met kadagiti dawat iti Daydiay a makabalin a mangisalakan kenkuana iti ipapatay, buyogen dagiti napigsa nga ikkis ken lulua, ket isu naipangag buyogen ti pannakaanamong gapu iti nadiosan a butengna.” (Heb 5:7-9; idiligyo ti Jn 12:27, 28; 17:1-5; Lu 22:41-44; 23:46.) Dayta ngarud ket “aldaw ti pannakaisalakan” maipaay iti mismo nga Anak ti Dios, a bayat dayta imparangarangna ti naan-anay a kinatarnaw ket, kas nagbanaganna, “nagbalin a makinrebbeng iti agnanayon a pannakaisalakan dagidiay amin nga agtultulnog kenkuana.”​—Heb 5:9.

Kanayonanna pay, ti panagadaw ni Pablo itoy a padto ipasimudaagna nga agaplikar pay dayta kadagiti Kristiano. Indagadag ni Pablo kadagita a Kristiano a ‘saanda nga awaten ti di kaikarian a kinamanangngaasi ti Dios ket maikapisda iti panggepna,’ ket kinunana met kadakuada (kalpasan ti panangadawna iti Isa 49:8): “Adtoy! Itan ti kangrunaan a makaay-ayo a tiempo. Adtoy! Itan ti aldaw ti pannakaisalakan.” (2Co 6:1, 2) Dagitoy a Kristiano nagbalinda a naespirituan nga “Israel ti Dios” nanipud Pentecostes ti 33 K.P. nga agpatpatuloy (Ga 6:16), ngem kasapulan a paneknekanda a maikarida iti di kaikarian a kinamanangngaasi ti Dios, tapno ti “makaay-ayo a tiempo” pudno nga agbalin kadakuada kas “aldaw ti pannakaisalakan.”

Yantangay ti orihinal a nagaplikaran ti padto ket maipapan iti pannakaisubli, maikuna nga agaplikar met daytoy iti tiempo ti pannakaluk-at manipud naespirituan a pannakakautibo ken iti tiempo ti pannakaisubli iti naan-anay a pabor iti Dios.​—Idiligyo ti Sal 69:13-18.

Kadagiti nayanak a Judio a saan a nangtagipateg iti “makaay-ayo a tiempo” ken iti gundaway a makastrek iti ‘naespirituan nga Israel,’ impakaammo ni Pablo a mapan kadagiti di Judio a nasion, ket inadawna ti Isaias 49:6 kas pammasingked, a kinunana: “Iti kinapudnona, ni Jehova nangipasdek iti bilin kadakami itoy a sasao, ‘Dinutokanka a kas silaw dagiti nasion, tapno agbalinka a pakaisalakanan agingga iti ungto ti daga.’” (Ara 13:47) Yantangay ti termino a “tiempo” ken “aldaw” ipamatmatda ti limitado a panawen, ipasimudaagda ti kinaganat ken ti nainsiriban a panangaramat iti tiempo ti napaboran a kasasaad sakbay a dumteng ti panagpatinggana, nga iti dayta maisanud ti nadibinuan nga asi ken tukon a pannakaisalakan.​—Ro 13:11-13; 1Te 5:6-11; Efe 5:15-20.